1. Mase Sibolis ai isarupahon songon sahalak parburu?

ANGGO sahalak parburu iparlajari ia do binatang na laho tangkaponni, ija iananni, janah aha do sipanganonni. Gabe ibotoh ia ma holi siding na sosok laho manangkap binatang ai. Ai do na ongga ihatahon hasoman ni si Job. (Job 18:8-10) Sonai do homa na ibahen Sibolis hubanta. Torus do ipardiateihon ia sonaha hasomalanta ampa aha do harosuhta. Dob ai, gabe ibotoh ia ma siding aha do na sosok laho manangkap hita. Tapi porini hona sidingni ai hita, boi do hita maluah hunjai. Anjaha ipatugah Bibel do sonaha ase hita ulang hona sidingni ai.

2. Dua siding aha do na gati igunahon Sibolis?

² Adong dua siding na gati igunahon Sibolis, ai ma sifat gijang ni uhur ampa paruhur haut. * Domma marribu tahun igunahon ia siding ai, janah gati do ai marhasil. Isarupahon do homa ia songon panangkap burung na mambahen puhot atap jaring. (Ps. 91:3) Age pe sonai, ipatugah Jahowa do banta siding na somal ipakei Sibolis laho manangkap hita. Jadi boi ma ipadaoh hita sidingni ai.​—2 Kor. 2:11.

3. Mase porlu iparlajari hita contoh-contoh ibagas Bibel?

³ Bani Bibel dong contoh-contoh na patuduhkon bahaya tumang do anggo hita margijang ni uhur ampa maruhur haut.  Hunjai, ibotoh hita use age pe domma dokah sidea mangidangi Jahowa, tapi ujungni hona siding ni Sibolis do sidea. Halani ai ma contoh-contoh ai isuratkon ibagas Bibel bahen “lumba-lumba” atap sipasingat hubanta. (1 Kor. 10:11) Sihol do Jahowa ase ibotoh hita sonaha carani ase ulang hona siding ni Sibolis.

4. Sonaha ujungni anggo hita margijang ni uhur?

⁴ Marosuh do Sibolis ase hita gabe halak na margijang ni uhur songon ia. Ibotoh ia do anggo lalab hita margijang ni uhur, lang boi hita manggoluh sadokah ni dokahni. (Pod. 16:18) Halani ai ma ipasingat apostel Paulus halak Kristen ase ulang ‘gabe margijang ni uhur janah madabuh hubagas uhum ni Sibolis’. (1 Tim. 3:6, 7) Sasada halak boi do gabe gijang uhurni age pe ia domma dokah ididi atap baru ope.

5. Domu bani Parambilan 7:16, 20, halak na sonaha do na margijang ni uhur ai?

⁵ Anggo halak na margijang ni uhur, dirini sandiri do na lalab ipingkirhon ia, sedo Jahowa. Marusaha do Sibolis mambahen hita gabe halak sisonai. Umpamani, ra do adong halak i kuria na pabajan-bajankon hita. Atap ra do adong na mambahen na lang dear hubanta. Anggo sonai na masa, sihol do Sibolis ase isalahkon hita Jahowa ampa hasoman na legan. Anjaha sihol do ia ase hita mangihutkon caranta sandiri laho pasaloseihon parsoalanta marimbangkon mangihutkon podah ni Jahowa.​—Basa Parambilan 7:16, 20.

