1. Mase maningon ipasirsir hita dirinta bani hasunsahan na laho roh?

BANI borngin paima matei Jesus, domma ihatahon ia iparburu do holi ganup susianni. (Joh. 17:14) Ronsi sonari bahat do halak Kristen na setia na iparburu halak na so sisombah Jahowa. (2 Tim. 3:12) Anjaha halani lambin dohor mando ujung ni dunia on, marusaha do munsuhta mambahen hita marsitaronon.​—Mat. 24:9.

2-3. (a) Aha do na sihol ibahen Sibolis hubanta? (b) Aha do na laho iulas hita bani artikel on?

² Aha ma na porlu bahenonta laho parsirsirhon diritta anggo iparburu holi? Tontu lang porlu ibayangkon hita ganup na laho ibahen munsuhta hubanta. Halani anggo ai na lalab ipingkirhon hita, gabe mabiar janah gobir ma hita. Ujungni gabe lang ra be hita mangidangi Jahowa. (Pod. 12:25; 17:22) Anjaha “Sibolis” munsuhta in marosuh ase hita mabiar halani ai do sinjatani. (1 Ptr. 5:8, 9) Jadi, sonaha ase barani hita paima roh ari parburuon ai?

³ Bani artikel on, iulas hita ma sonaha hita boi patoguhkon parhasomananta pakon Jahowa, anjaha mase ai porlu ibahen hita humbani sonari on. Ulas hita homa sonaha carani ase lambin barani janah aha ma na porlu bahenonta porini ihasogamkon halak hita.

4. Janji aha do na ipatugah bani Heber 13:5, 6, anjaha mase hita maningon porsaya bani janji ai?

⁴ Pos ma uhurta ihaholongi Jahowa do hita anjaha seng ongga tadingkonon-Ni hita. (Basa Heber 13:5, 6.) Piga-piga tahun na salpu, ihatahon majallah Menara Pengawal do sonon, “Halak na tongon-tongon mananda Jahowa, tontu porsaya do ia hu Bani bai ganup panorang.” Tongon do ai! Ase boi totap martahan sanggah iparburu,  maningon holong anjaha porsaya ma hita bani Jahowa. Anjaha pos ma uhurta ihaholongi Ia do hita.​—Mat. 22:36-38; Jak. 5:11.

5. Aha do na boi mangurupi ham ase porsaya holong do Jahowa bamu?

⁵ Basa ma Bibel bani ganup ari ase lambin dohor ham bani Jahowa. (Jak. 4:8) Sanggah mambasa, pingkirhon ma aha do na boi iparlajari nasiam pasal Jahowa. Dob ai rimangi ma sonaha Ia patuduhkon holong-Ni marhitei parsahap ampa pambahenan-Ni. (2 Mus. 34:6) Tapi sipata dong do halak na pangahapni lang ihaholongi Jahowa ia, halani sadokah on lang dong na mangkaholongisi. Anggo sonai do homa pangahap ni ham, suratkon ma sonaha Jahowa domma mangurupi ham. (Ps. 78:38, 39; Rom 8:32) Dob irimangi ham aha na dob ibasa anjaha isuratkon ham habujuran ni Jahowa, gabe iahapkon ham ma holong-Ni bamu. Ujungni gabe martarima kasih ma ham anjaha lambin orot ma parhasomananmu pakon Jahowa.​—Ps. 116:1, 2.

6. Domu bani Psalmen 94:17-19, sonaha tonggo boi mangurupi nasiam?

⁶ Tongtong ma martonggo. Bayangkon ma sada dakdanak bani abingan ni bapani. Tontu sonang janah damei ma pangahapni. Halani ai gabe ra ma ia mansaritahon aha na masa sadari ai. Nasiam pe boi mangahapkon sisonai anggo martonggo bani Jahowa bai ganup ari. (Basa Psalmen 94:17-19.) Sanggah martonggo, “useihon ma uhurmu songon bah”, artini patugah ma aha pe na mambahen nasiam gobir atap pe holsohan. (Tangis 2:19) Hasilni gabe iahapkon ham ma “damei ni Naibata, na mangatasi haganup paruhuron”. (Pil. 4:6, 7) Jadi lambin gati nasiam martonggo, lambin orot ma parhasomananmu pakon Jahowa.​—Rom 8:38, 39.

7. Mase hita maningon porsaya saud do holi ganup janji ni Naibata?

⁷ Porsaya ma bani pasu-pasu na ijanjihon Naibata marhitei Harajaon-Ni. (4 Mus. 23:19) Anggo hurang porsaya ham bani janji ni Naibata, gabe urah ma Sibolis pakon sidea na mangirikkonsi mambahen ham mabiar. (Pod. 24:10; Heb. 2:15) Halani ai, aha ma na boi bahenonmu sonari ase porsaya bani Harajaon ni Naibata? Riset ma aha na laho bahenon-Ni ibagas Harajaon-Ni, janah rimangi mase ham boi porsaya saud do holi janji-Ni ai. Aha do gunani anggo ibahen hita sonai? Pardiateihon ma pangalaman ni si Stanley Jones na ipenjarahon sadokah pitu tahun halani haporsayaonni. * Aha do na mangurupisi ase totap martahan? Ia mangkatahon,  “Halani hubotoh pasal Harajaon ni Naibata, gabe toguh ma haporsayaonku. Janah lang adong age aha pe na mambahen ahu manadingkon Jahowa.” Jadi anggo toguh haporsayaon ni nasiam bani janji ni Naibata, lambin orot ma parhasomananmu pakon Jahowa, janah lang dong aha pe na mambahen nasiam mabiar.​—Pod. 3:25, 26.

