Ahu tubuh tanggal 19 Mei 1940, i kota Amioûn, Lebanon. Tapi dob piga-piga tahun pindah ma hanami hu kota Tripoli. Holong tumang do uhur ni namatorasku bani Jahowa, janah holong do homa sidea bannami. Ahu ma anak na sietekan humbani lima marsanina. Adong tolu naboru, janah dua dalahi. Iajari namatorasku do bannami sedo mansari duit na sipontingan ibagas goluh on. Tapi marlajar Bibel, martumpu, ampa marbarita do na sipontingan.

Dong piga-piga halak na iminaki na i kurianami. Umpamani, si Michel Aboud, ia do na somal memandu parlajaran buku sidang i kurianami. Ia mananda hasintongan i New York. Tapi bani tahun 1921, pindah ma ia hu Lebanon laho marbarita. Hudingat ma bujur do ia mangurupi si Anne ampa si Gwen Beavor na baru lulus Sikolah Gilead. Ujungni gabe orot ma parhasomanannami. Dobkonsi marpuluh-puluh tahun, malas tumang do uhurhu halani boi jumpah use pakon si Anne i Amerika Serikat. Anjaha lang piga dokah hunjai jumpah ma ahu use pakon si Gwen. Domma marhajabuan ia pakon si Wilfred Gooch, anjaha mangidangi i Betel London do sidea.

Sanggah dakdanak ope ahu, otik dassa Saksi Jahowa i Lebanon. Age pe sonai totap do hanami ringgas marbarita. Anjaha totap do hanami marbarita age pe dong pemimpin ugama na marsogam ni uhur mangidah hanami. Hudingat do dong piga-piga hali hanami igilai pemimpin ugama sanggah marbarita.

Bani sada ari marbarita ma ahu pakon botouhu si Sana hu apartemen. Sanggah marsahapi hanami pakon na tading ijai, roh ma sada pandita manjumpahi hanami. Pasti dong do na patugahkon ai bani pandita ai ase roh ia. Mintor igilai pandita ai ma hanami, janah ionjar ma si Sana gabe madabuh ma ia. Ujungni dong ma na manalepon polisi, janah iurupi polisi ai ma si Sana. Iboan polisi ai ma pandita ai hu kantor polisi. Janah itonggor polisi ai ma iboan pandita ai do homa pistol. Ihatahon polisi ai ma bani pandita ai, “Ai aha do na iajarhon ho? Ugama do atap martinggili?”

Ongga do kurianami manewa sada bus laho marbarita hu huta bagas-bagas. Malas tumang do uhurnami sanggah marbarita ijai. Tapi ibotoh pandita ijai ma anggo hanami marbarita i huta ai. Jadi iarahkon ia ma piga-piga halak laho manggijigi hanami bani batu. Hudingat do sanggah ai mardaroh ma bohi ni bapangku. Masuk ma Bapa hu bus pakon Inang, janah dihut ma homa hanami masuk. Sanggah ipaborsih Inang luhani Bapa ai, ihatahon Inang ma, “Aih Jahowa, salpuhon Ham ma hasalahan ni sidea ai, ai lang ibotoh sidea hasalahanni ai.” Lang tarlupahon ahu na masa ai.

Bani sada ari laho ma hanami hu rumah ni ompung. Hape dong homa pastor na roh hujai. Janah domma ibotoh ia Saksi Jahowa do namatorasku. Hassi pe marumur onom tahun ope ahu sanggah ai, tapi sihol do pastor ai mambahen mela ahu. Ihatahon ia ma hubangku, “Mase lape tardidi ho?” Huhatahon ma bani, dakdanak ope ahu, ase boi ahu ididi maningon hubotoh do lobei ajaran ni Bibel anjaha maningon toguh do homa haporsayaonku. Halani lang marosuh pastor ai manangar balosku ai, ihatahon ia ma bani ompung lang dong hormatni pahompumu on bangku.

Age pe bahat tantangan tapi bahatan do na madear na dapotnami i Lebanon. Sasintongni basar do halak Lebanon ai janah rosuh manjalo tamu. Janah marosuh do homa sidea mangulas isi ni Bibel. Jadi bahat do parlajar Bibelnami ijai.

Sanggah sikolah ope ahu dong sada sanina na roh hu Lebanon, martumpu ma ia hu kurianami, janah marsitandaan ma ia pakon botouhu si Wafa. Ujungni marhajabuan ma sidea janah pindah ma sidea hu Venezuela. Tapi dobkonsi ai siholan ma si Wafa hu bannami. Bani suratni ihatahon ia ma bani Bapa ase pindah hanami hu Venezuela. Ujungni saud ma hanami pindah.

