1. Sonaha hita boi mangusihi Naibata na parholong in?

HOLONG tumang do Jahowa hubanta. (Joh. 3:16) Hita pe sihol mangusihi Naibatanta na parholong in. Halani ai, marusaha do hita patuduhkon ‘uhur na sapangahapan, marholong ni uhur anjaha maridop ni uhur’ bani ganup halak, tarlobih bani “hasomanta sahaporsayaon”. (1 Ptr. 3:8; Gal. 6:10) Jadi anggo adong sanina botounta na holsohan halani sitarononni, tontu sihol do hita mangurupi sidea.

2. Aha ma na laho iulas hita bani artikel on?

² Bahat do sitaronon ni halak na sihol mangidangi Jahowa. (Mrk. 10:29, 30) Ra, sai adong do lalab sitarononta ronsi roh ujung ni dunia on. Sonaha hita boi marsiurupan bani panorang sisonai? Pardiateihon hita ma parlajaran na boi ibuat hita humbani si Lot, si Job, ampa si Naomi. Ulas hita ma homa tantangan aha do na roh bani sanina botounta sonari, janah sonaha hita boi mangurupi sidea.

3. Songon na ibasa hita bani 2 Petrus 2:7, 8, haputusan aha ma na ibahen si Lot, janah sonaha ujungni?

³ Sanggah si Lot mamilih pindah hu kota Sodom, lepak do haputusanni ai. (Basa 2 Petrus 2:7, 8.) Tongon, jenges do tanoh ijai. Hassi pe sonai sambor tumang do parlahou ni parhuta ai. Gabe bahat ma sitaronon ni si Lot halani pindah hujai. (1 Mus. 13:8-13; 14:12) Ra, gabe marosuh tumang istrini tading ijai. Jadi, sanggah turun apuy pakon hirtah hun datas, dihut ma ia matei halani lang manangihon Jahowa. Dihut do homa matei calon helani ai. Jadi, bois ma ganup arta ni si Lot pakon  rumahni. Na mambahen pusok tumang uhurni, ai ma halani hamatean ni istrini. (1 Mus. 19:12-14, 17, 26) Bani panorang ai, sonaha Jahowa patuduhkon hasabaron hubani si Lot?

4. Sonaha Jahowa patuduhkon hasabaron hubani si Lot? (Tonggor ma gambar ni sampul.)

⁴ Hassi pe si Lot mamilih tading i kota Sodom, tapi totap do Jahowa maridop ni uhur hu bani. Isuruh do dua malekat-Ni paluahkon ia pakon kaluargani. Tapi lang mintor itangihon si Lot sipasingat na ibere malekat ai. “Ipadokah-dokah” do kaluar hun kota Sodom. Halani ai, mintor itangkap malekat ai ma tanganni anjaha iurupi ma ia pakon kaluargani kaluar hunjai. (1 Mus. 19:15, 16) Sanggah isuruh malekat ia lintun hu dolog, mangelek do si Lot ase ipaturut ia laho hu huta na sidohoran. (1 Mus. 19:17-20) Halani sabar Jahowa, ipaturut ma ia laho hujai. Tapi ujungni mabiar do si Lot tading ijai. Halani ai, pindah ma ia hu dolog songon na dob ihatahon Jahowa. (1 Mus. 19:30) Hunjon taridah ma, sabar tumang do Jahowa bani si Lot. Sonaha hita boi mangusihi Ia?

5-6. Sonaha hita boi maniru Jahowa sanggah mandalankon podah bani 1 Tessalonika 5:14?

⁵ Songon si Lot, ra do adong sanina botou na lepak sanggah mambahen haputusan. Ujungni, gabe adong ma parsoalan ni sidea. Anggo domma sonai, aha ma na maningon bahenonta? Ra mintor podas ma hita manguhumi sidea halani lang ra manangihon hata. (Gal. 6:7) Tapi sasintongni, dearan do anggo iurupi hita sidea, songon na ibahen Jahowa hubani si Lot.

⁶ Isuruh Jahowa malekat ai roh hubani si Lot sedo pitah laho pasingatkon si Lot. Tapi maningon iurupi sidea do homa si Lot ase maluah humbani panguhuman na laho mangonai Sodom. Jadi porini adong hasomanta na lepak sanggah mambahen haputusan, dear ma anggo ipasingat hita ia ase ulang hona masalah. Porini lang mintor idalankon ia sipasingat hun Bibel, ulang mintor itadingkon ia. Tapi sabar ma hita. (1 Joh. 3:18) Bahen hita ma songon na ibahen malekat ai na manangkap tangan ni si Lot. Pindahi ma cara na legan na boi mangurupi ia mandalankon podah ni Bibel.​—Basa 1 Tessalonika 5:14.

7. Sonaha hita boi maniru pambahenan ni Jahowa hubani si Lot?

⁷ Ibagas suratni, si Petrus mangkatahon anggo si Lot ai halak na pintor. Hunjon taridah ma lang hasalahan ni si Lot na idingat Jahowa. Tontu malas uhurta mambotoh lang sai idingat Jahowa hasalahanta. (Ps. 130:3) Jadi, sonaha hita boi mangusihi Ia? Anggo pitah na madear dassa na idingat hita humbani sanina botou, tontu lambin urah ma hita sabar hubani sidea. Hasilni, lambin urah ma sidea manjalo sipasingat na ibere hita.

