1. Aha do harosuh ni Jahowa sonari on?

 SONARI, sihol do Naibata ase ambilan na madear pasal Harajaon ibaritahon hu sab tanoh on. (Mrk. 13:10; 1 Tim. 2:3, 4) Horja ni Jahowa do on. Halani ponting tumang horja on, ipilih Ia ma Anak na hinaholongan-Ni laho mambobahon horja ai. Pos do uhurta halani Jesus na mambobahon horja parambilanon ai, tontu boi do salosei ai domu bani harosuh ni Jahowa paima roh ujungni.​—Mat. 24:14.

2. Aha ma na laho iulas hita bani artikel on?

² Bani artikel on, holi iulas hita ma sonaha Jesus manggunahon “juakjuak na bujur anjaha na maruhur” pasirsirhon pangajaran ampa mangorganisasi susianni laho mandalankon horja parambilanon. (Mat. 24:45) Holi iulas hita homa sonaha hita ganupan boi mangurupi Jesus ampa juakjuak na bujur.

3. Kuasa aha do na ibere hubani Jesus?

³ Jesus do na mambobahon horja parambilanon. Hunja ibotoh hita ai? Lang piga dokah paima naik Jesus hu surga, pajumpah ma ia pakon ganup susianni na setia, i dolog Galilea. Ihatahon ia ma bani sidea, “Domma ondos bangku sagala kuasa na i nagori atas ampa na i tanoh on.” Pardiateihon use na ihatahonni, “Laho ma hanima, [“bahen”, Terjemahan Dunia Baru] hanima ma sagala bangsa ase gabe susianku.” (Mat. 28:18, 19) Jadi, Jesus do na mambobahon horja parambilanon halani domma ibere kuasa hu bani.

4. Mase pos uhurta ibobahon Jesus ope horja parambilanon ai?

 ⁴ Jesus mangkatahon das hubani “sagala bangsa” do susianni marbarita janah mangurupi sidea gabe susianni. Ihatahon ia use hasomananni do susianni “ganup ari, ronsi roh ujung ni dunia on”. (Mat. 28:20) Hunjai tangkas ma ibobahon Jesus ope horja parambilanon ronsi sonari.

5. Sonaha hita boi dihut manggoki panjahaion bani Psalmen 110:3?

⁵ Lang mabiar Jesus holi otik dassa na marambilan sadokah panorang parpudi. Ibotoh ia saud do holi panjahaion na isurat bani Psalmen na mangkatahon, “Marurup ma bangsamu roh humbani megah ni uhurni bani ari parporanganmu.” (Ps. 110:3) Anggo dihut ham marbarita sonari, on artini iurupi ham do Jesus ampa juakjuak na bujur, janah dihut do homa ham manggoki panjahaion ai. Ronsi sonari ihorjahon ope parambilanon ai. Tapi adong piga-piga tantangan.

6. Tantangan aha do na roh bani parbarita Harajaon sonari on?

⁶ Tantangan na roh bani parbarita Harajaon ai ma parlawanan humbani halak na murtad, pamimpin ugama, pakon pamarentah. Domma ipararat sidea ladung pasal hita. Anggo porsaya kaluarga ampa hasomanta bani ladung ai, gabe ilarang sidea ma hita mangidangi Jahowa, janah ipaksa ma hita ase ulang be marbarita. Bani piga-piga nagori adong do sanina botounta na iancam, iserang, itangkap janah ipenjarahon. Lang tarsonggot hita mambogei ai halani ongga do ihatahon Jesus hinan, “Domdoman ni sagala bangsa do hanima halani goranku.” (Mat. 24:9) Jadi sanggah masa na sisonai hubanta, on patuduhkon itiru hita do Jesus janah malas ma uhur ni Jahowa ibahen hita. (Mat. 5:11, 12) Sasintongni Sibolis do na parohkon ganup parlawanan ai. Tapi daoh do gogohan Jesus marimbangkon Sibolis. Marhitei pangurupion ni Jesus das do barita na madear hubani sagala bangsa. Pardiateihon hita ma buktini.

7. Bukti aha do na patuduhkon anggo Pangungkabon 14:6, 7 igoki sonari on?

⁷ Sanggah marbarita, bahat do halak na ijumpahi lang iarusi hita sahapni. Tapi marhitei panonggoran na ibere Jesus bani Apostel Johannes ibotoh hita ma boi do iatasi hita tantangan ai. (Basa Pangungkabon 14:6, 7.) Aha ma buktini? Marusaha do hita padaskon barita Harajaon hubani ganup halak. Sonari, boi do ibasa sidea publikasinta i jw.org, janah adong do ai lobih humbani 1.000 bahasa! Setuju do Pangurus Pusat ase buku Hagoluhan na Martuah Sadokah ni Dokahni iterjemahkon hubani lobih 700 bahasa! Buku on do na igunahon laho mangurupi halak gabe susian ni Jesus. Sirsir do homa publikasi video hubani halak na bisu. Anjaha adong homa publikasi huruf Braille bani halak na mapitung. Sonari ididah hita do saud panjahaion ni Bibel na mangkatahon anggo ganup halak “humbani bangsa na marbagei-bagei sahap” marlajar bahasa “na pitah” humbani Bibel. (Sak. 8:23; Sep. 3:9) Ganupan ai boi ibahen halani Jesus Kristus na mambobahon horja parambilanon.

