1. Sonaha pangahapmu pasal martonggo?

 MALAS UHURTA halani ibere Sitompa banta hadiah na maharga tumang. Bayangkon ma: Ija pe hita janah aha pe bahasanta, boi do hita patugahkon aha na ibagas uhurta. Boi do hita martonggo sanggah boritan, atap pe sanggah i penjara. Janah porsaya do hita itangihon Bapanta na parholong in do tonggonta. Tontu martarima kasih tumang do hita bani hadiah ai.

2. Sonaha ma pangahap ni Raja Daud pasal tonggo?

² Maharga tumang do tonggo ai bani Raja Daud. Sanggah mandoding, nini do bani Jahowa, “Doskon dahupa [“na ipasirsir,” Terjemahan Dunia Baru] ma tonggongku i lobei-Mu.” (Ps. 141:1, 2) Bani panorang ni si Daud, dear do ipasirsir malim dahupa na laho igunahon sanggah manombah Jahowa. (2 Mus. 30:34, 35) Songon dahupa na dear ipasirsir, sonai ma tonggo ai bani si Daud. Ipingkirhon ia do lobei aha na laho ihatahonni ibagas tonggo. Sonai ma homa hita, sihol do uhurta ase tonggonta pamalaskon uhur ni Jahowa.

3. Maningon sonaha ma hita sanggah martonggo, anjaha mase?

³ Sanggah martonggo, maningon hormat ma parsahapta. Dingat ma panonggoran ni si Jesaya, si Hesekiel, si Daniel, pakon si Johannes. Panonggoran ni sidea ai, marlegan-legan, tapi dong do na sarupa. Ganup sidea manggambarhon anggo Jahowa ai sahalak Raja na marmulia. Si Jesaya ‘mangidah Jahowa hundul i atas tahta na gijang anjaha na marmulia’. (Jes. 6:1-3) Si Hesekiel mangidah Jahowa hundul i tahta-Ni janah adong ‘na  marsinalsal songon halibitongan i kalilingni’. (Hes. 1:26-28) Si Daniel mangidah adong sahalak “na Adong humbani Sapari” na marpakeian na putih. Hun tahta-Ni dong apuy na marjimbur-jimbur. (Dan. 7:9, 10) Bani panonggoran ni si Johannes, itonggor ia ma Jahowa hundul i tahta-Ni na jenges tumang anjaha adong halibitongan na manginggoti tahta-Ni. (Pangk. 4:2-4) Anggo irimangi hita hamuliaon ni Jahowa, gabe ipasangap hita ma Ia sanggah martonggo. Tapi, aha ma na boi itonggohon hita?

4. Aha do na boi iparlajari hita humbani contoh pasal tonggo na isurat bani Mateus 6:9, 10?

⁴ Basa ma Mateus 6:9, 10. Bani Ambilan i Dolog, iajarhon Jesus do susianni carani martonggo ase marosuh Naibata manangar. Dobkonsi mangkatahon “ase sonon ma tonggonima”, Jesus patugahkon na sipontingan itonggohon janah markaitan do ai bani harosuh ni Jahowa, ai ma: papansingkon goran-Ni; ase roh Harajaon-Ni janah iripaskon ganup munsuh-Ni; pakon pasu-pasu na laho bereon-Ni bani tanoh on ampa bani jolma bani ari simagira. Anggo itonggohon hita ai, on artini ponting do harosuh ni Naibata banta.

5. Ai itangar Jahowa do anggo itonggohon hita na porlu banta?

⁵ Dob ai, iajarhon Jesus do homa ase hita manonggohon na porlu banta. Boi do itonggohon hita ase ibere sipanganonta bani sadari ai, ibere hasasapan ni dousa banta, ipaluah hita humbani parlajouan, ampa ipaluah hita humbani halak na jahat. (Mat. 6:11-13) Anggo ibahen hita sonai, on patuduhkon porlu do banta pangurupion ni Jahowa janah sihol do hita pamalaskon uhur-Ni.

6. Sanggah martonggo, boi do pitah na iajarhon Jesus ai na itonggohon hita?

⁶ Jesus lang mangajarhon ase susianni maniru ganup hata-hatani humbani contoh tonggo. Sanggah martonggo Jesus bani panorang na legan, legan do na ipindo ia halani ai do ponting bani sanggah ai. (Mat. 26:39, 42; Joh. 17:1-26) Sonai ma homa sanggah hita martonggo. Sanggah  hita laho mambahen haputusan, pindo ma hapentaran ampa pangarusion. (Ps. 119:33, 34) Sanggah hita mandapot tugas na sunsah, martonggo ma mangindo pangurupion ase iarusi hita mangkorjahon ai. (Pod. 2:6) Namatoras boi do manonggohon niombahni, sonai homa niombah boi do manonggohon namatorasni. Ganup hita boi manonggohon parlajar Bibelta ampa pangidangionta. Tapi sanggah martonggo, ulang ma pitah mangindo pangurupion tumang.

