1. Songon na ihatahon susian ni Jesus, aha do na maningon ibahen buei halak?

BUEI halak roh hu Jerusalem. Sidea roh hun marbagei nagori janah marragam do bahasani. Bani ari ai, dong sada peristiwa na ponting. Sakalompok halak Jahudi boi marsahap bani halak na roh hun marbagei nagori nongkan ai. Tapi na sipontingan, ai ma aha na ihatahon sakalompok halak Jahudi ai pakon na ihatahon apostel Petrus bani sidea. Gabe ibotoh halak na mabuei ai ma ase boi sidea ipaluah maningon porsaya do sidea bani Jesus Kristus. Masuk do hubagas uhur ni sidea hata ai. Halani ai, isungkun sidea ma, “Aha ma sibahenonnami?” Ihatahon si Petrus ma, “Ididi ma nasiam.”​—Lah. 2:37, 38.

2. Aha ma na laho iulas hita bani artikel on? (Tonggor ma gambar sampul.)

² Dobkonsi ai, aha ma na masa? Domma iparentahkon Jesus ase marbarita susianni janah mangurupi na legan gabe susianni. Saud ma na ihatahon Jesus ai. Dong hira-hira 3.000 halak na ididi gabe susian ni Jesus. Ronsi sonari pe ai do homa na ihorjahon susianni. Tapi lang songon ondi ai, marbarita hita piga-piga jam hubani sasahalak mintor ra ia ididi. Ra, porlu do marbulan atap pe martahun ase ra sasada halak ididi. Songon na ibotoh nasiam, bahat do na porlu bahenon sanggah hita mangurupi sasada halak gabe susian ni Jesus. Bani artikel on, holi iulas hita ma sonaha carani.

3. Domu bani Mateus 28:19, 20, aha ma na maningon ibahen parlajar Bibel paima ia ididi?

³ Paima parlajar Bibel ai ididi, maningon idalankon ia do lobei aha na dob iparlajarini hun Bibel. (Basa Mateus 28:19, 20.) Anggo ibahen ia sonai, usih ma ia songon “halak na  maruhur” na pajongjong rumah i atas batu songon na isaritahon bani limbaga ni Jesus. (Mat. 7:24, 25; Luk. 6:47, 48) Jadi, sonaha hita mangurupi parlajar Bibel laho mangkorjahon ai? Ulas hita ma tolu carani.

4. Sonaha ham mangurupi parlajar Bibelmu ase sirsir ia holi ididi? (Tonggor ma kotak “ Mangurupi Parlajar Bibel Mambahen Tujuan janah Mangkorjahon ai”.)

⁴ Urupi ma parlajar Bibelmu mambahen tujuan. Mase maningon ibahen ham sonai? Umpamani, anggo laho ham hu sada ianan na daoh tontu malas uhurmu i ianan na jenges pemandanganni. Gabe lang daoh be pangahapmu pardalanan ai. Sonai ma homa anggo ibahen parlajar Bibelmu tujuan jangka pendek gabe sirsir ma holi ia ididi. Jadi, gunahon ma fitur “Na Laho Ibahen” na dong bani buku Hagoluhan na Martuah Sadokah ni Dokahni laho mangurupi parlajar Bibelmu mambahen hamajuon. Bani tiap ujung ni parlajaran, ulas ma pakon parlajar Bibelmu, sonaha tujuan ai markaitan pakon aha na baru iparlajarini. Anggo dong tujuan tambahan na sosok bani parlajar Bibelmu, suratkon ma ai i bagian “Na laho ibahen use”. Dob ai, tongtong ma pareksa ai pakon parlajar Bibelmu ase boi ia mandalankon tujuan jangka pendek ampa tujuan jangka panjang.

5. Domu bani Markus 10:17-22, aha ma na isuruh Jesus ihorjahon sada dalahi na bayak, janah mase?

⁵ Urupi ma parlajar Bibelmu mambahen hamubahon. (Basa Markus 10:17-22.) Ibotoh Jesus do lang urah bani sada dalahi na bayak manjual ganup artani. (Mrk. 10:23) Age pe sonai totap do isuruh Jesus ia mangkorjahon ai. Mase? Halani holong uhurni mangidahsi. Sipata ra do mabiar hita mangojur parlajar Bibelta mambahen hamubahon halani pangahapta lape sirsir ia. Tapi porlu do panorang bani sasada halak laho manadingkon parlahou na buruk, janah patuduhkon parlahou na dear. (Kol. 3:9, 10) Jadi anggo lambin  podas iulas ham pasal hamubahon na porlu ibahen ia, lambin podas ma ia mambahen hamubahon. Anggo ibahen ham sonai, taridah ma na parduli do ham hu bani.​—Ps. 141:5; Pod. 27:17.

