1. Aha do na patuduhkon seng parholong be buei jolma sonari on?

BIBEL mangkatahon bani ari parpudi on “seng parholong” be buei jolma. (2 Tim. 3:1, 3) Tongon, sonai do na ididah hita sonari on. Umpamani, dong marjuta kaluarga na marsirang, lang marsihaholongan be suami istri. Halani ai, iahap niombahni ma lang dong be na mangkaholongi sidea. Sada penasihat perkawinan mangkatahon, “Ra do ibagas sada kaluarga, hassi pe sarumah sidea, tapi lang gati sidea marbuali. Sibuk bei do sidea markomputer, martablet, atap pe mar-game. Jadi hassi pe sarumah sidea, tapi lang marsihaholongan sidea.”

2-3. (a) Domu bani Rom 12:10, holong na sonaha do na maningon ipatuduh hita bani sanina botou? (b) Aha do na laho iulas hita bani artikel on?

² Tontu lang ra hita mangihutkon halak i dunia on na lang parholong. (Rom 12:2) Tapi sihol do hita patuduhkon holong parsaninaon bani sanina botounta. (Basa Rom 12:10.) Aha do artini ai? Maningon marusaha do hita mangkaholongi sidea songon mangkaholongi kaluarganta sandiri. Holong na sisonai do na maningon ipatuduh ganup halak Kristen. Anggo marsihaholongan hita, gabe marsada ma hita ibagas mangidangi Naibata.​—Mi. 2:12.

³ Sonari iulas hita ma contoh bani Bibel na boi mangurupi hita ase lambin mangkaholongi sanina botou.

4. Humbani Jakobus 5:11, aha ma na ibotoh hita pasal Jahowa?

⁴ Humbani Bibel, bahat do na boi ibotoh hita pasal paruhuran ni Jahowa. Umpamani, ihatahon do “Naibata ai ma haholongon”. (1 Joh. 4:8) Dobkonsi ibotoh hita ai, gabe sihol ma hita marhasoman pakon-Si. Anjaha ihatahon  Bibel do homa ‘paridop ni uhur banggal do Jahowa’. (Basa Jakobus 5:11.) Hunjai taridah ma banggal tumang do holong ni Naibata hubanta!

5. Sonaha Jahowa patuduhkon idop ni uhur-Ni, janah sonaha hita boi mangusihi Ia?

⁵ Holong ni Jahowa ai anggo itonggor hita bani Jakobus 5:11, dong do kaitanni pakon idop ni uhur-Ni. Jahowa patuduhkon idop ni uhur-Ni hubanta marhitei manasap hasalahanta. (2 Mus. 34:6) Bani Bibel anggo ihatahon dong halak na maridop ni uhur, on artini ra ia manasap hasalahan ni hasomanni. (Ps. 51:3) Tapi lang pitah ai. Anggo itonggor ia dong halak na sunsah, mintor holong do ateini mangidahsi, janah mintor ra do ia mangurupi. Ihatahon Jahowa do bani juakjuak-Ni, sihol tumang do uhur-Ni mangurupi sidea. Janah banggalan do holong-Ni marimbangkon holong ni sada inang bani niombahni. (Jes. 49:15) Jadi, halani idop uhur ni Jahowa hubanta, mintor ra do Ia mangurupi hita sanggah hita ibagas hasunsahan. (Ps. 37:39; 1 Kor. 10:13) Maningon ipatuduh hita ma homa idop ni uhur bani hasomanta, marhitei ra manalpuhon salah ni sidea. (Ep. 4:32) Anggo dong na mambahen borit uhurta, ulang ma lalab hita manggila. Anjaha anggo itonggor hita hasomanta ibagas hasunsahan, urupi hita ma sidea. Ai do cara na sipontingan hita patuduhkon idop ni uhur bani sidea. Anggo ibahen hita sonai, dos do ai itiru hita Jahowa, paridop ni uhur banggal.​—Ep. 5:1.

6. Hunja ibotoh hita orot tumang do parhasomanan ni si Jonatan pakon si Daud?

⁶ Bani Bibel dong do juakjuak ni Naibata na totap orot parhasomananni hassi pe lang sempurna sidea. Umpamani, si Jonatan pakon si Daud. Bibel mangkatahon, “Tarsangkut ma uhur ni si Jonatan bani si Daud, anjaha ihaholongi si Jonatan ma ia songon dirini sandiri.”  (1 Sam. 18:1) Anak ni Raja Saul do si Jonatan. Tapi si Daud do na ipilih Jahowa gabe raja manggantihon si Saul. Halani ai simburu tumang do si Saul mangidah si Daud, janah marusaha ma ia mamunuhsi. Tapi si Jonatan lang ra mangihutkon bapani laho mamunuh si Daud. Marjanji do si Jonatan pakon si Daud ase tongtong sidea marhasoman ampa marsiurupan.​—1 Sam. 20:42.

