1. Aha do na mambahen piga-piga hasomanta lungunan?

BAHAT do hita ongga lungunan pangahapta. Dong na tongkin sonai pangahapni. Tapi na leganni dokah do ia marlungun ni uhur. Umpamani, ra do adong na lungunan age pe ia i tongah-tongah ni halak na mabuei. Dong do homa hasomanta na lang urah marsaor pakon hasoman i kuria na baru. Leganni ai, dong do hasomanta na hinan dohor pakon kaluargani tapi sonari lang be sonai. Halani ai, gabe lungun ma pangahapni. Dong do homa hasomanta na lalab marpusok ni uhur halani marujung goluh halak na hinaholonganni. Na leganni, dong hasomanta halani marlajar Bibel ia, gabe ihasogamkon kaluarga ampa hasomanni ma ia. Ai ma na mambahen ia lungunan.

2. Singkun-sungkun aha do na laho iulas hita bani artikel on?

² Sai tongtong do ipardiateihon Jahowa hita. Jadi sanggah lungunan pangahapta, pos ma uhurta ipardiateihon Jahowa do hita. Janah sihol do uhur-Ni mangurupi hita. Sonaha ma Jahowa mangurupi hita? Aha do na porlu ibahen hita ase ulang lalab lungunan? Anjaha sonaha hita boi mangurupi hasoman i kuria ase ulang lalab lungunan? Ulas hita ma balosni ai.

3. Sonaha Jahowa mangurupi si Elias?

³ Marosuh do Jahowa ase ganup juakjuak-Ni marmalas ni uhur. Jadi sanggah maretek ni uhur hita atap pusok uhurta,  pos ma uhurta dohor do Ia hubanta janah iparuhurhon do hita. (Ps. 145:18, 19) Pardiateihon hita ma sonaha Jahowa mangurupi Nabi Elias. Bani panorang ni si Elias hinan bahat do halak Israel na ibunuh halani manombah Jahowa. Tarmasuk do homa si Elias sihol ibunuh sidea. (1 Raj. 19:1, 2) Halani ai, gabe pusok ma uhur ni si Elias. Nini uhurni ma pitah ia mando na manombah Jahowa. (1 Raj. 19:10) Tapi, iurupi Jahowa ma si Elias. Isuruh Ia ma malekat-Ni manjumpahi si Elias laho patoguhkon uhurni. Ihatahon malekat ai do bahat ope halak Israel na totap manombah Jahowa.​—1 Raj. 19:5, 18.

4. Porini itadingkon kaluarganta hita, sonaha janji ni Jahowa na isurat bani Markus 10:29, 30 boi mambahen pos uhurta?

⁴ Ibotoh Jahowa do bahat do pengorbanan na ibahen hita laho manombah-Si. Umpamani, halani hita manombah-Si ra do gabe itadingkon kaluarganta hita. Apostel Petrus pe halani haru uhurni ongga do isungkun ia sonon hubani Jesus, “Ia hanami, haganup do itadingkon hanami laho mangirikkon ham, aha ma ulih bannami?” (Mat. 19:27) Ihatahon Jesus ma bani susianni haganup hasoman na i kuria boi do gabe kaluarganta. (Basa Markus 10:29, 30.) Anjaha Jahowa na songon Bapanta marjanji do Ia sai tongtong do urupan-Ni hita ase boi totap setia mangidangi-Si. (Ps. 9:11) Sonari, ulas hita ma piga-piga cara na boi ibahen hita ase iurupi Jahowa hita ulang lalab lungunan.

5. Aha do gunani anggo irimangi hita sonaha Jahowa domma mangurupi hita?

⁵ Rimangi ma sonaha Jahowa domma mangurupi hita. (Ps. 55:23) Anggo ibahen hita sonai, gabe pos ma uhurta sai tongtong do iurupi Jahowa hita. Ai do na iahapkon sada hasomanta na margoran si Karolin. * Age pitah ia dassa Saksi Jahowa ibagas kaluargani, tapi ihatahon ia do sonon, “Sanggah lungunan pangahapku, hurimangi ma sonaha Jahowa domma mangurupi ahu sanggah ahu marsitaronon. Ujungni lambin pos ma uhurhu sai urupan ni Jahowa do ahu i lobei ni ari.”

