1. Bani piga-piga ianan, parubahan aha do na masa sonari on?

SAPARI, bahat do jolma i sab dunia on na marugama. Tapi lang sonai be sonari. Lambin bahat do halak na lang marugama. Anjaha dong do piga-piga nagori bahatan pendudukni na lang marugama. *—Mat. 24:12.

2. Mase lambin bahat halak na lang marugama?

² Mase lambin bahat halak na lang marugama? * Dong halak na rosuhan marsonang-sonang. Dong homa na holsohan halani bahat masalahni. (Luk. 8:14) Dong na marugama hinan, tapi ujungni gabe lang porsaya bani Naibata. Dong homa halak na porsaya bani Naibata tapi lang porsaya anggo ugama ai sosok pakon ilmu pengetahuan. Ihatahon sidea lang dong gunani marugama sonari on. Ra do sonai sidea halani gatih manangar ajaran pasal evolusi humbani hasoman, guru, ampa media, tapi lang gati itangar sidea ajaran pasal Naibata. Dong homa na magigi mangidah pambobai ugama na tamak janah sihol mandapot jabatan. I piga-piga ianan, dong do pamarentah na mambatasi kegiatan ugama.

3. Mase porlu iulas hita artikel on?

³ Iparentahkon Jesus do hita ase mambahen sagala bangsa gabe susianni. (Mat. 28:19) Sonaha hita mangurupi halak na lang marugama ase boi mangkaholongi Naibata anjaha gabe susian ni Jesus? Maningon ibotoh hita do bahat halak somalni mangihutkon haporsayaon ibagas kaluargani. Jadi, sanggah marbarita hita bani halak sisonai, ra do  marmasam-masam pandapot ni sidea. Umpamani, lang dos haporsayaon ni halak i Eropa pakon halak i Asia. Anggo i Eropa bahat do halak na mambotoh pasal Bibel janah gati do itangar sidea Naibata do na manompa haganup. Tapi anggo i Asia, otik dassa na ibotoh halak pasal Bibel janah lang porsaya sidea dong do Panompa. Jadi, bani artikel on, iurupi ma hita sonaha boi padaskon barita na madear lang soal aha pe na ihaporsayai sidea.

4. Mase hita maningon totap marbarita hubani ganup halak?

⁴ Pos ma uhurta. Hassi pe lang marugama, tapi dong do sidea na dear parlahouni janah lang marosuh mangidah pambobai ugama na marsipakulah-kulah. Tapi dong homa sidea na sambor parlahouni. Hassi pe sonai, tiap tahun tong do adong humbani sidea ujungni gabe Saksi Jahowa. Halani ai, pos ma uhurta iurupi Jahowa do hita ase boi jumpah pakon halak na talup mandapot “hagoluhan sadokah ni dokahni”.​—Lah. 13:48; 1 Tim. 2:3, 4.

5. Mase ra halak manangihon baritanta?

⁵ Bujur ma janah parduli. Bahat do halak ujungni ra manangihon baritanta sedo halani aha na ihatahon hita, tapi halani dear caranta padaskon barita ai. Anggo bujur hita janah parduli bani sidea, gabe ra ma sidea manangihon. Tontu lang ipaksa hita sidea ase ra manangihon baritanta. Tapi marusaha ma hita mangarusi aha do na mambahen sidea lang marugama. Umpamani, dong halak na lang marosuh mangulas pasal ugama pakon halak na lape itanda. Dong homa lang marosuh isungkuni pasal Naibata. Dong na maila anggo ididah halak ia mambasa Bibel pakon Saksi Jahowa. Halani ai, marusaha ma mangarusi pangahap ni sidea.​—2 Tim. 2:24.

