1. Aha do na domma ibahen Jahowa bamu?

SONAHA do ham mananda hasintongan? Ra do ham parlobei sahali manangar “ambilan na madear” humbani namatorasmu, hasoman saparhorjaan, hasoman sasikolah, atap humbani na marbarita hun rumah hu rumah. (Mrk. 13:10) Dob ai marlajar Bibel ma ham pakon halak Saksi Jahowa. Tontu bahat do panorang ampa pengorbanan na ibere laho mangurupi ham. Sanggah marlajar ham lambin ihaholongi ham ma Jahowa. Anjaha ibotoh ham ma holong do uhur-Ni bamu. Jahowa do na manogu-nogu ham laho mananda hasintongan. Anjaha sonari domma gabe susian ni Jesus ham. Dapot ham ma homa pangarapan hagoluhan sisadokah ni dokahni. (Joh. 6:44) Tontu martarima kasih tumang do ham bani Jahowa halani domma isuruh Ia sasada halak laho mangajari ham. Anjaha sonari domma gabe Saksi Jahowa ham.

2. Aha do na laho iulas hita bani artikel on?

² Sonari dob itanda hita hasintongan, boi do homa hita mangurupi na legan laho mananda Jahowa. Anjaha sada hasangapon do ai. Ra urahan do iahap hita marbarita marimbangkon mangurupi halak marlajar Bibel. Sonai do homa pangahapmu? Bani artikel on dong do piga-piga saran na boi mangurupi hita. Iulas hita homa aha do na mangurupi hita mambahen susian. Pardiateihon hita homa sonaha mangatasi tantangan, ase lambin tarojur hita mangajari halak pasal Bibel. Parlobei, ulas hita ma mase hita lang pitah marbarita tapi maningon mangajari halak pasal ambilan na madear.

3. Mase hita maningon totap marbarita?

 ³ Sanggah Jesus i tanoh on, ibere ia do dua tugas na ponting hubani susianni. Parlobei, isuruh ia do susianni marbarita. Anjaha ipatugah ia do carani mangkorjahon ai. (Mat. 10:7; Luk. 8:1) Ipatugah ia do homa aha na laho bahenonni sidea anggo dong halak na ra atap lang ra manjalo barita ai. (Luk. 9:2-5) Ihatahon Jesus maningon das do barita na madear in hubani “ganup bangsa”. (Mat. 24:14; Lah. 1:8) Lang soal dong atap lang halak na manjalo, maningon idalankon hita do parentah ni Jesus laho mambaritahon Harajaon ni Naibata.

4. Domu bani Mateus 28:18-20, sobali marbarita aha ope na maningon ibahen hita?

⁴ Aha do tugas na paduahon na ibere Jesus? Isuruh ia do susianni laho mangajari halak mangkorjahon ganup parentahni. Tapi, dong na mangkatahon pitah hubani halak Kristen bani abad na parlobei do ibere tugas ai. Sasintongni lang sonai. Sanggah ihatahon Jesus maningon marbarita susianni, ihatahon do ai ibahen “ronsi roh ujung ni dunia”. (Basa Mateus 28:18-20.) Leganni ai, ra do homa tugas ai ihatahon Jesus i lobei ni lobih 500 halak susianni. (1 Kor. 15:6) Anjaha bani panonggoran ni apostel Johannes pe, iparentahkon Jesus do bani susianni laho mangajari halak pasal Jahowa.​—Pangk. 22:17.

5. Domu bani 1 Korint 3:6-9, limbaga aha ma na igunahon si Paulus laho patorangkon kaitanni marbarita ampa mangajar?

⁵ Sanggah hita mangajari sasada halak, isarupahon apostel Paulus do horja ai songon na mangurus suan-suanan. Dobkonsi isuan hita sada bonih maningon iarbahi hita do homa ai. Nini si Paulus do bani halak Korint, “Ahu do manuan, si Apollos mangarbahi, . . . juma ni Naibata” do nasiam. (Basa 1 Korint 3:6-9.) Parhorja i “juma ni Naibata” do hita. (Joh. 4:35) Jadi lang sungkup pitah marbarita, maningon iajarhon hita do homa sidea marlajar Bibel . Tapi Naibata do na patubuhkon bonih ai, artini Ia do na mangurupi halak ai laho mangidangi-Si.

