1. Songon si Daud, aha do ra na isungkun hita?

GANUP do hita sihol ase damei goluhta. Anggo boi namin, ulang ma adong na mambahen gobir atap holsohan hita. Tapi sipata, dong do na mambahen holsohan hita. Halani ai do ra ase adong piga-piga juakjuak ni Naibata na sarupa pangahapni pakon Raja Daud. Nini do, “Sadiha dokah nari sai tong marpingkir uhurhu, sai sunsah uhurhu ibagas [sadari manipat]?”​—Ps. 13:3.

2. Aha ma na laho iulas hita bani artikel on?

² Hassi pe sonai, dong do na boi ibahen hita ase ulang lalab holsohan. Bani artikel on, iulas hita ma aha do ra na mambahen hita holsohan. Dob ai iulas hita ma onom cara na mangurupi hita ase totap damei ibagas pingkiran hassi pe dong na mambahen sunsah pangahapta.

3. Aha do ra na mambahen hita holsohan, janah boi do tarpasoh hita ai?

³ Bahat do na mambahen hita holsohan, janah sipata ra do lang tarpasoh hita ai. Umpamani, tiap tahun lalab do naik arga ni sipanganon, pakeian, ampa sewa ni rumah. Anjaha sai adong do hasoman i parhorjaan atap pe i parsikolahan na mangarahkon hita ase marladung atap mangkorjahon na butak. Leganni ai, bahat do homa hajahaton na masa i iananta tading. Ganupan ai masa halani bahat halak lang ra mangihutkon prinsip ni Bibel. Sobali ai, Sibolis do homa na markuasa i dunia on, janah ibotoh ia do anggo holsoh-holsoh ni dunia on boi mambahen  halak lang ra mangidangi Jahowa. (Mat. 13:22; 1 Joh. 5:19) Jadi situasini dunia on do na mambahen bahat halak gabe holsohan.

4. Aha do na masa anggo lalab holsohan hita?

⁴ Anggo lalab holsohan hita, ai do na mambahen hita gobir. Umpamani ra do gobir hita, ai sungkup do holi duitta laho mamboli haporluanta? Atap sonaha ma holi anggo boritan hita, ai ipecat do holi hita hun parhorjaan? Leganni ai, anggo dong na mangarahkon hita mangkorjahon na lang dear, ra do gabe haru uhurta, boi do holi hita manulak ai? Lang piga dokah nari iparburu Sibolis ma juakjuak ni Naibata. Ra do halani ai gabe haru uhurta sonaha ma holi bahenonta anggo masa ai. Halani ganupan ai, ra do gabe sungkun-sungkun ibagas uhurta, ‘Ai salah do anggo hupingkiri ai?’

5. Aha do maksud ni Jesus sanggah ihatahon ia, “Ulang ma holsohan hanima”?

⁵ Ongga do ihatahon Jesus bani susianni, “Ulang ma holsohan hanima.” (Mat. 6:25) Aha do maksud ni Jesus sanggah mangkatahon ai? Sedo maksudni lang boi hita holsohan. Hinan, adong do juakjuak ni Naibata na holsohan. Tapi totap do iharosuhkon Jahowa ia. * (1 Raj. 19:4; Ps. 6:4) Sasintongni na laho mangapoh hita do ase ihatahon Jesus sonai. Sihol do ia ase ulang lalab holsohan hita. Gabe boi ma hita totap ringgas mangidangi Jahowa. Jadi aha ma na boi ibahen hita ase ulang lalab holsohan?​—Tonggor ma kotak “ Sonaha Carani?”

6. Domu bani Pilippi 4:6, 7, aha ma na boi mangurupi hita sanggah holsohan?

⁶ (1) Gati martonggo. Sanggah dong parsoalan na mambahen holsohan hita, martonggo ma bani Jahowa. (1 Ptr. 5:7) Ibalosi Ia do tonggonta janah ibere do damei na mangatasi haganup paruhuran. (Basa Pilippi 4:6, 7.) Marhitei tonduy na pansing, iurupi Jahowa do hita ase totap damei pangahapta.​—Gal. 5:22.