Bani tahun 1953, pindah ma hanami hu Venezuela. Tading i Caracas do hanami dohorhon  istana presiden. Halani remaja ope ahu sanggah ai, megah tumang do huahap sanggah mangidah montas presiden naik motor na jenges tumang. Tapi namatorasku mungkahni lang urah iahap sidea tading ijai. Halani lang sarupa bahasani, sipanganon, cuacani, ampa hasomalanni i nagorinami hinan. Lang piga dokah dobkonsi ai mubah ma situasinami.

Boritan ma Bapa, janah parah do naboritni ai. Tarsonggot tumang do hanami manangar ai halani sadokah on sehat do Bapa. Ihatahon dokter, ia hona kanker hati. Jadi ioperasi ma Bapa. Tapi, saminggu dobkonsi ai marujung goluh ma ia.

Lang tarhatahon hanami be sonaha pusok ni uhurnami sanggah ai. Lang ongga isangka hanami podas tumang Bapa marujung goluh. Janah marumur 13 tahun ope ahu sanggah ai. Iahap hanami lang dong be na boi mambahen malas uhurnami. Tarlobih ma Inang, songon na lang porsaya ia lang dong be Bapa. Tapi ibotoh hanami do lang boi hanami mandolei. Marhitei pangurupion ni Jahowa boi do hanami tarapoh. Anjaha dobkonsi tamat SMA ahu sanggah marumur 16 tahun, sihol do ahu marhorja laho mangurupi kaluargangku.

Dob ai marhajabuan ma botouhu si Sana pakon Rubén Araujo. Lulusan hun Sikolah Gilead do ia janah domma mulak hu Venezuela. Dob ai pindah ma sidea hu New York. Iojur kaluargangku ma ahu ase kuliah. Halani ai pindah ma ahu hu New York. Janah tading i rumah ni botouhu ai ma ahu. Sidea ma na tongtong mangurupi ahu ase lambin dohor bani Jahowa. Anjaha bahat do homa na mangurupi ahu sanggah ahu martumpu i kuria na marbahasa Spanyol i Brooklyn. Umpamani dong si Milton Henschel ampa si Frederick Franz. Mangidangi i Betel Brooklyn do sidea.

Dobkonsi hampir sada tahun ahu kuliah, gabe hupingkiri ma aha do cita-citaku na sasintongni. Halani ai hubasa ma artikel Menara Pengawal, na mangulas pasal sanina botou na mangidangi ibagas sepenuh waktu. Anggo hupardiateihon i kuriangku malas tumang do uhur ni sanina botou na mangidangi sepenuh waktu gabe perintis atap pe i Betel. Marosuh tumang do ahu songon sidea. Tapi sanggah ai lape ididi ahu. Jadi husadari ma maningon mangondoskon diri lobei ahu janah ididi. Ujungni bani tanggal 30 Maret 1957 ididi ma ahu.

Dobkonsi ididi ahu sihol do ahu mintor merintis. Huahap lang urah ai halani kuliah ope ahu. Anggo kuliah janah merintis homa sonaha ma ahu mangatur waktu. Halani ai hutulis ma surat bani kaluargangku i Venezuela, na patugahkon anggo ahu lang pala be kuliah janah huhatahon homa ahu sihol mulak laho merintis ijai.

Bani Juni 1957, mulak ma ahu hu Caracas. Tapi sanggah ai sunsah do parduiton ni kaluarganami. Jadi maningon adong do na marhorja laho mansari duit. Dong ma na manawarhon hubangku laho marhorja i bank. Tapi sihol do homa ahu merintis, halani ai do ahu ase mulak. Jadi marhorja  ma ahu i bank ai sambil merintis. Adong ma piga-piga tahun hubahen sonai. Hassi pe sibuk tumang ahu tapi malas tumang do uhurhu.

Lambin malas do uhurhu sanggah ahu marhajabuan pakon si Sylvia, sada botou hun Jerman. Domma pindah ia pakon namatorasni hu Venezuela. Holong tumang do uhur ni si Sylvia bani Jahowa. Dong ma dua niombahnami, na parlobei dalahi goranni si Michel (Mike), janah na paduahon naboru goranni si Samira. Anjaha Inang pe tading rap pakon hanami. Halani lambin banggal tanggung jawabku i kaluarga gabe soh ma ahu merintis. Age pe sonai totap do ahu ringgas marbarita. Umpamani sanggah ari-ari libur, merintis ekstra do ahu pakon si Sylvia.

