Dobkonsi merintis ahu, bahat tumang do pasu-pasu na huahapkon lobih humbani na hupingkirhon. (Ep. 3:20) Ra do sungkun-sungkun nasiam mase ahu merintis. On ma laho husaritahon bani nasiam.

Ahu tubuh i Berlin, Jerman, piga-piga bulan dobkonsi Perang Dunia II bani tahun 1939. Sanggah laho marujung porang ai bani tahun 1945, bahat tumang bom na idabuhkon hu hutanami. Lintun ma hanami sakaluarga hu ianan parponopan. Dobkonsi ai, pindah ma hanami hu huta hatubuhan ni inangku i Erfurt.

Sihol tumang inangku mambotoh hasintongan. Ibasa ia ma buku-buku filsafat anjaha iparlajarini ma ajaran ni bahat ugama. Tapi pangahapni lang hasintongan ai. Bani tahun 1948, roh ma dua halak Saksi Jahowa hu rumahnami. Isuruh inangku ma sidea masuk janah bahat ma sungkun-sungkunni bani sidea. Lape das sajam, ihatahon inangku ma hubangku pakon botouhu, “On do hasintongan ai!” Lang piga dokah hunjai, martumpu ma inang, ahu, pakon botouhu i Erfurt.

Bani tahun 1950, mulak use hanami hu Berlin. Martumpu ma hanami i kuria Berlin-Kreuzberg. Lang piga dokah, pindah ma use hanami hu kuria Berlin-Tempelhof. Ijai ma inang ididi. Tapi  anggo ahu bungbang ope huahap. Mase sonai?

Sunsah do huahap mambahen hamajuan halani parmaila tumang do ahu. Lang ongga ahu marsahap sanggah marbarita sadokah dua tahun. Tapi mubah ma ahu dobkonsi hutanda sanina botou na toguh haporsayaonni bani Jahowa. Sidea totap do martahan hassi pe ipenjarahon Nazi sidea i Jerman Timur atap ibahen i kamp konsentrasi. Dong na marponop-ponop laho mangirim publikasinta hu Jerman Timur hassi pe ai boi mambahen sidea itangkap janah ipenjarahon. Siusihan ni sidea on ma  na mangojur ahu. Anggo sidea pe ra mambere hagoluhanni bani Jahowa ampa sanina botou, ai lang maningon marusaha ahu ase ulang lalab maila?

Lambin barani ma ahu halani dihut bani kampanye marbarita tahun 1955. Bani publikasi Informant, * Sanina Nathan Knorr patugahkon kampanye on ma horja sibanggalan na parlobei sahali ibahen organisasi. Nini do homa, anggo ganup parbarita dihut bani kampanye on, “gabe sejarah na banggal ma on bani horja parambilanonta”. Tongon ai do na masa! Anjaha lang piga dokah, ahu, bapangku, pakon botouhu ididi tahun 1956. Tapi dong haputusan na ponting na maningon hubahen.

Sasintongni domma dokah hubotoh marintis  ai do cita-cita na sidearan. Tapi ninuhurhu holi ma ahu marintis. Jadi, marlajar ma ahu sonaha carani manjual barang hu nagori na legan. Ase lambin pandei ahu marjualan, hupindahi ma horja i sada perusahaan. Ujungni, bani tahun 1961 marhorja ma ahu i Hamburg, pelabuhan na sibanggalan i Jerman. Marosuh tumang ahu bani horja on, jadi lalab ma ahu lang marintis. Aha do na maningon hubahen?

Martarima kasih do ahu bani Jahowa halani igunahon Ia do sanina botou na bujur laho mangojur ahu. Piga-piga hasomanku domma marintis janah gabe siusihan hubakku. Leganni ai, dong sanina Erich Mundt na martahan sanggah ipenjarahon i kamp kosentrasi. Iojur do ahu ase porsaya bani Jahowa. Isaritahon ia, dong sanina-sanina i kamp konsentrasi na marpangunsandeian bani dirini sandiri. Ujungni gabe galek do sidea. Tapi anggo na porsaya bani Jahowa janah setia, ujungni igunahon Jahowa do sidea ibagas organisasi-Ni.

