1. Aha do na ibuktihon situasi ni dunia na masa sonari on, janah mase?

 ANGGO ididah ham ganup parsoalan na masa sonari on, ai porsaya do ham lambin dear do situasi bani ari na laho roh? Sonari on, lang adong be holong ibagas kaluarga. Bahat do halak na lambin jahat, kasar, janah mamontingkon diri. Bahat homa na lang porsaya bani pamarentah. Tapi, ganupan na masa ai sasintongni boi paposkon uhurmu lambin dear do situasi bani ari na laho roh. Mase? Halani parlahou ni sidea ai sosok pakon panjahaion pasal “panorang parpudi” na ipatugah bani Bibel. (2 Tim. 3:1-5) Hunjon tangkas ma anggo panjahaion ai domma saud sonari on. Janah gabe bukti do ai anggo Jesus Kristus domma mulai mamarentah gabe Raja i Harajaon ni Naibata. Tapi adong ope panjahaion na legan pasal Harajaon na domma saud baru-baru on. Anggo iulas hita ai, gabe ipatoguh ma haporsayaonta.

2. Aha ma na laho iulas hita bani artikel on, janah mase? (Tonggor homa hatorangan gambar sampul.)

² Bani artikel on adong tolu na laho iulas hita. Na parlobei, iulas hita ma sada panjahaion na mangurupi hita mambotoh nantigan do Harajaon ni Naibata ai jongjong. Na paduahon, iulas hita ma piga-piga panjahaion na mangurupi hita mambotoh anggo Jesus domma mamarentah hun surga. Anjaha na patoluhon, iulas hita ma panjahaion-panjahaion na patuduhkon sonaha munsuh ni Naibata laho iripaskon. Holi ididah hita ma markaitan do ganup panjahaion  ai, usih songon potongan-potongan kain na ipadomu penjahit laho mambahen sada baju na jenges. Ponting tumang do iparlajari hita on halani hita manggoluh bani panorang sanggah panjahaion ai ipasaud.

3. Aha do na ibotoh hita humbani panjahaion i Daniel 7:13, 14?

³ Humbani panjahaion i Daniel 7:13, 14 ibotoh hita ma anggo Jesus Kristus do Raja na sidearan. Malas do uhur ni sagala bangsa laho mangidangisi, anjaha lang adong na manggantihonsi gabe Raja. Panjahaion na legan bani buku Daniel patugahkon anggo Jesus holi mamarentah bani Harajaon ai bani ujung ni periode na isobut pitu panorang. Ai boi do ibotoh hita nantigan do Jesus gabe Raja?

4. Sonaha Daniel 4:10-17 mangurupi hita laho mambotoh nantigan do Jesus Kristus gabe Raja? (Tonggor homa surat partoruh.)

⁴ Basa ma Daniel 4:10-17. “Pitu panorang” manggambarhon periode 2.520 tahun. Periode ai imulai bani tahun 607 SM, sanggah Babel manaluhon raja na parpudi hun paratas ni Jahowa i Jerusalem. Anjaha marujung do panorang ai bani tahun 1914 M, sanggah Jahowa mambahen Jesus, ai ma “siparhak” gabe Raja bani Harajaon ni Naibata. *​—Hes. 21:30-32.

5. Aha ma gunani anggo iarusi hita panjahaion pasal “pitu panorang” ai?

⁵ Aha do gunani panjahaion ai hubanta? Anggo iarusi hita panjahaion pasal “pitu panorang”, gabe pos ma uhurta saud do ganupan janji ni Jahowa bani panorang na topat. Domma itontuhon Jahowa attigan do bahenon-Ni Jesus gabe Raja, anjaha sanggah roh panorangni bahenon-Ni do ai! Tontu pasaudon ni Jahowa do panjahaion na legan bani panorang na topat. Tongon, “seng tumaram lang saud” ari ni Jahowa.​—Hab. 2:3.

6. (a) Aha do na gabe bukti anggo Jesus domma mamarentah hun surga? (b) Sonaha Pangungkabon 6:2-8 patoguhkon ai?

⁶ Bani sada panorang ongga do ipatugah Jesus bani susianni aha na laho masa i tanoh on, na gabe bukti anggo ia domma mamarentah hun surga. Ihatahon ia masa ma porang, kelaparan, ampa gempa bumi. Ipatugah ia do homa adong ma holi sampar “bani buei nagori”. Songon na baru-baru on, masa ma pandemi COVID-19. Bani Bibel isobut do ganup na masa ai “tanda” paroh ni Kristus. (Mat. 24:3, 7; Luk. 21:7, 10, 11) Lobih humbani 60 tahun dobkonsi hamateanni janah mulak use ia hu surga, ibere Jesus ma panonggoran bani Apostel Johannes laho patoguhkon ganupan ai. (Basa Pangungkabon 6:2-8.) Humbani tahun 1914 mulai ma masa ganupan ai i tanoh on sanggah Jesus gabe Raja.

