“Sanggah martinggili ahu pakon panogolanku, mintor husongkik do ia janah sihol hubunuh.”​—Si Paul.

“Urah-urah tumang do ahu manggila i rumah. Sanggah manggila ahu, mintor huparseda do barang-barang atap hugijigkon.”​—Si Marco.

Ra do lang ibahen hita songon na ibahen sidea ai. Tapi, halani ganup jolma ginompar ni si Adam, gabe mardousa ma ganupan hita. Halani ai ma sipata lang urah hita manrajai diri. (Rom 5:12) Songon si Paul pakon si Marco, dong do homa na urah-urah manggila. Dong na lang urah manrajai pingkiranni. Umpamani, sai lalab do ipingkiri parsoalanni atap na mambahen sidea maretek ni uhur. Dong do homa na lang urah manrajai hisap-hisap ni dagingni. Umpamani, sihol mangkorjahon parriah-riahon, marminum-minum, ampa marnarkoba.

Sambor do ujungni anggo lang boi hita manrajai pingkiran, hisap-hisap ni dagingta, ampa pambahenanta. Aha ma na porlu ibahen hita ase ulang sonai? Maningon marusaha ma hita manrajai diri. Ase boi ipatuduh hita ai, ulas hita ma tolu sungkun-sungkun on: (1) Aha do panrajaion diri ai? (2) Mase ponting ai? (3) Halani “buah ni tonduy” do panrajaion diri ai, sonaha hita boi patuduhkon ai? (Gal. 5:22, 23) Dob ai, iulas hita homa aha do na porlu ibahen hita sanggah lang boi hita manrajai diri.

Halak na boi manrajai diri, ipingkirhon ia do lobei aha na laho ihatahon ampa na laho ihorjahonsi. Marusaha do ia ase pambahenan ampa parsahapni boi pamalaskon uhur ni Naibata.

Jesus do siusihan sonaha patuduhkon panrajaion diri. Bibel mangkatahon, “Seng manrisai ia sanggah na hona risa; seng asup-asup ia sanggah manaron na marsik, tapi iondoskon do ai bani Panguhum na pintor in.” (1 Ptr. 2:23) Sanggah igantung Jesus bani sada hayu anjaha irisai, totap do ia boi manrajai diri. (Mat. 27:39-44) Sanggah ilajou pambobai ugama ia ase lepak marsahap, totap do irajai ia dirini. (Mat. 22:15-22) Anjaha sanggah manggila halak Jahudi janah sihol manggijigkon batu, lang manggila ia. Tapi “ponop ma Jesus misir hun rumah panumbahan ai”.​—Joh. 8:57-59.

Hassi pe lang sempurna hita, ai boi do itiru hita Jesus? Boi. Apostel Petrus mangkatahon, “Kristus pe manaron na marsik do halani nasiam, mambere siusihan bani nasiam, ase iirikkon nasiam bokas ni nahei-Ni.” (1 Ptr. 2:21) Jadi boi do iirikkon hita bokasni atap itiru hita Jesus laho manrajai dirinta. Mase ponting ai?

Ase malas uhur ni Jahowa mangidah hita, maningon ipatuduh hita do panrajaion diri.  Hassi pe domma dokah hita mangidangi Jahowa, tapi anggo lang irajai hita parsahap ampa pambahenanta, ujungni boi do gabe seda parhasomananta pakon-Si.

Dingat ma si Musa. Ijia, “jolma na lamlam tumang do si Musa lobih humbani sagala jolma na i atas tanoh on”. (4 Mus. 12:3) Sadokah marpuluh tahun, sabar do ia mambobahon halak Israel na gati marungut-ungut. Tapi bani sada ari, mintor manggila ma si Musa bani sidea halani marungut-ungut lang adong bah. Mintor kasar ma ia marsahap hubani sidea. Nini ma, “Bogei ma, nasiam sipanggeori! Tarpaluar do bah bani nasiam hun dolog batu on?”​—4 Mus. 20:2-11.

Ijai ma hurang panrajaion diri ni si Musa. Lang ipasangap ia Jahowa, hape Ia do na mambere bah bani sidea. (Ps. 106:32, 33) Ujungni, lang ipaturut Jahowa si Musa masuk hu Tanoh Parpadanan. (4 Mus. 20:12) Ra do sadokah goluhni, isolsoli si Musa do hasalahanni ai.​—5 Mus. 3:23-27.