Dong homa Sanina Martin Poetzinger, na ujungni gabe Pangurus Pusat. Ia mangojur sanina-sanina, “Habaranion ai ma biak na maharga na maningon dong banta!” Dob hurimangi hatani ai, kaluar ma ahu hun horjangku janah marintis bani bulan Juni 1963. Malas tumang uhurhu dobkonsi hubahen haputusan ai! Dob dua bulan marintis janah lape sompat ahu mangindahi horja, iontang ma ahu gabe parintis istimewa. Dobkonsi piga-piga tahun, ibere Jahowa pasu-pasu na lang ongga tarpingkir ahu hinan. Iontang do ahu dihut Sikolah Gilead kalas 44.

Dapot ahu parlajaran na ponting humbani Sanina Nathan Knorr ampa Lyman Swingle. Ihatahon sidea do, “Ulang podas-podas maronti nasiam humbani tugasmu.” Iojur sidea do ase hanami totap mandalankon tugasnami hassi pe bahat tantangan. Ihatahon Sanina Knorr, “Aha do na ipardiateihon nasiam? Ai cuaca do, rongit, atap hasunsahan? Ai ididah nasiam do bunga, pohon, atap halak na tarsirom? Marusaha ma ase holong bani halak na legan!” Ongga do tariluh Sanina Swingle sanggah patugahkon dong piga-piga sanina na maronti humbani tugasni. Halani tangis, soh ma ia tongkin sanggah marambilan. Hona tumang ma ai bani uhurhu, anjaha lang ra ahu mambahen pusok uhur ni Jesus ampa saninani.​—Mat. 25:40.

Dobkonsi ipatugah ianannami itugaskon, dong anggota Betel manungkun pasal ai bani piga-piga hasomanku. Jenges-jenges do komentar ni sidea pasal nagori ai. Dob ai isungkun sidea ma ahu. Tapi sanggah hupatugah anggo hanami i Kongo (Kinshasa), mintor sip do sidea janah nini do, “Aha? Kongo! Sai hasomanan ni Jahowa ma nasiam da!” Ijia, ibotoh halak anggo i Kongo (Kinshasa) bahat porang ampa pamunuhan. Tapi totap do hudingat aha na huparlajari. Bani September 1967, wisuda ma hanami anjaha laho ma ahu, si Heinrich Dehnbostel, pakon si Claude Lindsay hu Kinshasa, ibu kota Kongo.

Dob das hanami i Kinshasa, iparlajari hanami ma sahap Prancis sadokah tolu bulan. Dob ai, laho ma hanami hu Lubumbashi, hinan isobut Elisabethville. Huta ai dohorhon nagori Zambia, hampit selatan ni Kongo. Hanami tading i rumah misionaris.

Huta Lubumbashi ai lang ongga ihorjahon. Megah tumang pangahapnami gabe halak na parlobei sahali marbarita bani halak ijai. Lang isangka hanami bahat tumang halak na sihol marlajar Bibel. Halani ai, lang sungkup panorang laho mangajari sidea ganup. Marbarita do homa hanami bani halak na marhorja i kantor pamarentah atap hubani polisi. Porsaya do sidea bani Hata ni Naibata janah ihargai sidea do horjanta. Somalni sidea marsahap Swahili, jadi ahu pakon si Lindsay marlajar sahap ai. Dob ai, itugaskon ma hanami hu kuria na marsahap Swahili.

Hassi pe bahat pangalaman na jenges, tapi dong homa tantanganni. Gati do hanami pajumpah pakon tentara na mabuk na marsinjata atap polisi na sihol marsoal pakon hanami. Ongga do piga-piga polisi roh hu partumpuan na ibahen i rumah misionaris. Iboan ma hanami hu kantor polisi janah isuruh ma hanami hundul i tanoh ronsi jam sapuluh borngin. Dob ai pe isuruh hanami mulak.