8. Aha ma hasilni horja parambilanon sonari on?

⁸ Sonari, lobih humbani 8.000.000 halak i 240 nagori na masuk hu organisasi ni Jahowa, anjaha dong marpuluh ribu halak na ididi tiap tahun! Tapi na sipontingan marusaha do sidea ganupan patuduhkon parlahou na baru. (Kol. 3:8-10) Bahat do na lang be mangkorjahon parriah-riahon ampa hajahaton, lang be  sididah bohi, janah lang be manganggap nagorini na sijagonan. Igoki do homa panjahaion na isurat bani Jesaya 2:4 na mangkatahon “seng be guruhonon ni sidea hamunsuhon”, atap lang be iparlajari sidea marporang. Leganni ai, iurupi hita do bahat halak ase masuk hu organisasi ni Jahowa. Anjaha on patuduhkon ra do hita mangirikkon Jesus Kristus na mambobahon hita. (Joh. 13:35; 1 Ptr. 2:12) Ganupan on boi masa halani ibere Jesus do pangurupion na iporluhon hita.

9. Domu bani Mateus 24:45-47, aha ma na ihatahon Jesus na masa sadokah panorang parpudi?

⁹ Basa ma Mateus 24:45-47. Jesus mangkatahon sadokah panorang parpudi ilantik ia ma “juakjuak na bujur anjaha na maruhur” laho pasirsirhon tugah-tugah humbani Hata ni Naibata. Tontu mangarap do hita anggo juakjuak ai ringgas marhorja bani panorangta on. Janah tongon do ai na masa! Domma igunahon Jesus sakalompok dalahi na iminaki laho pasirsirhon tugah-tugah hubani juakjuak ni Naibata ampa hubani sidea na marlajar Bibel ase boi sidea “mangan bani panorangni”. Sedo gabe manrajai haporsayaon ni hasomanni juakjuak ai. (2 Kor. 1:24) Tapi sidea mangakui Jesus Kristus do “raja pakon panggomgom” bani juakjuak ni Naibata.​—Jes. 55:4.

10. Publikasi na ija do na ipatuduh bani gambar na mangurupi ham laho mangidangi Jahowa?

¹⁰ Humbani tahun 1919, domma ipasirsir juakjuak na bujur marmasam publikasi na boi mangurupi halak laho marlajar hasintongan humbani Hata ni Naibata. Bani tahun 1921, ipasirsir ma buku The Harp of God (“Harpa Allah”), na mangurupi buei halak mamparlajari ajaran dasar ni Bibel. Dob ai, lambin tambah ma publikasi na ipasirsir. Buku na ija do na mangurupi  ham mananda ampa mangkaholongi Jahowa? Ai buku “Karena Allah Itu Benar Adanya”, Kebenaran Yang Membimbing Kepada Hidup Yang Kekal, Saudara Dapat Hidup Kekal Dalam Firdaus di Bumi, Pengetahuan yang Membimbing kepada Kehidupan Abadi, Apa yang Sebenarnya Alkitab Ajarkan?, Aha do na Iajarhon Bibel Hubanta?, atap publikasi na baru Hagoluhan na Martuah Sadokah ni Dokahni? Ganup publikasi ai irilis domu bani panorang na topat.

11. Mase maningon tongtong iparlajari hita pasal Jahowa ampa Bibel?

¹¹ Lang pitah halak na baru na porlu mamparlajari pasal Jahowa ampa Bibel. Ganup do hita porlu mangkorjahon ai. Songon na ihatahon Apostel Paulus halak ‘na dob matoras pe, porlu do sipanganon na koras bani’. Ipatorang si Paulus do anggo tongtong iparlajari hita Hata ni Naibata, gabe iurupi ma hita laho mambotoh “parlegananni na madear ampa na masambor”. (Heb. 5:14) Sonari, lang urah mangihutkon aturan ni Jahowa halani bahat halak sambor parlahouni. Tapi ibotoh Jesus do ai. Janah ipardiateihon do aha na porlu banta ase boi totap toguh haporsayaonta. Halani ai, ipasirsir juakjuak na bujur ma pangajaran humbani Hata ni Naibata, mangihutkon tugah-tugah na ibere Jesus. Anjaha ibagihon ma ai hubanta.

