1. Aha ma na mintor ibahen Jahowa dob mardousa si Adam pakon si Hawa? (1 Musa 3:15)

 DOBKONSI mardousa si Adam pakon si Hawa, mintor ipatugah Jahowa ma sada panjahaion na marisi janji hubani ginompar ni sidea. Panjahaion ai isurat bani 1 Musa 3:15.​—Basa.

2. Mase panjahaion na isurat bani 1 Musa 3:15 ponting tumang?

² On ma panjahaion na parlobei sahali isurat ibagas Bibel, janah ponting tumang do panjahaion ai. Mase? Halani aha na isurat bani 1 Musa 3:15 gabe tema utama ni Bibel. Anjaha markaitan hujai do ganup buku na dong ibagas Bibel. Tema utama ni Bibel ai ma dong Sipaluah na isuruh Naibata laho manripaskon Sibolis ampa haganup pangihutni. * Sanggah saud panjahaion ai, gabe marmalas ni uhur ma ganup na manombah Jahowa!

3. Aha ma na laho iulas hita bani artikel on?

³ Bani artikel on, holi iulas hita ma balos ni sungkun-sungkun na markaitan bani panjahaion na isurat i 1 Musa 3:15: Ise do deba na isobut bani panjahaion ai? Sonaha panjahaion ai saud? Anjaha aha ma gunani ai hubanta?

4. Ise do “ulog” ai, janah hunja ibotoh hita ai?

⁴ Bani 1 Musa 3:14, 15 dong ipatugah “ulog”, “ginompar” ni ulog, “naboru”, pakon “ginompar” ni naboru ai.  Ipatorang do bani Bibel ise sidea. * Sonari ulas hita ma lobei ise “ulog” ai. Tontu sedo ulog na dong i taman Eden ai halani pasti lang iarusi ia aha na ihatahon Jahowa. Jadi ise do sasintongni na iuhum Jahowa? Bani Pangungkabon 12:9 tangkas do ipatorang ise ulog ai. Ijai ihatahon anggo “ulog na basaia” ai ma Sibolis. Tapi ise ma na gabe ginompar ni ulog ai?

5. Ise do na tarmasuk ginompar ni ulog ai?

⁵ Sipata igunahon do kata ginompar bani sasahalak na pas tumang maniru halak na legan. Jadi isobut ma ia anak ni halak ai. Halani ai, tontu ginomparni Sibolis tarmasuk ma ai malekat-malekat na lang setia, pakon jolma na songon Sibolis na manlawan hubani Jahowa janah mamparburu juakjuak-Ni. Contohni malekat-malekat na manadingkon tugasni i surga bani panorang ni si Noak pakon halak na marparlahou songon Sibolis.​—1 Mus. 6:1, 2; Joh. 8:44; 1 Joh. 5:19; Jud. 6.

6. Mase boi ihatahon hita anggo “naboru” ai sedo si Hawa?

⁶ Sonari, ulas hita ma ise do “naboru” ai. Lang mungkin naboru ai si Hawa. Mase? Pardiateihon ma alasanni. Bani panjahaion ai ihatahon “lisatkonon” ni ginompar ni naboru ai do holi ulu ni ulog ai. Songon na dob iulas hita Sibolis do ulog ai. Tontu lang mungkin ginompar ni si Hawa na lang sempurna boi manripaskon ia. Jadi, sonaha ma holi Sibolis iripaskon?

7. Domu bani Pangungkabon 12:1, 2, 5, 10, ise ma naboru na isobut bani 1 Musa 3:15?

⁷ Bani buku pangungkabon ipatugah  do ise naboru na isobut bani 1 Musa 3:15. (Basa Pangungkabon 12:1, 2, 5, 10.) On sedo naboru na i tanoh on! Halani ihatahon dong bulan i toruh ni naheini, janah dong 12 bintang sortali ni uluni. Itubuhkon naboru ai ma Harajaon ni Naibata. Halani i surga do Harajaon ni Naibata, tontu i surga do homa naboru ai. Jadi, naboru ai manggambarhon organisasi ni Jahowa, tarmasuk malekat-malekat na setia.​—Gal. 4:26.

