Bani tahun 1935 tubuh ma ahu i Darlaston, bagian humbani sada wilayah i Inggris na isobut Black Country. Sonai ibahen goran ni kota ai halani ijai bahat pabrik na mambahen gok polusi udara. Sanggah marumur ompat tahun ahu, marlajar Bibel ma namatorasku pakon Saksi Jahowa. Dobkonsi remaja, porsaya ma ahu on do hasintongan. Jadi, bani tahun 1952 ididi ma ahu sanggah marumur 16 tahun.

Bani panorang ai ma homa marhorja ahu i sada perusahaan na banggal, na mambahen spare part kenderaan bermotor. Jadi, mulai ma ahu ilatih ase boi mandapot jabatan na ponting i perusahaan ai. Anjaha marosuh tumang ahu bani horja ai.

Isuruh sintua kaliling ma ahu ase mambobahon Pelajaran Buku Sidang i rumahnami. Jadi maningon hubahen ma haputusan na banggal halani sanggah ai martumpu i dua kuria do ahu. Bani partumpuan tongah minggu, ahu martumpu i kuria na dohor hun parhorjaanku i Bromsgrove, hira-hira 32 kilometer daohni hun rumah. Anjaha bani ujung minggu sanggah mulak hu rumah, martumpu ma ahu i kuria i Willenhall.

Halani sihol mangurupi ibagas organisasi ni Jahowa, hujalo ma tugas na ibere sintua kaliling ai. On artini maningon hutadingkon do horja na huharosuhkon tumang. Age pe sonai, lang ongga husolsoli haputusanku ai. Halani hupaturut Jahowa manogu-nogu dalanku, bahat tumang ma malas ni uhur na huahapkon.

Sanggah martumpu i Kuria Bromsgrove, pajumpah ma ahu pakon si Anne, botou na jenges janah ringgas ibagas pangidangion. Marhajabuan ma hanami bani tahun 1957. Bahat tumang do hasangapon na iahapkon hanami. Umpamani, merintis biasa, dob ai merintis istimewa, dihut bani horja kaliling, anjaha mangidangi i Betel. Sadokah goluhku, bahat tumang do huahapkon malas ni uhur rap pakon si Anne.

Bani tahun 1966, malas tumang uhurnami halani boi dihut bani sikolah Gilead kalas-42.  Dob ai, itugaskon ma hanami hu Malawi. Itanda do Malawi ai jantung Afrika yang hangat halani bujur anjaha basar do halak ijai. Tapi lang isangka hanami, pitah tongkin dassa hanami boi ijai.

Das ma hanami i Malawi bani tanggal 1 Februari 1967. Mintor iparlajari hanami ma bahasa ijai sadokah sabulan. Dob ai, itugaskon ma ahu gabe pengawas distrik. Marmotor jip do hanami. Bahat halak mangkatahon boi do ilopusi motor ai dalan na sonaha pe, tarmasuk sungai. Hape lang tongon sonai. Pitah sungai na etek do na boi ilopusi. Sipata, marborngin do hanami i rumah na ibahen humbani tanoh halampung, na martayub lalang. Sanggah musim udan, ibahen hanami ma terpal i toruh ni tayub ai ase ulang masuk bah hubagas. Sanggah ai ma iahapkon hanami sonaha sunsahni sanggah mamungkah horja misionaris. Age pe sonai malas tumang do uhurnami!

Bani bulan April, hubotoh ma tongkin nari adong mando masalah humbani pamarentah. Marhitei siaran radio hutangar ma Presiden Malawi, Dr. Hastings Banda, manuduh anggo Saksi-Saksi Jahowa lang manggalar pajak ampa mangganggu urusan politik. Tontu lang tongon ai. Ganup do hita mambotoh anggo Saksi Jahowa netral bani urusan politik. Ai do na mambahen pamarentah lang marosuh, tarlobih halani lang ra Saksi mamboli kartu keanggotaan partai politik.

Bani bulan September, ibasa hanami ma i koran anggo Presiden Banda manuduh sanina botou domma mambahen masalah i nagori ai. Bani sada pertemuan politik itingtinghon ia ma lang piga dokah nari ilarang pamarentah ma Saksi-Saksi Jahowa. Jadi, bani tanggal  20 Oktober 1967, ilarang ma Saksi Jahowa ijai. Lang piga dokah hunjai das ma polisi ampa petugas imigrasi i kantor cabang laho manutup kantor cabang. Anjaha iusir ma ganup misionaris hun nagori ai.