6. Mase porlu isungkun hita pandapot ni parlajar Bibelta pasal sada topik?

⁶ Ponting do isungkun hita parlajar Bibelta sonaha pandapotni pasal sada topik. Holi gabe ibotoh hita ma aha do na iarusi ampa na iparlajari ia sadokah on. Anggo ipasomal ham ai, lambin urah ma holi iahap ham mangulas topik na payah ijalo ia. Bani buku Hagoluhan na Martuah Sadokah ni Dokahni bahat do sungkun-sungkun sisonai. Umpamani bani parlajaran 04, dong sungkun-sungkun, “Sonaha do pangahap ni Jahowa anggo ipakei ham goran-Ni?” Bani parlajaran 09, dong sungkun-sungkun, “Anggo martonggo ham, aha ma na sihol ipindo ham?” Ra do lang urah iahap ia mambalosi sungkun-sungkun ai. Jadi boi ma igunahon ham ayat ni Bibel pakon gambar laho mangajari ia mangindahi balosni.

7. Sonaha hita boi mangojur parlajar Bibel marhitei pangalaman ni sanina botou?

⁷ Anggo domma ibotoh parlajar Bibel ai aha na porlu bahenonni, patuduh ma pangalaman ni sanina botou ase lambin tarojur ia mandalankon ai. Boi do ipatuduh ham video Yehuwa Peduli kepada Saya i bagian “Tonggor Homa” i parlajaran 14. Bani buku Hagoluhan na Martuah Sadokah ni Dokahni bahat do pangalaman ni sanina botou na boi patoguhkon uhurni. Pangalaman sisonai dong bani bagian “Parlajari Roh Bahatni” pakon “Tonggor Homa”. * Tapi ulang ma bandingkon ia pakon sanina botou na dong bani pangalaman ai. Halani ai, ulang ma ihatahon ham, “Anggo ia boi mangkorjahon ai, mase ham lang?” Paturut ma ia sandiri na mambuat parlajaran hunjai. Ulas ma ayat na mangurupi sanina ai marhasil mambahen hamubahon. Ulas ma homa sonaha Jahowa mangurupi sanina ai.

8. Sonaha hita boi mangurupi parlajar Bibelta ase mangkaholongi Jahowa?

⁸ Urupi ma parlajar Bibel mangkaholongi Jahowa. Sonaha carani? Marusaha ma mangurupi ia ase lambin mambotoh sifat-sifat ni Jahowa. Patugah ma anggo Jahowa ai Naibata na martuah na sirsir mangurupi halak na mangkaholongi-Si. (1 Tim. 1:11; Heb. 11:6) Patugah ma homa anggo titah ni Jahowa patuduhkon holong-Ni do ai hubanta. Anggo ra ia mandalankon ai, gabe martuah ma goluhni. (Jes. 48:17, 18) Jadi anggo lambin bagas holongni bani Jahowa, gabe tarojur ma ia mambahen hamubahon.​—1 Joh. 5:3.

9. Domu bani Markus 10:29, 30, pasu-pasu aha do na porlu idingat parlajar Bibel ase ra ia ididi age pe bahat tantanganni?

⁹ Ase boi mambahen hamajuon ronsi ididi, dong ope na porlu ibahen parlajar Bibel ai. Songon dalahi na bayak na ipatugah nongkan ai, ra do ia porlu manadingkon artani. Umpamani, anggo horjani lang sosok pakon prinsip ni Bibel, ra do maningon ipindahi ia horja na legan. Bahat do homa na manadingkon hasomanni na lang mangkaholongi Jahowa. Na leganni, dong do homa na itadingkon kaluargani halani sidea lang marosuh bani Saksi Jahowa. Domma ibotoh Jesus lang urah bani parlajar Bibel ai ibagas situasi sisonai. Hassi pe sonai, marjanji do ia dapotan pasu-pasu do hita anggo ra mangirikkonsi.  Anjaha gabe kaluarganta ma holi ganup sanina botou na dong i sab dunia on. (Basa Markus 10:29, 30.) Sonaha ma ham boi mangurupi parlajar Bibelmu ase mandapot pasu-pasu ai?