6. Aha do na boi iparlajari hita humbani hasomanta hun Belanda?

⁶ Pardiateihon ma pangalaman ni hasomanta na tading i Belanda. Dong hasoman i kuria mambahen borit tumang uhurni. Nini botou ai ma, “Lang tarmaafkon ahu be pambahenan ni sidea. Huhatahon ma bani suamingku ase pindah kuria hanami.” Tapi dob ai itonton botou ai ma acara JW Broadcasting^® bulan Maret 2016. Bani acara ai, iulas do aha na porlu bahenonta anggo dong hasoman na mambahen borit uhurta. Nini botou ai ma use, “Gabe  sadar ma ahu anggo ahu pe porlu mamareksa diri janah dong do homa salahku. Lang porlu hudingat-dingat salah ni hasoman. Na sipontingan, ai ma mambahen malas uhur ni Jahowa janah totap mangkorjahon parentah-Ni.” Aha do parlajaranni hubanta? Anggo dong parsoalanta, dingat hita ma Jahowa. Pindo ma hu Bani ase boi hita mangidah na dear humbani na legan. Sasintongni Jahowa pe ididah Ia do salah ni hasomanta. Tapi ra do Ia manalpuhon salah ni sidea. Halani ai, sihol uhur-Ni ase itiru hita Ia.​—1 Joh. 4:20.

7. Aha do na masa hubani Raja Usia?

⁷ Halani gijang uhur ni Raja Usia, lang ra ia manangihon podah. Anjaha barani do ia mangkorjahon aha na lang patut sihorjahonni. Mungkahni, bahat do pasu-pasu na ibere Jahowa hu bani. Gati do ia monang sanggah marporang. Bahat do homa huta na ipajongjong ia janah bolag do jumani. (2 Kron. 26:3-7, 10) ‘Tapi dob markuasa ia, gabe gijang ma uhurni’ janah parohkon “hamagouan” do ai hu bani. Pag do ia manutung dahupa i rumah panumbahan hape pitah malim dassa na boi mangkorjahon ai. Halani ai, iuhum Jahowa ma ia. Ibahen ma ia hona kusta ronsi parmateini.​—2 Kron. 26:16-21.

8. Domu bani 1 Korint 4:6, 7, aha do na porlu bahenonta ase ulang margijang ni uhur?

⁸ Aha do na boi mambahen hita gabe margijang ni uhur songon si Usia? Pardiateihon ma pangalaman ni si José. Pengusaha na sukses do ia janah sintua homa. Gati do ia marambilan i kebaktian wilayah ampa kebaktian regional. Sintua kaliling pe sipata manungkun do hu bani laho mangindo pandapot atap saranni. Tapi nini si José ma, “Dokah-dokah lang be marpangunsandeian bani Jahowa ahu. Huagan do domma toguh haporsayaonku. Jadi sanggah dong na mamodahi ahu, lang serius be huahap ai.” Ujungni gabe ihorjahon si José ma dousa na banggal anjaha ipecat ma ia hun kuria. Tapi domma ijalo use ia gabe Saksi Jahowa piga-piga tahun na salpu. Nini ma use, “Iajarhon Jahowa do hubangku sedo tanggung jawab i kuria na sipontingan. Tapi na sipontingan, ai ma maningon mangkorjahon haganup parentah-Ni.” Halani ai, dingat hita ma haganup tugasta i kuria atap pe halobihanta,  sibere-bere humbani Jahowa do ai. (Basa 1 Korint 4:6, 7.) Tapi anggo halani ai gabe gijang uhurta, lang marosuh be Jahowa hubanta.

9. Halani maruhur haut Sibolis pakon si Hawa, sonaha ma ujungni?

⁹ Anggo ihatahon sonaha do na paruhur haut ai, ra do mintor idingat hita Sibolis. Malekat ni Jahowa hinan do ia janah bahat do tugas na ibere hu bani. Tapi lang marnasungkup pangahapni. Sihol do ia ase isombah, hape pitah Jahowa do na patut isombah. Marusaha do Sibolis ase lang marnasungkup iahap hita aha na dong banta. Ai ma na ibahen ia bani si Hawa. Sanggah i pohon Eden hinan, ihatahon Jahowa do bani si Hawa boi do ipangan ia “ganup hayu na i pohon” ai. Pitah sada hayu dassa na lang boi ipangan buahni. (1 Mus. 2:16) Tapi ipengaruhi Sibolis ma si Hawa ase ipangan ia homa buah na ilarang ai. Mintor itangihon si Hawa do hata ni Sibolis. Lang ihargai ia ganup na ibere Jahowa hu bani. Ujungni gabe mardousa ma ia janah matei.​—1 Mus. 3:6, 19.

