Bani tahun na mangihut, dong pengumuman i Betel na patugahkon porlu tumang dong relawan hu kantor cabang i Afrika Selatan. Dong mesin cetak na baru ipasang ijai. Halani ai, hudaptarhon ma goranku janah isetujui do ahu. Malas tumang uhurhu. Dong tolu nari hasomanku hun Betel Kanada na dihut homa pindah hujai, ai ma si Dennis Leech, si Bill McLellan, pakon si Ken Nordin. Ihatahon do bannami dokah do holi hanami ijai.

Hutalepon ma inang. Ningku ma, “Nang, dong barita na madear. Ahu laho pindah hu Afrika Selatan.” Lang bahat na ihatahon inang halani halak na parsip do ia. Tapi dohor do ia bani Jahowa. Jadi pos do uhurhu setuju do holi ia bani keputusanku ai. Tongon, gabe lungun do uhur ni Bapa pakon Inang. Tapi, lang ilanglangi sidea ahu pindah hu Afrika.

Paima laho hanami hu Afrika Selatan, hu Betel Brooklyn do lobei hanami. Ijai ilatih do hanami sadokah tolu bulan manggunahon mesin cetak na banggal. Dobkonsi ai, markapal ma hanami hu Cape Town, i Afrika Selatan. Marumur 20 tahun ope ahu sanggah ai. Dob das hanami i Cape Town, markareta api ma hanami borngin-borngin hu Johannesburg. Dob ai, soh ma karetanami i sada kota na etek i gurun pasir Karoo. Milas tumang ijai janah bahat homa abu. Itonggor hanami ma hun jendela sonaha do kota ai. Gabe haru ma uhurnami sonaha holi i tempat penugasannami ai. Tapi dob piga-piga tahun, roh use hanami hu kota ai. Hape basar do halak ijai janah jenges homa kotani.

Sanggah i Betel Afrika, isuruh do ahu manggunahon mesin Linotype. Dong piga-piga tahun huhorjahon ai. Canggih tumang mesin ai. Ipakei do ai laho mangatur huruf-huruf i majalah Sadarlah! pakon Menara Pengawal paima icetak. Na icetak ijai lang pitah majalah bani bahasa i Afrika Selatan tumang. Tapi icetak do homa majalah bani piga-piga bahasa na legan i Afrika. Malas tumang uhurnami halani bahat tumang do hape gunani mesin cetak na iboan hanami hun Kanada ai.

Dob ai, itugaskon ma ahu laho mangurus piga-piga na porlu i bagian penerjemahan, percetakan, pakon pengiriman publikasi. Gabe sibuk tumang ma ahu. Tapi malas tumang do uhurhu.

Bani tahun 1968, marhajabuan ma ahu pakon sada perintis na margoran si Laura Bowen. Dohorhon Betel do rumahni. Anjaha dihut do ia mangurupi laho mengetik i Departemen Penerjemahan. Anggo hinan, halak na baru marhajabuan lang boi mangidangi i Betel. Jadi itugaskon ma hanami gabe perintis istimewa. Sadokah sapuluh tahun ahu i Betel, ipasirsir do ganup haporluanku. Dong sipanganon ampa tempat tinggal. Jadi gabe haru ma uhurhu sonaha ma holi anggo hanami gabe perintis istimewa. Hinan ibere do tiap bulan penggantian ongkos bannami 25 rand (hira-hira 500 ribu rupiah) sahalak. Ai pe boi dapotnami duit ai anggo gok kuota jam dinasnami. Maningon dong homa kunjungannami pakon publikasi na itempatkon. Duit ai ma na ipaotik-otik hanami laho manggalar sewa rumah, mamboli sipanganon, ongkos, anggo martambar, atap pe na leganni.

Itugaskon ma hanami hu sada kalompok dohorhon kota Durban. Bahat tumang halak India ijai. Halani bani tahun 1875, bahat do halak India na roh hu Afrika Selatan laho marhorja i pabrik gula. Tapi sonari domma marmasam horja ni sidea. Age pe sonai, sai tong do iboan sidea hasomalan hun hutani hinan. Janah gati do homa imasak sidea makanan khas ni sidea, songon kari na sodap. Ibotoh sidea do homa marbahasa Inggris. Jadi lang pala susah hanami marbarita bani sidea.

Hinan, sahalak perintis istimewa maningon do marbarita 150 jam tiap bulan. Halani lape dong kunjungan atap parlajar Bibelnami, ibahen hanami ma rencana marbarita hun rumah hu rumah onom jam sadari. Sanggah na marbarita ai, milas tumang cuacani. Hutonggor ma jam, hape 40 minit ope hanami na marbarita ai. Nini uhurhu ma sonaha ma holi hanami boi totap gabe perintis istimewa.

