ARTIKEL PARLAJARAN 25
Marpangunsandeian ma hubani Jahowa Sanggah Holsohan
“Holsoh ibagas uhur patunduk jolma.”—POD. 12:25.
DODING 30 Naibatangku, Bapangku, ampa Hasomanku
NA LAHO IULAS *
1. Mase porlu iparuhurhon hita sipasingat humbani Jesus?
PASAL panorang parpudi, ibere Jesus do sipasingat hubani susianni. Ia mangkatahon, “Jaga ma hanima bani dirinima, ulang ma boratan uhurnima halani . . . holsoh-holsoh bani na i dunia on,” maksudni, holsoh-holsoh pasal hagoluhan siganup ari. (Luk. 21:34) Mase porlu iparuhurhon hita sipasingat ai? Halani bahat do homa na mambahen hita holsohan sonari on.
2. Aha do deba sitaronon na iahapkon sanina botounta?
2 Sipata lang pitah sada sitarononta, tapi bahat tumang do. Umpamani pardiateihon ma sada pangalaman humbani hasomanta na margoran si John. * Ia hona panahit tulang. Janah dob 19 tahun marhajabuan, itadingkon istrini homa ia. On ma na mambahen lambin pusok uhurni. Dob ai, haduasi boruni pe lang be mangidangi Jahowa. Leganni ai dong homa sapasang suami-istri na margoran si Bob pakon si Linda. Ipecat do sidea hun parhorjaanni janah maningon pindah rumah do sidea halani lang boi manggalar cicilan. Dob ai, dokter mangkatahon anggo si Linda hona panahit jantung na parah. Anjaha tambah use panahitni na legan.
3. Humbani Pilippi 4:6, 7, aha do na ipatugah ijai pasal Jahowa?
3 Tapi, pos ma uhurta anggo Jahowa ai Naibata na parholong anjaha iarusi Ia do sonaha pangahapta sanggah holsohan. Sihol do homa Ia mangurupi hita ase totap martahan. (Basa Pilippi 4:6, 7.) Ibagas Bibel bahat do isurat pasal juakjuak-Ni na marsitaronon. Ipatorang do homa sonaha Jahowa mangurupi sidea ase totap martahan ibagas situasini. Ulas hita ma piga-piga contohni.
“JOLMA DO SI ELIAS, SABIAK PAKON HITA”
4. Hasunsahan aha do na iahapkon si Elias, janah sonaha pangahapni bani Jahowa?
4 Bahat do hasunsahan na iahapkon nabi Elias sadokah ia mangidangi Jahowa. Ijia, si Ahab, raja ni halak Israel marhajabuan pakon si Isebel, sada naboru na jahat janah manombah Baal. Dob ai, iarahkon sidea do ganup halak ase manombah Baal. Bahat do homa nabi ni Jahowa na ibunuh sidea. Tapi maluah do si Elias. Sanggah masa lohei na maparah, isarihon Jahowa do ia halani marpangunsandeian hu Bani. (1 Raj. 17:2-4, 14-16) Marpangunsandeian do tong ia bani Jahowa laho manlawan nabi-nabi palsu pakon sisombah Baal. Iojur si Elias do ganup halak Israel ase mangidangi Jahowa. (1 Raj. 18:21-24, 36-38) Sadokah panorang hasosakan ai, gati do iahapkon si Elias sonaha Jahowa manlinggomi janah mangurupisi.
Isuruh Jahowa do sada malekat mampargogohi si Elias (Tonggor ma paragrap 5-6) *
5-6. Domu bani 1 Raja-raja 19:1-4, aha ma na iahapkon si Elias, janah sonaha Jahowa patuduhkon holong-Ni hu bani?
5 Basa 1 Raja-raja 19:1-4. Tapi dobkonsi itangar ia laho ibunuh si Isebel ma ia, mintor mabiar tumang do ia. Jadi, lintun ma ia hu Berseba. Gabe mandolei ma ia lanjar ‘ipangindo uhurni ma ase matei ia’. Mase boi sonai pangahapni? Jolma na lang gokan dear do si Elias, “sabiak pakon hita”. (Jak. 5:17) Ra, domma loja tumang ia janah holsohan. Janah iagan ia do lang dong be halak Israel na manombah Jahowa. Nini uhurni soya-soya ma ganup horjani, anjaha pitah ia mando na mangidangi Jahowa. (1 Raj. 18:3, 4, 13; 19:10, 14) Ra do tarsonggot uhurta mambotoh sonai pangahap ni nabi na setia ai. Tapi anggo Jahowa, iarusi do pangahap ni si Elias.
6 Halani ai, lang manggila Jahowa hubani si Elias. Tapi iurupi do ia ase gogoh use. (1 Raj. 19:5-7) Dob ai, ipatuduh Jahowa ma hu bani sonaha banggal ni kuasa-Ni. Gabe iarusi si Elias ma salah do hape pandapotni ai. Leganni ai, ipatugah Jahowa ma dong ope 7.000 halak i Israel na lang ra manombah Baal. (1 Raj. 19:11-18) Sonai ma cara ni Jahowa patuduhkon holong-Ni hubani si Elias.