7. Mase ma lambin parah situasi ni dunia on dobkonsi Jesus gabe Raja?

⁷ Mase ma lambin parah situasi ni dunia on dobkonsi Jesus gabe Raja? Tangkas do ipatugah pasal ai bani Pangungkabon 6:2. Na parlobei sahali ibahen Jesus dobkonsi gabe Raja ai ma marporang. Manlawan ise? Manlawan Sibolis ampa malekat-malekatni. Bani Pangungkabon bindu 12 ihatahon talu ma Sibolis, anjaha idabuh ma ia pakon malekat-malekatni hu tanoh on.  Halani ai, marah tumang ma Sibolis janah iserang ma jolma. Ai do na mambahen gabe ‘mangarou tanoh on’.​—Pangk. 12:7-12, Terjemahan Dunia Baru (NW).

8. Sanggah ididah hita domma saud panjahaion pasal Harajaon, aha ma gunani ai hubanta?

⁸ Aha do gunani panjahaion ai hubanta? Ganup na masa ampa parubahan sifat ni halak sonari on patuduhkon anggo Jesus domma gabe Raja. Jadi, ulang ma marah hita sanggah mangidah lambin jahat parlahou ni halak janah mamontingkon diri. Tapi dingat ma, parlahou ni sidea ai patuduhkon anggo panjahaion ni Bibel domma saud. Tangkas ma domma jongjong Harajaon ni Naibata! (Ps. 37:1) Anjaha lambin dohor Harmagedon, lambin parah ma holi situasi ni dunia on. (Mrk. 13:8; 2 Tim. 3:13) Tontu martarima kasih tumang ma hita halani Jahowa, Bapa na parholong in mangurupi hita laho mangarusi mase bahat tumang parsoalan i tanoh on.

9. Sonaha panjahaion na isurat bani Daniel 2:28, 31-35 patorangkon pasal kuasa dunia na parpudi, anjaha mulai nantigan do ai adong?

⁹ Basa ma Daniel 2:28, 31-35. Ibotoh hita ma domma masa panjahaion ai sonari. Bani nipi ni si Nebukadnesar ipatugah do aha na sihol masa bani ujung ni ari ai, sanggah Kristus mulai mamarentah. Sada humbani munsuh ni Jesus i tanoh on ai ma kuasa dunia na parpudi. Bani Bibel patung Nebukadnesar igambarhon gabe kuasa dunia. Janah ‘nahei humbani bosi ampa tanoh liat’ ma kuasa dunia na parpudi ai. Munsuh ai mulai mamarentah bani Porang Dunia I, sanggah Inggris Raya marsada pakon Amerika  Serikat gabe Kuasa Dunia Anglo-Amerika. Humbani patung ibagas nipi ni si Nebukadnesar taridah ma siotikanni dong dua na mambahen legan kuasa dunia on humbani ganup kuasa dunia na sebelumni.

10. (a) Sonaha panjahaion bani buku Daniel sosok manggambarhon Anglo-Amerika? (b) Humbani aha ma hita porlu jaga? (Tonggor ma kotak “ Ai Ididah Ham do Bahayani?”)

¹⁰ Na parlobei, ihatahon do anggo kuasa-kuasa dunia na sebelumni humbani omas, pirak, atap bosi. Tapi anggo Kuasa Dunia Anglo-Amerika ihatahon humbani bosi pakon tanoh liat. Tanoh liat ai manggambarhon “jolma na simbuei”. (Dan. 2:43, NW) Sonari, tangkas do ididah hita banggal do pangaruh ni rakyat sanggah pemilu, kampanye, demonstrasi, ampa na leganni. On mambahen gabe sunsah ma kuasa dunia on pasaudkon sura-sura ni uhurni.

11. Sonaha parrohni Kuasa Dunia Anglo-Amerika paposkon uhurta anggo hita manggoluh bani ujungni panorang parpudi?

¹¹ Na paduahon, Anglo-Amerika na igambarhon gabe nahei ni patung, ai do kuasa dunia na parpudi na ipatugah bani Bibel. Lang adong be pamarentahan na legan dobkonsi ai. Tapi, iripaskon Harajaon ni Naibata do holi ai i Harmagedon, rap pakon pamarentahan na legan. *​—Pangk. 16:13, 14, 16; 19:19, 20.

12. Bukti aha ope na ipatugah si Daniel na mangapoh janah mambere pangarapan banta?

¹² Aha do gunani panjahaion ai hubanta? Dong ope bukti na legan na ipatugah si Daniel na patuduhkon anggo hita manggoluh bani panorang parpudi. Lobih humbani 2.500 tahun na salpu, si Daniel mangkatahon dobkonsi Babel, adong ompat nari kuasa dunia na manrajai juakjuak ni Naibata. Janah, tangkas ibotoh hita Kuasa Dunia Anglo-Amerika ma na parpudi. Tontu gabe tarapoh do uhurta halani mambotoh lang piga dokah nari iripaskon Harajaon ni Naibata ma ganup pamarentahan ni jolma. Dob ai, mamarentah ma Harajaon ai i tanoh on.​—Dan. 2:44.