10. Aha do na boi iparlajari hita humbani pangalaman ni si Manuel?

¹⁰ Marusaha ma marhasoman orot pakon parlajar Bibelmu. Maningon ipatuduh ham do homa anggo ham parduli bani parlajar Bibelmu. Sonaha carani? Pardiateihon ma na isaritahon si Manuel na tading i Meksiko sanggah marlajar Bibel ope ia. Ia mangkatahon, “Paima marlajar hanami, isungkun gurungku do ahu sonaha kabarku. Basar do ia. Halani ai, gabe urah ma ahu patugahkon aha na ibagas uhurhu. Boi ma huahapkon anggo ia tongon-tongon parduli bangku.”

11. Aha do gunani anggo gati hita marsaor pakon parlajar Bibelta?

¹¹ Gati ma marsaor pakon parlajar Bibelmu songon na ibahen Jesus bani susianni. (Joh. 3:22) Anggo ia domma mambahen hamajuon, boi do iontang ham ia hu rumahmu laho minum kopi, mangan, atap manonton JW Broadcasting. Porlu tumang do on ibahen hita sanggah lungunan pangahapni halani kaluarga atap hasomanni sibuk marari raya. Si Kazibwe na tading i Uganda mangkatahon, “Sanggah marlajar Bibel ahu, atap pe sanggah marsaor ahu pakon gurungku bahat do na huparlajari pasal Jahowa. Huidah ma parduli tumang do Jahowa bani juakjuak-Ni. Janah martuah do goluh ni sidea. Sihol do homa uhurhu ase sonai goluhku.”

12. Mase porlu margantih hasomanta sanggah mangajari parlajar Bibelta?

¹² Margantih ma boan hasomanmu sanggah mangajari parlajar Bibel. Sipata ra do iahap hita urahan do sahalakta atap lang pala margantih hasoman na iboan hita hu rumah ni parlajar Bibelta. Tapi dearan ma anggo margantih iboan ham hasomanmu halani bahat do gunani ai bani parlajar Bibelmu. Si Dmitrii  na tading i Moldova mangkatahon, “Margantih do hasoman na iboan gurungku sanggah mangajari ahu. Janah dear tumang do sidea patorangkon parlajaran ai. Gabe lambin huarusi ma sonaha mandalankon ai. Anjaha sanggah parlobei sahali ahu roh hu partumpuan, lang maila ahu halani domma bahat sanina botou na hutanda.”

13. Mase maningon iurupi hita parlajar Bibelta dihut martumpu?

¹³ Urupi ma parlajar Bibelmu ase dihut martumpu. Mase? Halani domma iparentahkon Jahowa ase martumpu juakjuak-Ni laho manombah-Si. (Heb. 10:24, 25) Sobali ai, kaluarganta do sanina botou na dong i kuria. Jadi sanggah hita martumpu, usih songon na rap mangan i rumah do hita ai. Leganni ai, anggo iurupi ham parlajar Bibelmu dihut martumpu, gabe urah ma iahap ia mambahen hamajuon ase ididi. Tapi ra do adong tantanganni ase boi ia dihut martumpu. Sonaha ham mamakei buku Hagoluhan na Martuah Sadokah ni Dokahni laho mangurupi parlajar Bibelmu mangatasi ai?

14. Sonaha hita mangojur parlajar Bibelta ase dihut martumpu?

¹⁴ Gunahon ma parlajaran 10 bani buku Hagoluhan na Martuah Sadokah ni Dokahni laho mangojur ia ase martumpu. Paima salosei buku ai ibahen, ipindo do bani piga-piga parbarita na marpangalaman ase manggunahon parlajaran ai hubani parlajar Bibelni. Dear tumang do nini sidea hasilni. Tapi ulang paima das lobei parlajaran 10 ase iontang ham ia roh hu partumpuan. Age baru marlajar, boi do iontang ham ia. Janah pasomal-somal ma mangontang ia. Dingat ma dong bei do tantangan ni tiap parlajar Bibel ai. Halani ai, pardiateihon ma sidea janah urupi ma domu bani tantanganni. Porini lape ra ia martumpu, ulang ma borit uhurmu. Sabar ma janah ulang marnaloja mangontang ia.

