1-2. (a) Domu bani Mateus 28:18-20, tugas na ponting aha do na maningon idalankon ganup kuria Kristen? (b) Sungkun-sungkun aha ma na laho iulas hita bani artikel on?

DOBKONSI Jesus ipapuho, isuruh ia ma ase susianni tumpu hu sada dolog i Galilea. Tontu malas tumang ma uhur ni susianni manangar ai. (Mat. 28:16) Ra, ijai ma Jesus ‘pataridahkon dirini sahali bani lobih lima ratus sanina’. (1 Kor. 15:6) Mase ma isuruh Jesus susianni tumpu ijai? Ia sihol mambere parentah on, “Laho ma hanima, podahi hanima ma sagala bangsa, ase gabe susianku sidea.”​—Basa Mateus 28:18-20.

² Ganup susian na manangar hata ni Jesus ai ujungni isobut gabe kuria Kristen bani abad na parlobei. Tugas ni kuria ai ma mambahen halak gabe susian ni Jesus. * Sonari, dong lobih saratus ribu kuria Kristen i sab dunia on. Anjaha dos do homa tugas ni sidea pakon kuria Kristen bani abad na parlobei. Bani artikel on, dong ompat sungkun-sungkun na laho iulas hita: Mase ponting tumang mambahen halak gabe susian ni Jesus? Aha na porlu ibahen hita laho mangkorjahon ai? Ai boi do hita marsiurupan laho mandalankon tugas ai? Anjaha mase maningon sabar hita sanggah mangurupi halak gabe susian ni Jesus?

3. Domu bani Johannes 14:6 pakon bindu 17:3, mase ponting mambahen halak gabe susian ni Jesus?

³ Mase ponting mambahen halak gabe susian ni Jesus? Halani pitah susian ni Jesus do na boi marhasoman  pakon Naibata. Leganni ai, lambin martuah do hagoluhan ni halak na mangirikkon Kristus. Janah boi ma sidea marpangarapan laho manggoluh sadokah ni dokahni i tanoh on. (Basa Johannes 14:6; 17:3.) Hassi pe ponting tugas na ibere Jesus ai, tapi lang marhitei gogohta sandiri hita mangkorjahon ai. Apostel Paulus mangkatahon anggo ia pakon hasomanni na legan isobut do ‘hasoman sahorja ni Naibata’. (1 Kor. 3:9) Tontu hasangapon na banggal do on halani ra Jahowa pakon Jesus mambere tugas on hubanta, jolma na lang gokan dear.

4. Aha ma na boi iparlajari hita humbani pangalaman ni si Ivan pakon si Matilde?

⁴ Parohkon malas ni uhur do anggo hita mangurupi halak gabe susian ni Jesus. On ma na iahapkon si Ivan pakon istrini, si Matilde i Kolombia. Marbarita ma sidea hubani sada dalahi na margoran si Davier. Nini si Davier, “Sihol do namin ahu mubah, tapi lang tarbahen ahu.” Partenju do ia, mamakei narkoba, partenggen, anjaha tading sarumah pakon si Erika, haletni. Nini si Ivan, “Ipungkah hanami ma marlajar Bibel pakonsi. Maningon marjam-jam ma hanami marlereng hu rumahni halani daohni. Marhubang homa dalanni. Dobkonsi ididah si Erika dong parubahan na ibahen si Davier, gabe dihut ma ia marlajar Bibel.” Ujungni, soh ma si Davier marnarkoba, lang be ia tenggen ampa martenju. Isahkon ma parhajabuanni pakon si Erika. Nini si Matilde, “Sanggah si Davier pakon si Erika ididi bani tahun 2016, idingat hanami ma na ongga ihatahon si Davier ai, ‘Sihol do namin ahu mubah, tapi lang tarbahen ahu.’ Gabe tariluh ma hanami halani malas ni uhurnami.” Tangkas ma iahapkon hita do malas ni uhur anggo ra mangurupi halak gabe susian ni Jesus.

5. Ase boi mangurupi halak gabe susian ni Jesus, aha do lobei na porlu ibahen hita?

⁵ Laho mambahen halak gabe susian, maningon “ipindahi” hita do lobei ise na ra mananda Jahowa. (Mat. 10:11) Anggo ra hita patugahkon pasal Jahowa hubani ganup halak na ijumpahi hita, on patuduhkon tongon-tongon do hita Saksi Jahowa. Anjaha anggo idalankon hita parentah ni Jesus laho marbarita, taridah ma anggo hita tongon-tongon halak Kristen.

6. Ase boi marhasil sanggah marbarita, aha ma na porlu ibahen hita?

⁶ Dong do piga-piga halak na mintor ra marlajar Bibel. Tapi dong na lang sonai. Ra, maningon iojur do lobei sidea ase ra marlajar Bibel. Jadi ase marhasil sanggah mangidangi, maningon ibahen hita ma persiapan na dear. Pingkirhon ma topik aha do hira-hira na iharosuhkon halak i iananta marbarita. Dob ai, pingkirhon ma hata pamungkah aha do na ipakei hita laho padaskon topik ai.

