Dong siah sifat na ipatugah bani ayat ai. Ijai ihatahon, “On do buah ni tonduy: Holong, malas ni uhur, damei, lumbang ni uhur, habasaron, halayakon, haporsayaon, halamlamon, ampa panrajaion diri.” Tapi lang pitah ai na isobut buah ni tonduy.

Hunja ibotoh hita ai? Bani ayat sebelumni dong ihatahon si Paulus, “Horja ni daging ai ma: Parriah-riahon, habutakon, goluh na so marrantei, marnaibata na legan, hadatuon, parmunsuh-munsuhon, partinggilan, parsimburuon, ringis, uhur haut, parbolah-bolahon, parlegan-leganon, subil, parmabukon, marpoyapoya ampa na usih hujai.” (Gal. 5:19-21) Bani ayat ai dong ihatahon si Paulus “na usih hujai”. Jadi “horja ni daging” na usih hujai isobut do homa bani Kolosse 3:5. Dobkonsi patugahkon siah sifat nongkan ai, bani ayat 23 ihatahon ia do use, “Seng marlawan titah dompak na sonai ai.” Hunjon tangkas ma ibotoh hita dong ope sifat na legan sobali na siah ai, na tarmasuk buah ni tonduy.

Ase lambin iarusi hita ai, pardiateihon ma na ihatahon si Paulus hubani kuria i Epesus. Nini do, “Buah ni haliharon ai ma sagala halayakon, hapintoron, ampa hasintongan.” (Ep. 5: 8, 9) Halani ihatahon “buah ni haliharon” do “halayakon”, sonai homa hapintoron ampa hasintongan, jadi “buah ni tonduy” do homa ganupan ai.

Lambin iarusi hita do homa ai anggo ipardiateihon hita podah ni si Paulus hubani si Timoteus. Iojur do ase si Timoteus patuduhkon onom sifat on: “hapintoron, hadaulaton, haporsayaon, holong ni uhur, hasabaron, ampa lamlam ni uhur”. (1 Tim. 6:11) Pitah tolu dassa humbani onom sifat ai na tarmasuk “buah ni tonduy”, ai ma haporsayaon, holong, ampa halamlamon. Hassi pe sonai maningon iurupi tonduy na pansing do si Timoteus ase boi patuduhkon hapintoron, hadaulaton, ampa hasabaron.​—Bandingkon Kolosse 3:12; 2 Petrus 1:5-7.

Jadi, iurupi tonduy na pansing do hita ase boi patuduhkon siah sifat na ipatugah bani Galatia 5:22, na isobut “buah ni tonduy”. Tapi, bahat ope sifat-sifat na legan na maningon ipatuduh halak Kristen. Maningon ipakei hita do parlahou na baru, “na tinompa usih hubani Naibata, ibagas hapintoron ampa hapansingon na botul”.​—Ep. 4:24.