7. Sanggah martonggo bani Jahowa, aha ma na porlu idingat hita?

⁷ Sanggah martonggo ham, patugah ma ganup na ibagas uhurmu hubani Jahowa. Saritahon ma aha do masalahmu janah sonaha pangahapmu halani ai. Anggo iahap ham boi do ipasalosei ham masalah ai, pindo ma hapentaran ase ibotoh ham aha do na porlu bahenonmu. Janah pindo ma homa hagogohan laho mangkorjahon ai. Tapi anggo iahap ham lang tarpasalosei ham masalah ai, pindo ma pangurupion-Ni ase lang lalab ai na ipingkiri ham. Anggo sonai ham martonggo, holi boi ma ididah ham sonaha Jahowa mambalosi tonggomu ai. Tapi porini lape ibalosi Jahowa tonggomu bani panorang ai, ulang ma marnaloja ham martonggo. Sihol do Ia ase totap itonggohon ham masalahmu ai.​—Luk. 11:8-10.

8. Sanggah holsohan hita, aha ope na boi itonggohon hita?

⁸ Sanggah ipatugah ham holsoh ni uhurmu hubani Jahowa, ulang lupa martarima kasih hu Bani. Dingat ma homa pasu-pasu na iahapkon ham hassi pe dong sitarononmu. Tapi, aha ma na laho bahenonmu porini lang tarhatahon ham  sonaha pangahapmu? Dingat ma ibalosi Jahowa do tonggomu hassi pe pitah on dassa na boi ihatahon ham, ‘Urupi ham ahu Bapa!’​—2 Kron. 18:31; Rom 8:26.

9. Aha ma na maningon ibahen hita ase lang mabiar?

⁹ (2) Marondos ma hubani Jahowa, ulang bani dirimu sandiri. Bani abad na paualuhkon laho iserang halak Assur ma halak Juda. Halani ai gabe mabiar ma sidea. Jadi ase ulang italuhon tentara Assur sidea, ipindo sidea ma pangurupion hu Masir. (Jes. 30:1, 2) Tapi ihatahon Jahowa ma lambin parah do situasini anggo sonai ibahen sidea. (Jes. 30:7, 12, 13) Halani ai marhitei nabi Jesaya ipasingat Jahowa ma halak Juda ase marondos hu Bani. Nini Jahowa ma, ‘Soh pakon marhatengeran ni uhur ma ase margogoh hanima.’​—Jes. 30:15b.

10. Bani situasi na sonaha do hita porlu marondos bani Jahowa?

¹⁰ Sonaha hita patuduhkon anggo hita marondos atap porsaya hubani Jahowa? Bayangkon ma piga-piga contoh. Umpamani, dong na laho mambere horja bamu janah bahat gajini, tapi maningon gati ma ham lembur. Halani ai gabe hurang ma panorangmu laho mangidangi Jahowa. Atap, dong hasoman i parhorjaan na marosuh bamu, tapi lang Saksi Jahowa ia. Atap dong kaluarga na mamaksa ham mambahen haputusan. Nini ma, ‘Pilih, ahu do atap ugamamu?’ Ra do lang urah iahap ham mambahen haputusan sanggah sonai situasini. Hassi pe sonai tongtong do iurupi Jahowa ham marhitei Bibel. (Mat. 6:33; 10:37; 1 Kor. 7:39) Ai ra do ham mangihutkon prinsip ni Bibel laho mambahen haputusan na madear?

