Sihol do Jahowa ase sidea na marhajabuan tongtong marmalas ni uhur janah totap martahan parhajabuanni. (Mat. 19:4-6) Anggo sihol nasiam marhajabuan, sonaha nasiam mangindahi halak na sosok? Ihutkon ma prinsip ni Bibel. Jahowa do na mambere prinsip ai hubanta. Anggo iihutkon hita prinsip-Ni ai gabe marmalas ni uhur ma hita, halani Ia do sitompa hita. Jadi Ia do na mambotoh sonaha carani ase kaluarga boi martuah.

Na parlobei dingat hita ma prinsip on, “Sipaoto-oto do uhur ni jolma, lobih humbani haganup na legan; jahat tumang, ise ma na boi mananda in?” (Jer. 17:9) Somalni, anggo sasada halak domma marosuh tumang bani halletni, gabe hujai ma lalab pingkiranni. Gabe sihol ma ia ase podas marhajabuan hape lape itanda sonaha sasintongni halletni. Ai ma na mambahen bahat halak lang martuah parhajabuanni. (Pod. 28:26) Halani ai ulang ma mintor podas-podas mambahen keputusan atap janji, anggo lape itanda sonaha sasintongni halletni ai.

Podah 22:3 mangkatahon, “Halak na pantas mangidah parmaraan, jadi marponop ma ia; tapi halak na oto itoruskon do langkahni, gabe manaron.” Aha do bahayani manggunahon situs mencari jodoh? Bahat do halak manggunahon situs ai laho mangindahi hallet. Tapi dobkonsi marhallet sidea, ibotoh ia ma domma hapeni ioto-otoi ia. Na leganni, dong halak na mangarang-ngarang identitasni bani situs ai hape sasintongni lang tongon sonai. Ibahen ia sonai ase mandapot duit do ia. Sipata dong do homa na mangkatahon ia Saksi Jahowa, hape sasintongni lang.

Pingkirhon ma homa bahaya na legan. Dong situs ai na manggunahon program komputer laho patuduhkon ise do na sosok gabe pasangan ni sasada halak. Tapi lang boi ihaporsayai hita program komputer ai. Jolma do na mambahen program ai. Tontu lang ra hita manggunahon program ai laho mambahen keputusan na serius, tarlobih laho mangindahi pasangan. Pitah prinsip ni Bibel do na boi ihaporsayai hita laho mambahen keputusan na dear.​—Pod. 1:7; 3:5-7.

 Prinsip na legan dong bani Podah 14:15, “Halak na bodoh porsaya do bani sagala sahap, tapi halak na maruhur itimbangi do langkah-langkahni.” Anggo sasada halak sihol marhajabuan, maningon dear do itanda ia halletni ai. Tapi sonaha ma ia boi tongon-tongon mananda halletni ai anggo pitah marhitei Internet dassa sidea marsahap? Ra do boi itonggor ia informasi pasal halak ai humbani situs ai. Tapi sedo artini ai tongon-tongon ia manandasi. Halani dong do halak na marsitandaan marhitei Internet, tapi dobkonsi pajumpah sidea, gabe tarsonggot ma ia halani lang songon na i situs ai halak na ijumpahini ai.

Panurat ni psalmen mangkatahon, “Seng ongga hundul ahu pakon siparladung, anjaha seng marsaor ahu pakon sipakulah-kulah.” (Ps. 26:4) Dong na marpingkir lang salah itambah-tambahi ia keterangan pasal dirini ase bahat na marosuh hu bani. Hassi pe hita gati mangirim pesan marhitei situs ai, lape tontu ibotoh hita sonaha parlahouni na sasintongni. Ra do adong na mangkatahon anggo ia Saksi Jahowa. Tapi rimangi ma on, ‘Ai tongon do domma ididi ia? Ai orot do parhasomananni pakon Jahowa? Ai sonaha do parlahouni? Ai gabe sitiruon na dear do ia atap sambor do parlahouni? (1 Kor. 15:33; 2 Tim. 2:20, 21) Anggo mangihutkon prinsip ni Bibel, ai domma boi ia marhajabuan?’ Maningon irimangi nasiam do ganupan ai. Ase boi ibotoh nasiam ai, maningon isungkun nasiam ma ai bani halak na manandasi. (Pod. 15:22) Tontu lang ra nasiam marhajabuan pakon na lang sisombah Jahowa.​—2 Kor. 6:14; 1 Kor. 7:39.

Tangkas ma bahaya do manggunahon situs mencari jodoh. Tapi sonaha ma nasiam boi mangindahi halak na sosok? Dong cara na dear laho mananda sasada halak. Umpamani, boi do nasiam marsitandaan pakon Saksi na legan sanggah i partumpuan, kebaktian, atap pe acara na leganni.

Tongon halani pandemi COVID-19 on, lang boi hita pajumpah pakon halak na legan. Tapi igunahon hita do Internet laho mambahen acara partumpuan. Ijai ma nasiam boi mananda sanina botou na lape marhajabuan. Humbani komentarni, boi do itonggor nasiam ai orot do parhasomananni pakon Jahowa atap lang. (1 Tim. 6:11, 12) Anjaha boi do homa nasiam marsahapi pakonsi i breakout room dob salosei acara partumpuan. Marhitei ai ma homa boi itanda nasiam sonaha paruhuranni atap pe sonaha pambahenanni bani halak na legan. (1 Ptr. 3:4) Anggo lambin itanda nasiam ia, gabe ibotoh nasiam ma ai sarupa do cita-cita ni nasiam, janah ai boi do ia gabe pasanganmu na dear atap lang.

Anggo iihutkon nasiam prinsip ni Bibel laho mangindahi pasangan, gabe martuah ma holi parhajabuanmu. Sosok ma ai songon podah on, “Halak na dapotan parinangon [atap pe paramangon], jumpahan na madear do, jumpahan idop ni uhur do ia humbani Jahowa.”​—Pod. 18:22.