1. Sipasingat aha do na ibere si Paulus bani halak Kristen na iminaki?

“ULANG”, nini si Paulus. Ulang aha? “Ulang ma sarupa nasiam pakon dunia on.” (Rom 12:2) Isuratkon apostel Paulus do sipasingat ai bani halak Kristen abad na parlobei. Mase ma sipasingat sisonai ibere si Paulus hubani halak Kristen na iminaki?​—Rom 1:7.

2-3. Sonaha Sibolis padaohkon hita humbani Jahowa? Sonaha hita boi mangambukkon sura-sura ampa pingkiran na lang madear na dob dokah dong ibagas uhurta?

² Sipasingat ai ibere halani si Paulus parduli bani halak Kristen ijia. Ipardiateihon ia dong piga-piga halak Kristen na mangihutkon pingkiran ni dunia on. (Ep. 4:17-19) Anjaha sonari pe boi do homa masa sisonai hubanta. Bahat do akal-akal na ibahen Sibolis ase hita ra mangihutkon sura-sura ampa pingkiran ni dunia on. Umpamani, anggo sihol hita gabe halak na tarsar, igunahon ia ma ai laho padaohkon hita humbani Jahowa. Marusaha do homa ia manggunahon aha na iparlajari hita hun hasoman, hun sikolah, atap hun parhorjaan, ase hita mangihutkon pingkiranni.

³ Ai boi do hita mangambukkon pingkiran na lang madear na dob dokah dong ibagas uhurta? (2 Kor. 10:4) Marhitei pangurupion ni Naibata, tontu boi do hita mangambukkon ai. Pardiateihon ma na ihatahon si Paulus, “Irumbakkon hanami do sura-sura ampa uhur hagijangon na manlawan habotohon na humbani Naibata,  anjaha itaban hanami do sagala pingkiran, ase pambalosi ai bani Kristus.” (2 Kor. 10:5) Songon tambar na boi pamateihon rasun, Hata ni Naibata boi mangurupi hita pamateihon rasun ni dunia na irajai Sibolis.

4. Parubahan aha ma na domma ibahen hita dobkonsi marlajar Bibel?

⁴ Dingat ma piga-piga parubahan na ibahen hita dobkonsi marlajar Bibel. Halani sihol mangidangi Naibata, bahat do homa na manadingkon parlahou na salah. (1 Kor. 6:9-11) Tontu martarima kasih do hita bani Naibata halani iurupi mambahen sisonai.

5. Domu bani Rom 12:2, aha ma na maningon ibahen?

⁵ Tapi lang sungkup pitah ai. Hassi pe domma itadingkon hita parlahou na sambor paima ididi, maningon totap do hita marusaha ase ulang be mangkorjahon sisonai i pudian ni ari. Sonaha carani? Si Paulus mangkatahon, “Ulang ma sarupa nasiam pakon dunia on, tapi mubah ma marhitei habayuon ni uhur.” (Rom 12:2) Jadi dong dua na maningon ibahen hita. Na parlobei, “ulang ma sarupa” hita pakon dunia on. Na paduahon, maningon “mubah ma” hita marhitei mambahen habayuon ni uhur.

6. Humbani Mateus 12:43-45, parlajaran na ponting aha do na ipatugah Jesus hubanta?

⁶ Parubahan na imaksud si Paulus ijon sedo pitah mangubah parlahou, tapi porlu do homa mangubah pingkiran, uhur, ampa sura-sura. (Tonggor ma kotak “ Mubah atap Pausih-usihkon Diri?”) Halani ai, ganup hita porlu manrimangi, ‘Ai pitah parubahan na boi ididah halak dassa na hubahen, atap tongon do huihutkon Kristus humbani uhur ampa  pingkiranku?’ Humbani Mateus 12:43-45, Jesus patuduhkon dong na maningon ibahen hita. (Basa.) Humbani ayat ai, dapot hita ma parlajaran na ponting: Lang sungkup pitah mangambukkon pingkiran na salah, tapi maningon do homa ipamasuk hita pingkiran ni Naibata hubagas pingkiranta.

7. Sonaha hita boi mangubah uhur ampa pingkiranta?

⁷ Ai boi do hita mambahen hamubahon ibagas pingkiran ampa uhurta? Bibel mangkatahon, “Gabe bayu ma nasiam ibagas tonduy ni uhur nasiam. Anjaha pakei nasiam ma jolma na baru, na tinompa usih hubani Naibata, ibagas hapintoron ampa hapansingon na botul.” (Ep. 4:23, 24) Hunjon ibotoh hita ma boi do hita mangkorjahon ai. Tapi lang sai urah mambahen sisonai. Hassi pe domma iambukkon hita sura-sura na salah janah lang be mangkorjahon na sambor, tapi porlu do homa ipabayu hita uhur ampa pingkiranta. Tarmasuk ma ai sura-sura, parlahou, ampa alasanta laho mangkorjahon aha pe. Halani ai, maningon tongtong ma hita marusaha pabayuhon uhur ampa pingkiranta.

