1. Domu bani Kolosse 2:4, 8, aha ma na ibahen Sibolis laho manrajai pingkiranta?

SIHOL do Sibolis ase hita lang be mangkaholongi Jahowa. Halani ai, marusaha ma ia pakahouhon pingkiranta ase boi hita iparjabolon ia janah ra mangihutkon harosuh ni uhurni. Ibahen ia do aha na sambor ai songon na dear idahon ase masuk hita hubagas tirangkapni.​—Basa Kolosse 2:4, 8.

2-3. (a) Mase maningon ipardiateihon hita sipasingat na isurat bani Kolosse 2:8? (b) Aha do na laho iulas hita bani artikel on?

² Mase maningon jaga hita ase ulang ioto-otoi Sibolis? Dingat ma, sanggah si Paulus manuratkon Kolosse 2:8, sedo hubani halak na lang sahaporsayaonni ai isurat, tapi hubani halak Kristen na iminaki do. (Kol. 1:2, 5) Gari sidea pe porlu ipasingat, tarlobih ma hita sonari on. (1 Kor. 10:12) Mase sonai? Halani dobkonsi Sibolis idabuhkon hu tanoh on, lambin igogohi ia do pakahouhon juakjuak ni Naibata. (Pangk. 12:9, 12, 17) Leganni ai, “lambin jahat” do halak na jahat ampa sipangoto-otoi bani panorangta sonari on.​—2 Tim. 3:1, 13.

³ Bani artikel on, iulas hita ma sonaha Sibolis manggunahon “sipaoto-oto na lumei” atap hata na so marguna laho pakahouhon pingkiranta. Janah, iulas hita homa tolu “akal-akal” na ibahen Sibolis laho mangoto-otoi hita. (Ep. 6:11) Dob ai, bani artikel na mangihut, iulas hita ma sonaha hita boi mambahen hamubahon porini domma sompat mangihutkon pingkiranni. Tapi paima ai, iulas hita ma lobei sonaha Sibolis pakahouhon halak  Israel dobkonsi masuk sidea hu Tanoh Parpadanan.

4-6. Domu bani 5 Musa 11:10-15, sonaha do holi halak Israel marjuma-juma sanggah sidea i tanoh Parpadanan?

⁴ Marusaha do Sibolis mambahen halak Israel ase manombah gana-gana. Sonaha carani? Ibotoh Sibolis do anggo halak Israel ai mamorluhon sipanganon. Jadi ipingkirhon ia ma sonaha ase sidea mangkorjahon harosuhni. Hinan, sanggah halak Israel i Masir, bah humbani Sungai Nil do na ipakei sidea laho mangarbahi jumani. Tapi halani lang dong sungai na banggal i Tanoh Parpadanan, mangarapkon udan ampa hombun do sidea laho mangarbahi jumani. (Basa 5 Musa 11:10-15; Jes. 18:4, 5) Halani ai, maningon iparlajari sidea ma cara na baru laho marjuma. Gabe sunsah ma ai iahap sidea halani ganup hasoman ni sidea na pandei marjuma domma marmateian sanggah i halimisan.

⁵ Tapi, domma ihatahon Jahowa legan do holi cara ni sidea marjuma-juma i Tanoh Parpadanan. Dob ai, ibere Ia do sipasingat hubani sidea, “Jaga nasiam ma diri nasiam, ase ulang [tareta-eta] uhur nasiam, gabe marbalik nasiam mangirikkon naibata na legan, anjaha marsombah hujai.” (5 Mus. 11:16, 17) Tapi sipasingat ai songon na lang dong kaitanni pakon horjani sidea laho marjuma-juma. Mase ma sonai sipasingat na ibere Jahowa hubani halak Israel?

⁶ Jahowa mambotoh isungkun halak Israel do holi bangsa-bangsa na tading i dohor ni sidea pasal marjuma. Tontu bahatan do pangalaman ni sidea pasal ai  marimbangkon halak Israel. Tapi dong do bahayani anggo isungkun halak Israel sidea. Halak Kanaan ai manombah Baal. Porsaya do sidea Baal ai do simada langit janah ia do sibere udan. Jadi lang marosuh Jahowa anggo juakjuak-Ni mangihutkon ajaran ni sidea ai. Hape ai do na tarjadi. Marulak-ulak do halak Israel manombah Baal. (4 Mus. 25:3, 5; Panguh. 2:13; 1 Raj. 18:18) Sonari, pardiateihon hita ma aha do na ibahen Sibolis laho pakahouhon pingkiran ni halak Israel.