6. Anggo lungunan iahap hita, sonaha 1 Petrus 5:9, 10 boi patoguhkon uhurta?

 ⁶ Rimangi ma sonaha Jahowa mangurupi hasomanta na lungunan. (Basa 1 Petrus 5:9, 10.) Pardiateihon hita ma pangalaman ni si Hiroshi. Mungkahni pitah ia dassa Saksi ibagas kaluargani. Tapi nini do sonon, “Anggo ididah hita i kuria, ganup do hasomanta ai dong bei do sitarononni. Tapi, marusaha do hita mambere na sidearan laho mangidangi Jahowa. Anggo irimangi hita ai, gabe toguh ma uhurta age pe lang dong kaluarganta na Saksi.”

7. Sonaha tonggo boi mangurupi hita?

⁷ Totap martonggo, mambasa Bibel, ampa roh hu partumpuan. Sanggah martonggo, patugah ma bani Jahowa aha na ibagas uhurmu. (1 Ptr. 5:7) Ai do na ibahen sada hasomanta anak boru na margoran si Mesy. Halani pitah ia dassa Saksi ibagas kaluargani, gabe lungunan ma pangahapni. Tapi ihatahon ia do, “Sanggah lungunan ahu, mintor martonggo do ahu bani Jahowa. Songon Bapangku do huahap Jahowa ai. Boi do ahu marulak-ulak martonggo ibagas na sadari. Janah hupatugah do haganup na ibagas uhurhu.”

8. Anggo ibasa janah irimangi hita Bibel, sonaha ai boi mangurupi hita?

⁸ Basa ma Bibel bai ganup ari, janah rimangi ma sonaha Jahowa patuduhkon banggal ni holong-Ni bamu. Ai do na ibahen hasomanta si Bianca. Gati do ia iejek kaluargani. Tapi nini do, “Hubasa janah hurimangi ma sarita ibagas Bibel na sarupa situasini pakon ahu. Ai do na mambahen ahu gabe toguh.” Na leganni, dong hasomanta na mardingat ayat-ayat ni Bibel na boi patoguhkon uhur ni sidea songon Psalmen 27:10 pakon Jesaya 41:10. Dong homa hasomanta na manangar rokaman audio publikasinta sanggah sidea mambahen persiapan. Dong na manangar rokaman pambasaan Bibel. Halani ai, lang gabe lungunan sidea.

9. Aha do gunani anggo roh hita hu partumpuan?

⁹ Marusaha ma nasiam ase totap roh hu partumpuan. Aha na iulas hita ijai boi patoguhkon uhurta. Janah boi hita lambin mananda hasomanta na legan. (Heb. 10:24, 25) Si Mesy na ipatugah nongkan ai mangkatahon, “Age pe parmaila ahu, tapi marusaha do ahu roh hu partumpuan janah mambere komentar. Gabe lambin dohor ma ahu pakon hasoman i kuria.”

10. Mase maningon orot hita marhasoman pakon sanina botou i kuria?

¹⁰ Marusaha ma ase orot marhasoman pakon sanina botou i kuria. Pindahi ma hasoman i kuria na boi patoguhkon uhurmu. Boi do ham marhasoman pakon sidea age pe lang  saumuran ham pakonsi, atap lang sarupa budaya ni nasiam. Bibel mangkatahon bahat do pangalaman na boi dapot hita humbani “halak na matua”. (Job 12:12) Anjaha na matua pe boi do homa marlajar humbani na maposo. (1 Sam. 18:1) Songon si Daud, age pe daoh posonan ia marimbangkon si Jonatan tapi orot do parhasomanan ni sidea. Marsiurupan do sidea ase boi totap mangidangi Jahowa age pe bahat tantangan. (1 Sam. 23:16-18) Ai ma na iahapkon si Irina. Pitah ia dassa Saksi ibagas kaluargani. Tapi ihatahon ia do, “Songon namatorasku ampa kaluargangku do hasoman i kuria. Sidea do na igunahon Jahowa laho patoguhkon ahu.”