11. Contoh-contoh na ija do na dong bani Bibel na mangurupi hita totap damei hassi pe dong tantangan?

¹¹ (3) Marlajar ma humbani contoh-contoh na dong ibagas Bibel. Bahat tumang do contoh-contoh bani Bibel na patuduhkon juakjuak ni Naibata na marondos hu Bani. Halani ai gabe totap ma damei pingkiran ni sidea. Anggo irimangi hita contoh-contoh ai, gabe ibotoh hita ma aha do na mangurupi sidea boi totap damei hassi pe dong tantangan. Umpamani, sanggah ilarang Sanhedrin ganup apostel marbarita, lang mabiar sidea. Pangkar do sidea mangkatahon sonon, “Maningon balosan do diri bani Naibata ase bani jolma!” (Lah. 5:29) Hassi pe domma ilonsingi, totap do sidea ringgas mambaritahon ambilan na madear. Mase? Halani sidea mambotoh ihasomani Jahowa do sidea janah marosuh do Ia mangidah sidea. (Lah. 5:40-42) Sonai homa sanggah si Stepanus laho ibunuh, totap do damei uhurni. “Songon bohi ni malekat” do bohini ididah munsuhni. (Lah. 6:12-15) Mase? Halani pos uhurni iharosuhkon Jahowa do ia.

12. Domu bani 1 Petrus 3:14 pakon 4:14, mase martuah hita anggo iparburu?

¹² Dong ope bukti na legan na patuduhkon ihasomani Jahowa do ganup apostel. Ibere do kuasa bani sidea ase boi sidea mambahen halongangan. (Lah 5:12-16; 6:8) Tapi lang boi be ibahen hita sonai sonari on. Hassi pe sonai, pos ma uhurta ihaholongi Jahowa do hita. (Basa 1 Petrus 3:14; 4:14.) Bani Bibel ihatahon sai urupan-Ni do hita marhitei tonduy-Ni, anggo ra hita manaron hasosakan halani hapintoran. Jadi ulang pala  haru uhurta mamingkiri aha do na laho bahenonta anggo iparburu hita bani ari na laho roh. Tapi humbani sonari, marusaha ma hita patoguhkon haporsayaonta bani Jahowa, ase pos uhurta paluahon-Ni do holi hita. Songon na ibahen apostel bani abad na parlobei, porsaya ma hita bani janji ni Jesus on, “Ahu do mamberehon bannima kuasa marsahap ampa hapentaron, na so boi imbangon atap jabapon ni munsuhnima.” Nini Jesus use, “Marhitei hasabaron do maluah hosahnima.” (Luk. 21:12-19) Pos ma uhurta sai idingat Jahowa do hita hassi pe matei hita halani setia hu Bani. Tontu papuhoon-Ni ma hita bani ari simagira.

13. Aha ma gunani anggo iparlajari ham pangalaman ni halak na lang totap marpangunsandeian bani Jahowa?

¹³ Adong do homa isurat bani Bibel pasal halak na lang totap marpangunsandeian bani Jahowa. Umpamani, Raja Asa hun Juda. Marpangunsandeian do ia bani Jahowa sanggah roh buei tentara laho mamorangi sidea. Halani ai monang ma sidea ibahen Jahowa. (2 Kron. 14:9-12) Tapi sanggah roh Raja Baesa hun Israel laho mamorangisi, hape otik do tentarani, lang be marpangunsandeian si Asa hubani Jahowa. Ibere do omas pakon pirak hubani Raja Aram ase iurupi sidea. (2 Kron. 16:1-3) Janah sanggah laho matei ia halani parah tumang naboritni, totap do lang marpangunsandeian ia hubani Jahowa.​—2 Kron. 16:12.