7. Mase maningon ipuji hita Jahowa ibagas tonggonta?

⁷ Dingat ma, maningon ipuji hita do Jahowa ibagas tonggonta. Lang adong naibata na patut manjalo pujian sobali Jahowa. Naibata ‘pardear layak do Ia ampa marpangulaki do uhur-Ni’. Leganni ai, ‘paridop ni uhur janah parholong do Ia, nanget manringis, gok holong ni uhur-Ni janah parsintong’. (Ps. 86:5, 15) Tontu bahat do alasanta laho mamuji Naibata halani domma ibotoh hita sifat-sifat ampa pambahenan-Ni.

8. Aha alasanni hita martarima kasih bani Naibata? (Psalmen 104:12-15, 24)

⁸ Alasan na legan laho mamuji Naibata ibagas tonggonta ai ma mangkatahon tarima kasih halani domma ipasirsir Ia ganup na porlu banta. Umpamani, martarima kasih do hita halani marmasam warna ni bunga, marmasam sipanganon na sodap, anjaha malas uhurta halani dong hasoman na mangkaholongi hita. Ganupan ai ipasirsir Naibata parholong ase boi hita marmalas ni uhur. (Basa Psalmen 104:12-15, 24.) Na sipontingan, hita martarima kasih halani ibere Ia pangajaran na patoguhkon haporsayaon ampa pangarapanta pasal ari simagira.

9. Aha do na boi mangurupi hita ase idingat hita martarima kasih bani Jahowa? (1 Tessalonika 5:17, 18)

⁹ Bahat do na domma ibere Jahowa banta. Tapi sipata, ra do lupa hita martarima kasih hu Bani. Aha ma na boi mangurupi hita laho mardingat ai? Boi do itulis ham aha na ipindo ham bani Jahowa, janah gati ma pareksa ai ase ibotoh ham sonaha Jahowa mambalosi tonggomu.  Dob ai, hatahon ma tarima kasih bani pangurupion-Ni. (Basa 1 Tessalonika 5:17, 18.) Dingat ma: Malas do uhurta sanggah adong na martarima kasih hubanta. Tontu sonai do homa pangahap ni Jahowa. (Kol. 3:15) Tapi, aha do alasan na sipontingan mase hita porlu martarima kasih bani Naibata?

10. Domu bani 1 Petrus 2:21, mase maningon martarima kasih hita hubani Jahowa?

¹⁰ Basa ma 1 Petrus 2:21. Maningon martarima kasih do hita hubani Jahowa halani domma isuruh Ia Anak na hinaholongan-Ni hu tanoh on laho mangajari hita. Sanggah ibasa hita pasal Jesus, gabe ibotoh hita ma pasal Jahowa ampa sonaha mambahen malas uhur-Ni. Anggo porsaya hita bani tobusan ni Kristus, gabe orot ma parhasomananta pakon Jahowa janah mardamei ma hita pakon-Si.​—Rom 5:1.

11. Mase hita maningon martonggo marhitei goran ni Jesus?

¹¹ Martarima kasih do hita bani Jahowa halani boi martonggo marhitei Anak-Ni. Igunahon Jahowa do Jesus laho mambere pangindoanta. Jadi anggo martonggo hita marhitei goran ni Jesus, itangar anjaha ibalosi Jahowa do tonggonta. Jesus mangkatahon, “Barang aha pe sipindoonnima marhitei goranku, bahenonku do, ase marsangap Bapa in ibagas Anak in.”​—Joh. 14:13, 14.

12. Aha ope alasan na legan mase martarima kasih hita halani Anak-Ni?

¹² Isasap Jahowa do dousanta marhitei tobusan ni Jesus. Bibel mangkatahon anggo Jesus ai ‘sintua ni malimta, na dob hundul i siamun ni paratas ni Hamuliaon i nagori atas’. (Heb. 8:1) Jesus do “sipangapiti banta bani Bapa in”. (1 Joh. 2:1) Martarima kasih tumang do hita bani Jahowa halani domma ibere banta Sintua ni Malim na boi mangarusi hagalekonta, janah na mambahen pangindoan bani Naibata hubanta! (Rom 8:34; Heb. 4:15) Halani lang gokan dear, lang boi hita roh hu lobei ni Jahowa anggo lang adong tobusan ni Jesus. Domma ibere Jahowa hadiah na maharga tumang hubanta, ai ma Anak na hinaholongan-Ni. Tongon, daoh do harganan hadiah ai marimbangkon hata tarima kasihta!

13. Bani borngin paima hamateanni, sonaha Jesus patuduhkon anggo ia mangkaholongi susianni?

¹³ Bani borngin paima hamateanni, ganjang do tonggo ni Jesus bani susianni. Ipindo ia do bani Bapani ‘ase iramotkon sidea dompak Sipangagou’. (Joh. 17:15) On patuduhkon holong tumang uhur ni Jesus bani sidea! Age pe ibotoh ia marsik mando sitarononni, tapi totap do ipingkirhon ia ganup apostelni.

