DOMMA somal halak Israel mambere guguan atap sumbangan laho mangurupi horja i rumah panumbahan. Tapi bani panorang ni Jesus bahat tumang pajak na maningon igalar halak Jahudi. On ma na mambahen lambin borat pangahap ni halak ijia.

Ganup halak Jahudi na dob magodang, maningon mambere sumbangan satongah sekel (dua drakhma) laho manggalar ganup haporluan na i tabernakel. Sonai do homa na ibahen sidea dob dong rumah panumbahan. Bani abad na parlobei pe ipakei do homa sumbangan ai, laho mambere galangan ampa mangurus rumah panumbahan na ipadear si Herodes. Sumbangan ai do homa na isungkun piga-piga halak Jahudi hubani si Petrus, ai igalar Jesus do ai atap lang. Hassi pe lang maningon igalar Jesus ai, tapi isuruh ia do si Petrus mambuat duit laho manggalar ai.​—Mat. 17:24-27.

Dong homa pajak na legan na maningon igalar halak Jahudi. Maningon igalar sidea do saparsapuluh hasilni tanohni ampa humbani ganup na idapot sidea. (3 Mus. 27:30-32; 4 Mus. 18:26-28) Ihatahon pemimpin ugama do homa, maningon igalar sidea do saparsapuluh humbani ganup sayur-sayuran, “hosaya, humangei, ampa huning”. Sedo na lang setuju Jesus pasal aturan manggalar saparsapuluhan ai, tapi ipinsang Jesus halak Parisei ampa sibotoh surat halani cara ni sidea mandalankon aturan ai lang sosok pakon na Tarsurat.​—Mat. 23:23.

Sanggah halak Rom na mamarentah halak Jahudi, maningon igalar sidea do homa bahat pajak na legan hubani pamarentah. Umpamani, anggo dong tanoh ni sidea maningon igalar sidea ma pajakni. Anjaha carani sidea manggalar pajak ai boi do marhitei mambere 20 ronsi 25 persen humbani hasil ni jumani. Leganni ai dong homa balasting atap pajak kopala. Pasal pajak ai ma na isungkun halak Jahudi bani Jesus. Ihatahon sidea ma ai boi do sidea manggalar ai atap lang. Jadi nini Jesus ma mambalosi, “Ai pe, bere ma bani kesar, na humbani kesar, anjaha bere ma bani Naibata, na humbani Naibata!”​—Mat. 22:15-22.

Dong homa pajak na maningon igalar partiga-tiga. Maningon igalar sidea ma pajak sanggah i pelabuhan, i dalan, manlewati jembatan, atap pe sanggah roh sidea hu sada kota atap tiga.

Lambin borat do pangahap ni halak bani pamarentahan Rom. Sejarawan ni halak Rom na margoran si Tacitus mangkatahon bani pamarentahan ni si Tiberius sanggah Jesus i tanoh on, “borat do iahap halak Siria ampa halak Judea manggalar pajak. Halani ai ipindo sidea ma ase ihurangi otik sigalaronni”.

Hinan carani pamarentah laho mamilih na gabe sijalo pajak ai ma marhitei lelang. Ise na manggalar bahatan hubani pamarentah, ia ma na tarpilih. Dob ai, ipindahi ia ma anak buahni laho mangindo pajak bani na legan. Janah pajak na ipindo sidea bahatan do marimbangkon na sasintongni. On ma na mambahen borat tumang manggalar pajak. Sonai do ra na ibahen si Sakeus kopala ni sijalo pajak. (Luk. 19:1, 2) Halani ai, bahat halak ijia magigi tumang bani sijalo pajak.