Ahu tubuh bani tahun 1954, i St. Paul Minnesota, Amerika Serikat. Anak paduahon do ahu, humbani lima marsanina. Sedo halak na bayak namatorasku, tapi sedo homa halak na miskin. Sanggah dakdanak, marsikolah i SD Katolik do ahu janah gabe Putra Altar i gareja. Tapi lang sai hubotoh isi ni Bibel. Hassi pe porsaya ahu Naibata do na manompa haganup, tapi huahap lang boi iurupi gareja ahu ase dohor hubani Naibata.

Sanggah baru ope kuliah ahu i William Mitchell College of Law, roh ma sapasang suami istri hu rumahku. Saksi Jahowa do sidea. Halani sanggah ai sibuk ope ahu manunsi, husuruh ma sidea roh use. Sanggah roh use sidea, husungkun ma: “Mase martuahan halak na jahat marimbangkon halak na bujur?” janah “Aha do na mambahen hita ase boi marmalas ni uhur?” Jadi, ibere sidea ma hubangku buku Kebenaran yang Membimbing kepada Hidup yang Kekal pakon Kitab Suci Terjemahan Dunia Baru, na marsampul siratah. Dob ai marlajar Bibel  ma hanami. Gabe huarusi ma Harajaon ni Naibata do holi na mamarentah i dunia on. Gabe hubotoh ma mase lang dong pamarentahan ni manisia na marhasil parohkon hadearon. Roh samborni do holi ujungni pamarentahan ni sidea on.

Mangondoskon diri ma ahu janah ididi bani tahun 1982 sanggah Kebaktian “Hasintongan pasal Harajaon”, i kota St. Paul. Saminggu dobkonsi ai mulak use ahu hu kota ai laho mandihuti ujian ase boi gabe pangacara. Bani bulan Oktober, hubotoh ma lulus do hape ahu janah domma boi gabe pangacara.

Bani Kebaktian “Hasintongan pasal Harajaon” ai, jumpah ma ahu pakon Sanina Mike Richardson, na mangidangi i Betel Brooklyn. Ipatugah ia ma anggo i kantor pusat domma ibahen bagian hukum. Jadi mintor hudingat ma na ihatahon pegawai hun Etiopia na isurat bani Lahoan 8:36. Dob ai husungkun ma diringku, ‘Ai adong ope na manlanglangi ahu ase mangidangi i kantor ai?’ Jadi huisi ma formulir Betel.

Lang marosuh namatorasku dob mambotoh anggo ahu domma gabe sahalak Saksi Jahowa. Jadi isungkun bapa ma hubangku sonaha ma holi ahu boi gabe pangacara na sukses anggo marhorja i Betel. Hupatorang ma bani bapa anggo ahu mangidangi ijai. Janah tiap bulan dong do ibere otik penggantian ongkos songon na ibere bani anggota Betel na legan.

Halani domma sompat ahu marjanji marhorja bani sada pengadilan, lang boi ahu mintor mangidangi i Betel bani panorang ai. Bani tahun 1984 ma ahu boi mangidangi i Betel Brooklyn, New York. Itugaskon ma ahu i Bagian Hukum. Pangalaman sanggah marhorja i pengadilan ai boi mangurupi ahu sanggah mangidangi i Betel.

Bani bulan November tahun 1983, iboli organisasi ma Stanley Theater i Jersey City, New Jersey. Marusaha ma sanina-sanina mangurus izin laho padearhon bangunan ai. Sanggah jumpah sidea pakon walikota, ipatorang sidea ma anggo bangunan ai sihol ibahen gabe gedung kebaktian ni Saksi Jahowa. Gabe parsoalan ma ai. Sadokah on dong paraturan i kota ai lang boi dong bangunan ugama i daerah bisnis. Maningon i daerah perumahan do boi adong bangunan sisonai. Halani ai lang ra sidea mambere izin bani saninanta. Jadi naik banding ma saninanta. Tapi itulak pamarentah do ai.

