1. Domu bani Pilippi 2:3, anggo toruh maruhur hita, sonaha ma pangahapta bani hasomanta?

SIHOL do hita unduk bani Jahowa halani iarusi hita Ia do mambotoh na sidearan hubanta. On patuduhkon halak na toruh maruhur do hita. (Ep. 4:22-24) Halani ai, pontingan do iahap hita harosuh-Ni marimbangkon harosuhta sandiri. Anjaha lang iahap hita lobihan dirinta marimbangkon halak na legan. Hasilni, lambin orot ma parhasomananta pakon Jahowa ampa sanina botounta.​—Basa Pilippi 2:3.

2. Aha ma na boi ibotoh hita humbani surat ni si Paulus, janah aha ma na laho iulas hita bani artikel on?

² Tapi anggo lang jaga hita, boi do holi hita songon bahatan halak na gijang maruhur janah mamontingkon diri. * Bani abad na parlobei, ra do adong piga-piga halak Kristen na sonai. Halani ai, itulis apostel Paulus ma surat hubani sanina botou i Rom. Ia mangkatahon, “Huhatahon ma bani ganup nasiam, ‘Ulang ma gijang hira nasiam diri nasiam lobih humbani na patut, tapi pandei ma nasiam maruhur.’” (Rom 12:3) Hunjon ibotoh hita ma lang salah nini si Paulus anggo hita mamingkirhon dirinta. Tapi porlu do homa hita toruh maruhur ase ulang iahap hita dirinta na sipontingan. Bani artikel on, iulas hita ma holi sonaha hita boi patuduhkon toruh ni uhur (1) ibagas parhajabuan, (2) sanggah mandapot tanggung jawab i kuria,  ampa (3) sanggah manggunahon media sosial. Ganupan on boi mangurupi hita ase ulang margijang ni uhur.

3. Mase marhasunsahan halak na marhajabuan, janah sonaha piga-piga halak pasaloseihon parsoalanni?

³ Sihol do Jahowa ase martuah parhajabuan. Tapi halani lang sempurna suami istri, ra do sipata lang sapanriahan sidea. Si Paulus mangkatahon dong do hasunsahan ni halak na marhajabuan. (1 Kor. 7:28) Bahat do halak sonari na lalab martinggili pakon pasanganni. Halani ai, isolsoli sidea ma parhajabuanni. Ninuhurni ma rahanan do sidea marsirang. Sasintongni, mamontingkon diri do pingkiran na sisonai ai.

4. Pingkiran na sonaha do na maningon ipadaoh hita?

⁴ Padaoh ma pingkiran na sisonai! Bibel mangkatahon pitah halani parbangkison do sasahalak boi marsirang. (Mat. 5:32) Jadi sanggah adong parsoalan ibagas parhajabuan, ulang ma iahap hita dirinta na sipontingan. Ulang ma homa ihatahon hita, ‘Lang be isarihon ia ahu. Lang be ihaholongi ia ahu. Huahap martuahan do ra goluhku anggo kawin ahu pakon na legan.’ Anggo sonai pingkiranta, pitah dirinta do na ipingkiri hita sedo pasanganta. Tongon bahat do halak i dunia on na mangkatahon, ‘Lang mahua marsirang anggo ai do na mambahen nasiam boi marmalas ni uhur.’ Tapi, Bibel mangkatahon, “Ulang ma na porlu bani nasiam paruhurhon nasiam, tapi dihut ma na bani hasoman!” (Pil. 2:4) Sasintongni, lang marosuh Jahowa anggo marsirang nasiam. (Mat. 19:6) Tontu malas uhur-Ni anggo iihutkon ham harosuh-Ni, sedo harosuhmu sandiri.

5. Domu bani Epesus 5:33, aha do na maningon ipatuduh suami istri?

 ⁵ Maningon marsihaholongan anjaha marsipasangapan ma suami istri. (Basa Epesus 5:33.) Tapi sonaha ase boi sidea patuduhkon ai? Maningon martoruh ni uhur ma sidea. Anggo martoruh ni uhur sidea, tontu lang na porlu bani dirini sandiri na isarihon, tapi “na bani [pasanganni] ma”. (1 Kor. 10:24) Bani Bibel iojur do hita ase mamingkirhon aha na boi ibere hita, sedo aha na boi idapot hita.​—Lah. 20:35.