8-9. Sonaha pangalaman ni sada hasomanta patuduhkon ponting tumang do mambahen hamubahon ni uhur ampa pingkiran?

⁸ Pardiateihon ma pangalamanni sada hasomanta dalahi. Partenggen hinan do ia, urah manggila, janah rosuh martinggili. Dob marlajar Bibel, mubah ma ia janah lang be ihorjahon ia ganupan ai. Gabe hasaksian na jenges do ai i hutani. Tapi bani sada ari, iuji ma ia. Lang piga dokah dob ididi, roh ma sada dalahi na tenggen hu rumahni, janah iarahkon ma ia martenju. Mungkahni lang ra ia. Hape dob irisai dalahi ai goran ni Jahowa, mintor sogam ma uhur ni hasomanta ai, lanjar hu darat ma ia janah itenju ma dalahi ai. Mase sonai hasomanta ai? Tongon, dob marlajar Bibel lang be marosuh ia martenju. Tapi lape mambahen hamubahon ia ibagas uhur ampa pingkiran.

⁹ Hassi pe sonai, marusaha do ia torus mambahen hamubahon. (Pod. 24:16) Halani iurupi sintua, boi ma ia mambahen hamajuon. Ujungni gabe sintua ma ia. Tapi bani sada ari, roh ma tantangan na sarupa songon ondi ai. Dong sada dalahi na tenggen roh hu alaman ni Balei Harajaon janah sihol manenju sintua na legan. Jadi hu darat ma hasomanta ai, janah irohi ma na tenggen ai. Lamlam do ia marsahap hu bani, janah itaruhkon hasomanta ai ma ia hu rumahni. Mase lang songon ondi ai be hasomanta ai? Halani ia domma mambahen hamubahon ni uhur ampa pingkiran. Sonari domma gabe halak na lamlam ia, toruh maruhur, janah rosuh mardamei. Parohkon hasangapon do ai bani Jahowa.

10. Sonaha ase hita boi mambahen hamubahon ni uhur ampa pingkiran?

¹⁰ Tapi parubahan ai lang tarjadi ibagas sadari. Lang homa tarjadi anggo lang marusaha ia mambahen hamubahon. Jadi maningon marusaha do hita “humbani sagala gogoh” laho pabayuhon uhur ampa pingkiranta. (2 Ptr. 1:5) Hassi pe domma martahun-tahun hita mangidangi Jahowa, maningon pongkut do hita marusaha mambahen hamubahon ni uhur ampa pingkiran. Ase boi mangkorjahon ai, ulas hita ma piga-piga cara na maningon ibahen hita.

11. Sonaha tonggo boi mangurupi hita mambahen hamubahon ni uhur ampa pingkiran?

¹¹ Cara na parlobei ai ma martonggo. Songon on ma namin hita martonggo, “Tompa Ham ma uhur na borsih ibagas diringku, Ham Naibata, anjaha bere Ham ma bangku tonduy na baru anjaha na totap.” (Ps. 51:12) Porlu do ibotoh hita parubahan aha na maningon ibahen hita, janah pindo ma ase iurupi Jahowa hita. Hunja ibotoh hita anggo Jahowa sihol mangurupi hita mambahen hamubahon? Bani panorang ni nabi Hesekiel, ihatahon Jahowa do bani halak Israel na jugul, ‘Berehonon-Ku ma bani sidea uhur na sada, anjaha nahkonon-Ku do tonduy na bayu hubagas sidea; . . . anjaha berehonon-Ku do bani sidea uhur na marpangahapan,’ ai ma uhur na ra mangihutkon panogu-noguan humbani Naibata. (Hes. 11:19) Anggo ra Jahowa mangurupi halak Israel mambahen hamubahon, tontu ra do homa Ia mangurupi hita.

12-13. (a) Domu bani Psalmen 119:59, aha do na porlu ibahen hita? (b) Sungkun-sungkun aha do na porlu irimangi hita?

¹² Cara na paduahon ai ma manrimangi isi ni Bibel. Halani ai, sanggah mambasa Bibel bai ganup ari, rimangi ma aha do na porlu iubah ibagas uhur ampa pingkiranta. (Basa Psalmen 119:59; Heb. 4:12; Jak. 1:25) Pingkirhon ma atap na dong do pingkiran ni dunia on na iihutkon hita. Dob ai, maningon jujur ma hita mangakui hagalekonta, anjaha marusaha ma hita mangambukkon ai.