7. Aha do na boi manlanglangi si Jonatan marhasoman pakon si Daud?

⁷ Dear tumang do parhasomanan ni si Jonatan pakon si Daud. Anggo irimangi hita, sasintongni bahat do perbedaan ni sidea na boi mambahen sidea lang be marhasoman. Umpamani, halani 30 tahun tuanan si Jonatan, boi do nini uhurni benahaku ma marhasoman pakon na posonan. Lang dong homa pangalamanni. Tapi lang sonai pangahap ni si Jonatan. Harga tumang do si Daud ai hu bani.

8. Mase boi ihatahon si Jonatan ai hasoman na dear tumang bani si Daud?

⁸ Leganni ai, boi do si Jonatan simburu hubani si Daud. Halani si Jonatan anak ni si Saul, sasintongni ia do namin na manggantihon bapani gabe raja. (1 Sam. 20:31) Tapi halak na martoruh ni uhur do si Jonatan, janah totap do setia ia bani Jahowa. Ibotoh ia do si Daud do na ipilih Jahowa manggantihon bapani gabe raja. Halani ai, totap do setia ia bani si Daud hassi pe ibotoh ia gabe marsogam ni uhur bapani mangidahsi halani ai.​—1 Sam. 20:32-34.

9. Hunja ibotoh hita lang simburu si Jonatan bani si Daud?

⁹ Halani holong uhur ni si Jonatan bani si Daud, lang ongga simburu ia hu bani. Sasintongni, jago tumang do si Jonatan mangumbalangkon batu. Barani do ia sanggah marporang janah gati do ia monang. Bani Bibel ihatahon do anggo si Jonatan pakon si Saul bapani ai, podasan do sidea humbani “manuk-manuk nanggordaha anjaha gogohan do sidea hun bani singa”. (2 Sam. 1:22, 23) Hassi pe sonai, lang ongga si Jonatan pajuntul-juntulhon dirini. Anjaha sanggah marhasil horja ni si Daud, lang homa simburu ia. Tapi ipuji ia do si Daud halani barani janah marondos bani Jahowa. Buktini, dobkonsi italuhon si Daud si Goliat, ai ma mungkahni gabe holong uhur ni si Jonatan mangidahsi. Jadi sonaha hita boi maniru holong ni si Jonatan ai?

10. Aha do artini ‘mangkaholongi humbani gok ni uhur’?

¹⁰ Bani Bibel iparentahkon do hita ase ‘marsihaholongan humbani gok ni uhur’. (1 Ptr. 1:22) Rimangi hita ma siusihan na ibahen Jahowa. Halani banggal tumang holong ni uhur ni Naibata hubanta, lang dong na boi mambahen hita sirang humbani holong-Ni anggo totap hita setia hu Bani. (Rom 8:38, 39) Bani hata Heber, ‘mangkaholongi humbani gok ni uhur’, artini maningon marusaha do sasada halak patuduhkon holong. Tongon, sipata lang urah patuduhkon holong bani sanina botou halani ra do adong na mambahen borit uhurta. Hassi pe sonai, marusaha ma hita ‘marsianjuan ibagas uhur na holong’. (Ep. 4:1-3) Haporluhon hita ma “manramotkon hasadaon ni tonduy marhitei panrahut ni damei”. Dingat ma, lang lalab idingat-dingat  Jahowa hasalahanta. Jadi marusaha ma hita maniru Ia. Anggo ibahen hita sonai, gabe mardamei ma hita haganupan.​—1 Sam. 16:7; Ps. 130:3.

11. Mase sipata lang urah mangkaholongi sanina botou?

¹¹ Sipata lang urah hita mangkaholongi sanina botounta tarlobih sanggah itonggor hita dong salah ni sidea. Sonai ma na masa bani piga-piga sanina botou bani abad na parlobei. Umpamani, marhasoman do mulani si Oiodia ampa si Sintike. Janah ‘marporang do sidea mangkopkop ambilan na madear in’, rap pakon si Paulus. Tapi ujungni lang orot be si Oiodia pakon si Sintike, ra do halani dong parsoalan ni sidea. Halani ai ma iojur si Paulus sidea ase “marsada ni uhur ibagas Tuhan in”.​—Pil. 4:2, 3.

12. Sonaha hita boi patuduhkon holong bani sanina botou?

¹² Sonaha hita boi patuduhkon holong bani sanina botounta? Marusaha ma hita ase lambin dear mananda sidea. Anggo ibahen hita sonai, gabe iarusi hita ma paruhuran ampa situasi ni sidea. Ai ma na mambahen lambin holong uhurta mangidahsi. Sobali ai, boi do homa hita marhasoman pakon sanina botou i kuria, age pe lang saumuran atap sasuku hita pakon sidea. Dingat ma songon si Jonatan nongkan ai, hassi pe tuanan ia 30 tahun marimbangkon si Daud, tapi orot do parhasomananni pakon si Daud. Jadi boi ma ipingkirhon hita ise do halak i kuria na posonan atap pe na tuanan na boi ibahen hita gabe hasoman. Anggo ibahen hita sonai, dos do ai hita “marholong ni uhur bani ganup hasoman”.​—1 Ptr. 2:17.