8. Ise do ginompar ni naboru ai, anjaha nantigan do ia ilantik gabe ginompar ni naboru ai? (1 Musa 22:15-18)

⁸ Bani Bibel ipatugah do homa ise ginompar ni naboru ai. Marhitei panjahaion ihatahon humbani ginompar ni si Abraham do ia. (Basa 1 Musa 22:15-18.) Tongon, humbani ginompar ni si Abraham do Jesus. (Luk. 3:23, 34) Halani ihatahon maningon lisatkononni do Sibolis, tontu daoh do gogohan ia marimbangkon jolma. Sanggah marumur 30 tahun, ilantik ma Jesus marhitei tonduy na pansing. Sanggah ai ma Jesus gabe ginompar ni naboru ai. (Gal. 3:16) Dobkonsi matei ia anjaha ipapuho, “hasangapon ampa hamuliaon do isortalihon” Naibata hu bani, anjaha iondoskon do bani “sagala kuasa na i nagori atas ampa na i tanoh on”, tarmasuk ma kuasa “laho mansedahon horja ni Sibolis”.​—Heb. 2:7; Mat. 28:18; 1 Joh. 3:8.

9-10. (a) Ise ma deba nari ginompar ni naboru ai, janah nantigan do sidea ilantik gabe ginompar ni naboru ai? (b) Aha ma use na laho iulas hita?

⁹ Sobali Jesus, dong ope ginompar ni naboru ai. Pardiateihon ma na ihatahon Apostel Paulus hubani halak Kristen na iminaki bani panorang ai. Ia mangkatahon, “Anggo Kristus simada nasiam, ginompar ni si Abraham do nasiam, anjaha panean mangihutkon bagah-bagah in.” (Gal. 3:28, 29) Sanggah ilantik Jahowa sasahalak marhitei tonduy na pansing, gabe ginompar ni naboru ai ma ia. Jadi, ginompar ni naboru ai, ai ma Jesus Kristus pakon 144.000 halak na laho mamarentah rap pakonsi. (Pangk. 14:1) Marusaha do sidea ganupan maniru Naibata Jahowa, Bapani.

¹⁰ Domma iulas hita ise do tokoh-tokoh na imaksud bani 1 Musa 3:15. Sonari ulas hita ma aha do na dob ibahen Jahowa laho manggoki panjahaion ai anjaha aha ma gunani ai banta.

11. Aha do artini sanggah ihatahon ipagut “tambihul” ni ginompar ni naboru ai?

¹¹ Domu bani panjahaion i 1 Musa 3:15, paguton ni ulog ai do “tambihul” atap tumit ni ginompar ni naboru ai. Panjahaion ai saud sanggah igunahon Sibolis halak Jahudi pakon halak Rom mamunuh Anak ni Naibata. (Luk. 23:13, 20-24) Anggo luka tumit ni sasahalak lang boi ia mardalan, tapi tongkin dassa ai. Sonai ma homa, sanggah matei Jesus hira-hira tolu ari, lang adong na boi ibahen ia sadokah ai.​—Mat. 16:21.

12. Sonaha anjaha antigan do iropukkon ulu ni ulog ai?

¹² Panjahaion 1 Musa 3:15 patuduhkon lang sadokah ni dokahni Jesus matei. Mase? Halani bani panjahaion ai ihatahon lisatkononni atap iropukkon do ulu ni ulog ai. On artini malum do luka ni Jesus atap ipapuho do ia. Janah tongon do masa ai! Bani ari patoluhon dobkonsi matei, ipapuho ma Jesus laho manggoluh i surga janah lang boi be ia matei.  Anjaha Kristus pakon ganup halak na rap mamarentah pakonsi manripaskon munsuh-munsuh ni Naibata, ai ma ginompar ni ulog ai. (Pangk. 17:14; 20:4, 10) Dob ai, bani panorang na dob itontuhon Naibata, iripaskon Jesus ma Sibolis.​—Heb. 2:14. *

13. Aha ma guna na iahapkon hita halani saud panjahaion ai?

¹³ Anggo domma mangondoskon diri nasiam hubani Naibata, tontu iahapkon nasiam ma gunani panjahaion na dob saud ai. Sanggah Jesus i tanoh on, sempurna do itiru ia sifat-sifat ni Bapani. (Joh. 14:9) Halani ai, anggo iparlajari hita pasal Jesus, gabe boi ma itanda hita Jahowa anjaha ihaholongi hita Ia. Leganni ai, adong do homa guna na iahapkon hita humbani ajaran ampa tugah-tugah na ibere Jesus marhitei kuria. Iajari do homa hita sonaha pamalaskon uhur ni Jahowa. Anjaha boi do homa hita mandapot guna humbani hamatean ni Jesus na igambarhon gabe luka bani tumitni. Mase? Dobkonsi Jesus ipapuho, ijalo Jahowa ma nilai galangan tobusanni na sempurna. Halani ai gabe ‘ipaborsih ma hita humbani sagala dousa’.​—1 Joh. 1:7.

