Iajari Jesus do hita ase mardamei bani ganup halak. Tapi bani sada panorang ihatahon ia do bani apostelni, “Ulang ma ninuhurnima na roh ahu laho mamboan damei hu tanoh on. Seng na roh ahu mamboan damei, tapi podang do. Na roh do ahu tongon, paingorhon anak dompak bapani, boru dompak inangni, parumaen dompak simatuani.” (Mat. 10:34, 35) Aha do maksudni Jesus ijai?

Jesus lang sihol mambahen parbolahan ibagas kaluarga. Tapi ibotoh ia do anggo pangajaranni ai boi mambahen parposahan ibagas kaluarga. Halani ai, sanggah adong sasahalak na laho gabe susian ni Jesus anjaha ididi, porlu do ibotoh ia ra adong do anggota kaluarga lang marosuh bani haputusanni ai. Sipata, ra do adong pasangan atap kaluarga na manlanglangi sidea laho mandalankon ajaran ni Jesus.

Bibel mangojur halak Kristen ase ‘mardamei pakon haganup halak’. (Rom 12:18) Tapi ajaran ni Jesus boi do songon “podang” bani piga-piga kaluarga. On boi masa sanggah adong na manjalo hasintongan, tapi dong homa na manantang. Bani situasi na sisonai songon “munsuh” ma na manjalo hasintongan ai bani kaluargani.​—Mat. 10:36.

Anggo adong halak Kristen na tading pakon kaluarga na tarbagi bani ugama, sipata maningon iputuskon sidea do: pamalaskon uhur ni Jahowa pakon Jesus do na sipontingan atap kaluargani. Umpamani, ra do ipaksa sidea hita manrayahon ari raya. Halani ai, maningon iputuskon sidea ma ise do na laho ipasonang. Jesus mangkatahon, “Barang ise na mangkaholongi bapani barang inangni lobih hun bangku, seng talup ai bangku.” (Mat. 10:37) On sedo artini ase boi sasahalak gabe susian ni Jesus, lang boi banggal holongni bani namatorasni. Tapi sihol do ia mangajarhon ise na sipontingan ibagas goluhta. Hassi pe adong kaluarga na manlanglangi hita manombah Jahowa, totap do holong uhurta bani sidea. Tapi maningon banggalan do holongta bani Naibata.

Pasti pusok do uhurta sanggah adong tantangan humbani kaluarga. Halani ai, dingat hita ma hata ni Jesus, “Barang ise na so mamorsan [“tiang siksaanni,” Terjemahan Dunia Baru] anjaha iirikkon ahu, seng talup ai bangku.” (Mat. 10:38) Anggap hita ma tantangan na humbani kaluarga ai songon bagian humbani sitaronon na maningon ijalo hita. Age pe sonai, tongtong do hita mangarap anggo totap ipatuduh hita parlahou na madear, bani sada ari ra do sidea manjalo hasintongan.​—1 Ptr. 3:1, 2.