8. Sonaha hita patuduhkon idop ni uhur?

⁸ Anggo si Job marsitaronon sedo halani hasalahanni. Hassi pe sonai parahan do sitarononni marimbangkon sitaronon ni si Lot. Bois do ganup na dong bani, artani, janah hona panahit homa ia. Na siparahan, matei do homa ganup niombahni. Dob ai, iuhumi tolu hasomanni homa ia. Mase hasomanni ai lang maridop ni uhur bani si Job? Halani lang marusaha sidea mangarusi situasini. Ai ma na mambahen kasar  sidea marsahap hubani si Job. Sonaha ase hita ulang mambahen hasalahan na sisonai. Dingat ma, pitah Jahowa do na boi mangarusi situasi ni ganup jolma. Halani ai, anggo adong hasoman na mansaritahon sitarononni, dear ma tangihon. Tapi lang pitah ai. Marusaha ma homa mangarusi sonaha pangahapni. Hasilni, gabe boi ma hita patuduhkon uhur na sapangahapan hubani sanina botou.

9. Anggo hita maridop ni uhur, aha ma na lang ibahen hita, janah mase?

⁹ Anggo maridop ni uhur hita, tontu lang isaritahon hita masalah ni hasoman hubani halak na legan. Anggo isaritahon hita ai, boi do gabe adong parposahan ibagas kuria. (Pod. 20:19; Rom 14:19) Leganni ai, lambin pusok ma homa uhur ni hasoman na marsitaronon ai. (Pod. 12:18; Ep. 4:31, 32) Halani ai, dearan ma anggo marusaha hita mangindahi aha na madear hum bani. Janah pingkirhon ma sonaha hita boi mangurupisi ibagas sitarononni.

10. Aha ma na boi iparlajari hita humbani Job 6:2, 3?

¹⁰ Basa Job 6:2, 3. Sipata, lepak-lepak do parsahap ni si Job. Tapi ujungni, isolsoli ia do ganup hatani ai. (Job 42:6) Songon si Job, bahat do halak sonari na lepak parsahapni sanggah marsitaronon. Tapi ujungni isolsoli sidea do homa ai. Jadi, aha ma na ibahen hita anggo adong hasomanta na sonai? Ulang ma hita podas-podas manguhumi sidea. Tapi totap ma hita maridop ni uhur. Dingat ma lang marosuh Jahowa ise pe hita marsitaronon. Halani ai, porini adong hasomanta na lepak marsahap sanggah  marsitaronon ia, marusaha ma hita mangarusi ai. Hassi pe ra sidea mangkatahon na lepak pasal Jahowa atap pasal dirinta, ulang ma mintor manggila hu bani.​—Pod. 19:11.

11. Sanggah mambere podah, sonaha sintua boi maniru si Elihu?

¹¹ Sipata, halak na marsitaronon ai porlu do homa ipodahi anjaha ipatorsa-torsa. (Gal. 6:1) Anggo sonai, aha ma na porlu ibahen sintua? Tiru ma si Elihu na patuduhkon uhur na sapangahapan sanggah manangar si Job marsarita. (Job 33:6, 7) Dob iarusi ia situasi ni si Job, ipodahi ia ma si Job. Jadi sintua pe marusaha ma manangihon janah mangarusi situasi ni sasada halak. Hasilni, gabe urah ma ijalo na marsitaronon ai podahni.

12. Sonaha pangahap ni si Naomi halani matei suamini ampa dua anakni?

¹² Setia do si Naomi janah mangkaholongi Jahowa. Dob matei suamini ampa dua anakni, sihol ma ia manggantih goranni gabe si Mara, na mararti “Paet”. (Rut 1:3, 5, 20, 21) Sadokah sitarononni ai, totap do si Rut, parumaenni ai mangkasomanisi. Lang pitah isarihon si Rut ia, tapi iapoh do homa. Sobali na mangurupisi, ipatuduh si Rut do holongni marhitei parsahap na lamlam.​—Rut 1:16, 17.

13. Mase halak na matei pasangan goluhni porlu iurupi?

¹³ Suami istri ai usih songon dua hayu na rap isuan. Dob martahun-tahun marsada ma urat ni haduasi hayu ai. Porini matei sada hayu ai, banggal do pengaruhni hubani hayu na sada nari. Sonai ma homa anggo matei sasada halak, tontu pusok tumang ma uhurni pasanganni. Halani ai ma, porlu tumang do hita mangurupi sanina atap botou na matei pasangan goluhni. Sonai ma na iahapkon si Paula. * Sompong do matei suamini. Ia mangkatahon, “Mubah tumang do huahap hagoluhanku. Lang dong be hasomanku na sidearan. Somalni, husaritahon do ganupan hu bani. Ia do hasomanku ibagas na sunsah ampa na sonang. Sanggah pusok uhurhu, iapoh ia do ahu. Tapi dobkonsi lang dong be ia, songon na magou do huahap satongah goluhku.”