14. Hunja ibotoh hita anggo panjahaion na ipatugah Jahowa i Taman Eden lang mintor saud bani panorang ai?

¹⁴ Panjahaion na ipatugah Jesus i Taman Eden lang mintor saud bani panorang ai. Porlu do panorang bani naboru ai laho manubuhkon ginomparni. Porlu do homa panorang bani Sibolis laho patumpuhon pangihutni ronsi marmunsuh (atap, mardomdom) haduasi pihak ai. Anggo iarusi hita panjahaion on, gabe ibotoh hita ma tongon ihasogamkon dunia na i rajai Sibolis on do juakjuak ni Jahowa. Hinan pe ongga do ipasingat Jesus susianni pasal ai. (Mrk. 13:13; Joh. 17:14) Anjaha domma ididah hita saud do panjahaion ai sonari on, tarlobih 100 tahun na parpudi on. Aha ma na masa?

15. Mase lambin ihasogamkon dunia on hita, tapi mase lang porlu mabiar hita hubani Sibolis?

¹⁵ Lang piga dokah dobkonsi Jesus gabe raja i Harajaon ni Naibata bani tahun 1914, idabuhkon ma Sibolis hun surga. Sonari pitah i tanoh on dassa ia janah ibotoh tongkin nari iripaskon mando ia. (Pangk. 12:9, 12) Halani ai, gabe marah tumang ma Sibolis, janah iparburu ma juakjuak ni Naibata. (Pangk. 12:13, 17) On do na mambahen ase lambin ihasogamkon hita. Tapi lang porlu mabiar hita hubani Sibolis pakon pangihutni. Dos do pangahapta songon na ihatahon Apostel Paulus, “Anggo Naibata hasomanta, ise ma imbangta?” (Rom 8:31) Lambin porsaya do hita hubani Jahowa halani domma bahat saud panjahaion na isurat bani 1 Musa 3:15.

16-18. Aha do gunani bani si Edward, si Ursula, pakon si Jessica halani mangarusi panjahaion bani 1 Musa 3:15?

¹⁶ Janji ni Jahowa na isurat bani 1 Musa 3:15 boi mangurupi hita ase totap martahan sanggah adong sitaronon. Si Edward, sahalak misionaris na mangidangi i Guam mangkatahon, “Sanggah adong sitarononku, sipata ra do lang urah huahap totap setia hubani Jahowa. Tapi, sanggah hurimangi panjahaion i  1 Musa 3:15, gabe porsaya ma ahu hubani Bapa na i surga.” Sai tarpaima-ima do si Edward bani janji ni Jahowa na laho pasaloseihon ganup sitarononta.

¹⁷ Si Ursula, botounta na tading i Bavaria i Jerman mangkatahon halani iarusi ia panjahaion bani 1 Musa 3:15, gabe lambin porsaya ma ia humbani Naibata do Bibel ai. Gabe longang do uhurni halani mangidah markaitan do panjahaion ai hubani ganup panjahaion na isurat ibagas Bibel. Nini use, “Sanggah huparlajari panjahaion ai, hubotoh ma mintor ibere Jahowa do pangarapan hubanta. On mambahen lambin banggal holong ni uhurhu hu Bani.”

¹⁸ Si Jessica hun Mikronesia, mangkatahon, “Hudingat do sonaha pangahapku sanggah parlobei sahali jumpah ahu hasintongan. Huidah do sonaha panjahaion na isurat bani 1 Musa 3:15 ai saud. Gabe hubotoh ma sitaronon aha pe na masa hubanta sonari on sedo sura-sura ni Jahowa ai. Gabe ipatoguh do homa uhurhu anggo torus ahu mangidangi Jahowa, gabe martuah ma goluhku sonari, tarlobih bani ari simagira.”

19. Mase pos uhurta saud do holi bagian na parpudi humbani panjahaion ai?

¹⁹ Songon na dob iulas hita, masa ope sonari on panjahaion na isurat bani 1 Musa 3:15. Domma tangkas iarusi hita ise do ginompar ni naboru ai pakon ginompar ni ulog ai. Jesus do ginompar ni naboru ai janah domma malum luka bani tumitni. Sonari domma ipasangap ia gabe Raja janah lang boi be matei ia. Leganni ai domma hampir salosei Jahowa mamilih ganup halak na laho mamarentah rap pakon Anak-Ni i surga. Halani domma saud bagian na parlobei humbani panjahaion ai, tontu pos do uhurta saud do holi bagian na parpudi. Pasti iropukkon do holi ulu ni ulog ai. Sanggah iripaskon Sibolis, marmalas ni uhur ma ganup juakjuak ni Naibata. Tapi paima masa ai, tongtong ma hita setia. Pasaudon ni Naibata do holi ganup janji-Ni. Marhitei ginompar ni naboru ai bereon-Ni do buei pasu-pasu hubani “sagala bangsa na i tanoh on”.​—1 Mus. 22:18.