6. Sonaha cara ni si Paulus marbarita, janah sonaha hita boi mangusihisi?

⁶ Anggo jumpah hita pakon sasada halak na lang marosuh manangar hata “Bibel”, “tompaon”, “Naibata”, atap “ugama”, aha ma na boi ibahen hita? Tiru hita ma apostel Paulus na mambahen hata pamungkah na sosok. Sanggah jumpah pakon halak Jahudi, mintor iulas ia do humbani na Tarsurat in. Tapi sanggah jumpah pakon halak Junani na i Areopagus, lang adong ipatugah ia anggo na ihatahon ia ai, ibuat humbani na Tarsurat. (Lah. 17:2, 3, 22-31) Sonaha hita boi maniru si Paulus? Anggo jumpah hita pakon halak na lang porsaya bani Bibel, ulang mintor ibasahon hita ayat ni Bibel bani sidea. Anggo dong halak na lang marosuh ididah mambasa Bibel pakon hita, dearan ma ibasahon hita ai humbani HP atap tablet.

7. Domu bani 1 Korint 9:20-23, sonaha hita boi maniru si Paulus?

⁷ Arusi ma janah Tangihon. Maningon marusaha ma hita mangarusi pandapot ni halak i iananta marbarita. (Pod. 20:5) Dingat ma contoh humbani si Paulus. Hassi pe ia halak Jahudi, tapi ipasosok ia do baritani pakon halak na lang Jahudi halani sidea lang mananda janah lang mambotoh isi ni Bibel. Sonai homa hita, pingkirhon ma aha na ihaporsayai halak i iananta. Boi homa isungkun hita sanina botou na marpangalaman sonaha carani ase hita boi mangarusi aha na ipingkirhon halak i iananta.​—Basa 1 Korint 9:20-23.

8. Sonaha carani hita mambahen hata pamungkah laho mangulas isi ni Bibel?

⁸ Hita sihol mangindahi halak “na talup”. (Mat. 10:11) Ase dapot hita halak sisonai, maningon ibotoh hita do lobei  aha na ipingkirhon halak. Jadi, sungkun ma pandapot ni sidea. Dob ai, tangar ma sanggah sidea marsarita. Sonai ma na ibahen hasomanta i Inggris. Gati do isungkun ia halak sonaha ase martuah kaluarga, sonaha pagodangkon niombah, atap aha na boi ibahen hita anggo dong na mambahen na jahat hubanta. Dob itangar ia pandapot ni sidea, nini ma, “Ongga do itangar ham podah na jenges na isurat hira-hira 2.000 tahun na salpu?” Dob ai ibasahon ia ma sada ayat humbani henponni, tapi lang ipatugah ia anggo ai humbani “Bibel”.

9. Sonaha hita mangurupi sidea na lang marosuh marsahapi pasal Naibata?

⁹ Anggo dong halak na lang ra mangulas pasal Naibata, boi ma iulas hita pasal tompaon hubani sidea. Somal do halak longang mangidah tompaon. Jadi, boi ma ihatahon hita, “Sonari, bahat do penemuan na maniru aha na dob itompa. Umpamani, halak na mambahen mik, marlajar humbani cara kerja ni pinggol. Na mambahen kamera marlajar humbani cara kerja ni mata. Jadi sonaha pandapotmu pasal ganup tompaon i tanoh on? Ai tarjadi sandiri do ai, atap dong do na manompa ai?” Dobkonsi itangar hita pandapot ni sidea, hatahon ma use, “Gari ilmuwan pe marlajar humbani pinggol ampa mata, jadi ise ma na mambahen ganupan ai? Ongga do hutangar sada umpasa na mangkatahon, ‘Ia, sijadihon pinggol, mintor ma lang marpanangar? Ia, sijadihon mata, mintor ma lang marpangidah? Ia do na mangajarhon habotohon hubani ganup jolma.’ Jadi, bahat do ilmuwan na porsaya sasintongni adong do panompa ai.” (Ps. 94:9, 10) Dob ai, patuduh ma video hun jw.org^® i bagian “Wawancara dan Pengalaman” bani seri “Pendapat tentang Asal Mula Kehidupan”. (Tonggor bani PUBLIKASI > VIDEO.) Boi do homa ibere hita brosur Benarkah Kehidupan Diciptakan? atap pe brosur Asal Mula Kehidupan—Lima Pertanyaan yang Patut Direnungkan.