6. Aha do na porlu ibahen hita sanggah mangajari sasada halak gabe susian ni Jesus?

⁶ Sonari marusaha do hita mangindahi “halak na marosuh manjalo hasintongan na parohkon hagoluhan sisadokah ni dokahni”. (Lah. 13:48, Terjemahan Dunia Baru) Ase boi sasada halak gabe susian ni Jesus, maningon iurupi hita ma ia (1) mangarusi parlajaran, (2) porsaya bani ajaranni Bibel, ampa (3) mangkorjahon aha na iparlajarisi. (Joh. 17:3; Kol. 2:6, 7; 1 Tes. 2:13) Anggo dong halak na baru roh hu partumpuanta, patuduh hita ma holong janah dear ma mangalo-alo sidea. (Joh. 13:35) Ra do maningon bahat do panorang na maningon ibere hita laho mangurupi sasada halak manadingkon ajaran ampa hasomalan na sadokah on ihaporsayai sidea. (2 Kor. 10:4, 5) Halani ai ma ra dong halak na marlajar Bibel ronsi marbulan-bulan ase boi ia mambahen parubahan ronsi ididi. Hassi pe sonai maharga tumang do ganupan na ibahen nasiam ai laho mangurupi ia.

7. Aha do na mangojur hita laho marbarita ampa mangurupi halak gabe susian ni Jesus?

⁷ Mase ra hita marbarita ampa mangurupi halak gabe susian ni Jesus? Alasan na parlobei, ai ma halani holong uhurta bani  Jahowa. (1 Joh. 5:3) Ra do iahap hita lang urah marbarita. Ra do hitir-hitir hita sanggah parlobei sahali marbarita. Age pe sonai, totap do hita marbarita halani holong uhurta bani Jahowa. Ibotoh hita do maningon ihorjahon hita do parentah ni Jesus ai. Dokah-dokah gabe marosuh ma hita marbarita. Tapi, sonaha ma pasal mangajari halak marlajar Bibel? Ra do mabiar homa hita mangkorjahon ai. Halani ai, pindo ma bani Jahowa ase boi barani ham janah marhinsah ni uhur mangurupi halak gabe susian ni Jesus.

8. Domu bani Markus 6:34, aha ope na boi mangojur hita laho mangajari halak na legan?

⁸ Alasan na paduahon mase ra hita marbarita, halani holong uhurta bani halak na legan. Sonai do homa Jesus pakon susianni. Dobkonsi marbarita sidea sadari bod, ipindahi sidea ma ianan laho marsaran. Hape itonggor sidea ma dong halak na mabuei na mangirikkon sidea. Gabe holong ma uhur ni Jesus mangidah halak ai. Halani ai, iajarhon ia ma ‘buei podah’ bani sidea. (Basa Markus 6:34.) Mase ma ra ia marbarita hassi pe domma loja? Halani ibayangkon Jesus do dirini songon halak na mabuei ai. Sarupa do sidea ai songon biribiri na so adong parmahanni. Itonggor Jesus ma bahat tumang sitaronon ni sidea janah lang dong pangarapanni. Ai ma na mangojur ia laho mangurupi sidea. Sonai do homa halak sonari on. Age pe idahon songon na marmalas ni uhur sidea, tapi sasintongni totap do marsitaronon sidea. Ihatahon si Paulus seng marpangarapan sidea halani lang mananda Naibata. (Ep. 2:12) Isarupahon do sidea ai songon na mardalan i “dalan hu hamagouan”. (Mat. 7:13) Anggo irimangi hita ai, tontu gabe holong do homa uhurta bani sidea janah sihol hita mangurupi sidea. Sada carani hita patuduhkon holong, ai ma mangurupi sidea marlajar Bibel.