SONAHA JAHOWA MANGURUPI HITA?
7. Sonaha pangalaman ni si Elias ai boi mangapoh hita?
7 Ai dong do homa na mambahen nasiam holsohan? Tontu tarapoh do uhurta mambotoh iarusi Jahowa do pangahap ni si Elias. Gabe porsaya ma hita ibotoh Jahowa do homa sitarononta. Ibotoh Ia do aha na boi ampa na lang boi ibahen hita, aha na ipingkirhon hita, janah sonaha pangahapta. (Ps. 103:14; 139:3, 4) Anggo marpangunsandeian hita bani Jahowa, songon na ibahen si Elias, iurupi Jahowa ma hita ase totap martahan ibagas hasosakan.—Ps. 55:23.
8. Sonaha Jahowa mangurupi hita sanggah ibagas hasosakan?
8 Anggo lalab ham holsohan, gabe iagan ham ma holi lang boi be mubah situasi ni ham ai. Ujungni, gabe mandolei ma ham. Tapi dingat ma sai urupan ni Jahowa do ham bani situasi sisonai. Sonaha Ia mangurupi hita? Iontang Ia do ham ase ra patugahkon ganup holsoh ni uhurmu hu Bani. Janah marjanji do Ia laho mambalosi tonggomu ai. (Ps. 5:4; 1 Ptr. 5:7) Jadi, gati ma martonggo sanggah ibagas hasosakan. Tontu lang hun surga Jahowa marsahap laho mangurupi hita, songon na ibahen Ia ondi hubani si Elias. Tapi marhitei Bibel ampa organisasi-Ni do Ia mangurupi hita. Bahat do homa sarita ibagas Bibel na boi mangapoh janah mambere pangarapan. Anjaha sanina botou pe boi do homa mangapoh hita.—Rom 15:4; Heb. 10:24, 25.
9. Sonaha hasomanta boi mangurupi hita?
9 Hinan, isuruh Jahowa do si Elias mambere tugas hubani si Elisa ase adong na mangurupisi sanggah na mandolei ai ia. Jadi, anggo ra hita patugahkon holsoh ni uhurta hubani hasoman, gabe iurupi ma homa hita ase boi martahan. (2 Raj. 2:2; Pod. 17:17) Tapi porini lang dong hasomanta laho marsarita, pindo ma bani Jahowa ase iurupi ham mandapot hasoman na boi mangapoh ham.
10. Sonaha pangalaman ni si Elias boi patoguhkon uhurta, janah sonaha janji na isurat bani Jesaya 40:28 boi mangurupi hita?
10 Jadi, iurupi Jahowa do si Elias ase boi tongtong mangidangi-Si hassi pe ibagas hasosakan. Tontu gabe toguh ma uhurta mambotoh ai. Ra do sadokah martahun-tahun, bahat sitaronon na mambahen hita loja janah holsohan. Tapi anggo totap hita marpangunsandeian bani Jahowa, bereon-Ni do hagogohon hubanta ase boi tongtong mangidangi-Si.—Basa Jesaya 40:28, 29.
SI HANNA, SI DAUD, PAKON “SI ASAP” MARPANGUNSANDEIAN BANI JAHOWA
11-13. Hasunsahan aha ma na iahapkon tolu juakjuak ni Naibata?
11 Dong homa contoh na legan na isurat ibagas Bibel. Umpamani, si Hanna. Halani lang dong niombahni, sai irisai imbangni ma ia. (1 Sam. 1:2, 6) Pusok tumang ma uhurni, lalab ma ia tangis, anjaha seng ra mangan.—1 Sam. 1:7, 10.
12 Leganni ai, dong homa Raja Daud. Halani bahat sitarononni gabe holsohan ma ia. Sai lalab do isolsoli ia dirini halani hasalahanni na hinan. (Ps. 40:13) Si Absalom anakni ai pe manlawan do hu bani, janah ujungni matei. (2 Sam. 15:13, 14; 18:33) Itahihon huan-kuanni do homa ia. (2 Sam. 16:23–17:2; Ps. 55:13-15) Isuratkon si Daud do sonaha pusok ni uhurni ibagas buku Psalmen. Isuratkon do homa anggo ia totap do porsaya hubani Jahowa.—Ps. 38:6-11; 94:17-19.
Aha do na mangurupi panurat ni psalmen mandapot gogoh use? (Tonggor ma paragrap 13-15) *
13 Dong homa sahalak panurat psalmen humbani suku Levi. Ra, ginompar ni si Asap do ia, janah domma martahun-tahun mangidangi i “ianan ni Naibata na pansing in”. Simburu do uhurni mangidah hagoluhan ni halak parjahat. Halani ai gabe holsohan ma ia janah lang martuah. Pangahapni, songon na soya-soya ma ia mangidangi Jahowa.—Ps. 73:2-5, 7, 12-14, 16, 17, 21.