10. Sonaha hita boi mamungkah parsahapan bani halak na lang marosuh mangulas pasal Naibata?

¹⁰ Bahat do halak sihol ase roh dearni tanoh on. Tapi bahat do homa halak na mabiar ipamasab holi tanoh on. Sahalak sintua kaliling hun Norwegia mangkatahon bahat do halak na lang marosuh mangulas pasal Naibata, tapi marosuh mangulas  pasal sonaha holi dunia on bani ari simagira. Dob marsitandaan ihatahon ia ma, “Pandapot ni ham ise do na boi mambahen dunia on lambin dear, ai pamarentah do, ilmuwan, atap na leganni?” Dobkonsi itangar ia pandapotni, ibasahon atap ipatugah ia ma ayat na patugahkon pasal pangarapan bani ari simagira. Bahat do halak marosuh dobkonsi mambotoh anggo tanoh on totap do adong, janah halak na bujur boi manggoluh sadokah ni dokahni.​—Ps. 37:29; Par. 1:4.

11. Mase maningon ibahen hita hata pamungkah na sosok, anjaha domu bani Rom 1:14-16, sonaha hita boi mangusihi si Paulus?

¹¹ Halani lang sarupa pandapot ni tiap halak, maningon ipasosok hita ma hata pamungkah sanggah marbarita. Aha na iharosuhkon sada halak, lape tontu iharosuhkon na legan. Dong na marosuh mangulas pasal Naibata atap pe Bibel, tapi na leganni lang sonai. Jadi marusaha ma hita marbarita hubani ganup halak. (Basa Rom 1:14-16.) Dingat ma Jahowa do na patubuhkon hasintongan ibagas uhur ni halak na mangkaholongi na pintor.​—1 Kor. 3:6, 7.

12. Sonaha hita boi mangurupi halak i Asia na lang porsaya adong Panompa?

¹² Bahat do sanina botou i sab dunia on na pajumpah pakon marmasam halak hun benua Asia. Tarmasuk ma na roh hun nagori na mambatasi kegiatan ugama. Bahat do halak ijai lang porsaya dong Naibata ai. Hassi pe sonai, dong do sidea na ra marlajar Bibel. Anjaha na leganni dong do na lang ra marlajar halani lang ongga itangar sidea ajaran ni Bibel. Jadi sonaha hita boi mangurupi halak sisonai? Piga-piga parbarita mangkatahon, dear do hasilni anggo sidea marsahapi lobei janah ipatuduh sidea ma anggo sidea parduli bani halak ai. Dob ai, anggo sosok ipatugah sidea ma sonaha mandalankon prinsip ni Bibel ai boi mambahen hagoluhan ni sidea lambin dear.

13. Aha do na boi ibahen hita ase ra halak mangulas isi ni Bibel? (Tonggor ma gambar sampul.)

¹³ Bahat do halak na marosuh manangar podah na dong ibagas Bibel. (Par. 7:12) Sada hasomanta naboru i New York marbarita hubani halak na marsahap Mandarin. Nini do, “Marusaha do ahu bujur bani halak na hujumpahi. Janah dear do hutangihon sanggah marsarita sidea. Anggo hubotoh ia pangungsi, husungkun ma, ‘Mase ham pindah hujon? Ai domma dapot horja ham? Bujur do halak ijon bamu?’” Sipata, dob marsahap-sahapi sonai, ujungni gabe boi ma ia mangulas pasal Bibel bani sidea. Nini botou ai ma use, “Pandapot ni ham, sonaha ma carani ase boi hita mardamei pakon halak na legan? Boi do hupatuduh sada podah na jenges hun Bibel? Ihatahon, ‘[Sibuka] bah bongbongan do halak sibahen paringoran, halani ai, paima pultak paringoran, intopi ma ai.’ Ai dong do gunani anggo idalankon hita podah on?” (Pod. 17:14) Dob marsahapi sonai, gati do boi ibotoh hita ise do halak na marosuh janah boi irohi use.