8. Aha do gunani anggo humbani sonari domma ringgas hita martumpu?

⁸ Ringgas ma martumpu. Anggo ringgas hita martumpu, lambin orot ma parhasomananta pakon Jahowa. Gabe iurupi ma hita ase totap martahan sanggah iparburu bani ari na laho roh. (Heb. 10:24, 25) Mase ihatahon sonai? Halani anggo sonari pe gabe lang martumpu hita halani na otik, sonaha ma holi boi ringgas hita martumpu sanggah ilarang. Tapi anggo ringgas hita humbani sonari, holi sanggah ilarang, totap do hita marusaha martumpu. Halani ai humbani sonari maningon ringgas ma hita martumpu. Anggo domma marosuh hita martumpu, tontu marusaha do holi hita martumpu hassi pe ilarang pamarentah.​—Lah. 5:29.

9. Sonaha ayat ni Bibel boi mangurupi hita pasirsirhon diri anggo iparburu bani ari na laho roh?

⁹ Marusaha ma mardingat ayat-ayat ni Bibel. (Mat. 13:52) Hassi pe lang urah laho mardingat ayat-ayat ni Bibel, tapi boi do iurupi Jahowa hita marhitei tonduy na pansing laho mardingat ai. (Joh. 14:26) Pardiateihon ma pangalaman ni sada hasomanta i Jerman Timur na ipenjarahon. Ia mangkatahon, “Malas tumang uhurhu halani domma bahat ayat ni Bibel na huparlajari sadokah on. Hassi pe sahalak ahu, tongtong do huparimbagaskon ayat atap topik ni Bibel na ongga huparlajari. Jadi ganup ayat ai boi mangurupi hasomanta on ase totap dohor bani Jahowa janah martahan.”

10. Mase porlu ihapal hita doding Harajaon?

¹⁰ Marusaha ma mangapal doding Harajaon. Sanggah si Paulus pakon si Silas ipenjarahon i Pilippi, idodingkon sidea ma doding na idingat sidea laho mamuji Jahowa. (Lah. 16:25) Sonai ma homa na ibahen sanina botounta i Uni Soviet hinan, na ibuang hu Siberia. Sonaha sidea boi totap toguh? Si Mariya Fedun mangkatahon, “Idodingkon hanami ma ganup dodingta na boi idingat hanami.”  Ia mangkatahon anggo doding sisonai boi patoguhkon uhur ni sidea janah mambahen sidea lambin orot bani Jahowa. Sonai do homa pangahap ni nasiam sanggah mandodingkon doding Harajaon? Anggo sonai, marusaha ma mangapal doding ai humbani sonari!​—Tonggor ma kotak “ Buat Aku Berani.”

11-12. (a) Domu bani 1 Samuel 17:37, 45-47, mase barani si Daud manlawan si Goliat? (b) Sonaha hita boi mangusihi si Daud?

¹¹ Sanggah iparburu porlu tumang do habaranion ai. Tapi anggo pangahapmu sedo halak na barani ham, aha ma na boi bahenonmu? Dingat ma contoh humbani si Daud. Marimbangkon si Goliat, daoh do etekan si Daud, galekan, janah lang homa ibotoh marporang. Podangni pe lang adong. Hassi pe sonai, barani do si Daud manlawan raksasa ai.

¹² Mase si Daud barani manlawan si Goliat? Halani porsaya sai ihasomani Jahowa do ia. (Basa 1 Samuel 17:37, 45-47.) Lang sai ipingkiri si Daud banggalan do si Goliat marimbangkon ia. Tapi pos do uhurni daoh do gogohan Jahowa marimbangkon si Goliat. Hunjon, aha ma na boi iparlajari hita? Ase boi barani, porsaya ma sai ihasomani Jahowa do hita anjaha gogohan do Ia marimbangkon munsuhta. (2 Kron. 20:15; Ps. 16:8) Tapi, sonaha hita boi lambin barani sonari, paima roh ari parburuon ai?

13. Sonaha ase boi hita lambin barani?

¹³ Sonari hita boi lambin barani anggo sirsir mangambilankon pasal Harajaon ni Naibata. Mase boi sonai? Sanggah marbarita, iajari do hita ase porsaya bani Jahowa janah lang mabiar dompak jolma. (Pod. 29:25) Songon otot, boi do ai lambin gogoh anggo ilatih. Hita pe boi lambin barani sanggah marbarita hun rumah hu rumah, i ianan na mabuei, i ianan bisnis, ampa mambere hasaksian na lang resmi. Anggo humbani sonari ringgas hita marbarita, marusaha do homa hita totap marbarita hassi pe ilarang.​—1 Tes. 2:1, 2.