7. Sonaha haporsayaon ni halak Israel iuji sanggah sidea masuk hu Tanoh Parpadanan?

⁷ Tontu lang salah anggo halak Israel mangarapkon udan laho mangarbahi juma ni sidea. Janah ibotoh Sibolis do sura-sura ni sidea ai. Jadi, ibahen Sibolis ma ai gabe dalan laho mangoto-otoi sidea. On ma akal-akalni na parlobei. Somalni, logou do ari bani ujungni bulan April ronsi bulan September. Bani bulan Oktober, mulai ma roh udan. Dobkonsi ai saud ma halak marpariama. Tapi halak Kanaan porsaya anggo ibahen sidea acara hubani gana-gana ni sidea, gabe salpu ma logou ni ari janah roh ma udan. Ijon ma marusaha Sibolis ase halak Israel mangihutkon hasomalan ni halak Kanaan ai. Anggo lang toguh haporsayaon ni sidea bani Jahowa, gabe dihut ma sidea mambahen sisonai laho pasangapkon Baal.

8. Patorang ma aha do akal-akal ni Sibolis na paduahon.

⁸ Igunahon Sibolis ma akal-akalni na paduahon. Marusaha do ia mambahen halak Israel mangkorjahon parriah-riahon. Sanggah bangsa na legan mambahen acara laho manombah naibatani, ihorjahon sidea do homa parriah-riahon. Dong dalahi pakon dalahi, dong homa naboru pakon naboru. Lang mahua pangahap ni sidea mangkorjahon ganupan ai. (5 Mus. 23:17, 18; 1 Raj. 14:24) Porsaya do sidea anggo ihorjahon sidea parriah-riahon, gabe gok ma pariama ni sidea ibahen naibatani ai. Bahat do halak Israel na mangihutkon hasomalan ni bangsa-bangsa ai. Halani ai, gabe dihut ma sidea manombah gana-gana. Sasintongni, domma iparjabolon Sibolis sidea.

9. Domu bani Hosea 2:15, 16, aha ma na ibahen Sibolis ase halak Israel lang mananda Jahowa?

⁹ Igunahon Sibolis ma akal-akalni na patoluhon. Ibahen ia do ase halak Israel lang tongon-tongon mananda ise do Jahowa ai. Bani panorang ni nabi Jeremia, ipatugah Jahowa domma ibahen nabi-nabi palsu ase juakjuak-Ni manlupahon goran-Ni “halani Baal”. (Jer. 23:27) Ra do lang be igunahon halak Israel goran ni Jahowa halani domma igantih sidea ai pakon Baal, artini “Simada” atap pe “Tuan”. Halani ai, ibagas pingkiran ni halak Israel dos do Jahowa pakon Baal. Isampur sidea ma panombahan hubani Baal sanggah sidea manombah Jahowa.​—Basa Hosea 2:15, 16.

10. Akal-akal aha do na igunahon Sibolis sonari on?

¹⁰ Sonari, igunahon Sibolis do homa tolu cara laho pakahouhon jolma. Ipakahou ia do halak marhitei sura-sura na lang salah. Ibahen ia do ase parriah-riahon  ai songon na lang salah idahon. Anjaha marusaha do ia mambahen halak ase lang mananda Jahowa. Ulas hita ma akal-akalni ai.

11. Aha do na ibahen Sibolis ase halak lang tongon-tongon mananda Jahowa?

¹¹ Ibahen Sibolis ma ase halak lang tongon-tongon mananda ise do Jahowa ai. Dobkonsi matei ganup apostel ni Jesus, bahat ma halak Kristen na murtad janah mangajarhon ajaran palsu. (Lah. 20:29, 30; 2 Tes. 2:3) Marusaha do sidea mambahen ase buei halak lang mambotoh ise do Naibata na sintong. Umpamani, ibagas Bibel igantih sidea do goran ni Jahowa gabe “Tuhan”. Halani ai sanggah ibasa halak Bibel, iagan sidea ma dos do Jahowa pakon “naibata” na legan na isobut ibagas Bibel. (1 Kor. 8:5) Isobut sidea do homa Jesus ai “Tuhan”. Jadi lang ibotoh halak anggo Jahowa ai lang dos pakon Jesus, Anak-Ni. (Joh. 17:3) On ma na mambahen dong ajaran Naibata Sitolu Sada. Hape, lang dong ai iajarhon ibagas Bibel. Ujungni bahat ma halak na porsaya anggo sidea lang boi mananda Jahowa. Majangin tumang do ganup ladung ai!​—Lah. 17:27.

12. Aha do na iojur ugama palsu bani buei halak, janah songon na ihatahon bani Rom 1:28-31 sonaha ma ujungni?

¹² Ibahen Sibolis do ase halak mangkorjahon parriah-riahon. Hinan, marhitei ugama palsu iojur Sibolis do ase halak Israel mangkorjahon parriah-riahon. Sonari pe sonai do homa na ibahen ia. Bahat do ugama palsu mangojur halak ase mangkorjahon parriah-riahon. Ujungni, lang be iihutkon halak aturan ni Jahowa. Gabe sambor ma parlahou ni halak songon na ipatugah si Paulus bani halak Kristen i Rom. (Basa Rom 1:28-31.) Deba humbani horja “na so patut” na ihorjahon dunia on tarmasuk ma parriah-riahon ampa homoseksualitas. (Rom 1:24-27, 32; Pangk. 2:20) Halani ai ponting tumang do ase hita mangihutkon ajaran ni Bibel.

