1. Aha do na masa anggo dong halak na marpangahap gijangan ia marimbangkon na legan?

BAHAT do halak i dunia on marusaha gabe gijangan marimbangkon na legan. Umpamani, anggo dong pebisnis na simburu bani pebisnis na legan, ibahen ia do marmasam cara ase bisnisni ai lobih maju marimbangkon na legan. Lang mahua pangahapni mambahayahon halak na legan, asal ma usahani ai maju. Dong homa atlet na simburu bani atlet na legan. Halani ai, marusaha ma ia mambahayahon na legan ase ia na monang. Dong homa anak sikolah halani sihol masuk hu universitas na jago, ibahen ia ma marmasam cara age pe ai lepak asal ma boi ia masuk hujai. Tapi “horja ni daging” do sisonai. (Gal. 5:19-21) Age pe sonai, dong piga-piga halak i kuria na mangahap gijangan dirini marimbangkon na legan. Aha do na mambahen sidea gabe sonai? Ulas hita ma ai bani artikel on.

2. Aha do na laho iulas hita bani artikel on?

² Bani artikel on iulas hita ma aha do na mambahen sasada halak mangahap gijangan dirini marimbangkon na legan. Dob ai iulas hita use pasal juakjuak ni Naibata na lang ra pajuntul-juntulhon dirini. Tapi ulas hita lobei pingkiran na sonaha do na porlu ipadaoh hita.

3. Sungkun-sungkun aha do na porlu irimangi hita?

³ Porlu tumang do ipareksa hita sonaha ibagas uhurta. Jadi rimangi ma sungkun-sungkun on, ‘Ai huahap do lobihan  ahu marimbangkon na legan halani bahat keterampilanku? Aha do tujuanku ringgas mangidangi? Ai ase dear do ahu itonggor buei halak atap halani holongku bani Jahowa a?’ Mase porlu irimangi hita sungkun-sungkun ai? Pardiateihon ma aha na ihatahon Bibel.

4. Domu bani Galatia 6:3, 4, mase lang dear anggo ibandingkon hita dirinta pakon na legan?

⁴ Bani Bibel ihatahon, lang dear anggo ibandingkon hita dirinta pakon halak na legan. (Basa Galatia 6:3, 4.) Mase? Halani anggo ibotoh hita bahatan keterampilanta marimbangkon na legan, gabe gijang ma uhurta. Tapi anggo itonggor hita lang dong keterampilanta, gabe maretek ni uhur ma hita. (Rom 12:3) Botou Katarina, * na tading i Junani mangkatahon, “Hinan gati do hubandingkon diringku pakon sanina botou na jenges, na pandei, ampa na basar. Dobkonsi ai, huahap ma lang maharga diringku.” Dingat hita ma, sedo halani hapandeion atap jenges hita ase itogu Naibata hita hu organisasi-Ni. Tapi halani ididah Ia do holong ni uhurta hu Bani janah ra hita manangihon parentah ni Anak-Ni.​—Joh. 6:44; 1 Kor. 1:26-31.

5. Aha do na boi iparlajari hita humbani pangalaman ni si Hyun?

⁵ Rimangi ma sungkun-sungkun on: “Sonaha do pandapot ni sanina botou pasal ahu? Ai ididah sidea do ahu halak na rosuh mardamei atap na rosuh martinggili?” Pardiateihon ma pangalaman ni Sanina Hyun hun Korea Selatan. Hinan, ianggap ia do ganup sintua i kuria ai sainganni. Nini ma, “Gabe lang marosuh ahu mangidah sidea. Janah gati do ahu lang setuju bani hata ni sidea.” Tapi nini use, “Halani parlahoungku ai, lang marsada be kuria.” Ujungni iurupi hasomanni ma ia mambahen hamubahon. Sadar ma ia domma lepak hape ia. Sonari domma gabe sintua na bujur si Hyun. Jadi anggo urah-urah hita mambandingkon diri pakon na legan, porlu do hita mambahen hamubahon.

6. Domu bani Galatia 5:26, aha do na mambahen sasada halak mangahap gijangan do ia marimbangkon na legan?

⁶ Basa Galatia 5:26, NW. Aha do na mambahen sasada halak mangahap gijangan ia marimbangkon na legan? Ai ma anggo margijang ni uhur ia anjaha latei bani na legan. Anggo gijang uhurni pitah dirini sandiri dassa na iparuhurhon, lang be halak na legan. Anggo latei ia mangidah halak, gabe sihol ma ia mambuat aha na dong bani halak ai. Janah marosuh do ia ase magou ganup na dong bani halak ai. Anjaha gabe sogam do uhurni bani halak ai. Tontu lang ra hita margijang ni uhur atap latei mangidah na legan.