10. Aha do na masa halani maruhur haut Raja Daud?

¹⁰ Bahat tumang do pasu-pasu na ibere Jahowa bani si Daud. Ibahen do ia gabe raja, gati ia monang sanggah marporang, anjaha bahat homa artani. Martarima kasih tumang do si Daud bani Jahowa halani ‘seng targorani bueini’ pasu-pasu ai. (Ps. 40:6) Tapi dobkonsi ai, lang marnasungkup iahap si Daud ganup na ibere Naibata hu bani. Gabe marosuh do ia bani istri ni halak hape domma bahat istrini. Anjaha lang mintor iambukkon ia pingkiran na salah ai. Marosuh do ia bani si Batseba, istri ni si Uria, halak Heti ai. Modom ma ia pakon si Batseba janah hamil ma si Batseba. Tapi dong ope na lobih jahat ibahen si Daud. Iatur ia do use ase matei si Uria ibagas parporangan. (2 Sam. 11:2-15) Ra do heran hita mase ma sonai pambahenan ni si Daud hape domma bahat pasu-pasu na ijalo ia humbani Jahowa. Sasintongni ganupan ai masa halani domma maruhur haut si Daud. Anjaha ujungni gabe bahat ma sitarononni. Age pe sonai, iakui si Daud do salahni ai janah ra do ia mubah. Janah martarima kasih do ia bani Jahowa halani isasap Jahowa salahni ai.​—2 Sam. 12:7-13.

11. Domu bani Epesus 5:3, 4, aha ma na porlu ibahen hita ase ulang maruhur haut?

 ¹¹ Aha do na boi iparlajari hita humbani si Daud? Maningon martarima kasih do hita bani Jahowa halani ganup na ibere Ia hubanta. (Basa Epesus 5:3, 4.) Maningon ihamalaskon hita ma aha pe na dong banta. Gati do iajari hita parlajar Bibelta ase mamingkirhon pasu-pasu na ijalo ia bai ganup ari. Anggo sonai ibahen ia gabe bahat ma na ihatahon ia tarima kasih bani Naibata. (1 Tes. 5:18) Sonai do homa hita. Anggo irimangi hita pasu-pasu na idapot hita humbani Naibata gabe martarima kasih do hita bani Jahowa. Anggo gati hita mangkatahon tarima kasih, tontu ihamalaskon hita do aha pe na dong banta. Gabe boi ma ipadaoh hita uhur haut ai ibagas uhurta.

12. Halani maruhur haut si Judas Iskariot, aha ma na ibahen ia?

¹² Halani maruhur haut si Judas Iskariot, gabe jahat ma ia janah ihianati ia do Jesus. Mungkahni lang sonai ia. (Luk. 6:13, 16) Ipilih Jesus do ia gabe apostelni, janah ibere do hu bani tanggung jawab laho manjaga kotak parduitan. Duit ai igunahon sidea laho mamboli aha na porlu sanggah marbarita. Sarupa ma ai songon sumbanganta sonari na igunahon laho pararatkon barita na madear. Sasintongni domma gati itangihon si Judas sanggah Jesus pasingatkon halak ase ulang maruhur haut. Tapi lang iparuhurhon ia ai. (Mrk. 7:22, 23; Luk. 11:39; 12:15) Ujungni, gabe manangko ma ia.

13. Bani situasi na sonaha do taridah si Judas ai paruhur haut?

¹³ Lambin tangkas ma taridah domma maruhur haut si Judas ai. Sanggah ai, laho ma Jesus, apostelni, pakon si Maria ampa si Marta hu rumah ni si Simon na baru malum humbani kusta. Sanggah mangan sidea, iboan si Maria ma minak na maharga tumang janah iuseihon hu ulu ni Jesus. Dob ididah si Judas pakon apostel na legan ai, sogam tumang ma sidea. Ihatahon sidea ma rahanan do minak ai ijual ase duitni igunahon laho mangidangi. Tapi legan do maksud ni si Judas. Nini uhurni anggo ijual minak ai, boi ma itangko ia duit ai hun kotak parduiton ni sidea. Dob ai, pos do uhurni manjual Jesus songon harga ni sahalak jabolon.​—Joh. 12:2-6; Mat. 26:6-16; Luk. 22:3-6.