11. Aha do na porlu bahenonta ase orot hita pakon sanina botou?

¹¹ Ra do lang urah marsaor pakon sanina botou, tarlobih anggo parmaila hita. Dong hasomanta si Ratna, halani marlajar Bibel ia gabe bahat na marsogam ni uhur hu bani. Tapi nini do, “Porlu tumang do ahu iurupi anjaha iojur hasoman i kuria.” Ra do lang urah mansaritahon hubani hasomanta sonaha na ibagas uhurta. Tapi anggo ra hita marsarita, lambin orot ma hita pakon sidea. Sasintongni malas do uhur ni sidea mangurupi ampa mangojur hita. Tapi anggo lang ra hita marsarita, lang ibotoh sidea sonaha mangurupi hita.

12. Anggo rup marbarita hita pakon hasoman i kuria, mase ai boi mambahen hita lambin orot pakon sidea?

¹² Sanggah rup marbarita hita pakon sanina botou, lambin orot ma hita pakon sidea. Si Karolin na ipatugah nongkan ai mangkatahon, “Lambin hutanda ma hasoman i kuria sanggah rup marbarita hanami. Lambin orot ma hanami. Anjaha igunahon Jahowa do sidea laho patoguhkon uhurhu.” Tangkas ma bahat do gunani anggo marhasoman hita pakon sanina botou. Sidea do na igunahon Jahowa laho patoguhkon hita sanggah maretek ni uhur hita atap pe sanggah lungunan pangahapta.​—Pod. 17:17.

13. Aha do na porlu ibahen hita ganupan ibagas kuria?

¹³ Maningon marsihaholongan do hita ganup janah mambahen kuria totap marsada. (Joh. 13:35) Halani ai, parsahap ampa pambahenanta maningon boi mangojur na legan. Sada hasomanta naboru mangkatahon, “Sanggah marlajar Bibel ahu, gabe kaluargangku do hasoman i kuria. Anggo lang iurupi sidea ahu, lang boi ahu gabe Saksi Jahowa.” Jadi sonaha hita boi mangurupi hasomanta na sahalaksi dassa Saksi ibagas kaluargani?

14. Aha do na porlu ibahen hita ase orot hita pakon halak na baru roh martumpu?

¹⁴ Marusaha ma ase lambin mananda hasoman i kuria. Anggo dong halak na baru roh martumpu, mintor parsahapkon ma sidea. (Rom 15:7) Tapi ulang ma sungkun aha na lang porlu botohonta. Bahen hita ma sidea gabe hasomanta. Sanggah marsarita sidea, gabe ibotoh hita ma aha do tantangan ni sidea. Tapi dong do na lang ra mansaritahon sonaha pangahapni. Anggo sonai, ulang paksa hita sidea marsarita. Tapi pingkirhon ma sungkun-sungkun na sosok bani sidea ase ra sidea patugahkon sonaha pangahapni. Umpamani, boi isungkun hita sonaha mungkahni sidea mananda hasintongan. Janah sabar ma hita manangihon sanggah sidea marsarita.

15. Aha do na porlu ibahen hita laho patoguhkon hasoman i kuria?

¹⁵ Anggo ganup hita tarmasuk sintua parduli bani hasoman i kuria, gabe toguh ma  haporsayaon ni sidea. Pardiateihon ma pangalaman ni si Melissa na marlajar Bibel humbani inangni. Nini do, “Malas tumang uhurhu halani parduli hasoman i kuria hubangku. Domma huanggap sidea ai songon bapangku. Dear itangihon sidea ahu sanggah marsarita.” Dong homa hasomanta garama na margoran si Maurikio. Pusok tumang uhurni halani na mangajarisi hinan marlajar Bibel ipecat hun kuria. Tapi nini do, “Parduli tumang ganup sintua hubangku. Gati do sidea marsahapi hubangku janah iarahkon do ahu rup marbarita. Iulas sidea do ayat-ayat Bibel na patoguhkon uhurhu. Sipata iarahkon do ahu marolahraga.” Sonari si Melissa pakon si Maurikio mangidangi ibagas dinas sepenuh waktu.