14-15. Aha ma na boi iparlajari hita humbani tolu contoh na ipatugah ibagas Bibel?
14 Hassi pe sonai, hatolusi sidea tongtong do marpangunsandeian hubani Jahowa. Sai martonggo do sidea hu Bani. Ipatugah sidea do ganup holsoh ni uhurni bani Jahowa. Anjaha totap do sidea roh hu rumah panumbahan laho 1 Sam. 1:9, 10; Ps. 55:23; 73:17; 122:1.
manombah Jahowa.—15 Halani maidop uhur ni Jahowa, ibalosi ma tonggo ni sidea ai. Gabe damei ma pangahap ni si Hanna. (1 Sam. 1:18) Isurat si Daud ma sonon, “Buei pe sitaronon ni halak parpintor, tapi ipaluah Jahowa do ia humbani haganupan ai.” (Ps. 34:20) Na manuratkon psalmen ai pe gabe mambotoh ‘ijolom Jahowa do tanganni siamun’, janah ibere do hu bani podah na dear. Nini do, “Anggo ahu, hatuahon do bangku na dohor ai bani Naibata; Jahowa do hubahen hatengeran ni uhurhu.” (Ps. 73:23, 24, 28) Aha ma na boi iparlajari hita humbani sidea ai? Sipata, holsohan do hita halani bahat sitarononta. Tapi tongtong ma rimangi hita sonaha Jahowa mangurupi juakjuak-Ni hinan. Ase boi hita totap martahan hassi pe ibagas hasosakan, tongtong ma martonggo janah horjahon ma ganup parentah-Ni.—Ps. 143:1, 4-8.
MARPANGUNSANDEIAN MA BANI JAHOWA ASE BOI MARTAHAN
Sada hasomanta na papuligkon diri, tapi dobkonsi ia mangurupi na legan, gabe damei do pangahapni (Tonggor ma paragrap 16-17)
16-17. (a) Mase hita lang boi papuligkon diri? (b) Aha ma na porlu ibahen hita ase dapot gogoh use?
16 Dong homa parlajaran na boi ibuat hita humbani hatolusi halak ai. Sanggah ibagas hasosakan, ulang ma hita mandaoh Pod. 18:1) Dong hasomanta na margoran si Nancy, pusok tumang do uhurni halani itadingkon suamini. Nini do, “Sompat do lang marosuh ahu pajumpah atap marsahapi pakon ise pe. Tapi lambin pusok do uhurhu halani hubahen sonai.” Sonari lang sonai be pangahapni halani marusaha do si Nancy mangurupi hasoman na marsitaronon. Ia mangkatahon, “Hutangihon ma sanggah sidea mansaritahon holsoh ni uhurni. Gabe holong ma uhurhu mangidah sidea. Halani ai, lang be sai hupingkiri masalahku.”
humbani Jahowa atap pe papuligkon diri humbani hasomanta. (17 Anggo roh hita hu partumpuan, margogoh ma use hita. Sanggah martumpu, iahapkon hita ma sonaha Jahowa ‘mangurupi anjaha mangapoh’ hita. (Ps. 86:17) Ijai, ipargogohi do hita marhitei tonduy na pansing, Bibel, ampa sanina botou. Boi do homa hita marsiojuran pakon sanina botou na legan. (Rom 1:11, 12) Hasomanta na margoran si Sophia mangkatahon, “Halani pangurupion ni Jahowa ampa sanina botou, gabe boi ma ahu martahan. Domma huahapkon anggo lambin ringgas ahu martumpu janah mangidangi, gabe boi ma ahu martahan ibagas sitarononku.”
18. Sanggah maretek ni uhur hita, aha do na ibere Jahowa hubanta?
18 Marjanji do Jahowa anggo bani ari simagira lang dong be holsoh ni uhurta. Tapi sonari pe, marjanji do homa Ia laho mangurupi hita sanggah holsohan. Halani ai sanggah maretek ni uhur, dingat hita ma janji ai. Ibere Jahowa do holi hagogohon ase hita ulang lalab mandolei.—Pil. 2:13.
19. Janji aha do na isurat bani Rom 8:37-39?
19 Basa Rom 8:37-39. Apostel Paulus mangkatahon lang adong na boi mambahen sirang hita humbani holong ni uhur ni Naibata. Sonaha hita boi mangurupi sanina botou na holsohan? Bani artikel na mangihut ulas hita ma sonaha hita maniru Jahowa na patuduhkon idop ni uhur sanggah mangurupi sidea na holsohan.
DODING 44 Tonggo ibagas Hasosakan
^ par. 5 Bahatni sitaronon ampa holsoh ni uhur boi mambahen hita gabe loja anjaha marpusok ni uhur. Sonaha Jahowa boi mangurupi hita? Holi iulas hita ma humbani Bibel sonaha do hinan Jahowa mangurupi nabi Elias. Dong homa contoh na legan na patuduhkon sonaha hita boi marpangunsandeian bani Jahowa sanggah ibagas hasosakan.
^ par. 2 Piga-piga goran bani artikel on domma iubah.