15. Aha do ra na ihabiari parlajar Bibelta?

¹⁵ Ai idingat ham do sonaha pangahapmu ondi ai sanggah laho gabe Saksi Jahowa? Ra, mabiar do ham halani pangahapmu lang barani ham marbarita hu rumah-rumah. Atap mabiar ham dong kaluarga atap hasoman na manlarang ham gabe Saksi Jahowa. Anggo sonai, boi ma iarusi ham pangahap ni parlajar Bibelmu ai. Jesus mangkatahon ra do bahat halak na sonai pangahapni. Hassi pe sonai, iojur ia do ase ulang mabiar susianni janah maronti mangidangi Jahowa. (Mat. 10:16, 17, 27, 28) Sonaha Jesus mangurupi susianni ase ulang mabiar? Anjaha sonaha ham boi maniru Jesus?

16. Sonaha hita boi manlatih parlajar Bibelta ase boi mansaritahon na dob iparlajarisi?

¹⁶ Tongtong ma latih parlajar Bibelmu laho mansaritahon na dob iparlajarisi. Ra, mabiar do homa susian ni Jesus hinan sanggah isuruh marbarita. Tapi iurupi Jesus do sidea. Ipatugah ia do huja sidea marbarita ampa aha na laho ibaritahon. (Mat. 10:5-7) Sonaha ham boi maniru Jesus? Urupi ma parlajar Bibelmu ase mambotoh hubani ise ia boi marbarita. Umpamani, sungkun ma ia adong do hira-hira hasomanni na boi homa mandapot guna humbani parlajaran ai. Dob ai, urupi ma sonaha ase boi dear ia padaskon barita ai. Bani buku Hagoluhan na Martuah Sadokah ni Dokahni dong fitur “Anggo Dong na Mangkatahon”. Anggo sosok, boi do ipakei ham fitur ai laho marlatih. Sanggah mambahen ai latih ma parlajar Bibelmu ase basar ia janah manggunahon Bibel laho mambalosi sungkun-sungkun.

17. Sonaha hita manggunahon Mateus 10:19, 20, 29-31 laho mangurupi parlajar Bibelta ase marondos bani Jahowa?

 ¹⁷ Urupi ma parlajar Bibelmu ase marondos bani Jahowa. Ihatahon Jesus do bani susianni sai urupan ni Jahowa do sidea halani holong uhur-Ni bani sidea. (Basa Mateus 10:19, 20, 29-31.) Jadi patugah ma bani parlajar Bibelmu ai pasti iurupi Jahowa do homa ia. Urupi ma ia ase marondos bani Jahowa. Sonaha carani? Boi do rup martonggo nasiam janah pindo ma bani Jahowa ase iurupi ia mandalankon tujuan-tujuanni. Si Franciszek na tading i Polandia mangkatahon, “Gati do isobut gurungku pasal tujuanku sanggah martonggo hanami. Huidah ma ibalosi Jahowa do tonggo ni gurungku ai. Halani ai, mulai ma ahu martonggo bani Jahowa. Sanggah ai, sihol uhurhu dihut martumpu ampa hu kebaktian hape baru dapot horja ope ahu. Jadi hutonggohon ma ai. Malas tumang uhurhu halani ibalosi Jahowa do tonggongku ai.”

18. Sonaha pangahap ni Jahowa mangidah haringgasonta mangajarhon Bibel hubani halak?

¹⁸ Parduli tumang do Jahowa hubani parlajar Bibelta. Janah ibotoh Ia do homa haringgasonta laho mangurupi bahat halak ase dohor Bani. Halani ai, holong do homa uhur-Ni mangidah hita. (Jes. 52:7) Tapi, ra do lang ganup hita dong parlajar Bibelni sonari. Age pe sonai, totap do hita boi mangurupi parlajar Bibel mambahen hamajuon janah ididi. Jadi anggo iarahkon sanina botou hita mangkasomanisi laho mangajari parlajar Bibelni, marusaha ma hita mangurupi parlajar Bibelni ase boi mambahen hamajuon janah ididi.