1. Aha do na dob ibahen Jahowa hubanta?

DOMMA itogu-togu Jahowa hita gabe Saksi-Ni. (Joh. 6:44) Humbani marjuta halak i dunia on, ipilih Ia do hita gabe Saksi-Ni halani dong ididah Ia na maharga ibagas dirinta. Pos do uhur-Ni boi do holi hita mangkaholongi-Si. (1 Kron. 28:9) Halani ai itanda Jahowa do sonaha paruhuranta, janah holong do uhur-Ni banta. Tontu malas tumang do uhurta mambotoh ai.

2. Ase boi iarusi hita sonaha holong ni Jahowa banta, limbaga aha do na isaritahon Jesus?

² Holong do uhur ni Jahowa hubamu pakon bani sanina botou na legan. Pardiateihon hita ma limbaga na ibahen Jesus. Ijai isarupahon ia do Jahowa ai songon parmahan. Anggo dong 1 na magou humbani 100 biribirini, aha ma na ibahen parmahan ai? Tontu “tadingkononni ma na siah puluh siah ai i dolog, laho mangindahi na magou ai”. Anjaha dob jumpahsi na magou ai, malas tumang do uhur ni parmahan ai, janah lang ibogbog ia biribiri ai. Aha ma parlajaranni hubanta? Maharga tumang do ganup hita i lobei ni Jahowa. Jesus mangkatahon, “Seng marosuh uhur ni Bapanima na i nagori atas ai, anggo magou sada humbani na etek-etek on.”​—Mat. 18:12-14.

3. Aha do na laho iulas hita bani artikel on?

³ Tontu lang dong hita na marosuh mambahen borit uhur ni hasoman. Halani ai, aha ma porlu ibahen hita ase ulang mambahen borit uhur ni sidea? Anjaha, aha ma na porlu ibahen hita  sanggah dong na mambahen borit uhurta? Ulas hita ma balosni ai bani artikel on. Tapi ulas hita ma lobei, ise do na imaksud “na etek-etek on” na isurat bani Mateus bindu 18.

4. Ise do na imaksud “na etek-etek on”?

⁴ Na imaksud “na etek-etek on”, ai ma ganup susian ni Jesus age na matua atap na maposo. Isarupahon do sidea ai songon “dakdanak”, halani idalankon sidea do ajaran ni Jesus. (Mat. 18:3) Hassi pe sidea ai lang sarupa sukuni, hasomalanni, atap pe paruhuranni, tapi porsaya do sidea hubani Jesus janah ra mandalankon parentahni. Halani ai, holong tumang uhur ni Jesus bani sidea.​—Mat. 18:6; Joh. 1:12.

5. Sonaha do pangahap ni Jahowa anggo dong na mambahen na jahat bani juakjuak-Ni?

⁵ Ganup do “na etek-etek on” maharga bani Jahowa. Ase iarusi hita pasal ai, bayangkon hita ma dakdanak. Tontu ilinggomi hita do sidea halani lang margogoh sidea janah lang dong pangalamanni. Somalni lang marosuh hita anggo dong na mambahen na jahat bani na legan. Tarlobih anggo ibahen na sonai bani dakdanak, tontu sogam tumang do uhurta. Sonai do homa Jahowa, sihol tumang do Ia manlinggomi hita. Anggo dong na mambahen na jahat bani juakjuak-Ni, gabe sogam tumang do uhur-Ni mangidah sidea.​—Jes. 63:9; Mrk. 9:42.

6. Domu bani 1 Korint 1:26-29, sonaha do pandapot ni dunia on pasal susian ni Jesus?

⁶ Aha ope na mambahen susian ni Jesus isobut “na etek-etek on”? Somalni, halak na sonaha do na ianggap dunia on na ponting? Tontu halak na bayak ampa na dong jabatanni. Tapi anggo susian ni Jesus, ianggap dunia on do sidea halak na galek janah lang maharga. Halani ai ma susian ni Jesus isobut “na etek-etek on”. (Basa 1 Korint 1:26-29.) Tapi harga tumang do sidea bani Jahowa.

7. Aha do harosuh ni Jahowa na porlu bahenonta bani hasomanta?

⁷ Holong tumang do Jahowa bani juakjuak-Ni, age sidea domma dokah ididi atap baru ope. Jadi harga tumang do sidea ai bani Jahowa. Halani ai maharga tumang do homa sidea ai banta. Ulang ma ibeda-bedahon hita hasoman i kuria. Tapi haholongi hita ma ganup sidea. (1 Ptr. 2:17) Sihol do hita manlinggomi ampa mangurupi sidea. Anggo dong na tersinggung halani pambahenan atap parsahapta, ulang ma iahap hita salahni do ai halani ia do na urahtu tersinggung. Mase ma dong piga-piga hasomanta na urah-urah tersinggung? Ra do, i hutani hinan atap hasomalan i kaluargani, somal do halak mapas uhurni mangidah na legan. Halani ai, iahap ia ma lang maharga ia. Jadi urah ma ia tersinggung anggo dong na mambahen na hurang dear hu bani. Na leganni dong hasomanta na baru ope ididi. Lang isangka sidea anggo sanina botou i kuria dong do homa na mambahen na salah. Tapi aha pe situasini, maningon marusaha do hita ganup mambahen kuria totap mardamei. Anjaha anggo urahtu hita tersinggung porlu do homa hita mambahen parubahan. Anggo ganup hita mambahen na sonai gabe marsada anjaha mardamei ma kuria.