6. Parlajaran aha ma na dapot nasiam humbani si Steven pakon si Stephanie?

⁶ Bahat do halak Kristen na martuah parhajabuanni halani patuduhkon toruh ni uhur. Si Steven mangkatahon, “Maningon marsiurupan do suami istri, tarlobih sanggah dong parsoalan. Marusaha do ahu mamingkirhon ‘aha na sidearan bannami?’ sedo ‘aha na sidearan bangku?’” Sonai do homa pangahap ni si Stephanie, istrini. Ia mangkatahon, “Ise pe lang ra sarumah pakon halak na rosuh marsual. Sanggah lang sapanriahan hanami, marusaha do hanami mangindahi aha do sasintongni na gabe masalah. Dob martonggo hanami, iriset janah iriahkon hanami ma ai. Marusaha do hanami pasaloseihon parsoalan ai ase ulang martinggili.” Lambin marmalas ni uhur do suami istri anggo lang pitah mamingkirhon dirini.

7. Sonaha ma namin pangahap ni sanina na mandapot tanggung jawab i kuria?

⁷ Malas tumang uhurta halani boi mangidangi Jahowa. (Ps. 27:4; 84:11) Jadi, sipujion do anggo adong sada sanina na sihol marhorja lobih bahat ibagas organisasi ni Jahowa. Bibel mangkatahon, “Halak na sihol gabe parmahan ibagas kuria, sipindahi horja na madear do ai.” (1 Tim. 3:1) Hassi pe sonai, anggo ibere tanggung jawab bani sanina, ulang ma ninuhurni halak na ponting do ia. (Luk. 17:7-10) Tapi, maningon marusaha ma ia mangidangi sanina botou humbani toruh ni uhurni.​—2 Kor. 12:15.

8. Sipasingat aha do na dapot hita humbani pangalaman ni si Diotrepes, Raja Usia, pakon si Absalom?

⁸ Bani Bibel bahat do ipatugah pasal halak na pitah mamingkirhon dirini sandiri. Umpamani, sihol do si Diotrepes gabe “sigijangan” i kuria. (3 Joh. 9) Ihorjahon Raja Usia do sada tugas, hape lang dong hak-ni mangkorjahon ai. (2 Kron. 26:16-21) Marusaha do si Absalom mambuat uhur ni rayat halani sihol ia gabe raja. (2 Sam. 15:2-6) Tapi ujungni parohkon mara do ai bani sidea ganupan. (Pod. 16:18) Hunjon tangkas ma ibotoh hita lang marosuh Jahowa hubani halak “na mangindahi hasangapon bani dirini sandiri”.​—Pod. 25:27, Terjemahan Dunia Baru.

9. Sitiruon aha do na ibahen Jesus?

⁹ Tapi anggo Jesus lang sonai. ‘Age pe marrupa Naibata ia, sedo ihira uhurni usih ni Naibata ia.’ (Pil. 2:6) Hassi pe banggal kuasani, tapi lang ongga iahap ia ponting tumang dirini. Ihatahon ia do bani susianni, “Barang ise sietekan i tongah-tongahnima, ia do sibanggalan.” (Luk. 9:48) Tontu malas tumang uhurta boi rap mangidangi pakon perintis, siparugas, sintua, ampa sintua kaliling na martoruh ni uhur songon Jesus. Anggo martoruh ni uhur hita, marusaha do  hita mangkaholongi na legan. Anjaha ihatahon Jesus maningon marsihaholongan do juakjuak ni Naibata.​—Joh. 13:35.

10. Aha do na maningon bahenonmu anggo iahap ham dong parsoalan na lang isaloseihon sintua?

¹⁰ Aha ma bahenonmu anggo iahap ham dong masalah i kuria tapi lalab ipaturut sintua ai? Ulang ma marungut-ungut ham. Patuduh ma toruh ni uhur anjaha ihutkon ma pangaturan na domma ibahen sidea. (Heb. 13:17) Ase boi ibahen ham sonai, sungkun ma dirimu: ‘Ai parah do tongon parsoalan on, janah maningon isaloseihon? Ai sosok do huhatahon on sonari? Ai sosok do ahu na patugahkon ai bani sidea? Aha do sasintongni tujuanku, marusaha mambahen kuria totap marsada atap na pajuntul-juntulhon diri dassa ahu?’

11. Domu bani Epesus 4:2, 3, aha ma hasilni anggo martoruh ni uhur hita mangidangi Jahowa?

¹¹ Pontingan do bani Jahowa toruh ni uhur marimbangkon hapentaran. Janah pontingan do hasadaon marimbangkon mangkorjahon buei tugas. Anggo martoruh ni uhur hita mangidangi Jahowa, gabe adong ma hasadaon i kuria. (Basa Epesus 4:2, 3.) Halani ai ringgas ma ham mangidangi. Bujur ma bani ganup halak, ulang pitah hubani sidea na martanggung jawab i kuria. (Mat. 6:1-4; Luk. 14:12-14) Anggo ra ham rap marhorja pakon sanina botou, gabe ibotoh sidea ma sahalak na toruh maruhur do ham.

