Gabe Sintua ni Malim do Jesus sanggah ia ididi bani tahun 29 M. Mase ihatahon hita sonai? Sanggah Jesus ididi ihatahon ia laho bereonni do dirini bahen galangan domu bani harosuh ni Naibata. Anjaha harosuh ni Naibata igambarhon do pakon anjapanjap na dong i rumah panumbahan hinan. Sanggah Jesus mambere hagoluhanni bahen tobusan, dos do ia songon na manggalangkon dirini i anjapanjap. Jadi anjapanjap ai domma adong dobkonsi Jesus ididi. (Gal. 1:4; Heb. 10:5-10) Rumah panumbahan hinan manggambarhon pangaturan na ibahen Jahowa ase juakjuak-Ni boi manombah-Si marhitei tobusan ni Jesus. Halani domma adong anjapanjap ai dobkonsi Jesus ididi, tontu rumah panumbahan ai pe domma dong bani panorang ai.​—Mat. 3:16, 17; Heb. 5:4-6.

Hinan, dong do Sintua ni Malim na mangidangi i rumah panumbahan. Jadi sonaha Jesus ipilih gabe Sintua ni Malim? Iminaki Jahowa do ia gabe Sintua ni Malim marhitei “tonduy na pansing ampa hagogohon”. (Lah. 10:37, 38; Mrk. 1:9-11) Tapi hunja ibotoh hita anggo Jesus domma gabe Sintua ni Malim paima ia matei ampa ipapuho? Ase ibotoh balosni, ulas hita ma lobei aha na ibahen si Aron pakon ginomparni sanggah sidea mangidangi gabe Sintua ni Malim.

Songon na ibahen bani Titah ni si Musa, pitah Sintua ni Malim dassa na boi masuk hu Ianan na Sipansingan na dong i tabernakel ampa i rumah panumbahan. Ijai ibahen do sada hirei-hirei gabe parholangan bani Ianan na Pansing pakon Ianan na Sipansingan. Pitah bani Ari Pardearan dassa Sintua ni Malim boi masuk hu Ianan na Sipansingan. (Heb. 9:1-3, 6, 7) Tontu si Aron pakon ginomparni domma gabe Sintua ni Malim paima masuk sidea “manlopusi hirei-hirei” na dong i tabernakel ai. Sonai homa ma Jesus, tontu domma iminaki Jahowa ia gabe Sintua ni Malim paima matei ia ampa ipapuho. Dobkonsi ai, masuk ma ia “manlopusi hirei-hirei ai, ai ma dagingni ai”. (Heb. 10:20) Halani ai ma apostel Paulus mangkatahon Sintua ni Malim do Jesus ai halani domma masuk ia hu “nagori atas”.​—Heb. 9:11, 24.

Jadi sadihari ma padan na baru ai isahkon? Dong tolu na maningon ibahen. Na parlobei, naik ma Jesus hu surga. Na paduahon, ibere ia ma nilai tobusanni ai bani Naibata. Anjaha na patoluhon, ijalo Jahowa ma nilai tobusan ai. Dobkonsi ibahen na tolu ai, marlakku ma padan na baru ai.

Lang dong ipatugah bani Bibel sadihari do Jahowa manjalo nilai tobusan ni Jesus. Halani ai, lang ibotoh hita sadihari do pastini padan na baru ai marlaku atap pe isahkon. Tapi, ibotoh hita do domma naik Jesus hu surga sapuluh ari paima ari Pentakosta. (Lah. 1:3) Jadi paima ari Pentakosta ai ma ibere Jesus nilai tobusanni bani Jahowa. Anjaha ijalo Jahowa do ai. (Heb. 9:12) Taridah do ai humbani aha na masa sanggah ari Pentakosta. (Lah. 2:1-4, 32, 33) Hunjai taridah ma domma isahkon padan na baru ai.

Jadi padan na baru ai isahkon dobkonsi ijalo Jahowa nilai tobusan ni Jesus. Ijai ma padan ai marlaku. Anjaha Jesus na gabe Sintua ni Malim ai ma na gabe siholang bani padan ai.​—Heb. 7:25; 8:1-3, 6; 9:13-15.