8. Bani jaman ni Jesus aha do na sipontingan ianggap halak, janah aha do pengaruhni bani susianni?

⁸ Bahat do halak Jahudi na marpingkir ponting tumang do ase dong jabatan ni sidea. Sada pakar mangkatahon, “Na sipontingan bani buei halak, ai ma ase ipasangap ia anjaha boi gabe halak na tarsar.” Halani ai do ase isungkun susian ni Jesus sonon, “Ai ise  do sibanggalan ibagas Harajaon nagori atas?” (Mat. 18:1) Tapi ihatahon Jesus ma anggo ganup susianni ai isobut do “na etek-etek on”.

9. Aha do na maningon ihorjahon susian ni Jesus?

⁹ Ibotoh Jesus do anggo susianni boi do gabe terpengaruh bani halak Jahudi ai. Halani ai, ihatahon Jesus ma bani susianni, “Sibanggalan bannima, ai ma gabe songon siposoan, anjaha na mamarentah, ai ma gabe songon siparugas.” (Luk. 22:26) Ase boi hita gabe “siposonan” maningon ihira hita do halak na legan ‘lobihan marimbangkon dirinta sandiri’. (Pil. 2:3) Halani ai, jaga hita ma parlahounta ase lang mambahen borit uhur ni halak na legan.

10. Aha do podah ni si Paulus na porlu iparuhurhon hita?

¹⁰ Anggo marusaha hita mangidah na dear humbani hasomanta, tontu setuju do hita lobihan do sidea marimbangkon dirinta sandiri. Tongtong ma idingat hita podah ni si Paulus on, “Ai ise mambahen marhasurungan ham? Ai aha na adong bamu, na so jinalomu? Anggo na manjalo do, mase ma [margijang ni uhur] ham songon na so manjalo?” (1 Kor. 4:7) Ulang ma dong tujuanta ase ipuji-puji halak hita. Ulang ma iahap hita pandeinan hita marimbangkon na legan. Umpamani, anggo dong hita na pandei marambilan atap pe bahat parlajar Bibelta, hubani Jahowa ma bere hita pujian halani Ia do na mangurupi hita mangkorjahon ai.

11. Parlajaran aha ma na idapot hita humbani limbaga ni Jesus pasal sada raja ampa jabolonni?

¹¹ Dob ipodahi Jesus susianni ase ulang mambahen halak marborit ni uhur, ipatugah ia ma sada limbaga. Dong sada jabolon na bahat tumang utangni bani sada raja. Tapi lang sanggup jabolon ai manggalar utangni. Jadi ibalihon raja ai ma utangni ai. Dob ai, pajumpah ma jabolon ai pakon hasomanni jabolon na marutang otik bani. Tapi lang ra ia mambalihon utang ni hasomanni ai. Halani ai, ipamasuk raja ai ma jabolon na jahat ai hu penjara. Aha ma parlajaranni hubanta? Jesus mangkatahon, “Sonai do bahenon ni Bapangku na i nagori atas ai bennima, anggo lang isasap hanima bei humbagas uhurnima salah ni hasoman.”​—Mat. 18:21-35.

12. Anggo lang ra hita manalpuhon hasalahan ni hasomanta, mase ai boi mambahen na legan gabe sunsah?

¹² Aha na ibahen jabolon na jahat ai, lang pitah manunsahi dirini sandiri tapi dihut do homa halak na legan. Umpamani, ipamasuk ia do hasomanni ai hu penjara. Anjaha gabe sunsah do homa hasomanni na legan mangidah ai. Ihatahon “dob ididah hasomanni juakjuak na masa ai” pusok ma uhur ni sidea mangidah ai. Sonai do homa, anggo lang ra hita manalpuhon salah ni hasoman, sonaha ma ujungni? Na parlobei, Gabe lang parduli be hita bani hasomanta na dong salahni ai janah lang holong be hita hu bani. Na paduahon, hasoman na legan pe gabe pusok do uhurni mangidah hita lang mardamei pakon na legan.