 Jadi iboan ma parkara ai hu pengadilan. Sanggah ai, baru ope ahu mangidangi i Betel. Halani ongga ahu marhorja sadokah dua tahun i pengadilan i St. Paul, Minnesota, domma somal huidah parkara sisonai. Jaksa penuntutnami mangkatahon somal do ibahen acara i Stanley Theater ai. Contohni acara-acara film pakon musik. Jadi, mase ma sonari lang boi igunahon ai bahen acara-acara ugama? Gabe iarusi pengadilan ma parkara ai janah ibotoh sidea ma anggo pamarentah Jersey City lang mangkargai hak ni halak laho marugama. Jadi iparentahkon pengadilan ma ase ibere pejabat nongkan ai izin hubani Saksi laho padearhon bangunan ai. Ijai ma huidah sonaha Jahowa mamasu-masu organisasi-Ni. Malas tumang uhurhu halani boi dihut ijai.

Ipungkah ma horja padearhon gedung ai. Lang das satahun salosei ma horja ai. Janah bani tanggal 8 September 1985, ijai ma ibahen acara wisuda Sikolah Gilead na pa-79. Malas tumang uhurhu boi dihut marhorja bani Jahowa. Martuahan do huahap mangidangi i Betel marimbangkon sanggah ahu gabe pangacara hinan. Lang husangka igunahon Jahowa ope ahu laho pasaloseihon bahat parkara na legan.

Bani tahun 1980-an, lang ihargai dokter pakon rumah sakit hak ni Saksi Jahowa laho manulak transfusi darah. Gabe tantangan ma on, tarlobih hubani botou na laho melahirkan anakni. Halani ihatahon hakim do anggo lang ibere transfusi darah bani inangni ai, gabe matei ma holi ia. Ujungni gabe tading maetek ma anakni.

Bani tanggal 29 Desember 1988, pendarahan ma Botou Denise Nicoleau dobkonsi melahirkan anak ia. Halani HB-ni domma i toruh ni 5, ihatahon dokter maningon transfusi darah ma botou ai. Tapi lang ra botou ai. Halani ai, patarni roh ma pagawai ni rumah sakit ai hu pengadilan laho mangindo izin hubani hakim ase boi sidea mambere transfusi darah hubani botou ai. Mintor ibere hakim ai ma pangindoan ni sidea, hape lape isungkun ia Botou Nicoleau pakon suamini.

Ari Jumat, tanggal 30 Desember, mintor ibere pagawai ni rumah sakit ma transfusi darah bani Botou Nicoleau, hassi pe domma ihatahon suami pakon kaluargani lang setuju sidea. Anjaha bani bod ni ari itangkap ma kaluarga ni botou ai pakon sada atap dua sintua halani ilanglangi sidea pagawai nongkan ai laho mambere transfusi darah. Sogodni, ari Sabtu, tanggal 31 Desember mintor tarbarita ma pasal panangkapan ni sidea ai i radio pakon TV i New York City ampa Long Island.

Ari Senin sogod ni ari, marsahap ma ahu hubani Hakim Milton Mollen i mahkamah  agung. Hupatorang ma na sasintongni pasal parkara ai. Hupatugah ma bani anggo hakim i pengadilan na sebelumni ai domma mambahen haputusan hape lape itangar hatorangan humbani kaluarga ni Botou Nicoleau. Jadi isuruh hakim ai ma ahu ase roh use bani bod ni ari hu kantorni laho mansahapkon pasal ai pakon hukum-hukum na marlaku hujai. Jadi roh ma use ahu hu kantorni ihasomani Sanina Philip Brumley, na gabe pangawasku. Iontang do homa pangacara ni rumah sakit ai. Tapi gabe emosi ma ahu sanggah mangulas pasal ai, sonai homa pangacara ni rumah sakit ai. Ibahen Sanina Brumley ma satatan ase “tenang” ahu. Sosok tumang do huahap podahni ai halani domma korastu sorangku ondi ai laho patuduhkon domma salah na ibahen rumah sakit ai.

Dobkonsi sajam hanami mangulas ai, ihatahon Hakim Mollen ma anggo patar parkara on do na parlobei iulas i pengadilan. Sanggah kaluar hanami hun kantorni ai, ihatahon Hakim Mollen ai ma anggo patar sunsah do holi pangacara ai laho mambela rumah sakit halani domma mamaksa Botou Nicoleau manjalo transfusi darah. Jadi lambin pos ma uhurhu urupan ni Jahowa do holi hanami ase monang. Malas tumang uhurnami sanggah mangidah sonaha Jahowa mangurupi hanami laho pasaudkon sura-sura-Ni.

