BANI Bibel ipatugah do sonaha pangahap ni bahat halak. Anjaha dos do pangahap ni sidea pakon hita sonari on. (Jak. 5:17) Umpamani, iarusi hita do sanggah apostel Paulus patugahkon pangahapni pasal hagalekonni bani Rom 7:21-24. Nini do, “Na madear do husurahon sihol bahenonku, tapi na masambor do huhorjahon. . . . Aih, ahu jolma na masombuh on.” Jadi sada apoh-apoh do on hubanta sanggah maretek ni uhur halani situasi na sarupa.

Leganni ai, bani Galatia 2:20, si Paulus mangkatahon anggo Jesus ‘mangkaholongisi anjaha mamberehon dirini mangkopkop ia’. Ai sonai do homa pangahap ni nasiam? Sipata lang.

Sanggah maretek ni uhur nasiam halani dousa-dousa sapari, ra do gabe lang porsaya nasiam anggo Jahowa domma manasap ai janah holong do uhur-Ni bamu. Ra do nini uhurmu, ‘Tobusan ni Jesus ai lang hubangku’. Ai marosuh do Jesus anggo sonai pangahapta pasal tobusan? Aha do na porlu ibahen hita ase porsaya bani tobusan ai? Ulas hita ma balosni ai.

Jesus marosuh ase hita porsaya anggo tobusanni ai marguna hubanta. Sonaha ase boi hita porsaya? Bayangkon ma situasi na isuratkon bani Lukas 23:39-43. Sada dalahi na igantung dohorhon Jesus, mangaku anggo ia domma mambahen hajahaton na banggal. Anjaha iuhum ma ia halani hajahatonni ai. Pusok tumang uhurni halani uhuman ai. Mangindo ma ia bani Jesus, “Ham Jesus, ingat ham ma ahu, anggo das ma ham bani Harajaonmu.”

Aha do na ibahen Jesus? Hassi pe borit pangahapni sanggah igantung, tapi marusaha do ia ase boi mangidah parjahat ai. Marusaha do homa ia ase boi tarsirom laho patoguhkon dalahi ai. Nini, “Sintong do hatangkon bam sadari on, rap pakon ahu ma ho i Paradeiso!” Ijon Jesus pataridahkon anggo ‘Anak ni Jolma in roh ase mamberehon hosahni bahen tobus ni buei jolma’. (Mat. 20:28) Boi do ididah ham anggo Jesus sihol ase dalahi ai mandapot guna humbani tobusanni holi? Lamlam do Jesus marsahap janah igunahon ia do hata “ahu” pakon “ho” bani dalahi ai. Janah marjanji do Jesus anggo dalahi holi manggoluh i paradeiso.

Marosuh do Jesus ase dalahi ai porsaya anggo tobusan ai sibere-bere hu bani. Jadi itobus Jesus do parjahat ai hassi pe ia lape mangidangi Naibata. Tontu sonai ma homa bahenon ni Jesus hubani halak Kristen na ididi janah mangidangi Naibata. Anggo sonai, aha do na mangurupi hita ase mandapot guna humbani tobusan ni Jesus?

Pangidangion ni si Paulus mambahen ia lambin mangkargai tobusan ni Jesus. Mase?  Ia patugahkon, “Mangkatahon tarima kasih do ahu bani na margogohi ahu, in ma Kristus Jesus Tuhanta in, ai ihira do ahu hatengeran ni uhur, gabe ipabangkit do ahu bani horja parugason on, ahu, sipanrisai, siparburu ampa siunsagahkon gogohku hinan.” (1 Tim. 1:12-14) Halani ringgas mangidangi, iahapkon si Paulus ma anggo Jesus mangkaholongisi janah mambere tugas na ponting hubani. Hita pe homa ibere Jesus tugas na ponting laho mangidangi. (Mat. 28:19, 20) Ai sarupa do pangahapta pakon si Paulus pasal pangidangion?

Si Albert, saninanta na ongga ipabali sadokah 34 tahun, patorangkon, “Sai lalab do hudingat dousaku. Tapi sanggah mangidangi huahapkon do songon si Paulus, ibere Jesus do ahu tugas na ponting. Gabe marmalas ni uhur ma ahu janah marpingkir na dear pasal diriku sandiri, hagoluhanku ampa ari simagira.”​—Ps. 51:5.

Si Allan, bahat mambahen hajahaton sanggah lape mananda hasintongan. Ia mangkatahon, “Gati do ahu tarsingat hajahatonku hinan bani halak na legan. Halani ai, gabe pusok ma uhurhu. Tapi martarima kasih ma ahu bani Jahowa na ra manggunahon sahalak pardousa songon ahu mangambilankon hata-Ni. Sanggah huidah halak ra manangar barita na madear, lambin hudingat ma Jahowa Naibata na parholong. Huahap igunahon Jahowa do ahu laho mangurupi halak na sarupa situasini songon ahu sapari.”

Sanggah hita mangidangi, iurupi do hita ase mamingkirhon janah mambahen na madear. Lambin pos ma uhurta anggo Jesus holong janah porsaya hubanta.

Paima dunia ni Sibolis iripaskon, ra do lalab maretek ni uhur hita halani dousa sapari. Aha do na boi mangurupi ase ulang lalab sonai?

Hinan sanggah poso ope si Jean, marsipakulah-kulah do ia bani kaluarga ampa kuria, janah lalab do isolsoli ia ai. Tapi nini do, “Malas tumang uhurhu mambotoh ‘banggalan do Naibata humbani uhurta.’” (1 Joh. 3:19, 20) Tarapoh do homa uhurta halani Jahowa pakon Jesus mangarusi hagalekonta. Dingat ma, anggo tobusan ai marguna sedo hubani jolma sempurna, tapi bani jolma na mardousa na ra mubah.​—1 Tim. 1:15.

Anggo irimangi hita sonaha pambahenan ni Jesus bani jolma na lang gokan dear anjaha ringgas homa hita mangidangi, lambin porsaya ma hita anggo tobusan ai sibere-bere hubanta. Anjaha dos ma pangahapta songon si Paulus na mangkatahon, ‘Ihaholongi Jesus do ahu anjaha iberehon do dirini mangkopkop ahu.’