Dokah-dokah domma terbiasa hanami marbarita ijai. Iboan hanami ma tiap ari sipanganon ampa kopi ibagas termos. Sanggah istirahat hanami, iparkirhon hanami ma motornami i toruh ni hayu. Dong ma anak-anak India na manonggor hanami. Heran do sidea halani legan warna kulitnami pakon sidea. Dob piga-piga ari, domma mariah iahap hanami. Lang na gojabkon domma dua atap tolu jam hanami marbarita.

Malas do uhurnami marbarita bani halak India ijai. Bujur-bujur do sidea, basar, janah porsaya do sidea dong do Naibata ai. Bahat do halak Hindu na ra manjalo baritanta. Marosuh do sidea marlajar pasal Jahowa, Jesus, Bibel, paradeiso, ampa parpuhoon bani halak na matei. Dob satahun hanami marbarita, dong 20 halak parlajar Bibelnami. Tiap ari, sai dong do parlajar Bibelnami na mangarahkon hanami mangan siang sanggah roh hanami hu rumah ni sidea. Malas tumang uhurnami.

Dob ai, itugaskon ma hanami gabe sintua kaliling i daerah i pesisir Samudra Hindia. Tiap minggu, menginap ma hanami i rumah ni sada kaluarga. Rup mangidangi ma hanami pakon parbarita ijai janah ipatoguh hanami ma sidea. Domma songon kaluarganami sidea. Gati do hanami marguro-guro pakon anak ni sidea ampa peliharaanni. Lang na gojabkon domma dua tahun hanami mangidangi ijai. Sompong roh ma talepon hun kantor cabang. Ipindo sidea do ahu laho mangidangi i Betel use. Sasintongni domma sodap huahap mangidangi i lapangan. Tapi sai totap do ijalo hanami tugas aha pe na ibere organisasi.

Dob i Betel, itugaskon do ahu i Departemen Dinas. Rap marhorja ma ahu pakon sanina-sanina na marpangalaman. Hinan dobkonsi roh sintua kaliling hu sada kuria, ibere ia ma laporan hu kantor cabang. Ikirim kantor cabang ma use surat hu kuria ai laho patoguhkon sanina botou atap pe laho mambere tugah-tugah. Somalni laporan na ikirim sintua kaliling hu kantor cabang itulis ibagas bahasa Xhosa, Zulu, pakon na legan. Jadi iterjemahkon sekretaris i Departemen Dinas ma surat ai hu bahasa Inggris. Dobkonsi ai, iterjemahkon sidea ma surat hun Departemen Dinas ai hun bahasa Inggris hubagas bahasa na dong i Afrika. Martarima kasih tumang do ahu halani  bahat na ihorjahon penerjemah ai. Humbani sidea do homa hubotoh hasunsahan aha do na iahapkon sanina botou na markulit hitam i Afrika.

Hinan, ipakei ope pengaturan sistem apartheid i Afrika Selatan. Maksudni, halak na lang sarupa sukuni lang boi rup tading i sada ianan. Halani ai, sanina botounta na markulit hitam gabe pulig ma sidea sanggah marbarita ampa martumpu. Janah bahasani bei ma na ipakei sidea sanggah marsahap.

Hinan lang bahat na hubotoh pasal sanina botounta na markulit hitam. Halani i kuria bahasa Inggris do ahu itugaskon. Tapi sonari domma hubotoh sonaha hasomalan ni sidea ampa tantangan na iahapkon sidea. Bahat tumang do sidea na ipaksa mangihutkon adat i iananni. Anjaha ihasogamkon kaluarga ampa sahutani do homa sidea halani lang ra mangihutkon hasomalan na dong kaitanni pakon spiritisme. Age pe sonai, totap do barani sidea mandalankon Hata ni Naibata. Leganni ai, bahat do homa halak na markulit hitam na tading i huta-huta bagas janah miskin tumang sidea. Anjaha lang dong homa sikolahni. Tapi marosuh do sidea marlajar Bibel.

Bahat do homa anak sikolah Saksi na ipakaluar hun sikolah halani lang ra sidea martonggo ampa mandodingkon lagu agama. Jadi ahu ma na itugaskon laho mangurus kasus-kasus ai. Gabe ipatoguh do ahu halani mangidah haporsayaon ni sidea.