Dobkonsi tolu ari ipenjara, iusir ma hanami hu Mauritius, nagori na ikuasai Inggris. Tapi lang ilopas pamarentah Mauritius hanami tading ijai gabe misionaris. Jadi itugaskon ma hanami hu Rhodesia (sonari Zimbabwe). Daskonsi hanami ijai, pajumpah ma hanami pakon sahalak petugas imigrasi na garang. Ia mangkatahon, “Iusir do nasiam hun Malawi. Lang ipaturut homa nasiam tading i Mauritius, anjaha marusaha nasiam masuk hujon halani lang adong pilihan, kan?” Tangis ma si Anne halani songon na lang adong halak na ra manjalo hanami. Sanggah ai sihol tumang uhurhu mulak hu Iggris. Ujungni, ipaturut petugas ma hanami marborngin i kantor cabang. Tapi patarni maningon manlapor hanami hu kantor pusat ni sidea. Loja tumang pangahapnami. Tapi iondoskon hanami do masalah ai hubani Jahowa. Patarni, lang isangka hanami, hape ilopas do hanami tading i Zimbabwe gabe pelancong. Lang ongga ihalupahon hanami sonaha pangahapnami sanggah ai. Lambin pos ma uhurnami itogu-togu Jahowa do dalannami.

Martugas ma ahu i Departemen Dinas, i kantor cabang Zimbabwe. Departemen on mangawasi horja parambilanon i Malawi pakon i Mozambik. Tugasku ai ma manerjemahkon laporan na ikirim sintua kaliling i Malawi. Iparburu ope sanina botounta i Malawi. Bani sada borngin, sanggah lembur tangis ma ahu dob mambasa laporan pasal sanina botounta na iarsik-arsik i Malawi. * Hassi pe sonai, gabe ipatoguh do uhurhu halani totap do sidea setia janah martahan sidea.​—2 Kor. 6:4, 5.

Ipastihon hanami do ase sanina botou na tading i Malawi, sonai homa na lari hu Mozambik totap mandapot publikasi. Tim penerjemahan bahasa Chichewa, ai ma bahasa na igunahon bahat halak Malawi, pindah hu perladangan ni sada sanina i Zimbabwe. Bujur tumang do sanina ai. Ipajongjong ia do rumah pakon kantor bani sidea. Boi ma sidea hunjai totap manerjemahkon publikasi.

Iatur hanami ma ase sintua kaliling hun Malawi boi dihut kebaktian distrik bahasa Chichewa, na ibahen i Zimbabwe tiap tahun. Ijai ibere ma bani sidea rangka-rangka khotbah na laho ipadas i kebaktian ai. Dobkonsi mulak hu Malawi, igunahon sidea ma ai sanggah marambilan i kuria-kuria. Satahun dobkonsi ai, ibahen hanami ma Sekolah Pelayanan Kerajaan laho patoguhkon sintua kaliling na barani ai.

Bani bulan Februari 1975, laho ma ahu hu Mozambik manjumpahi Saksi-Saksi hun Malawi na melarikan diri hujai. Totap do iihutkon sidea tugah-tugah humbani organisasi ni Jahowa, tarmasuk ma ai pangaturan na baru pasal pelantikan badan penatua. Bahat do horja na iatur sintua na baru ai. Umpamani, padaskon ambilan bani halak na mabuei, mangulas ayat harian ampa majallah Ambilan na Madear, pakon mambahen kebaktian wilayah. Songon i kebaktian do homa iatur sidea i kamp ai. Adong departemen pembersihan, adong na mambagihon sipanganon, ampa bagian keamanan. Bahat tumang do pasu-pasu na iahapkon sanina botounta na setia ai. Jadi, dobkonsi mulak ahu gabe ipatoguh do uhurhu.

Bani ujung ni tahun 1970-an, kantor cabang i Zambia ma na mangawasi horja parambilanon i Malawi. Age pe sonai, tong do hupingkiri sanina botou i Malawi anjaha hutonggohon do sidea. Tapi lang pitah ai na hubahen. Halani ahu anggota Panitia Cabang Zimbabwe, adong ma kesempatan pajumpah pakon wakil hun kantor pusat ampa sanina-sanina na martanggung jawab i Malawi, Afrika Selatan, pakon Zambia. Tiap pajumpah, gati do isungkun hanami, “Aha ope na boi ibahen hita bani sanina botou i Malawi?”

Dokah-dokah moru ma penganiayaan. Adong ma sanina botou na mulak use hu Malawi. Tapi adong do na lang ra mulak halani trauma ope  bani penganiayaan na ongga iahapkon sidea. Jadi porlu do panorang laho manlupahon ai. Negara tetangga mulai mangakui Saksi-Saksi Jahowa, janah bebas ma hita marbarita ampa martumpu. Bani tahun 1991, icabut ma homa larangan i Mozambik. Tapi sungkun-sungkun do hanami, ‘Attigan ma Saksi-Saksi Jahowa lang be ilarang i Malawi?’

Mubah ma situasi politik i Malawi. Anjaha bani tahun 1993 iakui pamarentah ma Saksi-Saksi Jahowa ijai. Lang piga dokah dobkonsi ai, marsahapi ma ahu pakon sahalak misionaris. Isungkun ia ma, “Ai ra do ham mulak hu Malawi?” Sanggah ai domma marumur 59 tahun ahu. Jadi ningku ma, “Lang, domma matua ahu Ambia!” Hape piga-piga ari dobkonsi ai, ijalo hanami ma fax atap surat hun Pangurus Pusat, na mangontang hanami mulak hu Malawi.