9. Domu bani Pilippi 2:13, sonaha Jahowa boi mangurupi nasiam?

⁹ Sipata dong do na lang ra mangurupi halak marlajar Bibel halani mamingkiri tontu bahat do holi panorangni bois hujai. Umpamani, maningon ibere ma panorang laho persiapan ampa mangajari halak ai marlajar Bibel. Anggo sonai do pangahapmu, patugah ma ai bani Jahowa. Pindo ma hu Bani ase boi ham marhinsah ni uhur mangajari halak gabe susian ni Jesus. (Basa Pilippi 2:13.) Apostel Johannes mangkatahon anggo ipindo hita domu bani harosuh ni Naibata, itangihon Ia do ai. (1 Joh. 5:14, 15) Jadi pos ma uhurmu sai urupan ni Jahowa do ham ase boi totap marhinsah ni uhur mambahen halak gabe susian ni Jesus.

10-11. Tantangan aha do na iahapkon piga-piga hasomanta laho mangurupi halak marlajar Bibel?

¹⁰ Domma iulas hita ponting tumang do mangajari halak gabe susian ni Jesus. Tapi, bahat do tantanganni mangkorjahon ai. Ulas hita ma piga-piga tantangan janah sonaha carani mangatasi ai.

¹¹ Domma hurang gogohta. Dong do hasomanta na boritan atap pe na matua. Ai sonai do homa situasi ni nasiam? Anggo sonai, boi do iihutkon nasiam cara na ipakei hita laho marbarita sanggah pandemi COVID-19. Bahat do hasomanta na mangajari parlajar Bibelni marhitei talepon. Jadi age pe lang boi nasiam kaluar hun rumah, boi do igunahon nasiam talepon laho mangurupi parlajar Bibelmu. Anjaha  dong do homa gunani na legan anggo ibahen hita cara sisonai. Dong do halak na ra marlajar Bibel, tapi panorangni anggo lang girah sogod maningon bodari do. Anggo sonai, sosok ma igunahon hita talepon laho mangajari sidea bani panorang ai. Jesus pe borngin-borngin do ia mangajari si Nikodemus halani ijai do adong panorang ni si Nikodemus.​—Joh. 3:1, 2.

12. Aha do na boi mangurupi hita ase pos uhurta mangajari na legan?

¹² Ra do iahap hita lang pandei hita mangajari halak na legan. Nini uhurta maningon pandei do lobei hita ase boi mangajari sidea. Anggo sonai pangahapmu, dong tolu na boi mangurupi ham ase pos uhurmu. Parlobei, dingat ma pos do uhur ni Jahowa boi do ham mangajari halak na legan. (2 Kor. 3:5) Na paduahon, domma iondoskon bani Jesus “sagala kuasa na i nagori atas ampa na i tanoh on”, anjaha ia do na mambere tugas banta laho mangajari halak. (Mat. 28:18) Na patoluhon, boi do ham marlajar humbani hasoman na legan. Jesus pe marlajar humbani Bapani. Humbani Jahowa do ganup na iajarhon ia. Halani ai, tiru hita ma Jesus. (Joh. 8:28; 12:49) Boi do ipindo ham pengawas dinas, perintis, atap pe sahalak parbarita na marpangalaman laho mangurupi ham mambahen parlajaran Bibel. Leganni ai, boi do homa itonggor ham sonaha sidea mangajari parlajar Bibelni.

13. Cara na baru aha do na igunahon hita sonari laho mangurupi halak marlajar Bibel?

¹³ Ra do lang urah mangihutkon cara mangajar pakon publikasi na baru. Sonari publikasi na igunahon laho mangurupi halak marlajar Bibel domma igantih. Domma ipakei hita buku Hagoluhan na Martuah Sadokah ni Dokahni. Bani buku ai lang bahat be paragrap na porlu iulas, tapi bahatan do hita mambahen sungkun-sungkun. Leganni ai, lambin bahat do homa hita manggunahon video ampa publikasi na dong i aplikasi JW Library^®. Halani ai maningon dear ma hita mambahen persiapan. Anggo lape somal nasiam mamakei cara ai, boi do ipindo nasiam hasoman laho mangurupi nasiam. Ra do lang mintor podas boi iihutkon hita cara na baru ai halani sadokah on lang sonai caranta mangajar. Tapi pos ma uhurmu iurupi Jahowa ampa hasoman do nasiam. Anggo domma somal hita mangihutkon cara na baru on, lambin marhinsah ni uhur do hita mangurupi halak marlajar Bibel. Sada perintis mangkatahon, “Sanggah iihutkon hita cara na baru ai, gabe malas do uhur ni parlajar Bibel sonai homa na mangajari sidea.”