Dong homa tantangan na legan na iahapkon sanina botou i Swaziland. Sanggah matei Raja Sobhuza II, dong hasomalan na maningon iihutkon ganup rakyatni laho pasangapkon na matei ai. Umpamani, maningon ibotak do ganup dalahi. Anggo naboru maningon ipangkas do pendek jambulanni. Tapi halani lang ra sanina botounta mangihutkon hasomalan ai, gabe ianiaya ma sidea. Halani totap setia sidea bani Jahowa, gabe ipatoguh do haporsayaonku. Bahat tumang do na boi huparlajari humbani sanina botou ijai halani mangidah toguhni haporsayaon ni sidea.

Bani tahun 1981, itugaskon ma ahu i bagian percetakan. Sanggah ai, domma lambin maju carani percetakan. Dong sahalak sales na roh hu  kantor cabang laho mempromosihon mesin phototypesetter. Sanggah icoba hanami mesin ai, podas tumang cara kerjani. Halani ai, igantih ma siah mesin Linotype ijai gabe lima mesin phototypesetter. Ipasang do homa ijai sada mesin cetak na baru. Hasilni gabe lambin bahat ma publikasi na boi icetak.

Halani lambin maju teknologi, ibahen ma sada program na baru, ai ma program Sistem Penerbitan Elektronik Multibahasa (MEPS). Program ai igunahon laho menyusun huruf-huruf bani publikasinta na laho icetak. Daoh do podasan program ai marimbangkon mesin Linotype na igunahon hanami hinan sanggah ahu pakon tolu hasomanku roh hu Betel Afrika Selatan. (Jes. 60:17) Sanggah program ai domma igunahon, hanami na ompat domma marhajabuan pakon perintis biasa. Ahu pakon si Bill totap do mangidangi i Betel. Tapi anggo si Ken pakon si Dennis lang be halani domma marniombah sidea.

Lambin bahat do horja i Betel Afrika Selatan. Umpamani lambin bahat do majalah na icetak ijai hubagas marmasam bahasa na dong i Afrika. Janah maningon ikirim do homa ai hu cabang na legan. Halani ai, maningon adong ma kantor Betel na lobih banggal. Jadi ipajongjong ma sada bangunan Betel dohorhon Johannesburg. Itahbiskon ma ai bani tahun 1987. Malas tumang uhurhu boi mangidangi i Betel anjaha sompat do ahu gabe anggota Panitia Cabang ijai sadokah martahun-tahun.

Bani tahun 2001, lang husangka iontang ma ahu gabe anggota Panitia Cabang i Betel Amerika Serikat. Sanggah ai, baru ope ibahen cabang ai. Sasintongni lungun do uhurnami laho pindah halani domma bahat hasomannami i Afrika. Tapi malas do uhurnami halani boi pajumpah pakon kaluarga na baru i Betel Amerika Serikat.

Tapi haru do uhurnami ise ma holi na mangurus inang ni si Laura na dob matua. Anggo hanami domma i New York, lang boi podas hanami mangurupi aturang ai. Tapi sirsir do tolu kakak ni si Laura mangurus ia. Nini sidea ma bannami, “Anggo hanami lang boi mangidangi ibagas dinas sepenuh waktu. Jadi hanami pe na mangurus inang on ase boi nasiam totap mangidangi.” Malas tumang uhurnami manangar ai.

Malas do homa uhurhu halani dong abangku pakon istrini na ra mangurus inang na dob mabalu. Dong lobih 20 tahun inang tading pakon sidea i Toronto, Kanada. Lang piga dokah dob pindah hanami hu New York, marujung goluh ma inang. Bahat kaluarganami na ra mangurus inang sadokah on age pe lang urah mangkorjahon ai.

Dob piga-piga tahun mangidangi i bagian percetakan, itugaskon ma ahu i Departemen Pembelian. Domma adong hira-hira 20 tahun ahu mangidangi i cabang on, janah malas tumang uhurhu. Sonari, dong 5.000 anggota kaluarga Betel ijon ampa 2.000 komuter.

Lang husangka bahat tumang do pasu-pasu na ijalo hanami sadokah 60 tahun on. Sai tongtong do iurupi si Laura ahu. Domma dong marmasam tugas na ibere bannami janah malas do uhurhu boi marhorja pakon sanina botou na legan. Sanggah irohi hanami kantor cabang na legan, malas uhur boi pajumpah pakon sanina botou ijai. Sonari domma 80 lobih umurhu. Jadi lang bahat be tugas na ibere hubangku halani domma bahat sanina na maposo na ilatih mangkorjahon tugas ai.

Sahalak panurat ni psalmen mangkatahon, “Martuah ma bangsa na mambahen Jahowa Naibatani.” (Ps. 33:12) Tongon tumang do hata ai! Malas do uhurhu mangidangi Jahowa rap pakon sanina botou na marmalas ni uhur.