BANI tahun 1970, dapot arkeolog ma sada gulungan i Ein Gedi, Israel dohor ni Laut Mati hampit barat. Gulungan ai idapot sanggah sidea mangkurak sinagoga na matutung hira-hira dobkonsi tahun 500 M. Halani domma maseda tumang gulungan ai, gabe lang tarbasa isini. Anggo ipaksa ibuka gabe maropuk ma ai. Tapi halani dong alat na canggih scanner 3-D, baru-baru on gabe boi ma tarbasa isi ni gulungan ai.

Aha ma isi ni gulungan ai? Gulungan ai marisi piga-piga ayat ni Bibel na ibuat humbani buku 3 Musa. Ijai dong homa isurat goran ni Naibata ibagas sahap Heber, mamakei Tetragramaton. Ra do gulungan ai domma dong humbani tahun 50 M ronsi 400 M. Jadi, gulungan on ma na sidokahan dobkonsi Gulungan Laut Mati (Qumran). Humbani na isurat si Gil Zohar i The Jerusalem Post, gabe ibotoh hita ma paima dapot Gulungan Ein Gedi ai, pitah Gulungan Laut Mati (hira-hira isurat tahun 100 SM) pakon Kodeks Aleppo (hira-hira isurat tahun 930 M) do na adong. Jadi dong ma hira-hira 1.000 tahun jarakni haduasi ai isuratkon. Piga-piga pakar Alkitab mangkatahon humbani Gulungan Ein Gedi na boi tarbasa ai, gabe ibotoh ma anggo Taurat na isalin Kaum Masoret lang mubah isini.