7. Mase gabe sambor ujungni anggo hita margijang ni uhur atap latei mangidah halak na legan? Bahen ma sada limbaga!

⁷ Sasada halak na lalab gijang maruhur atap latei mangidah na legan, isarupahon do ai songon burbur atap pe rayab na dong i baroti bumbungan ni rumah. Dokah-dokah, gabe hancur do baroti ai. Sonai do homa halak na lalab margijang ni uhur. Mungkahni mangidangi Jahowa do ia. Tapi anggo lalab ia margijang ni uhur atap latei bani na legan gabe sambor do ujungni. (Pod. 16:18) Dokah-dokah lang be ra ia mangidangi Naibata anjaha ibahen ia do holi na masambor  bani na legan. Jadi, aha do na porlu bahenonta ase ulang sonai?

8. Aha do na boi mangurupi hita ase ulang be margijang ni uhur?

⁸ Aha do na boi mangurupi hita ase ulang margijang ni uhur? Ihutkon hita ma podah ni apostel Paulus bani halak Pilippi. Nini do, “Ulang ma maruhur haut atap marhasangapon na lumei, tapi ibagas toruh ni uhur hira nasiam ma hasoman nasiam lobihan humbani nasiam sandiri!” (Pil. 2:3) Jadi, maningon ihira hita ma hasomanta lobihan marimbangkon hita. Anggo ibahen hita sonai, malas do uhurta halani igunahon sidea do keterampilanni laho mangidangi Naibata. Leganni ai, anggo dong keterampilanta, ihutkon hita homa podah ni si Paulus ai. Marusaha ma hita mangidah na dear humbani halak na legan. Hasilni gabe marsada anjaha mardamei ma kuria.

9. Sonaha carani ase hita ulang latei bani halak na legan?

⁹ Sonaha carani ase hita ulang latei bani halak na legan? Marusaha ma hita totap martoruh ni uhur. Anggo martoruh ni uhur hita, tontu lang ra hita pajuntul-juntulhon dirinta. Tapi ra do hita marlajar humbani sanina botou. Umpamani, anggo dong ididah hita sanina na pandei marambilan, tontu isungkun hita ma ia sonaha carani mambahen persiapan na dear. Leganni ai, anggo dong itonggor hita sada botou na pandei marmasak, tontu ra do hita mangindo ia mangajari hita. Anjaha anggo dong na maposo na sunsah pangahapni bergaul pakon na legan, boi do isungkun ia sanina botou na bahat hasomanni. Anggo sonai ibahen hita, lang gabe latei hita bani halak na legan. Anjaha gabe lambin pandei ma hita.

10. Tantangan aha do na roh bani si Gideon?

¹⁰ Pardiateihon ma aha na masa bani si Gideon hun suku Manasse pakon halak Efraim. Iurupi Jahowa do si Gideon pakon 300 hasomanni monang sanggah marporang. Tapi dobkonsi ai, roh ma halak Efraim  manjumpahi si Gideon. Manggila ma sidea bani si Gideon halani lang iarahkon ia sidea marporang. Sihol do halak Efraim ai ase hormat suku Manasse hubani sidea. Lang idingat sidea anggo si Gideon ai marporang laho pasangapkon goran ni Naibata janah manlinggomi halak Israel humbani munsuh.​—Panguh. 8:1.

11. Aha do na ihatahon si Gideon hubani halak Efraim?

¹¹ Tapi ihatahon si Gideon ma bani halak Efraim ai, “Aha ma na hubahen in anggo na partimbangkon hubani na binahen nasiam?” Ihatahon si Gideon do homa bahat do pasu-pasu na dob ibere Jahowa bani halak Efraim. Dob ai “mahombun ma ringis ni sidea dompaksi”. (Panguh. 8:2, 3) Tangkas ma martoruh ni uhur do si Gideon ai. Marusaha do ia mardamei pakon halak Efraim ai.

12. Aha do na boi iparlajari hita humbani contoh ni halak Efraim pakon si Gideon?

¹² Aha ma parlajaranni hubanta? Ulang ma hita songon halak Efraim na mangindahi hasangapon bani dirinta sandiri. Tapi Jahowa ma na ipasangap hita. Sintua pakon kopala kaluarga boi do marlajar humbani si Gideon. Anggo dong itonggor hita borit uhur ni halak halani hita, pingkirhon ma mase sonai pangahap ni sidea. Puji ma pambahenan ni sidea na madear. Tongon lang urah mangkorjahon ai, tarlobih anggo sedo hita na marsalah. Jadi, maningon martoruh ni uhur do hita. Dingat hita ma dearan do hita mardamei pakon na legan, marimbangkon mangindahi ise na sintong ampa na salah.

13. Tantangan aha do na roh bani si Hanna, janah aha do na ibahen ia?

¹³ Rimangi ma homa contoh ni si Hanna, istri ni si Elkana hun suku Levi. Dong dua istri ni si Elkana. Na sada nari, ai ma si Peninna. Holongan do si Elkana bani si Hanna. Tapi lang dong anak si Hanna, anggo si Peninna dong. Halani ai iejek si Peninna ma torus ia. Ujungni gabe seda ma uhur ni si Hanna. “Sai tangis ma ia anjaha seng ra mangan”. (1 Sam. 1:2, 6, 7) Tongon lang dong ipatugah bani Bibel, gabe mardomdom do si Hanna halani ai atap lang. Tapi ipatugah ia do ganup na ibagas uhurni bani Jahowa. Pos do uhurni iurupi Jahowa do holi ia. Age pe lang ibotoh hita gabe mubah do si Peninna atap lang, tapi anggo si Hanna lang be marpusok ni uhur ia. Gabe damei do uhurni.​—1 Sam. 1:10, 18.