7. Sonaha hita boi mamungkah parsahapan pakon sasada halak, janah mase porlu dear hita manangihon sidea?

⁷ Umpamani, boi do ihatahon hita bani simada rumah, “Ganup hita dong bei do sitarononni. Sonai homa ganup halak i sab tanoh on. Anggo iahap ham, ai dong do pamarentahan na boi pasaloseihon ganup parsoalan i dunia on?” Dob ai ulas ma Daniel 2:44. Atap boi do homa ihatahon ham sonon, “Pandapot ni ham, sonaha do cara na sidearan  laho mangajari niombah ase dear parlahouni?” Dob ai ulas ma 5 Musa 6:6, 7. Jadi pasosok ma topik na ipilih hita domu bani situasi ni halak. Pikkirhon ma aha do gunani na idapot sidea anggo ra marlajar Bibel. Sanggah sidea marsahap, dear ma tangihon. Anjaha porini lepak pandapot ni sidea, ulang ma mintor isalahkon ham sidea. Jadi anggo marusaha hita mangarusi situasi ni sidea, lambin marosuh ma sidea manangar baritanta.

8. Mase maningon gati hita manrohi use?

⁸ Paima ra sasada halak marlajar Bibel, ra do maningon piga-piga hali hita hu rumahni. Mase? Halani sanggah parlobei sahali hita manrohi use, ra lang dong sidea i rumah. Dong homa halak na ra marlajar Bibel dobkonsi tongon-tongon mananda hita. Usih songon suan-suanan do ai. Ase boi tubuh, maningon taratur ma ai isiram. Sonai homa halak, ase lambin banggal holongni hubani Jahowa pakon Jesus Kristus, maningon taratur ma hita mangulas pasal Bibel pakon sidea.

9-10. Mase boi ihatahon marsiurupan do hita laho mangurupi halak gabe susian ni Jesus?

⁹ Sasintongni, marsiurupan do ganup halak Kristen sanggah mangindahi halak na ra mambotoh hasintongan. On boi isarupahon songon mangindahi sada dakdanak na magou atap kahou. Mase boi sonai? Bani sada huta, dong ma sada dakdanak na marumur tolu tahun magou. Jadi iarahkon ma hira-hira 500 halak laho mangindahisi. Dobkonsi 20 jam sidea mangindahi, dong ma sada halak na mandapot dakdanak ai i juma. Sanggah bahat halak mamujisi, lang ra ia. Nini do, “Dakdanak ai boi dapot halani dong marratus halak na dihut mangindahisi.”

 ¹⁰ Songon dakdanak ai, bahat do halak i dunia on na kahou janah lang marpangarapan. Tapi sihol do namin sidea iurupi. (Ep. 2:12) Dong hira-hira ualuh juta Saksi Jahowa i sab dunia on na dihut mangindahi halak sisonai. Ra do lang dong dapot nasiam halak na sihol marlajar Bibel. Tapi adong parbarita na legan na jumpah pakon halak na sihol mambotoh hasintongan janah ra marlajar Bibel. Jadi anggo adong sanina botou na jumpah pakon sasada halak na sihol gabe susian ni Jesus, tontu marmalas ni uhur ma ganup sanina botou na dihut bani horja ai.

11. Anggo lape adong parlajar Bibelmu, aha do cara na legan laho mangurupi halak gabe susian ni Jesus?

¹¹ Hassi pe lape adong parlajar Bibelta, tapi dong do cara na legan laho mangurupi halak gabe susian ni Jesus. Umpamani, basar ma hita mangalo-alo halak na roh hu Balei Harajaon. Hasilni, gabe porsaya ma sidea holong do na gabe tanda ni halak Kristen. (Joh. 13:34, 35) Sanggah martumpu, anggo hita mambere komentar na dear, ra do gabe ibotoh sidea sonaha cara na dear laho patorangkon haporsayaonni. Boi do homa iurupi hita parbarita na baru ope, sonaha patorangkon ayat ni Bibel sanggah marbarita. Anggo ibahen hita sonai, domma iajari hita sidea sonaha maniru Jesus.​—Luk. 10:25-28.

12. Ai maningon pandei do hita ase boi mangajari halak gabe susian ni Jesus? Patorang ma.

¹² Ulang ma iagan hita maningon pandei do lobei hita ase boi mangajari halak gabe susian ni Jesus. Pardiateihon ma contoh humbani si Faustina na tading i Bolivia. Sanggah pajumpah ia pakon Saksi Jahowa, lape ibotoh ia mambasa. Tapi dobkonsi ai marlajar mambasa ma ia janah domma boi otik-otik ia mambasa. Sonari domma ididi ia anjaha marosuh tumang ia mangurupi halak laho marlajar Bibel. Tiap minggu dong lima halak na iurupi ia marlajar Bibel. Hassi pe lang sai lancar ia mambasa, tapi ujungni dong onom halak na iurupi ia ronsi ididi.​—Luk. 10:21.