12. Mase Jahowa sihol ase dong hasomanta?

¹² Sihol do Jahowa ase lambin orot hita pakon hasoman ampa kaluarganta.  (Ps. 133:1) Jesus pe bahat do hasomanni. (Joh. 15:15) Ipatugah do bani Bibel bahat do gunani na marhasoman ai. (Pod. 17:17; 18:24) Anjaha iojur do hita ase ulang papuligkon diri. (Pod. 18:1) Halani ai, bahat do mangahap ase ulang lungunan sidea, ipindahi ma hasoman-hasoman hun media sosial. Tapi maningon maruhur ma hita sanggah manggunahon media sosial.

13. Mase adong halak na gabe lungunan anjaha sunsah pangahapni dob mangidah postingan i media sosial?

¹³ Somalni, poto na sidearan do na iposting halak i media sosial. Sihol do sidea patuduhkon halak na sonaha do ia, ise hasomanni, ampa ianan na ongga irohi ia. Sada penelitian patuduhkon lungunan anjaha sunsah do pangahap ni halak na gati mangidah postingan i media sosial. Mase? Halani gabe ibandingkon ia ma dirini pakon postingan na ididahni ai. Sahalak botou na marumur 19 tahun mangkatahon, “Gabe simburu do ahu mangidah postingan ni halak na mardalani, hape ahu lalab i rumah.”

14. Sonaha podah bani 1 Petrus 3:8 boi mangurupi hita ase maruhur manggunahon media sosial?

¹⁴ Tongon, dong do gunani media sosial anggo maruhur hita manggunahon ai. Umpamani, gabe boi ma ihubungi hita kaluarga ampa hasomanta. Tapi, ai ipardiateihon ham do aha tujuan ni halak mambahen postingan i media sosial? Bahatan do sidea sihol ipardiateihon halak. Dong homa na mambahen komentar na lang suman bani poto ni sandiri atap i poto ni halak. Tapi anggo halak Kristen, iojur do hita ase patuduhkon uhur na sapangahapan ampa toruh ni uhur. Halani ai, ulang ma songon sidea ai hita sanggah manggunahon media sosial.​—Basa 1 Petrus 3:8.

15. Sonaha podah ni Bibel boi mangurupi hita ase ulang mamontingkon diri?

¹⁵ Anggo manggunahon media sosial ham, sungkun ma dirimu, ‘Humbani komentar, photo, ampa video na huposting, ai boi do on mambahen halak marpingkir na pajuntul-juntulhon diri do ahu? Ai  gabe simburu do halak mangidah on?’ Bibel mangkatahon, “Sagala na i dunia on, ai ma rosuh-rosuh ni daging, rosuh-rosuh ni mata ampa na mangenjengkon haadongan, seng humbani Bapa in ai, tapi humbani dunia on do.” (1 Joh. 2:16) Jadi, ulang ma iahap hita pontingan dirinta marimbangkon halak na legan. Tapi ihutkon hita ma podah on, “Ulang ma parayak hita [gijang ni uhur], ulang ma marsipagila-gilaan, anjaha ulang ma marsilateian.” (Gal. 5:26) Anggo toruh maruhur hita, tontu lang marosuh hita songon halak na i dunia on na gijang maruhur anjaha mamontingkon diri.

16. Mase lang ra hita margijang ni uhur?

¹⁶ Tontu lang ra hita gabe halak na gijang maruhur. Rosuh martinggili do halak na gijang maruhur janah mamontingkon diri. Parohkon hasedaon do parlahou na sisonai bani dirini ampa hubani halak na legan. Anggo lang mubah ia, lambin gijang ma uhurni songon Sibolis. (2 Kor. 4:4; 11:3) Tapi legan do anggo halak na toruh maruhur. Ibotoh do ise dirini na sasintongni. (Rom 12:3) Lang iahap ia pontingan dirini marimbangkon halak na legan. (Pil. 2:3) Ia mambotoh “iimbang Naibata do sigijang uhur, tapi ibere do idop ni uhur bani na toruh maruhur”. (1 Ptr. 5:5) Halani ai, sihol do hita gabe halak na toruh maruhur ase ulang gabe munsuh ni Naibata hita.

17. Mase maningon tongtong hita martoruh ni uhur?

¹⁷ Maningon marusaha do hita ase boi tongtong patuduhkon toruh ni uhur. ‘Tanggali hita ma jolma na buruk in rap pakon pambahenanni, anjaha pakei hita ma na baru in.’ Parlajari ma sitiruon na ibahen Jesus, janah ihutkon ma ai. (Kol. 3:9, 10; 1 Ptr. 2:21) Bahat do gunani anggo hita patuduhkon toruh ni uhur. Lambin martuah ma kaluarganta, gabe marsada ma kuria, anjaha gabe maruhur ma hita manggunahon media sosial. Na sipontingan, gabe malas ma uhur ni Jahowa mangidah hita, anjaha bereon-Ni ma pasu-pasu hubanta.