12. Songon Jesus, sonaha hita pasangapkon goran ni Naibata?

¹² Songon Jesus ipasangap hita do goran ni Naibata. (Joh. 17:6, 26) Umpamani, bani tahun 1931 igoran ma hita Saksi Jahowa, songon na ihatahon Jahowa ibagas Bibel. On patuduhkon ponting tumang do goran ni Naibata ai hubanta. Janah sihol do hita itanda marhitei goran ni Bapa na i surga in. (Jes. 43:10-12) Anjaha humbani bulan Oktober tahun ai, totap do adong goran ni Naibata bani  sampul majallah Ambilan na Madear. Leganni ai, bani Kitab Suci Terjemahan Dunia Baru domma ipaulak goran ni Naibata hu iananni. Legan tumang do na ibahen gareja-gareja. Isasap sidea do goran ni Naibata humbani Bibel terjemahan ni sidea!

13. Aha do na paposkon uhurmu anggo sonari on domma igunahon Jesus juakjuak na bujur anjaha na maruhur? (Johannes 6:68)

¹³ Marhitei “juakjuak na bujur anjaha na maruhur”, domma ibahen Jesus sada organisasi na jenges tumang i tanoh on laho patimbulhon panombahan na sintong. Sonaha pangahapmu bani organisasi ai? Ra do sarupa pangahapmu songon na ihatahon Apostel Petrus bani Jesus, “Hubani ise ma hanami laho Tuhan? Bamu do hata hagoluhan sisadokah ni dokahni!” (Joh. 6:68) Ai boi do ibayangkon ham sonaha goluhmu anggo lang itanda ham Jahowa ampa organisasi-Ni? Marhitei organisasi ni Jahowa, ipastihon Jesus do ganup hita mandapot aha na iporluhon ase boi totap setia hubani Naibata. Ilatih do homa hita ase lambin pandei ibagas pangidangion. Anjaha iurupi ia do homa hita patuduhkon parlahou na baru ase boi hita pamalaskon uhur ni Jahowa.​—Ep. 4:24.

14. Aha do gunani na iahapkon ham halani gabe bagian humbani organisasi ni Jahowa sadokah pandemi COVID-19 on?

¹⁴ Ibere Jesus do homa tugah-tugah bani panorang hasosakan on. Tangkas do taridah gunani tugah-tugah ai sadokah masa pandemi COVID-19. Sanggah ai, bahat halak lang mambotoh aha do na porlu bahenonni. Tapi ipastihon Jesus do hita mandapot tugah-tugah ase boi totap aman. Iojur do hita totap mamakei masker  janah manjaga jarak sanggah i ianan na mabuei. Ipasingat do homa sintua ase tongtong mampardiateihon aha na porlu bani sanina botou i kuria ase boi totap sehat, aman, janah orot pakon Jahowa. Dapot hita do homa tugah-tugah na boi patoguhkon uhur marhitei laporan Badan Pimpinan.

15. Sadokah pandemi on, tugah-tugah aha ma na ibere pasal partumpuan ampa horja parambilanonta, janah aha ma hasilni?

¹⁵ Sadokah pandemi on, ibere do homa tugah-tugah sonaha partumpuan ampa horja parambilanon ibahen. Mintor ibahen ma partumpuan, kebaktian wilayah, ampa kebaktian regional marhitei online. Ibahen do homa penyesuaian ibagas pangidangionta. Umpamani, marbarita do hita marhitei talepon ampa surat. Ipasu-pasu Jahowa do ganupan ai. Bahat do kantor cabang na manlapor martambah do bilangan ni parbarita. Sasintongni bahat do homa sanina botou na mandapot pangalaman na jenges sadokah pandemi on.​—Tonggor ma kotak “ Ipasu-pasu Jahowa do Horja Parambilanonta”.

16. Aha do na paposkon uhurta?

¹⁶ Bahat halak manganggap mahati-hatitu do organisasi sadokah pandemi on. Tapi, gati do ididah hita topat do ganup tugah-tugah na ibere ai. (Mat. 11:19) Anjaha anggo irimangi hita sonaha banggal ni holong ni Jesus sanggah mambobahon juakjuak ni Naibata, gabe pos ma uhurta lang soal atap aha pe na masa bani ari na laho roh, sai hasomanan ni Jahowa pakon Jesus do hita.​—Basa Heber 13:5, 6.

17. Sonaha pangahapmu halani Jesus na mambobahon hita?

¹⁷ Malas tumang uhurta halani Jesus na mambobahon hita! Marsada do hita ibagas organisasi hassi pe roh humbani marbagei bangsa, hasomalan, ampa bahasa. Ibere do homa tugah-tugah hubanta marhitei Hata ni Naibata. Anjaha ilatih do hita ase boi mandalankon horja parambilanonta. Leganni ai, iurupi do ganup hita ase boi patuduhkon parlahou na baru janah marsihaholongan. Tontu megah tumang uhurta halani Jesus na gabe Pambobai banta!