13. Parlajaran aha do na boi idapot hita humbani pangalaman ni sahalak perintis?

¹³ Anggo ra hita manalpuhon salah ni hasoman, gabe malas ma uhurta sonai homa hasoman na legan. Ai ma na iahapkon sada perintis na margoran si Crystal. Adong i kuria na mambahen borit uhurni. Nini ma, “Borit tumang uhurhu manangar parsahapni ai, songon isayat pisou huahap. Gabe lang marosuh be ahu marbarita pakonsi. Dokah-dokah lang semangat be ahu mangidangi.” Mungkahni iahap si Crystal do lang salah parlahouni ai. Tapi marusaha do ia ase ulang lalab marsogam ni uhur. Idalankon ia ma podah i artikel “Ampunilah dengan Segenap Hati  Saudara” bani majallah Menara Pengawal 15 Oktober 1999. Ujungni boi ma isalpuhon ia salah ni hasomanni ai. Nini ma use, “Ganup do hita maningon marusaha mambahen hamubahon. Anjaha sai tongtong do ra Jahowa manalpuhon hasalahanta bani ganup ari. Sonari domma hampung pangahapku janah malas tumang uhurhu.”

14. Domu bani Mateus 18:21, 22, aha do na sunsah ihorjahon si Petrus janah parlajaran aha ma na boi dapot hita humbani balos ni Jesus?

¹⁴ Domma ibotoh hita maningon isalpuhon hita do salah ni hasoman. Tapi sipata lang urah mangkorjahon ai. Ra do sonai na iahapkon si Petrus. (Basa Mateus 18:21, 22.) Halani ai, aha ma na boi mangurupi hita? Na parlobei, rimangi ma sadiha bahat do domma isalpuhon Jahowa hasalahanta. (Mat. 18:32, 33) Sasintongni halani idop do uhur ni Naibata do ase ra Ia manasap hasalahanta. (Ps. 103:8-10) Leganni ai, iparentahkon do hita ase ‘marsihaholongan samah hita’. Halani ai maningon ra do hita manalpuhon salah ni hasoman. (1 Joh. 4:11) Na paduahon, dingat ma hasilni anggo ra hita manalpuhon salah ni hasomanta. Umpamani, gabe mardear ma use hita pakon hasomanta ai janah hampung ma pangahapta. Dob ai, gabe marsada ma kuria janah totap hita gabe hasoman ni Naibata. (2 Kor. 2:7; Kol. 3:14) Na sipontingan martonggo ma bani Jahowa. Sasintongni marosuh tumang do Sibolis anggo lang mardamei hita pakon hasomanta. (Ep. 4:26, 27) Halani ai porlu tumang do hita iurupi Jahowa ase ulang ihorjahon hita harosuh ni Sibolis ai.

15. Domu bani Kolosse 3:13, prinsip aha do na boi mangurupi hita anggo dong sanina botou na mambahen borit uhurta?

¹⁵ Tapi aha do na boi ibahen nasiam anggo dong halak i kuria na mambahen borit tumang  uhurmu? Marusaha ma mardamei pakonsi. Patugah ma na ibagas uhurmu bani Jahowa. Tonggohon ma homa hasomanmu ai. Pindo ma ase boi ham mangidah na dear humbani hasomanmu ai. (Luk. 6:28) Tapi sonaha anggo lang boi ihalupahon ham pambahenanni ai? Anggo sonai, dear do anggo iarahkon ham ia marsahap. Ulang ma iahap ham na sangaja do ia mambahen borit uhurmu. (Mat. 5:23, 24; 1 Kor. 13:7) Sanggah marsahapi, dingat ma tujuanmu na laho mardamei do pakonsi. Tapi sonaha anggo lang ra ia mardamei pakon ham? Totap ma sabar ham hu bani. (Basa Kolosse 3:13.) Na sipontingan ulang ma lalab sogam uhurmu halani boi do ai mambahen ham lang be marhasoman pakon Jahowa. Ulang ma halani salah ni halak gabe mandaoh ham humbani Jahowa. Anggo ibahen nasiam sonai, on patuduhkon holongan do uhurmu bani Jahowa marimbangkon na legan.​—Ps. 119:165.

16. Aha do tanggung jawabta haganup?

¹⁶ Malas tumang uhurta mangidangi pakon sanina botou na legan. Sada “hulanan” do hita anjaha sada “parmahan”. (Joh. 10:16) Buku Diorganisasi untuk Melakukan Kehendak Yehuwa, alaman 165, mangkatahon, “Ponting tumang do hasadaon ai. Halani ai maningon ijaga hita do hasadaon ai.” Tiru hita ma Jahowa na tongtong mangidah na madear humbani na legan. Maharga tumang do ganup hita “na etek-etek on” i lobei ni Jahowa. Tontu harga tumang do homa ganup hasomanta hubanta. Malas do uhur ni Jahowa anggo ra hita mangurupi janah patoguhkon hasomanta.​—Mat. 10:42.

17. Aha do na maningon bahenonta ganup?

¹⁷ Halani holong uhurta bani hasomanta, “dearan ma naputuskon, ulang be nabahen partolsuan atap parsangsian bani sanina”. (Rom 14:13) Hira hita ma hasomanta lobihan marimbangkon hita sandiri. Anjaha humbani uhur ma salpuhon hita salah ni sidea. Ulang mandaoh hita humbani Jahowa halani salah ni hasoman. Tapi, “parayak hita ma na padameihon ampa na patorsa-torsahon hita samah hita!”​—Rom 14:19.