16-17. Sonaha hita boi mangurupi hasomanta?

¹⁶ Urupi hita ma hasomanta. (Gal. 6:10) Pardiateihon ma pangalaman ni si Leo na mangidangi gabe misionaris. Ia mangkatahon, “Age pe otik na ibahen halak hubanta, tapi anggo pas tumang panorangni, harga tumang do ai hubanta. Hudingat do sanggah baru kecelakaan ahu, stres tumang ahu daskonsi i rumah. Tapi dong hasoman i kuria na mangontang ahu hu rumahni janah ibere do homa ahu mangan. Lang hudingat aha na ipangan hanami sanggah ai. Tapi lang tarhalupahon ahu habujuran ni sidea ai. Dear itangihon sidea saritangku. Ai ma mambahen malas uhurhu.”

¹⁷ Tontu malas tumang uhurta sanggah i kebaktian halani boi do hita marsiojuran ijai. Boi do homa hita mangulas acara kebaktian ai. Tapi dong do sanina botou na lungunan pangahapni sanggah i kebaktian. Ai ma na iahapkon si Karolin. Nini do, “Age pe dong marratus atap marribu halak i kebaktian ai, tapi sai tong do lungunan huahap. Halani bahat do sidea na hundul pakon kaluargani tapi anggo ahu lang.” Leganni ai, dong do hasomanta sadokah on rup pakon pasanganni do ia hu kebaktian. Tapi bani panorang on, pitah sahalaksi mando halani domma marujung goluh pasanganni ai. Ai dong do itanda nasiam hasomanta na sonai situasini? Dear do anggo iarahkon nasiam sidea ase rup hundul pakon kaluargamu bani kebaktian na mangihut.

18. Sonaha hita boi mandalankon prinsip na dong bani 2 Korint 6:11-13?

 ¹⁸ Bere ma panorang laho marsahapi. Boi do hita mambere panorangta laho marsahapi pakon hasoman na legan, tarlobih pakon sidea na gati lungunan. Maningon “ipalumbang hita do uhurta” bani hasomanta. (Basa 2 Korint 6:11-13.) Si Melisa mangkatahon, “Malas tumang uhurhu halani iontang sanina botou ahu hu rumahni. Anjaha dong homa na mangarahkon ahu mardalani pakon kaluarga ni sidea.” Ai dong do itanda ham hasoman i kuria na boi iontang ham homa hu rumahmu?

19. Sadihari do panorangni hasomanta porlu tumang ihasomani?

¹⁹ Dong do masani hasomanta i kuria porlu tumang ihasomani. Umpamani, ra do adong hasomanta na lang boi mulak manjumpahi kaluargani sanggah kaluargani ai marayahon ari raya. Gabe lungunan ma ia halani ai. Na leganni, dong na gabe pusok uhurni sanggah laho jumpah tanggal hamatean ni halak na hinaholonganni. Halani ai, dear do anggo ihasomani hita sidea bani panorang ai. Anggo ibahen hita sonai, on patuduhkon ihaholongi hita do hasomanta “humbani uhur na bujur”.​—Pil. 2:20.

20. Sonaha hata ni Jesus na isurat bani Mateus 12:48-50 boi mangurupi hita sanggah lungunan?

²⁰ Bahat do na boi mambahen hita lungunan. Tapi dingat ma sai tongtong do ipardiateihon anjaha iurupi Jahowa hita. Iurupi Jahowa do hita marhitei hasoman i kuria. (Basa Mateus 12:48-50.) Tontu martarima kasih tumang hita bani Jahowa. Halani ai, urupi hita ma homa hasoman na mamorluhon. Lang soal aha pe sitarononta, lang ipaturut Jahowa hita sahalakta. Sai tongtong do ihasomani Ia hita.