Aha ma parlajaranni hubanta? Hassi pe domma dokah hita mangidangi Jahowa, tapi lang boi kasar parsahapta hubani halak na mambahen borit uhurta, atap pe hubani halak na mambahen na lepak. (Ep. 4:32; Kol. 3:12) Tongon, anggo lambin matua hita, ra do lang urah patuduhkon hasabaron. Tapi dingat ma pangalaman ni si Musa ai. Tontu lang ra hita soya-soya pangidangionta sadokah on halani lang boi manrajai diri. Jadi aha ma na porlu ibahen hita ase boi manrajai diri?

Martonggo ma mangindo tonduy na pansing. Mase? Halani buah ni tonduy do panrajaion diri ai. Anjaha ibere Jahowa do tonduy-Ni bani ise pe na ra mangindo. (Luk. 11:13) Marhitei tonduy-Ni iurupi Jahowa do hita ase margogoh patuduhkon panrajaion diri. (Pil. 4:13) Iurupi do homa hita ase boi patuduhkon holong. Anggo adong holong ibagas dirinta, lambin urah ma hita manrajai diri.​—1 Kor. 13:5.

Padaoh hita ma dirinta humbani aha pe na mambahen hita lang manrajai diri. Umpamani, ulang ma ididah hita aha pe na sambor i internet atap mangidah hiburan “na lang patut”. (Ep. 5:3, 4, Terjemahan Dunia Baru) Sasintongni, maningon ipadaoh hita do dirinta humbani aha pe na mambahen tubuh hisap-hisap ni daging. (Pod. 22:3; 1 Kor. 6:12)  Umpamani, anggo iahap sasahalak urah ia mamingkirhon na sambor, iputuskon ia ma lang ra ia manonton film atap pe mambasa buku na mambahen tubuh pingkiran na lang suman.

Ra do lang urah mandalankon ai! Tapi anggo torus hita marusaha, ibere Jahowa do hagogohan hubanta laho manrajai diri. (2 Ptr. 1:5-8) Iurupi Ia do hita ase boi manrajai pingkiran, parsahap, ampa parlahounta. Sonai ma na iahapkon si Paul pakon si Marco. Sonari lang be urah-urah sidea manggila. Pardiateihon homa contoh na legan. Dong sada sanina na urah manggila, tarlobih sanggah mamboan motor ia. Sipata, ra do homa ia martinggili i dalan. Halani ai, aha ma na ibahen ia? Nini do, “Torus do hutonggohon ai. Huparlajari ma artikel na mangulas sonaha boi manrajai diri, anjaha hudingat do ayat-ayat ni Bibel na boi mangurupi ahu. Hassi pe domma martahun-tahun hubahen sonai, tapi maningon hupasingat do diringku tiap sogod ase boi ahu manrajai diri. Anjaha anggo marjanji ahu pakon na legan, mintor girah do ahu laho ase ulang tarolos i dalan.”

Sipata, lang tarrajai hita dirinta. Ra do halani ai gabe maila hita martonggo bani Jahowa. Tapi sasintongni, sangah ai ma porlu tumang hita mangindo pangurupion ni Jahowa marhitei tonggo. Sanggah martonggo, pindo ma hasasapan ni dousa. Janah marusaha ma ase ulang mangulaki hasalahanmu ai. (Ps. 51:11-13) Pos ma uhurmu itangihon Jahowa do tonggomu ai. (Ps. 102:18) Apostel Johannes mangkatahon marhitei daroh ni Jesus domma ‘ipaborsih hita humbani sagala dousa’. (1 Joh. 1:7; 2:1; Ps. 86:5) Dingat ma homa iparentahkon Jahowa do juakjuak-Ni ase tongtong manalpuhon hasalahan ni halak na legan. Tontu ra do homa Ia manasap hasalahanta.​—Mat. 18:21, 22; Kol. 3:13.

Sanggah si Musa lang boi manrajai diri, lang marosuh Jahowa hu bani. Hassi pe sonai, isalpuhon Jahowa do hasalahanni. Bibel mangkatahon sahalak na toguh marhaporsayaon do si Musa. Janah maningon itiru hita do ia. (5 Mus. 34:10; Heb. 11:24-28) Tongon lang ipaturut Jahowa si Musa masuk hu Tanoh Parpadanan. Tapi ipagoluh Jahowa do holi ia i Paradeiso janah boi manggoluh sadokah ni dokahni. Hita pe, boi do manggoluh sadokah ni dokahni anggo marusaha hita patuduhkon panrajaion diri humbani sonari.​—1 Kor. 9:25.