¹³ Umpamani, rimangi ma sungkun-sungkun on: ‘Ai dong do subil ibagas uhurhu?’ (1 Ptr. 2:1) ‘Ai gijangan do huahap diringku halani marga, sikolah, atap halani bahat duitku?’ (Pod. 16:5) ‘Ai huapasi do halak na miskin atap pe na lang sasuku pakon ahu?’ (Jak. 2:2-4) ‘Ai huharosuhkon do homa aha na iharosuhkon dunia on?’ (1 Joh. 2:15-17) ‘Ai marosuh do ahu mangidah hiburan na marisi pasal parriah-riahon ampa na sambor?’ (Ps. 97:10; 101:3; Ams. 5:15) Sanggah ibalosi nasiam sungkun-sungkun ai, gabe ibotoh nasiam ma aha do na porlu ibahen nasiam. Anggo boi ilawan hita sura-sura na salah na dong ibagas uhurta, tontu malas ma uhur ni Jahowa.​—Ps. 19:15.

14. Mase ponting tumang mamilih hasoman na bujur?

¹⁴ Cara na patoluhon ai ma mamilih hasoman-hasoman na bujur. Sasintongni, bahat do pangaruh ni hasoman na ipilih hita hubani dirinta. (Pod. 13:20) Bahatan do hasoman i sikolah atap pe i parhorjaan lang mangojur hita mangkorjahon aha na madear i lobei ni Naibata. Tapi, legan do anggo i partumpuan. Ijai, bahat do halak na boi ipilih hita gabe hasoman. Sidea boi mangojur hita mandalankon “holong ampa horja na madear”.​—Heb. 10:24, 25.

15-16. Aha do na ibahen Sibolis laho pasedahon pingkiranta?

¹⁵ Dingat ma, ibotoh Sibolis do homa anggo hita domma mambahen habayuon ni uhur halani mangihutkon Hata ni Naibata. Halani ai, bahat do cara na igunahon ia laho pasedahon pingkiranta.

¹⁶ Hinan, ioto-otoi Sibolis do si Hawa marhitei sungkun-sungkun on, “Adong do nani ihatahon Naibata . . . ?” (1 Mus.  3:1) Sonari pe sonai do cara na igunahon Sibolis. Gati do itangar hita sungkun-sungkun na mambahen galek haporsayaonta. Umpamani, ‘Ai tongon do lang marosuh Naibata mangidah dalahi marhajabuan pakon dalahi, sonai homa naboru pakon naboru? Ai tongon do lang marosuh Naibata anggo hita marayahon ari Natal ampa ulang tahun? Ai tongon do ilarang Naibatamu nasiam manjalo transfusi darah? Ai tongon do Naibata na parholong manlarang hita marsaor pakon kaluarga atap pe hasomanta na dob ipecat?’

17. Anggo dong sungkun-sungkun na mambahen bungbang hita, aha do na maningon bahenonta, janah domu bani Kolosse 2:6, 7, aha ma hasilni?

¹⁷ Halani ai, porlu ma ipatoguh hita haporsayaonta. Anggo lang ipindahi hita balos ni sungkun-sungkun sisonai, gabe bungbang ma pingkiranta. Ujungni, gabe galek ma haporsayaonta. Anggo sonai, aha ma na porlu ibahen hita? Bibel mangkatahon maningon ipabayu hita do pingkiranta, ase ibotoh hita ‘harosuh ni uhur ni Naibata, ai ma na madear ampa na gokan dear’. (Rom 12:2) Anggo tongtong hita marlajar Bibel, gabe iarusi hita ma hasintongan na iparlajari hita. Dob ai lambin porsaya ma hita anggo aturan ni Naibata ai do na sintong. Hasilni, gabe ‘jonam ma haporsayaonta’ songon hayu na bagas uratni.​—Basa Kolosse 2:6, 7.

18. Sonaha hita boi pamateihon rasun ni dunia on?

¹⁸ Jadi, pitah ham sandiri do na boi patoguhkon haporsayaonmu. Halani ai, torus ma pabayu ham uhur ampa pingkiranmu. Tongtong ma martonggo janah pindo ma bani Jahowa ase iurupi tonduy na pansing ham. Tongtong ma rimangi parubahan aha do na porlu ibahen ham. Pilih ma hasoman na boi mangurupi ham mangubah pingkiranmu. Anggo sonai ibahen ham, gabe boi ma ham pamateihon rasun ni dunia on ampa mangambukkon “sura-sura ampa uhur hagijangon, na manlawan habotohon na humbani Naibata”.​—2 Kor. 10:5.