Bani tahun 1969, itugaskon ma ahu gabe sintua kaliling. Itugaskon do ahu hu huta-huta na bagas i Afrika, marhubang do dalanni janah halong. Bani sada huta, ongga do modom sada  dayok pakon anakni i toruh ni podomanku. Lang tarlupahon ahu, martahuak dayok ai tongah borngin anjaha gabe puho ahu halani ai. Hudingat do homa sanggah ahu pakon sanina botou ijai mangulas Bibel. Rap hundul ma hanami borngin-borngin anjaha mandadang.

Tantangan na borat huahap ai ma sanggah manangani sanina-sanina na marsipakulah-kulah i kuria. Sasintongni sidea on anggota ni kalompok Kitawala. * Parahni ididi do sidea janah adong na gabe sintua. Songon “batu karang ibagas laut” do sidea. Tapi sanina botou na setia lang boi ioto-otoi sidea. (Judas 12, Terjemahan Dunia Baru) Ujungni, ipatalar Jahowa ma sidea. Anjaha lambin bahat ma halak na manjalo hasintongan.

Bani tahun 1971, itugaskon ma ahu hu kantor cabang Kinshasa. Ijai marmasam-masam do tugasku. Ongga do ahu i bagian dinas, surat-menyurat, ampa mangirim publikasi. Huparlajari do sonaha carani totap mandalankon tugas hassi pe lang pala dear dalan ijai, listrik, atap pe kendaraan. Somalni, dob marbulan-bulan do das suratnami hu kuria-kuria. Surat ai ikirim marhitei kapal terbang. Dob ai ikirim use marhitei parau. Tapi halani bahat tumang eceng gondok i sungai, gabe sunsah ma parau ai mardalan, ronsi marminggu-minggu ma ase das. Hassi pe bahat tantangan, boi do totap ihorjahon hanami tugasnami.

Longang tumang uhurhu mangidah sanina botou ijai boi mambahen ianan kebaktian na jenges hassi pe otik duitni. Ibahen sidea ma timbunan ni tanoh bokas ni ngitngit gabe panggung. Ipakei sidea ma rih bahen dingding pakon hundulan. Tiang-tiangni ibahen humbani buluh atap bambu, anjaha ipakei do homa ai mambahen tayub ampa meja. Halani lang adong paku, irahut ma bahan-bahan ai marhitei kulit ni hayu. Pandei tumang sidea mangkorjahon ai. Gabe holong do uhurhu bani sidea. Dobkonsi pindah ahu, siholan do ahu bani sidea.

Bani tahun 1974, ipindahkon ma ahu hu kantor cabang i Nairobi, Kenya. Bahat tumang horja ijai halani kantor ai mangawasi sapuluh nagori tarmasuk ma nagori na manlarang horjanta. Gati ma ahu isuruh manrohi nagori-nagori ai contohni Etiopia. Ijai, iparburu do sanina botounta janah bahat tumang do sitarononni. Dong na ibogbogi, ipenjarahon, atap pe ibunuh. Tapi totap do sidea martahan halani orot parhasomanan ni sidea bani Jahowa pakon na legan.

Bani tahun 1980, malas tumang uhurhu halani marhajabuan ahu pakon si Gail Matheson. Hutani i Kanada janah sakalas do hanami i Sikolah Gilead. Markirim surat do hanami. Ia itugaskon gabe misionaris i Bolivia. Dobkonsi 12 tahun, jumpah ma hanami i New York. Anjaha, marhajabuan ma hanami i Kenya. Tongtong do ia mangurupi ahu mandalankon tugasku. Si Gail halak na dohor bani Jahowa janah ihasonangkon ia do aha pe na adong.

Bani tahun 1986, itugaskon ma ahu gabe sintua kaliling. Anjaha bani panorang ai pe, ahu domma mangidangi gabe Panitia Cabang. Itugaskon ma hanami laho hu piga-piga nagori na iawasi kantor cabang Kenya.