Sasintongni, haputusan na borat do on halani marosuh hanami i Zimbabwe. Domma bahat hasomannami ijon. Tapi bujur tumang do Pangurus Pusat bennami. Ihatahon sidea boi do hanami totap i Zimbabwe anggo lang ra pindah hanami. Jadi, boi do itontuhon hanami dalannami. Tapi hudingat ma si Abraham pakon si Sarah. Age pe domma matua, ra do sidea manadingkon rumahni na jenges halani sihol mangihutkon panogu-noguan humbani Jahowa.​—1 Mus. 12:1-5.

Jadi iputuskon hanami ma mangihutkon tugah-tugah humbani organisasi. Bani tanggal 1 Februari 1995 mulak ma hanami hu Malawi, topat 28 tahun dobkonsi parlobei sahali hanami das ijai. Mintor ibahen ma Panitia Cabang, dihut ma ahu sada rap pakon dua sanina na legan. Anjaha mintor sibuk ma hanami mangatur kegiatan ni Saksi-Saksi Jahowa ijai.

Malas tumang uhur mangidah sonaha Jahowa mamasu-masu horja ijai! Mintor podas do tambah bilangan ni parbarita. Hira-hira 30.000 bani tahun 1993, gabe 42.000 bani tahun 1998. * Halani ai, irencanahon Pangurus Pusat ma pajongjongkon kantor cabang na baru. Dapot hanami ma lahan 12 hektar i Lilongwe, anjaha itugaskon ma ahu gabe anggota panitia pembangunanni.

Bani bulan Mei 2001, Sanina Guy Pierce hun Pangurus Pusat padaskon ambilan penahbisan kantor cabang na baru ai. Lobih dua ribu Saksi Malawi na roh. Bahatan sidea domma ididi lobih 40 tahun. Sidea ma sanina botounta na  totap setia sanggah iparburu sadokah martahun-tahun. Age pe miskin, tapi toguh do haporsayaonni janah orot parhasomanan ni sidea pakon Jahowa. Sanggah tur sidea hu Betel, huja pe sidea laho, idodingkon sidea do doding Harajaon songon somalni halak Afrika mandoding. Malas tumang uhurhu mangidah ai. On patuduhkon ipasu-pasu Jahowa do sanina botounta na totap setia sanggah ibagas parlajouan.

Dob salosei pembangunan kantor cabang, malas tumang uhurhu mandapot tugas na baru, ai ma menahbiskon Balei Harajaon. Organisasi mangatur ase bahat Balei Harajaon ipajongjong i nagori-nagori na bahat sanina botou na miskin. Bahat do gunani na iahapkon sanina botou halani pangaturan ai. Hinan, bahat do kuria na mambahen partumpuan i sopou-sopou na ibahen humbani hayu eukaliptus. Tayubni ibahen humbani lalang, janah ibahen ma bangku na ganjang humbani tanoh halampung gabe hundulan. Sonari, ibahen sidea ma panutungan batu bata, anjaha ringgas tumang do sidea mambahen batu bata laho pajongjongkon ianan partumpuan na jenges. Tapi rosuhan do sidea mamakei bangku marimbangkon kursi, halani nini sidea, ‘Anggo hurang ianan, boi ope hanami margeser ase siat.’

Malas do homa uhurhu mangidah sonaha Jahowa mangurupi sanina botou ijai ase lambin toguh haporsayaonni, tarlobih ma sanina-sanina na maposo. Sirsir do sidea mangurupi. Sanggah ibahen organisasi pelatihan, mintor podas do sidea marlajar. Gabe boi ma sidea mandalankon tanggung jawab i Betel, sonai homa i kuria. Lambin ipatoguh do homa kuria halani bahat sanina ijai na ilantik gabe sintua kaliling, janah bahatan na domma marhajabuan. Hassi pe bahat halak tarmasuk kaluargani sihol ase sidea marniombah, tapi iputuskon sidea do lang marniombah bani panorang on, ase boi sidea mambere lambin bahat panorang ibagas pangidangion.

Dobkonsi 52 tahun mangidangi i Afrika, borit-boritan ma ahu. Jadi, irekomendasihon Panitia Cabang ma bani Pangurus Pusat ase itugaskon use hanami hu Inggris, janah isetujui do ai. Pusok do uhurnami manadingkon penugasan na iharosuhkon hanami. Tapi, dear tumang do anggota kaluarga Betel i Inggris mangurus hanami hassi pe domma matua hanami sonari.

Pos uhurhu haputusan na sidearan na ongga hubahen ai ma mangihutkon panogu-noguon ni Jahowa. Porini ahu marpangunsandeian bani pingkiranku sandiri, tontu lang sonon goluhku. Tongtong do ibotoh Jahowa aha na huhaporluhon laho ‘papintor dalanku’. (Pod. 3:5, 6) Tongon sada hasangapon do bani na maposo boi marlajar i sada perusahaan na banggal. Tapi, bahatan do na domma ibere organisasi ni Jahowa hubangku marimbangkon na ijanjihon perusahaan ai. Sasintongni, tongtong mangidangi Jahowa, ai do na tongon-tongon mambahen sonang goluhku!