14. Parlajaran aha do na boi idapot hita humbani si Hanna?

¹⁴ Parlajaran aha do na boi idapot hita humbani si Hanna? Anggo dong halak na pajuntul-juntulhon dirini hubanta, ulang  ma ibalas hita sidea. Dingat ma lang dear anggo ibalas hita na jahat pakon na jahat. Tapi marusaha ma hita totap mardear pakon halak ai. (Rom 12:17-21) Porini pe totap lang dear pambahenanni, tapi anggo hita totap do damei pangahapta.

15. Aha do na sarupa humbani si Paulus pakon si Apollos?

¹⁵ Na parpudi, iulas hita ma sitiruon humbani si Apollos pakon si Paulus. Sasintongni haduasi sidea bagas do pangarusionni pasal Na Tarsurat in. Itanda buei halak do homa sidea anjaha pandei do sidea mangajari. Leganni ai, bahat do homa na dob iurupi sidea gabe susian ni Jesus. Age pe sonai lang simburu sidea samah sidea.

16. Halak na sonaha do si Apollos ai?

¹⁶ “Tubuh i huta Aleksandria” do si Apollos. Hinan ijai ma dong sikolah na sidearan. Jadi pandei do si Apollos mangajari. Anjaha bagas do pangarusionni pasal Na Tarsurat in. (Lah. 18:24) Sanggah roh ia hu kuria Korint, dong piga-piga na mangkatahon rosuhan do sidea mangidah si Apollos marimbangkon si Paulus. (1 Kor. 1:12, 13) Ai gabe gijang do uhur ni si Apollos halani ai? Lang. Buktini, isuruh si Paulus do ase roh use si Apollos hu kota Korint. (1 Kor. 16:12) Anggo gijang uhur ni si Apollos, lang mungkin isuruh si Paulus ia hujai. Tangkas ma dear do igunahon si Apollos keterampilanni. Igunahon ia do ai laho marbarita ampa patoguhkon sanina botou. Leganni ai, halak na toruh maruhur do homa ia. Sanggah ‘ipatorang si Akilla ampa si Priskilla lambin tangkas pasal dalan ni Naibata’ hu bani, ra do ia manjalo ai.​—Lah. 18:24-28.

17. Hunja ibotoh hita anggo si Paulus marusaha manjaga kuria totap marsada?

¹⁷ Ibotoh si Paulus do bahat do na dear  na dob ihorjahon si Apollos. Tapi lang simburu si Paulus hu bani. Totap do martoruh ni uhur si Paulus. On boi ibotoh hita humbani suratni hubani halak Korint. Sanggah ai dong piga-piga halak na mangkatahon “susian ni si Paulus do ahu”. Tapi lang marosuh ia manangar ai. Hubani Jahowa ampa Jesus do ibere ia ganup pujian.​—1 Kor. 3:3-6.

18. Domu bani 1 Korint 4:6, 7, aha do na boi iparlajari hita humbani si Apollos pakon si Paulus?

¹⁸ Aha do na boi iparlajari hita humbani si Apollos pakon si Paulus? Ra do bahat na boi ibahen hita ibagas pangidangion, janah bahat homa na iurupi hita ronsi ididi. Tapi dingat ma halani pangurupion ni Jahowa do boi ibahen hita ganupan ai. Leganni ai, marusaha ma hita manjaga kuria totap marsada janah mardamei. Tontu malas do uhurta mangidah sintua ampa siparugas i kuria na marusaha manjaga kuria totap marsada. Sai tongtong do igunahon sidea Bibel laho mamodahi. Lang homa marusaha sidea pasangapkon dirini sandiri. Tapi iurupi sidea do sanina botou mandalankon parentah ni Jesus.​—Basa 1 Korint 4:6, 7.

19. Aha do na sihol bahenonta ganup? (Tonggor ma kotak “ Ulang ma Ibanding-bandingkon Hita Halak na Legan”.)

¹⁹ Ibere Naibata do keterampilan hubanta ganup. Halani ai, gunahon hita ma ai laho mangurupi na legan. (1 Ptr. 4:10) Tapi ra do nini uhurmu, pitah otik dassa na tarbahen ham laho mangurupi halak. Anggo sonai, rimangi ma songon batu bata na ipakei laho pajongjongkon sada rumah. Age pe etek sada batu bata, tapi anggo isusun ai bahat, boi do ai gabe sada rumah. Sonai ma homa, age pe otik dassa na tarbahen ham, tapi boi do ai mangurupi kuria totap marsada. Jadi ulang ma hita sihol gabe sigijangan marimbangkon na legan. Tapi marusaha ma hita manjaga kuria totap marsada janah mardamei.​—Ep. 4:3.