Dob ai, hudingat do sonaha hanami mambahen persiapan kebaktian i Asmara (i Eritrea) bani tahun 1992, sanggah horjanta lape ilarang. Ondi ai, pitah sada gudang na maseda do dapotnami na boi ibahen gabe ianan kebaktian. Hun darat ni gudang ai pe domma lang jenges idahon, hape parahan do ibagas. Tapi sanggah ari kebaktian, longang tumang uhurhu, domma jenges gudang ai ibahen sanina botou. Bahat kaluarga ijai na mamboan kain-kain janah igunahon ma ai laho manutupi barang-barang na lang jenges i gudang ai. Malas tumang uhurnami  sanggah kebaktian ai, janah dong 1.279 hadirinni.

Sadokah gabe sintua kaliling, margantih-gantih do ianannami tading. Ongga do hanami marborngin i sada rumah na banggal janah dohorhon laut. Tapi ongga do homa hanami tading i sopou-sopou humbani seng, anjaha hira-hira 100 meter ma hun sopou ai kamar mandini. Tapi na lang ongga tarhalupahon hanami, ai ma sanggah rup marbarita hanami pakon perintis ampa parbarita na ringgas ijai. Bahat tumang hasoman na hinaholongannami ijai. Dob pindah hanami, siholan tumang uhurnami bani sidea.

Hira-hira bani tahun 1980-an ronsi awal tahun 1990-an, horjanta i piga-piga nagori na iawasi kantor cabang Kenya lang be ilarang pamarentah. Halani ai, ibahen ma kantor cabang i piga-piga nagori ai. Bani tahun 1993, dobkonsi lang be ilarang horjanta i Addis Ababa i Etiopia, itugaskon ma hanami hu kantor cabang ijai.

Ipasu-pasu Jahowa do horjanta i Etiopia. Bahat sanina botou ijai na gabe parintis. Humbani tahun 2012, lobih humbani 20 porsen parbarita ijai mangidangi gabe parintis biasa. Leganni ai, ijai ibahen do sikolah-sikolah na manlatih parbarita. Dong 120 lobih Balei Harajaon na ipajongjong. Bani tahun 2004, pindah ma anggota Betel hu kantor na baru. Ijai pe domma adong Balei Kebaktian. Hunjon taridah do pasu-pasu ni Jahowa ai.

Bahat do hasomannami i Etiopia. Holong tumang uhurnami bani sidea halani bujur-bujur do sidea. Na baru on, halani boritan hanami, ipindahkon ma hanami hu kantor cabang Eropa Tengah. Hassi pe ijai isarihon do hanami, tapi totap do siholan hanami bani hasomannami na i Etiopia.

Domma ididah hanami sonaha Jahowa mamasu-masu horja parambilanonta. (1 Kor. 3:6, 9) Umpamani, sanggah parlobei sahali ahu marbarita bani parhorja i tambang na dong i Kongo, lape dong Saksi Jahowa i Rwanda. Tapi sonari domma dong 30.000 lobih parbarita ijai. Bani tahun 1967, hira-hira 6.000 dassa parbarita i Kongo (Kinshasa). Tapi sonari on domma dong hira-hira 230.000 halak parbarita, janah dong lobih sajuta na roh hu acara Pardingatan Hamatean ni Jesus na ibahen bani tahun 2018. I piga-piga nagori na ongga iawasi kantor cabang Kenya, sonari domma dong 100.000 lobih parbarita ijai.

Hira-hira 50 tahun na salpu, igunahon Jahowa do sanina botou laho mangurupi ahu gabe perintis. Hassi pe ronsi sonari parmaila ope ahu, tapi totap do ahu marpangunsandeian bani Jahowa. Pangalamanku sanggah i Afrika do na mangurupi ahu ase totap sabar janah lang marungut-ungut. Ipuji hanami do sanina botou na totap sabar janah porsaya bani Jahowa hassi pe marsitaronon sidea. Malas tumang uhurhu anggo hudingat holong ampa habujuran ni Jahowa. Ipasu-pasu Ia do ahu lobih humbani na hupingkirhon.​—Ps. 37:4.