13. Hassi pe sibuk, pasu-pasu aha ma na boi idapot hita halani mangurupi halak gabe susian ni Jesus?

¹³ Sonari, buei do sanina botou na sibuk halani bahat tanggung jawabni. Hassi pe sonai, ipasirsir sidea do panorangni laho mangurupi halak marlajar Bibel. Janah bahat do pasu-pasu na idapot halani ai. Pardiateihon ma pangalaman ni si Melanie na tading i Alaska. Sahalaksi do pagodangkon boruni na marumur ualuh tahun. Maningon iurus  ia do homa bapani na hona kanker. Pitah ia do Saksi Jahowa i hutani. Hassi pe sonai, sihol tumang do ia pajumpah pakon halak na ra marlajar Bibel. Jadi martonggo ma ia bani Jahowa ase ipargogohi ia marbarita sanggah borgoh ari. Ujungni, pajumpah ma ia pakon si Sara. Malas tumang do uhurni si Sara dobkonsi mambotoh dong do hape goran ni Naibata. Dob piga-piga dokah, marlajar Bibel ma ia. Nini si Melanie, “Bani sada borngin, loja tumang do huahap. Tapi bahat do pasu-pasu na hudapot halani totap do ahu pakon boruku roh hu rumah ni si Sara laho marlajar Bibel pakonsi. Sodap tumang huahap halani boi mambalosi sungkun-sungkunni. Anjaha malas tumang uhurnami halani ia sihol gabe hasoman ni Jahowa.” Hasilni, totap do si Sara martahan hassi pe bahat tantanganni. Kaluar ma ia hun gareja, janah ujungni ididi ma ia.

14. (a) Mase mambahen halak gabe susian ai usih songon manjala dengke? (b) Sonaha ma pangahapmu dob mambasa 2 Timoteus 4:1, 2?

¹⁴ Anggo lape jumpah ham pakon halak na ra marlajar Bibel, torus ma pindahi. Jesus mangkatahon usih songon halak na manjala dengke do ai. Ra, maningon marjam-jam do ia paimahon ase mandapot dengke. Gati do homa ia laho bani borngin ni ari atap girah sogod laho manjala dengke. Sipata, maningon laho do ia hu tongah-tongah ni laut. (Luk. 5:5) Sonai ma na ibahen piga-piga hasomanta sanggah sidea mangindahi halak na sihol marlajar Bibel. Hassi pe marjam-jam, totap do sidea “sabar  mangindahi” anjaha laho homa hu ianan na legan. Mase? Ase lambin bahat halak na boi ijumpahi. Anggo ringgas hita mangindahi, boi ma hita pajumpah pakon halak na rosuh manangar baritanta. Halani ai, dear ma anggo ipingkirhon hita attigan janah ija do ianan na sosok ase boi hita jumpah pakon buei halak.​—Basa 2 Timoteus 4:1, 2.

15. Mase maningon sabar hita sanggah mangurupi halak marlajar Bibel?

¹⁵ Mase maningon sabar hita sanggah mangurupi halak marlajar Bibel? Porlu do iurupi hita halak ase porsaya bani Bibel. Tapi sobali ai, maningon iurupi hita do homa sidea ase mananda janah mangkaholongi Jahowa. Ambahni ai, hassi pe domma ibotoh sidea aha na iajarhon Jesus, porlu do homa iurupi hita sidea ase mambotoh sonaha maniru Jesus ibagas goluhni. Sipata dong do halak na mambahen hamubahon dob piga-piga bulan marlajar. Tapi dong do homa na dokah mambahen hamubahon. Jadi maningon sabar ma hita mangurupi sidea laho mandalankon prinsip ni Bibel.

16. Aha ma na boi iparlajari hita humbani pangalaman ni si Raúl?

¹⁶ Dong sada pangalaman humbani sada misionaris i Peru na patuduhkon bahat do gunani halani sabar ia. Nini ma, “Dong sada parlajar Bibelku na margoran si Raúl. Domma dua buku salosei iparlajari hanami. Tapi totap do bahat masalahni. Lang martuah parhajabuanni janah gati homa ia cakap kotor. Halani parlahouni ai, gabe sunsah ma niombahni unduk hu bani. Hassi pe sonai, tongtong do ia martumpu. Halani ai, totap do ahu hu rumahni laho mangurupisi ampa kaluargani. Dob tolu tahun lobih hanami pajumpah, ujungni ididi ma ia.”

17. Aha do na laho iulas hita bani artikel na mangihut?

¹⁷ Iparentahkon Jesus do hita ase ‘laho janah mambahen sagala bangsa gabe susianni’. Sanggah mandalankon parentah ai, gati do hita pajumpah pakon marmasam halak. Dong do ra halak na lang marugama. Dong homa halak na lang porsaya dong do Naibata ai. Bani artikel na mangihut ulas hita ma sonaha hita boi padaskon barita na madear hubani halak sisonai.