14. Aha ma na boi iparlajari hita humbani pangalaman ni si Asa?

¹⁴ Mungkahni, marpangunsandeian bani Jahowa do si Asa sanggah dong masalahni. Tapi ujungni lang sonai be ibahen ia. Sanggah ipindo si Asa pangurupion humbani Raja Aram, mulani dear do hasilni. Tapi tongkin dassa iahapkon sidea hadameion. Isuruh Jahowa ma sahalak nabi manjumpahi si Asa. Nini do, “Halani marpangunsandeian ham hubani raja Aram, seng marpangunsandeian ham hubani Jahowa, Naibatamu, maluah ma bala ni raja Aram hun tanganmu.” (2 Kron. 16:7) Halani ai sanggah dong masalahta, jaga ma hita ase ulang marusaha hita pasaloseihon ai mangihutkon pingkiranta. Tapi marusaha ma mangindahi aha do harosuh ni Jahowa. Porini pe maningon podas hita mambahen haputusan, marondos ma bani Jahowa ase marhasil hita.

15. Aha ma na porlu ibahen hita sanggah mambasa Bibel?

¹⁵ (4) Dingat ma ayat-ayat ni Bibel. Anggo dong ayat-ayat ni Bibel na boi patoguhkon haporsayaonta hubani Jahowa, dingat ma ai. Ase lambin urah hita mardingat ayat sisonai, marsora ma sanggah mambasa Bibel. Suratkon ma ai, janah gati ma basa. Hinan, iparentahkon Jahowa do si Josua ase marsora sanggah mambasa buku titah. Hasilni, gabe maruhur ma ia. Anggo iramotkon si Josua Titah ni Jahowa, gabe marhasil ma ia mambobahon juakjuak ni Jahowa. (Jos. 1:8, 9) Sonari on pe bahat do situasi na boi mambahen gobir atap holsohan hita. Tapi marhitei ayat-ayat ni Bibel, iurupi Jahowa do hita ase totap damei pangahapta.​—Ps. 27:1-3; Pod. 3:25, 26.

16. Sonaha hasoman sahaporsayaon boi mangurupi hita ase totap damei janah lang be holsohan?

¹⁶ (5) Marsaor ma pakon hasoman sahaporsayaon. Marhitei hasoman sahaporsayaon iurupi Jahowa do hita ase  totap damei janah marondos hu Bani. Sanggah martumpu hita bahat do parlajaran na boi dapot hita humbani ambilan, komentar ni hasoman, ampa sanggah marbuali hita pakon sanina botou i kuria. (Heb. 10:24, 25) Anggo ra hita mansaritahon pangahapta bani sidea, gabe ipatoguh do homa uhurta. “Parsahap na basar” humbani hasoman, boi mangurupi hita totap damei janah lang be holsohan.​—Pod. 12:25.

17. Domu bani Heber 6:19, mase pangarapan ai boi mangurupi hita sanggah ibagas hasosakan?

¹⁷ (6) Dingat ma pangarapanta. Songon “sauh” atap jangkar ni kapal do pangarapanta ai. (Basa Heber 6:19.) Boi do ai mangurupi hita totap damei hassi pe bahat holsoh ni uhurta. Dingat ma janji ni Jahowa. Bani ari simagira lang be idingat hita aha pe na mambahen pusok uhurta. Bayangkon ma anggo hita dong i dunia na baru. (Jes. 65:17) Ijai lang dong be holi na mambahen hita holsohan. (Mi. 4:4) Ase lambin porsaya hita bani pangarapan ai, saritahon ma ai hubani na legan. Marusaha ma humbani tuk ni gogohmu laho marbarita ampa mangurupi halak gabe susian ni Jesus. Anggo ibahen hita sonai, gabe boi ma hita “marsijoloman botul bani pangarapan in ronsi ujungni”.​—Heb. 6:11.

18. Tantangan aha ma na laho masa hubanta, janah aha ma na boi mangurupi hita?

¹⁸ Halani lambin dohor ajal ni dunia on, bahat do masalah na boi mambahen hita holsohan. Ayat tahunan 2021 boi mangurupi hita ase totap damei janah marpangunsandeian hubani Jahowa, sedo bani dirinta sandiri. Halani ai, marhitei pambahenanta, tongtong ma patuduh anggo hita porsaya bani janji ni Jahowa on, ‘Margogoh do hanima marhitei na soh pakon marhatengeran.’​—Jes. 30:15.