14. Sonaha hita patuduhkon anggo hita mangkaholongi sanina botounta?

¹⁴ Ase boi maniru Jesus, ulang ma pitah na porlu banta na ipingkiri hita. Tapi tonggohon hita ma homa sanina botounta. Sanggah ihorjahon hita ai, artini unduk do hita bani parentah ni Jesus ase marsihaholongan. Anjaha on patuduhkon hubani Jahowa anggo hita mangkaholongi hasoman sahaporsayaonta. (Joh. 13:34) Sanggah itonggohon hita sanina botounta, on boi mangurupi sidea. Bibel mangkatahon, “Margogoh tumang do pangkorhon ni tonggo ni halak parpintor.”​—Jak. 5:16.

15. Mase porlu itonggohon hita sanina botounta?

 ¹⁵ Porlu do itonggohon hita sanina botounta halani bahat do homa sitaronon ni sidea. Boi do ipindo hita ase iurupi Jahowa sidea martahan sanggah boritan, hona bencana alam, adong porang, iparburu, atap na leganni. Boi do homa itonggohon hita sanina botou na ringgas marhorja laho mangurupi sidea na mamorluhon. Ra do adong na itanda ham sanina botou na mangahapkon situasi na sisonai. Dear do anggo isobut ham goranni ibagas tonggomu. Taridah do holong uhurmu hubani sanina botou anggo ipindo ham iurupi Jahowa sidea ase boi martahan.

16. Mase maningon itonggohon hita sanina na mambobahon hita?

¹⁶ Martarima kasih tumang do sanina na mambobahon hita anggo isobut hita goran ni sidea ibagas tonggonta. Marguna tumang do tonggo ai hubani sidea. Ibotoh Apostel Paulus do homa on. Halani ai ipindo ia ma ase sanina botou manonggohonsi. Ia mangkatahon, “Ase ibere bangku hata-Ni, anjaha iungkab pamanganku laho pabotohkon rusia ni ambilan na madear in marhasoman hinsah ni uhur” (Ep. 6:19) Sonari pe, bahat tumang do sanina na ringgas marhorja laho mambobahon hita. Taridah do holongta bani sidea anggo ipindo hita Jahowa mamasu-masu horja ni sidea.

17-18. Sanggah attigan do ra ipindo hita mambobahon tonggo, anjaha aha ma na maningon idingat hita?

¹⁷ Sipata, ra do ipindo hita mambobahon tonggo. Umpamani, adong ma sada botou na laho mambobahon parlajaran Bibel. Jadi, ra do ipindo ia hasomanni na mambobahon tonggo. Tapi, ra do lape itanda hasomanni ai na marlajar Bibel ai. Halani ai, ra do pangahapni rahanan ma ia na mambobahon tonggo dob salosei marlajar. Anggo sonai, gabe boi ma ipasosok ia isi ni tonggoni domu bani haporluan ni parlajaran Bibel ai.

¹⁸ Sanggah martumpu, atap pe bani partumpuan dinas adong do sanina na mambobahon tonggo. Jadi, bani sanina na mandapot hasangapon ai porlu do idingat  ia aha do tujuan ni partumpuan ai. Ulang ma igunahon ia tonggo laho mamodahi sanina botou atap pe laho mambahen tingting. Somalni, bani partumpuanta domma itontuhon lima minit laho mandoding ampa martonggo. Halani ai, ulang ma igunahon sanina ai ‘buei sahap’ sanggah mambobahon tonggo, tarlobih bani tonggo pamungkah partumpuan.​—Mat. 6:7.

19. Aha ma na boi mangurupi hita ase sirsir sanggah roh ari panguhuman ni Jahowa?

¹⁹ Sonari on, lambin ponting do tonggo ai halani lambin dohor ari panguhuman ni Jahowa. Halani ai ma ihatahon Jesus, “Jaga ma hanima anjaha martonggo ma tongtong, ase margogoh hanima manimbili sagala na sihol roh.” (Luk. 21:36) Anggo tongtong hita martonggo, lambin toguh ma haporsayaonta anjaha sirsir ma hita sanggah roh ari panguhuman ni Naibata.

20. Sonaha ase tonggonta boi songon dahupa na misbou?

²⁰ Aha ma na dob iulas hita? Domma ibotoh hita sada hasangapon do tonggo ai. Na sipontingan na maningon itonggohon hita ai ma harosuh ni Jahowa. Porlu do homa hita martarima kasih halani domma ibere Ia Anak-Ni hubanta ampa pasu-pasu marhitei Harajaon-Ni. Tonggohon hita ma homa sanina botounta. Leganni ai, sihol do homa Jahowa ase itonggohon hita haporluanta siganup ari ampa ipindo hita pangurupion-Ni laho patoguhkon haporsayaonta. Anggo ipingkiri hita lobei aha na laho ihatahon paima martonggo, on patuduhkon iakui hita do tonggo ai sada hasangapon janah ihargai hita do ai. Anggo sonai ibahen hita, gabe songon dahupa na misbou ma tonggonta na ‘iharosuhkon Jahowa’.​—Pod. 15:8.