13. Aha use akal-akal ni Sibolis?

¹³ Ipakahou Sibolis do halak marhitei sura-sura na lang salah. Ganup hita sihol do mandapot horja na sosok ase  boi mansarihon dirinta sandiri pakon kaluarganta. (1 Tim. 5:8) Halani ai, sanggah i sikolah marusaha do hita ase ringgas marlajar. Tapi maningon jaga do hita. Bani piga-piga nagori, iajarhon do homa ajaran ni jolma i sikolah. Iajarhon do halak ase porsaya lang adong Naibata ai. Iojur do homa muridni ase ulang mangihutkon aturan ni Bibel. Ihatahon sidea do pitah ajaran evolusi do na boi patorangkon sonaha mungkah ni hagoluhan. Janah bahat do ilmuwan na porsaya bani ajaran ai. (Rom 1:21-23) Tapi, marlawanan do na iajarhon sidea ai pakon “hapentaron ni Naibata”.​—1 Kor. 1:19-21; 3:18-20.

14. Hapentaran ni dunia on mangojur halak ase sonaha?

¹⁴ Marlawanan do hapentaran ni dunia on pakon aturan ni Naibata. Anggo dunia on, iojur do halak ase mangkorjahon “horja ni daging” sedo patuduhkon buah ni tonduy. (Gal. 5:19-23) Iojur do homa sidea ase margijang ni uhur. Ujungni lambin bahat ma halak na “mangkaholongi dirini”. (2 Tim. 3:2-4) Hape marlawanan do ai pakon harosuh ni Naibata. Anggo Naibata sihol ase juakjuak-Ni patuduhkon toruh ni uhur. (2 Sam. 22:28) Tapi dong do piga-piga halak Kristen na gabe mangihutkon pingkiran ni dunia on dobkonsi kuliah sidea. Ulas hita ma sada contohni.

15-16. Aha ma na boi iparlajari hita humbani pangalaman ni hasomanta ai?

¹⁵ Dong hasomanta naboru na domma 15 tahun lobih ibagas dinas sepenuh waktu. Isaritahon ia do pangalamanni  hinan. Nini ma, “Gati do hubasa janah hutangar bahaya do anggo hita mangindahi sikolah na gijang. Tapi lang hutangihon sipasingat ai, halani pangahapku lang sosok ai bangku.” Aha ma na masa hu bani? Nini do, “Gabe sibuk tumang ma ahu mangkorjahon tugas-tugas i sikolah. Halani ai lang sompat be ahu martonggo. Halani domma loja tumang huahap, gabe marayoh ma ahu mangidangi ampa mambahen persiapan paima martumpu. Ujungni, husadari ma domma mandaoh ahu humbani Jahowa dob kuliah ahu. Jadi huputuskon ma lang be hutoruskon sikolahkai.”

¹⁶ Gabe sonaha ma pangahap ni hasomanta ai bani halak na legan dobkonsi ia kuliah? Nini do, “Sasintongni maila do ahu patugahkon. Gabe hahurangan ni halak do na lalab hutonggor, tarlobih ma hahurangan ni sanina botou. Lalab do hurang huahap aha pe na ibahen sidea. Lang be marsaor ahu pakon sidea. Tapi lambin dokah, husadari ma lang boi sonai ahu. Hunjon hubotoh ma bahaya do anggo lang manangihon sipasingat na ibere Jahowa marhitei organisasi-Ni. Ambit hutangihon Ia, tontu lang sonai sitarononku.”

17. (a) Aha do na maningon bahenonta? (b) Aha do na laho iulas hita bani artikel na mangihut?

¹⁷ Ulang ma ra hita ipakahou Sibolis “marhitei hapentaron dunia ampa sipaoto-oto na lumei”. Ulang ra hita masuk hubagas tirangkap ni Sibolis. (1 Kor. 3:18; 2 Kor. 2:11) Ulang ma paturut Sibolis mambahen hita manlupahon Jahowa. Tapi totap ma ihutkon hita aturan ni Jahowa. Ulang paturut hita akal-akal ni Sibolis ai mambahen hita lang manangihon sipasingat ni Jahowa. Tapi porini domma tarihut hita bani pingkiran ni dunia on, aha ma na boi ibahen hita? Bani artikel na mangihut, ulas hita ma sonaha Hata ni Naibata boi mangurupi hita “manrumbakkon” pingkiran ampa hasomalan ni dunia on.​—2 Kor. 10:4, 5.