14. Sonaha hasomanta mandalankon prinsip na isurat bani Lukas 16:13?

¹⁴ Ipasingat Jesus do susianni, “Seng tarbalosi hanima Naibata rap pakon [habayakon].” (Basa Lukas 16:13.) Pardiateihon ma pangalamanni suami istri hun Rumania na mandalankon sipasingat ai. Dong na manawarhon sidea sada horja i luar negeri. Nini sidea, “Aih sosok tumang do horja ai. Nini uhurnami ma pasu-pasu humbani Jahowa do ai. Halani dong homa utangnami i bank.” Tapi ibotoh sidea ma anggo ijalo sidea horja ai, holi gabe lang bahat be panorang ni sidea laho manombah Naibata. Jadi ibasa sidea ma Menara Pengawal 15 Agustus 2008, bani artikel “Pertahankan Loyalitas dengan Kebulatan Hati”. Dob ibasa sidea ihatahon sidea ma, “Anggo tujuanta pindah hu luar negeri ase boi bayak, gabe otik ma holi panorangta laho mangidangi Jahowa. Dokah-dokah lang ponting be iahap hita Jahowa.” Jadi lang ijalo sidea horja ai. Tapi dob ai, dapot suamini ma sada horja i ianan ni sidea janah gajini sungkup do laho manggoki haporluan ni sidea. Ihatahon istrini ma, “Sai tongtong do iurupi Jahowa juakjuak-Ni.” Malas tumang uhur ni sidea halani Jahowa do na sipontingan ibagas goluh ni sidea sedo habayakon.

15. Mase pos uhurta anggo hita boi maluah humbani siding ni Sibolis?

¹⁵ Ra do lang sadar hita anggo sadokah on domma gijang uhurta atap maruhur haut. Tapi boi do hita mambahen hamubahon. Ihatahon si Paulus do boi do hita “maluah humbani siding ni Sibolis”. (2 Tim. 2:26) Songon si Daud, itangihon ia do sipasingat humbani Nabi Natan anjaha mubah ma ia. Gabe orot ma use parhasomananni pakon Naibata. Dingat ma gogohan do Jahowa humbani Sibolis. Anggo marondos hita bani Naibata, boi do hita maluah humbani siding aha pe na ibahen Sibolis.

16. Aha do na boi mangurupi hita ase ulang hona siding ni Sibolis?

¹⁶ Age pe hita boi maluah humbani siding ni Sibolis, tapi dearan ma ulang pala hona hita bani sidingni ai. Maningon marondos do hita bani Jahowa ase ulang hona siding ai. Ulang iahap hita halani domma dokah hita mangidangi Jahowa lang mungkin be hita margijang ni uhur atap pe maruhur haut. Halani dong do juakjuak ni Naibata na sonai. Halani ai, pindo ma bani Jahowa ase iurupi hita mambotoh atap dong do pingkiran ampa parlahounta na porlu ipadear. (Ps. 139:23, 24) Marusaha ma hita ase ulang margijang ni uhur pakon maruhur haut!

17. Aha do tongkin nari na laho masa bani Sibolis?

¹⁷ Domma marribu tahun marusaha Sibolis manangkap juakjuak ni Naibata. Tapi tongkin nari iripaskon mando Sibolis ai. (Pangk. 20:1-3, 10) Halani ai torus ma hita marjaga-jaga ase hita ulang hona siding ni Sibolis. Marusaha ma hita ase ulang adong gijang ni uhur pakon uhur haut ibagas dirinta. ‘Lawan hita ma Sibolis, jadi maporus ma ia hun banta’.​—Jak. 4:7.