14. Anggo i iananta lang bahat halak na ra manjalo baritanta, aha ma na porlu idingat hita humbani 1 Korint 3:6, 7?

¹⁴ Susah mangindahi halak na rosuh marlajar Bibel. Ra do i iananta bahat halak lang marosuh manangar baritanta, atap mintor itulak sidea. Anggo sonai, sonaha ma hita ase totap boi marhinsah ni uhur? Dingat ma boi do sipata mubah situasini tiap halak. Hinan lang tarpingkir sidea bani Naibata, tapi halani dong masalahni gabe tarpingkir ma sidea sonaha pasaloseihon masalah ai. (Mat. 5:3) Dong do homa halak na hinan lang ra manjalo publikasinta tapi sonari domma ra marlajar Bibel. Dingat ma Jahowa do simada sabion ai. (Mat. 9:38) Sihol do Ia ase hita manuan ampa mangarbahi suan-suanan ai. Tapi pitah Ia dassa na boi patubuhkon ai. (1 Kor. 3:6, 7) Porini pe lape dong halak na ra marlajar Bibel, ulang ma etek uhurmu. Sai  ipasu-pasu Jahowa do nasiam anggo totap ringgas mangidangi. *

15. Sonaha ma pangahap ni Jahowa anggo dong halak na ra marlajar Bibel janah ra mangkorjahon na iparlajarisi?

¹⁵ Malas tumang do uhur ni Jahowa sanggah dong halak na ra manjalo hasintongan anjaha mansaritahon ai bani halak na legan. (Pod. 23:15, 16) Anjaha malas do homa uhur-Ni mangidah ganup na ibahen hita laho mangidangi-Si. Umpamani, sanggah pandemi bani tahun dinas 2020, dong 7.705.765 na ra marlajar Bibel pakon hita. Anjaha dong homa 241.994 na ididi. Sidea na baru ididi ai pe marusaha do homa mangurupi halak na legan gabe susian ni Jesus. (Luk. 6:40) Tontu malas tumang do uhur ni Jahowa mangidah haringgasonta laho mangurupi halak gabe susian ni Jesus.

16. Aha do na sihol bahenonta?

¹⁶ Age pe lang urah mangurupi halak gabe susian ni Jesus, tapi marhitei pangurupion ni Jahowa boi do ihorjahon hita ai. Jadi marusaha ma hita mangurupi apala sahalak laho marlajar Bibel. Halani ai ise pe na jumpahta boi do iojur hita sidea marlajar Bibel. Pos ma uhurta ipasu-pasu Jahowa do na ibahen hita ai.

17. Sonaha ma pangahapta anggo dong halak na iurupi hita marlajar Bibel?

¹⁷ Sada hasangapon do banta boi marbarita ampa mangajari halak gabe susian ni Jesus. Anjaha malas tumang do uhurta mangkorjahon ai. Sonai do homa pangahap ni si Paulus, bahat do halak na i Tessalonika na iurupi ia gabe susian ni Jesus. Nini do, “Ai ise do pangarapan bannami, malas ni uhur ampa sortali puji-pujian sobali nasiam i lobei ni Tuhanta Jesus Kristus bani parrohni ai? Tongon, nasiam do hasangapon ampa malas ni uhur bannami.” (1 Tes. 2:19, 20; Lah. 17:1-4) Sonari on pe bahat do homa hasomanta na sonai pangahapni. Umpamani, si Stéphanie pakon suamini, domma bahat na iurupi sidea marlajar Bibel ronsi ididi. Nini sidea, “Lang dong malas ni uhur na sibanggalan sobali mangurupi halak mananda Jahowa ronsi ididi.”