14-15. Sonaha hita boi mangapoh sasada halak na matei pasangan goluhni?

¹⁴ Sonaha hita boi mangapoh sasada halak na matei pasangan goluhni? Hassi pe lang ibotoh hita sonaha mambere hata apoh-apoh, marusaha ma marsahap hu bani. Si Paula na isaritahon nongkan ai mangkatahon, “Tongon sunsah do pangahap ni ganup halak sanggah dong na matei. Halani ai, ra do piga-piga halak pitah sip dassa halani mabiar lepak holi ia marsahap. Tapi rahanan ma lepak ia marimbangkon lang mangkatahon age aha pe.” Sasintongni na marpusok ni uhur ai lang mangarap ase ganjang halak marsahap laho mangapoh ia. Si Paula mangkatahon, “Tarapoh do uhurhu age pe hasomanku pitah mangakatahon, ‘Dihut marpusok ni uhur da.’”

¹⁵ Piga-piga tahun na salpu, matei ma istri ni si William. Ia mangkatahon, “Malas tumang do uhurhu sanggah isaritahon sanina botou habujuran ni istringku. Gabe hubotoh ma bahat do halak na marosuh anjaha mangkaholongisi. Tarapoh do ahu manangar ai. Harga tumang do  ia bangku halani ia pasangan goluhku.” Si Bianca na dob mabalu mangkatahon, “Tarapoh do homa uhurhu sanggah dong na mangarahkon ahu martonggo ampa mambasahon sada atap dua ayat hun Bibel. Gabe tarapoh do homa ahu sanggah isaritahon sidea pasal suamiku, atap sanggah itangar sidea ahu marsarita.”

16. (a) Aha ma na maningon ibahen hita hubani sidea na marpusok ni uhur? (b) Domu bani Jakobus 1:27, tugas aha ma na ibere Jahowa hubanta?

¹⁶ Songon si Rut na tongtong mangurupi si Naomi, marusaha ma hita tongtong mangurupi halak na matei na hinaholonganni. Si Paula na ipatugah nongkan ai mangkatahon, “Sanggah matei suamiku, mintor bahat do na roh mangapoh anjaha mangurupi ahu. Dob piga-piga dokah, sibuk ma sidea mangurus urusanni bei. Tapi anggo ahu, lape tarbahen ahu sonai. Sasintongni halak na marpusok ni uhur, porlu do tongtong iapoh ronsi marbulan-bulan, atap martahun.” Tangkas ma lang dos dokahni halak marpusok ni uhur. Dong na podas, tapi dong homa na dokah. Janah legan-legan do homa cara ni sidea patuduhkon pusok ni uhurni. Dong na lungun pangahapni sanggah mardingat aha na ongga ihorjahon ia rap pakon na dob matei ai. Halani ai, sada hasangapon do anggo ra hita mangurupi halak na marpusok ni uhur.​—Basa Jakobus 1:27.

17. Mase halak na itadingkon pasangan goluhni porlu iurupi?

¹⁷ Dong homa piga-piga halak na marsitaronon  anjaha na holsohan halani itadingkon pasangan goluhni ia. Songon si Joyce, itadingkon suamini do ia halani naboru na legan. Nini do, “Pusokan do uhur isirangkon suami marimbangkon sirang halani hamateian. Porini matei ia halani boritan, sedo pilihanni ai. Tapi on, ia do na mamilih manadingkon ahu. Majangin tumang do huahap pambahenanni ai.”

18. Sonaha hita boi mangurupi halak na lang dong be pasangan goluhni?

¹⁸ Anggo bujur hita hubani halak na lang dong be pasangan goluhni, on patuduhkon anggo hita mangkaholongi sidea. Lungun tumang do pangahapni. Halani ai, porlu ma hita gabe huan-kuan bani sidea. (Pod. 17:17) Sonaha hita patuduhkon ai? Boi do iontang hita sidea mangan hu rumahta, rup mardalani, atap mangidangi. Sipata, boi do homa iarahkon nasiam ia dihut sanggah nasiam mambahen parlajaran Bibel kaluarga. Anggo sonai ibahen hita, tontu malas do uhur ni Jahowa halani ‘dohor do Ia bani halak paruhur na marosak’ janah Ia do “panguhum bani na mabalu”.​—Ps. 34:19; 68:6.

19. Mardingat 1 Petrus 3:8, aha ma na maningon ibahen hita?

¹⁹ Lang piga dokah nari, sanggah mamarentah Harajaon ni Naibata i tanoh on, ilupahon ganup halak ma hasosakan na dob salpu humbagas uhurni. Tontu ipaima-ima hita ma panorangni sanggah “seng be ingaton na parlobei in, barang puho ibagas uhur”. (Jes. 65:16, 17) Tapi paima roh ari ai, marsiurupan ma hita. Patuduh hita ma holongta bani ganup sanina botou marhitei parsahap ampa parlahounta.​—Basa 1 Petrus 3:8.