GANUPAN do hita porsaya anggo Jahowa manogu-nogu juakjuak-Ni sadokah “panorang parpudi” on. Ibere do hubanta aha pe na ihaporluhon ase lambin orot hu Bani. (2 Tim. 3:1) Tapi maningon unduk do homa hita hubani Jahowa. Situasinta on boi ipausih songon situasi ni halak Israel hinan sanggah i halimisan atap padang gurun. Sanggah ai maningon ihorjahon sidea do domu bani sora ni tarompet na itangar sidea.

Isuruh Jahowa ma ase ibahen si Musa tarompet humbani pirak “laho patumpuhon kuria ai ampa laho pabingkatkon tumpuan ai”. (4 Mus. 10:2) Dong piga-piga cara na ibahen malim sanggah manompul tarompet ai. Hunjai ma gabe ibotoh halak Israel aha do na laho ihorjahon sidea. (4 Mus. 10:3-8) Bani artikel on, holi iulas hita ma tolu cara na porlu ibahen laho mandapot tugah-tugah, janah ibandingkon hita ma holi ai bani sora ni tarompet i Israel hinan. (1) Iontang do juakjuak ni Naibata ase roh hu kebaktian. (2) Iontang do ase pengawas mandapot pelatihan. (3) Ipindo do ase ganup kuria ra mangihutkon parubahan.

Anggo Jahowa sihol ase “ganup tumpuan” ai martumpu hu lobei ni labah ni lampo-lampo atap tabernakel ai, maningon isompul malim ma haduasi tarompet ai. (4 Mus. 10:3) Jadi ganup ma suku na ibagi gabe ompat kalompok na markemah i kaliling ni tabernakel ai boi manangar sora ni tarompet ai. Sidea na tading dohor hun tabernakel, boi ma mintor podas das ijai. Tapi sidea na markemah daoh hunjai ra do dokah ase das. Lang soal dohor atap pe daoh sidea, Jahowa sihol ase ganupan sidea martumpu ase manangar tugah-tugah hun Bani.

Sonari lang be i tabernakel hita martumpu, tapi iontang do hita ase roh hu kebaktian atap partumpuan na leganni. Ijai dapot hita ma pangajaran ampa tugah-tugah na ponting. I sab dunia on, dos do pangajaran na ijalo Saksi-Saksi Jahowa. Tontu marmalas ni uhur ma ise pe na ra manjalo ontangan ai. Dong do sidea na roh hun ianan na daoh. Hassi pe sonai bahat do guna na idapot sidea.

Sonaha ma sanina botou na iananni daoh hun kebaktian ai? Halani domma canggih teknologi sonari, boi do sidea mandapot guna humbani acara-acara sisonai. Janah dos songon na dihut do homa sidea bani kebaktian ai. Umpamani, sanggah roh wakil ni Pangurus Pusat hu kantor cabang i Benin, boi do homa sanina botou na tading i ianan na daoh manonton acara ai. Songon sanina botou na tading i Arlit, Niger. Dong 21 hadirin  ijai. Tarmasuk ma homa piga-piga parlajar Bibel. Hassi pe daoh ianan ni sidea hun lokasi kebaktian, tapi pangahap ni sidea songon na dihut do sidea bani kebaktian na irohi 44.131 halak ai. Dong sada sanina na manurat, “Martarima kasih tumang do hanami halani boi manonton acara ai. On patuduhkon holong tumang do uhur ni nasiam bannami.”

Anggo sada do tarompet na isompul malim, pitah “kopala pambobai ni halak Israel marribu-ribu” ma na roh hu partumpuan ai. (4 Mus. 10:4) Ijai ma dapot sidea hatorangan ampa pelatihan humbani si Musa. On ma na mangurupi sidea ase dear mambobahon sukuni. Porini dihut ham gabe kopala ijai, tontu marusaha do ham roh hujai ase boi mandapot guna.

Sonari, sintua sedo gabe “kopala” atap songon na mamaksa sanina botou i kuria. (1 Ptr. 5:1-3) Tapi marusaha do sidea ase boi dear mamparmahani biri-biri ni Naibata. Halani ai, sanggah sidea iontang ase dihut bani pelatihan i Sikolah Pelayanan Kerajaan, marusaha do sidea ase boi dihut. Bani sikolah ai iajari do sidea ase boi lambin dear mangurus urusan i kuria. Hasilni gabe boi ma sidea mangurupi sanina botou ase lambin orot hubani Jahowa. Anggo nasiam lape dihut bani sikolah ai, boi do nasiam mandapot guna humbani sanina na domma dihut bani sikolah ai.

Anggo mareta-eta sora ni tarompet ai, on patuduhkon Jahowa sihol ase bangsa Israel pindah hu ianan na legan. (4 Mus. 10:5, 6) Taratur tumang do sidea sanggah na pindah ai. Tontu lang urah mangkorjahon ai. Sipata ra do adong halak Israel na marayoh laho pindah. Mase sonai?

Dong na mangahap magatitu do sidea pindah. “Sipata humbani bodari das ronsi sogod do marsaran” sidea i sada ianan. Tapi sipata boi do “dua ari, barang sabulan, barang lobih” ase pindah. (4 Mus. 9:21, 22) Jadi sadokah pardalanan ai, piga hali ma sidea pindah? Humbani buku 4 Musa bindu 33 ipatugah dong hira-hira 40 hali sidea pindah.

Sipata halak Israel marsaran i ianan na linggom. Halani sidea dong i “halimisan na bolon anjaha na majangin”, tontu sonang ma uhur ni sidea anggo boi marsaran i ianan na linggom. (5 Mus. 1:19) Ra do ai na mambahen piga-piga halak Israel gabe marayoh laho pindah. Haru do uhur ni sidea lang boi dapot ianan sisonai.

Sanggah laho pindah sidea, maningon sabar do piga-piga suku paimahon suku na legan laho. Ganup do sidea boi manangar sora ni tarompet ai, tapi lang boi rup laho sidea. Sanggah parlobei sahali itangar sidea mareta-eta sora ni tarompet ai, suku-suku na markemah dompak timur ma na maningon laho. Suku Juda, suku Isasar, pakon suku Sebulon ma ai. (4 Mus. 2:3-7; 10:5, 6) Dob laho na tolu suku ai, isompul malim ma use mareta-eta tarompet ai. Ai ma tandani tolu suku na markemah dompak selatan na maningon laho. Jadi sonai ma na ibahen malim ronsi laho ganup suku ai.

Sanggah dong parubahan na ibahen organisasi, ra do lang urah iahap ham mandalankon ai. Ra do ai halani dong piga-piga parubahan na ibahen. Atap ra do iahap ham domma sosok pangaturan na ibahen sadokah on. Jadi lang marosuh ham anggo ai iubah. Halani ai, ra do iahap ham maningon sabar janah porlu do panorang ase boi mangihutkon parubahan ai. Hassi pe sonai, anggo ra hita mangihutkon parubahan ai, boi do holi ididah hita marguna do parubahan ai hubanta, janah ibotoh hita ma marosuh do Jahowa hubanta.

Bani panorang ni si Musa, itogu-togu Jahowa do marjuta dalahi, naboru, pakon dakdanak manlopusi padang gurun. Anggo lang iurupi janah itogu-togu Jahowa, lang boi sidea martahan. Sonari itogu-togu Jahowa do homa hita sadokah panorang parpudi. Iurupi Ia do homa hita ase lambin toguh haporsayaonta janah lambin orot hu Bani. Halani ai, sihol do hita manangihon-Si songon halak Israel na mandalankon domu hubani sora ni tarompet na itangar sidea.