Bani bornginni ai, iulas hanami ma aha na laho ihatahon hanami i pengadilan patar. Patarni mardalan ma hanami hu pengadilan halani dohor do ai humbani Betel Brooklyn. Dobkonsi ibogei ompat hakim ijai hatorangannami, ihatahon sidea ma sasintongni lang boi rumah sakit ai mambere transfursi darah hubani Botou Nicoleau. Ihatahon sidea homa domma marsalah rumah sakit ai halani mamaksa Botou Nicoleau manjalo transfusi darah.

Ujungni iputuskon mahkamah agung New York ma anggo Botou Nicoleau marhak manulak transfusi darah. On ma kasus na parlobei humbani ompat kasus na hutangani pasal manulak transfusi darah. (Tonggor ma kotak “ Kasus na Monang i Mahkamah Agung”.) Dobkonsi ai, rap marhorja do homa ahu pakon pangacara-pangacara na legan i Betel laho manangani kasus na leganni.  Umpamani, pasal hak asuh anak, parsirangan, ampa izin bangunan.

Jumpah ma ahu pakon Botou Denise. Ondi ai domma mabalu ia janah dong tolu niombahni. Sunsah do pargoluhanni, tapi merintis do ia. Halani huidah banggal holongni hubani Jahowa, gabe holong ma uhurhu mangidahsi. Bani tahun 1992, dihut ma hanami hu Kebaktian Distrik “Na Mamboban Haliharon” i New York City. Ijai huarahkon ma ia martunangan pakon ahu. Satahun dobkonsi ai marhajabuan ma hanami. Jahowa do na sipontingan ibagas goluh ni si Denise janah rosuh homa ia marhuria-huria. Huahap sibere-bere humbani Jahowa do ia hubangku. Malas tumang uhurhu sadokah marrumah tangga hanami.​—Pod. 31:12.

Sanggah marhajabuan hanami, dakdanak ai dong na marumur 11, 13, ampa 16 tahun. Sihol do ahu gabe bapa na bujur bani sidea. Jadi hupindahi ma bani publikasinta pasal orangtua tiri janah marusaha ma ahu mandalankon podahni ai. Mungkahni lang urah ai. Tapi ujungni malas tumang uhurhu halani boi do ijalo sidea ahu gabe bapa ampa hasoman ni sidea. Gati do homa roh hasoman ni sidea hu rumah. Janah malas tumang uhurnami mangalo-alo sidea.

Bani tahun 2013, pindah ma hanami hu Wisconsin laho mangurus bapa pakon simatuangku. Tapi malas tumang uhurhu halani boi ope ahu mangurupi organisasi i bagian hukum.

Bani bulan September 2018, gati tumang mardahak tolonanku. Sanggah hupareksa bani dokter, lang ibotoh ia aha naboritku ai. Jadi isuruh ma ahu hu dokter bagian neurolog. Bani bulan Januari 2019 ihatahon dokter bagian neurolog ai ma anggo ahu domma hona panahit na parah. Jarang do halak na hona panahit sisonai anjaha lape adong tambarni.

Tolu ari dobkonsi ai marolahraga ma ahu. Sasintongni jago tumang do ahu marolahraga ai janah memang ai do hobikku. Tapi sanggah na marolahraga ai ahu, madabuh ma ahu, lanjar ponggol ma tanganku. Hunjai gabe hubotoh ma domma sunsah ahu mangatur pergerakanku. Lambin dokah lambin parah ma naboritku ai janah domma sunsah ahu marsahap, marhusor, atap pe mambondut.

Malas tumang uhurhu halani boi hugunahon na huparlajari hinan laho mangurupi horja ibagas organisasi ni Jahowa. Anjaha malas do homa uhurhu boi hutulis bahat artikel na boi ibasa dokter, pangacara, pakon hakim. Sanggah dong seminar-seminar, dihut do ahu mambela hak ni Saksi Jahowa laho mamilih pangobatan na iharosuhkon sidea. Ijai ma hupatorang mase sidea lang ra manjalo transfusi darah. Boi ma huhatahon songon na isurat bani Lukas 17:10, ‘Jabolon na so margagan do ahu, sibar horja na patut do hansa na hulahoi.’