13. Ai maningon orot do parhasomananta pakon ganup halak i kuria? Patorang.

¹³ Ai maningon orot do parhasomananta pakon ganup halak i kuria? Lang. Lang tarbahen hita ai. Sasintongni lang salah anggo hita orot pitah pakon piga-piga halak dassa. Somalni, urahan do hita orot pakon halak na sarupa hasomalanni ampa harosuhni pakon hita.  Jesus pe ihatahon ia do ganup apostelni ai “hasoman”. Tapi pitah si Johannes dassa hasoman na hinaholonganni. (Joh. 13:23; 15:15; 20:2) Hassi pe sonai lang pilih kasih Jesus. Umpamani, ongga do ipangindo si Johannes ampa si Jakobus bani Jesus ase boi sidea hundul bani siamun atap sambilou ni Jesus sanggah ia mamarentah. Tapi ihatahon Jesus do bani sidea, “Na mambahen hundul i siamunku atap i sambilouku, seng saguru bangku ai”. (Mrk. 10:35-40) Jadi songon Jesus ulang ma hita pilih kasih hubani sanina botou. (Jak. 2:3, 4) Anggo pilih kasih hita, boi do ai mambahen gabe marposah kuria.​—Jud. 17-19.

14. Domu bani Pilippi 2:3, aha do na boi mangurupi hita ase ulang simburu bani hasoman i kuria?

¹⁴ Anggo ganup hita marsihaholongan, gabe marsada ma kuria. Dingat ma songon si Jonatan, lang simburu ia bani si Daud halani si Daud na ipilih gabe raja. Jadi tiru hita ma ia, ulang ma hita simburu bani sanina botou halani marhasil sidea. Tapi ‘hira hita ma sidea lobihan marimbangkon dirinta sandiri’. (Basa Pilippi 2:3.) Dingat ma ganup do hita i kuria dong bei do halobihanni. Janah ganup do hita boi marsiurupan laho mambahen kuria gabe marsada. Halani ai, marusaha ma hita ase totap martoruh ni uhur. Pindahi hita ma aha na dear humbani hasomanta. Janah ra ma hita marlajar humbani sidea.​—1 Kor. 12:21-25.

15. Aha ma na boi iparlajari hita humbani si Tania pakon kaluargani?

¹⁵ Anggo sompong roh masalah atap sitaronon, igunahon Jahowa do sanina  botou laho mangurupi hita. Pardiateihon hita ma pangalaman ni si Tania ampa kaluargani i Amerika Serikat dobkonsi mulak sidea ari Sabtu, hun Kebaktian Internasional 2019, “Kasih Tidak Akan Berakhir! Dong tolu niombah ni si Tania. Nini si Tania ma, “Sanggah hanami i pardalanan laho mulak hu hotel, dong ma na manabrak motornami. Halani ai, tarsonggot tumang ma hanami janah hitir-hitir. Kaluar ma hanami hun motor, janah jongjong ma hanami i dalan. Dong sada sanina na baru mulak homa hun kebaktian ai, soh ma ia dobkonsi itonggor ia hanami. Dob ai, roh ma use lima sanina botou delegasi hun Swedia. Idahop botou ai ma ahu pakon borungku. Gabe tenang ma pangahapnami. Huhatahon ma bani sidea lang pala mahua anggo mulak sidea. Tapi totap do ihasomani sidea hanami ronsi roh petugas ni rumah sakit. Ibere sidea do ganup na ihaporluhon hanami. Huahapkon ma holong tumang do Jahowa bannami. Hunjai gabe lambin holong ma uhurhu bani sanina botou, tarlobih ma bani Jahowa.” Ai idingat ham do sadihari do sanina botou ongga mangurupi ham?

16. Aha ma hasilni anggo totap hita marsihaholongan?

¹⁶ Aha ma hasilni anggo totap hita marsihaholongan? Gabe boi ma hita mangapoh sanina botounta na ibagas hasunsahan. Janah lambin marsada ma homa kuria. Anjaha gabe taridah ma anggo hita tongon-tongon do susian ni Jesus, janah boi do homa ai mambahen halak gabe tarojur uhurni laho mangidangi Naibata. Na sipontingan, parohkon hasangapon do ai bani Jahowa “Bapa paridop ni uhur ampa Naibata sipangapoh in”. (2 Kor. 1:3) Halani ai, marusaha ma hita ganup ase lambin marsihaholongan!