14. Sonaha hasomanta i Timur Jauh mangurupi halak na lang porsaya bani Naibata?

¹⁴ Sonaha hita boi mangurupi halak na lang porsaya bani Naibata? Sada hasomanta dalahi i Timur Jauh mangkatahon, “Anggo ijon adong na mangkatahon, ‘Lang porsaya ahu bani Naibata,’ maksudni ai ia lang porsaya bani gana-gana. Jadi huhatahon ma ahu pe setuju sedo  naibata na sintong anggo gana-gana ai. Gati do hubasahon Jeremia 16:20, ‘Ai tarbahen jolma do mambahen Naibata bani? Sedo naibata ai!’ Dob ai husungkun ma ia, ‘Jadi sonaha ma hita boi mambotoh na ija do Naibata na sintong?’ Dob hutangar balosni, hubasahon ma use Jesaya 41:23, ‘Patugah hanima ma aha na masa dob on, ase ibotoh hanami atap Naibata do hanima tongon.’ Dob ai, hupatuduh ma aha na ihatahon Jahowa pasal ari simagira.”

15. Aha na boi iparlajari hita humbani pangalaman ni hasomanta i Asia Timur?

¹⁵ Sada hasomanta dalahi i Korea patorangkon sonaha carani ia manrohi use. Nini do, “Gati do lobei huulas pakon sidea pasal podah ni Bibel, panjahaion na dob saud, ampa pasal hukum alam na mangatur tanoh on. Dob ai hupatorang ma, marhitei ganupan ai gabe ibotoh hita ma adong do Panompa na pentar. Anggo domma porsaya ia adong do Naibata ai, hupatuduh ma aha na iajarhon Bibel pasal Jahowa.”

16. Domu bani Heber 11:6, mase parlajar Bibelta maningon porsaya bani Naibata ampa isi ni Bibel, anjaha sonaha hita boi mangurupi sidea ase toguh haporsayaonni?

¹⁶ Sanggah mangurupi halak na lang marugama marlajar Bibel, tongtong ma urupi sidea ase porsaya dong do Naibata ai. (Basa Heber 11:6.) Porlu do homa iurupi hita sidea ase lambin porsaya bani Bibel. Halani ai, maningon marulak-ulak ma hita mangajarhon hasintongan ai. Sanggah marlajar ai, porlu do iulas hita bukti-bukti na patuduhkon anggo Bibel ai tongon-tongon do Hata ni Naibata. Umpamani, boi do iulas hita panjahaion ni Bibel na dob saud, sonaha ilmu pengetahuan ampa sejarah sosok pakon isi ni Bibel, ampa aha do gunani anggo idalankon hita podah ni Bibel.

17. Aha do hasilni anggo ipatuduh hita holong sanggah mangajari halak?

¹⁷ Maningon ipatuduh hita ma holong hubani ganup halak ase ra sidea gabe susian ni Jesus. (1 Kor. 13:1) Sanggah mangajari sidea, urupi ma ase sidea mambotoh anggo Jahowa mangkaholongi hita janah sihol ase hita mangkaholongi-Si. Tiap tahun dong marribu halak na lang marugama na ididi gabe Saksi Jahowa halani sidea mangkaholongi Naibata. Jadi totap ma ringgas marbarita hubani ganup halak. Haholongi ma sidea janah tangihon ma pandapotni. Marusaha ma mangarusi pangahapni. Bahen ma sitiruon na dear ase ra sidea gabe susian ni Jesus.