Songon na husaritahon nongkan ai, sanggah hudingat sonaha pandapot ni tetanggaku pasal ahu, sanggah ai domma sikolah anak-anakku. Memang domma dear parduitonnami. Anjaha domma dear homa horjangku i bank. Tapi sihol do ahu ase boi itanda tetanggaku ahu sahalak Saksi Jahowa. Halani ai hupingkiri ma aha do na boi bahenonku ase boi sonai pandapot ni sidea. Jadi huriahkon ma ai pakon istringku aha do na boi bahenonnami. Huhatahon ma anggo kaluar holi ahu hun parhorjaanku dapot ahu do holi duit pesangon janah bahat do ai. Anggo hemat-hemat hanami boi do dokah igunahon hanami duit ai laho manggalar haporluannami siganup ari, janah lang dong homa utangnami.

Memang lang urah mambahen haputusan ai. Tapi setuju do Inang pakon istringku bani rencanaku ai. Sihol do ahu ase boi merintis biasa ulakkon. Malas tumang do uhurhu halani ai. Tapi pas laho merintis ahu mintor mubah ma situasinami.

Bani na sada ari ipatugah dokter ma domma hamil use si Sylvia. Tarsonggot tumang do hanami manangar ai. Age pe sonai malas do homa uhurnami paima-imahon tubuh anaknami ai. Tapi gabe tarpingkir ma ahu use bani cita-citaku laho merintis, gabe haru ma uhurhu. Anggo domma sonon situasingku ai boi do holi ahu merintis? Jadi huriahkon ma use ai bani kaluargangku. Janah setuju do sidea anggo ahu merintis.

Jadi anakku si Gabriel tubuh ma ia bani bulan April tahun 1985. Dobkonsi ai kaluar ma ahu hun horjangku i bank, janah mulai ma ahu merintis bulan Juni 1985. Dob ai iontang do homa ahu gabe anggota Panitia Cabang. Tapi sedo i Caracas kantor cabang. Daoh ni rumahnami hu kantor cabang dong hira-hira 80 km. Anjaha ibagas na  saminggu dong hira-hira dua atap tolu hali ahu laho hujai.

Dob ai iputuskon hanami ma use ase pindah hu La Victoria, ase dohor hu Betel. Tongon lang urah mambahen parubahan ai. Age pe sonai martarima kasih tumang do ahu bani kaluargangku, halani sai tongtong do iurupi sidea ahu. Jadi Inang tading ma pakon botouhu si Baha. Si Mike domma marhajabuan, anjaha si Samira pakon si Gabriel tading pakon hanami do sidea. Jadi pindah ma hanami hu La Victoria anjaha itadingkon hanami ma hasomannami i Caracas. Si Sylvia pe bahat do homa mambahen penyesuaian halani sonari hanami tading i kota na etek, lang songon na hinan. Anjaha etek do homa rumahnami.

Bahat tumang do parubahan na maningon ibahen hanami ase boi pindah hu La Victoria. Dob marhajabuan si Gabriel, si Samira pe lang be tading pakon hanami. Jadi mulai tahun 2007 iontang ma ahu pakon si Sylvia mangidangi i Betel ronsi sonari. Si Mike anaknami sikahanan domma mangidangi gabe sintua janah merintis do homa ia pakon istrini si Monica. Si Gabriel pe mangidangi do homa ia gabe sintua, anjaha sonari i Italia do ia tading pakon si Ambra istrini. Si Samira pe, merintis do homa ia anjaha mangidangi gabe relawan jarak jauh i Betel.

Domma bahat haputusan na ponting na hubahen ibagas goluhku. Age pe sonai lang ongga husolsoli haputusan na hubahen ai. Malas tumang do uhurhu mangkorjahon ganup tugas na ibere organisasi ni Jahowa. Domma huahapkon maningon toguh do parhasomananta pakon-Si. Lang soal hita mambahen haputusan na etek age na banggal, anggo orot parhasomananta pakon Naibata bereon-Ni do banta damei-Ni ‘na mangatasi haganup paruhuron’. (Pil. 4:6, 7) Malas tumang do uhurhu pakon si Sylvia mangidangi i Betel. Sai totap do ipasu-pasu Jahowa haputusannami halani totap do ibahen hanami Ia na sipontingan ibagas goluhnami.