14-15. Humbani pangalaman ni si Nancy Yuen pakon si Valentina Garnovskaya, aha ma na boi iusihi hita?

¹⁴ Hita boi marlajar humbani pangalaman ni dua hasomanta na barani tumang. Hassi pe pondok si Nancy Yuen,  tapi lang parbiar ia. * Totap do ia mambaritahon pasal Harajaon ni Naibata hassi pe domma ilarang pamarentah. Ujungni, ipenjarahon ma ia i Cina sadokah 20 tahun. Sanggah ipareksa, ihatahon polisi ma ia “halak na jugul tumang”.

¹⁵ Sonai homa si Valentina Garnovskaya na ipenjarahon tolu hali i Uni Soviet hinan. Anggo ietong, 21 tahun ma ia ipenjara. * Mase ipenjarahon ia? Halani totap do ia marbarita hassi pe domma ilarang. Ihatahon pamarentah ma ia “parjahat na marbahaya”. Aha ma na mambahen haduasi hasomanta ai barani? Halani porsaya sai ihasomani Jahowa do sidea.

16. Sonaha carani ase boi barani?

¹⁶ Songon na dob iulas hita ase boi lambin barani ulang ma hita marpangunsandeian bani gogohta. Tapi maningon porsaya ma hita sai ihasomani Jahowa do hita anjaha Ia do na marporang laho mangkopkop hita. (5 Mus. 1:29, 30; Sak. 4:6) On ma carani ase boi totap barani.

17-18. Domu bani Johannes 15:18-21, sipasingat aha ma na ibere Jesus? Patorang ma.

¹⁷ Tontu marosuh do hita anggo ihargai halak. Tapi ulang ma maretek ni uhur anggo bahat halak lang marosuh hubanta. Jesus mangkatahon, ‘Martuah ma hanima anggo ihasogamkon anjaha itulak halak hanima, anggo irisai hanima anjaha iambukkon gorannima, halani Anak ni jolma in.’ (Luk. 6:22) Aha do artini ai?

¹⁸ Jesus lang mangkatahon anggo susianni marosuh idomdomi. Tapi ia sihol patugahkon aha na laho masa hubanta halani mangihutkonsi. Sedo humbani dunia on hita. Idalankon hita do homa aha na iajarhon Jesus janah ibaritahon hita do ajaranni. On ma na mambahen hita idomdomi dunia on. (Basa Johannes 15:18-21.) Tapi hita sihol pamalaskon uhur ni Jahowa. Jadi, porini  idomdomi halak hita halani mangkaholongi-Si, ulang ma hita maretek ni uhur.

19. Sonaha hita boi mangusihi apostel-apostel hinan?

¹⁹ Ulang ma paturut hita aha na ihatahon halak atap pambahenan ni sidea mambahen hita maila patugahkon diri Saksi Jahowa. (Mi. 4:5) Tiru hita ma siusihan humbani apostel hinan sanggah sidea i Jerusalem, lang piga dokah dobkonsi Jesus matei. Sidea mambotoh sogam tumang do pambobai ugama ni Jahudi mangidah sidea. (Lah. 5:17, 18, 27, 28) Hassi pe sonai totap do sidea marbarita i rumah panumbahan janah patugahkon diri anggo sidea susian ni Jesus. (Lah. 5:42) Hita pe boi lambin barani anggo lang maila patugahkon dirinta Saksi Jahowa hubani hasoman i sikolah, i parhorjaan, atap hubani tetangga.​—Lah. 4:29; Rom 1:16.

20. Hassi pe idomdomi, mase ganup apostel marmalas ni uhur?

²⁰ Ganup apostel mambotoh halani mangkorjahon harosuh ni Jahowa do sidea ihasogamkon janah iparburu. On ma na mambahen sidea marmalas ni uhur. (Luk. 6:23; Lah. 5:41) Halani ai, apostel Petrus manuratkon, “Anggo manaron nasiam halani hapintoron, na martuah do nasiam ai.” (1 Ptr. 2:19-21; 3:14) Anggo ibotoh hita halani mangkorjahon na sintong do hita ihasogamkon, tontu marusaha ma hita totap mangidangi Jahowa hassi pe masa sisonai.

21-22. (a) Sonaha nasiam boi pasirsirhon diri paima roh ari parburuon ai? (b) Aha ma na laho iulas hita bani artikel na mangihut?

²¹ Lang ibotoh hita attigan do masa parburuon ai atap attigan do ilarang pamarentah horja parambilanonta. Tapi humbani sonari domma ibotoh hita sonaha pasirsirhon diri. Jadi, patoguh ma parhasomananta dompak Jahowa. Tongtong ma patuduhkon habaranion. Janah totap ma marmalas ni uhur hassi pe idomdomi. On ma na mangurupi hita boi totap mangidangi Jahowa.

²² Tapi, aha ma na laho bahenonmu porini ilarang mangidangi Jahowa? Bani artikel na mangihut ulas hita ma prinsip-prinsip ni Bibel na boi mangurupi hita ase totap mangidangi Jahowa hassi pe ilarang.