13. Manggambarhon aha do raja “na paualuhkon” pakon “sapuluh raja” na isobut bani Pangungkabon 17:9-12, janah sonaha panjahaion ai saud?

¹³ Basa ma Pangungkabon 17:9-12. Bahat tumang do hasedaon na ibahen Porang Dunia I. Halani ai, sihol do pamimpin ni dunia on mambahen ase adong hadameion i tanoh on. Jadi, bani bulan Januari 1920, ibahen sidea ma Liga Bangsa-Bangsa. Dob ai bani bulan Oktober 1945, igantih ma ai gabe Perserikatan Bangsa-Bangsa (PBB). Bani Bibel isobut do organisasi ai raja “na paualuhkon”. Tapi sedo kuasa dunia ai halani humbani pamarentahan politik do kuasani. Bani Bibel isobut do ganup pamarentahan ai “sapuluh raja”.

14-15. (a) Sonaha panonggoran bani Pangungkabon 17:3-5 pasal “Babel na Banggal” saud? (b) Aha ma na ibahen pendukung ni ugama palsu?

¹⁴ Basa ma Pangungkabon 17:3-5. Marhitei panonggoran humbani Naibata, ididah Apostel Johannes ma sada boru jalang, ai ma “Babel na Banggal”, na manggambarhon ganup ugama palsu. Sonaha panonggoran ai saud? Sadokah on idukung ugama palsu do kuasa politik ni dunia on, janah kerja sama do sidea. Tapi, lang piga dokah nari ibahen Jahowa ma hubagas uhur ni pamarentah dunia on sura-sura “laho pasaudkon sura-sura ni uhur ni [Naibata]”. Aha ma hasilni? Iserang anjaha iripaskon “sapuluh raja” ai ma holi ganup organisasi ni ugama.​—Pangk. 17:1, 2, 12, 16, 17.

 ¹⁵ Hunja ibotoh hita domma dohor ujung ni Babel na Banggal ai? Laho mambotoh balosni, dingat hita ma kota Babel na hinan. Ikalilingi Bah Eprat na banggal do kota ai. Bani buku Pangungkabon isarupahon do marjuta pendukung ni Babel na Banggal ai pakon “bah” na banggal. (Pangk. 17:15) Tapi ihatahon use “horah” ma bah ai. On patuduhkon anggo harajaon ni ugama palsu itadingkon pendukungni. (Pangk. 16:12) Sonari saud do panjahaion ai. Bahat do halak na manadingkon ugama anjaha ipindahi sidea do ianan na legan laho pasaloseihon masalahni.

16. Aha do gunani halani ibotoh hita nantigan PBB ibahen pakon attigan Babel na Banggal iripaskon?

¹⁶ Aha do gunani panjahaion ai hubanta? Sanggah ibahen PBB ampa sanggah itadingkon bahat halak ugama palsu, gabe bukti do on anggo hita manggoluh bani panorang parpudi. Age pe bahat halak lang be mandukung Babel na Banggal, tapi sedo ai na mambahen hancur organisasi ni ugama palsu. Songon na ipatugah  nongkan ai, ibahen Jahowa do hubagas uhur ni “sapuluh raja”, ai ma kuasa politik dunia on na mandukung PBB “laho pasaudkon sura-sura ni uhur ni [Naibata]”. Sompong do iripaskon bangsa-bangsa Babel na Banggal, na mambahen tarsonggot dunia on. * (Pangk. 18:8-10) Sanggah iripaskon Babel na Banggal, bahat do pangaruhni ai bani dunia on, janah ra do ai mambahen buei masalah. Tapi lang sonai bani juakjuak ni Naibata. Siotikanni dong dua alasan na mambahen sidea marmalas ni uhur. Lang adong be ugama palsu, na sadokah on gabe munsuh ni Naibata Jahowa. Anjaha ibebaskon ma hita humbani dunia na jahat on!​—Luk. 21:28.

17-18. (a) Sonaha hita boi patoguhkon haporsayaonta? (b) Aha ma na laho iulas hita bani artikel na mangihut?

¹⁷ Si Daniel mangkatahon “gabe tambah ma habotohon”. Anjaha topat do ai! Sonari, domma iarusi hita anggo hita manggoluh bani panorang na parpudi. (Dan. 12:4, 9, 10) Halani topat do saud ganup panjahaion ai, gabe lambin ipasangap hita ma Jahowa janah ihargai hita do Hata-Ni. (Jes. 46:10; 55:11) Halani ai, tongtong ma patoguh haporsayaonmu marhitei ringgas mamparlajari Bibel janah mangurupi halak ase marhasoman orot pakon Jahowa. Iramotkon Ia do ganup halak na marpangunsandeian Bani. Janah ibere Ia do “damei” na manongtong bani sidea.​—Jes. 26:3.

¹⁸ Bani artikel na mangihut iulas hita ma panjahaion pasal kuria Kristen bani panorang parpudi. Songon na laho iparlajari hita, ganup panjahaion ai pe mambuktihon anggo hita manggoluh bani panorang parpudi. Holi iulas hita ma bukti anggo Jesus gabe Rajanta in do na mambobahon ganup susianni na setia.