1. Situasi na sonaha do na boi mambahen hasomanta gabe mabiar?

 PARUHURHON hita ma piga-piga situasi na mambahen hasomanta mabiar. Si Nestror pakon si María istrini, sihol mangidangi i ianan na mamorluhon bahat parbarita. * Ase boi ihorjahon sidea ai, ibahen sidea ma rencana, tarmasuk mangatur parduitan. Tapi, mabiar do sidea holi lang boi manggoki haporluanni siganup ari. Hasomanta na legan ai ma si Biniam, tading i nagori na manlarang pangidangionta. Mabiar do ia bani sada ari hona tangkap. Tapi biaran do ia anggo kaluargani mambotoh ia domma gabe Saksi Jahowa. Hasomanta na legan ai ma si Valérie, mangkatahon ia hona kanker ganas. Jadi marusaha ma ia mangindahi dokter na mangkargai haporsayaonni, na ra mangoperasi ia tanpa transfusi darah. Tontu mabiar do homa ia matei.

2. Mase porlu irajai hita biar ni uhur?

² Bahat do hasomanta na ongga mangahapkon situasi na sisonai. Tapi, anggo lang irajai hita biar ai, gabe lepak ma holi haputusan na ibahen hita. Janah gabe maseda ma holi parhasomananta pakon Jahowa. Ai do harosuh ni Sibolis. Sihol do ia ase hita mabiar, gabe lang idalankon hita be titah ni Naibata janah lang be marbarita. (Pangk. 12:17) Jahat tumang do Sibolis ai, kejam, janah gogohan do ia marimbangkon hita. Hassi pe sonai, dingat ma boi do ilawan hita ia. Sonaha carani?

3. Aha do na boi mangurupi hita manrajai biar ni uhurta?

³ Anggo porsaya hita holong do uhur ni Jahowa hubanta janah sai ihasomani Ia do hita, boi do italuhon hita Sibolis. (Ps. 118:6) Pardiateihon hita ma sitiruon humbani panurat ni Psalmen 118. Bahat do hasunsahanni, bahat  homa munsuhni, tarmasuk ma pejabat bani panorang ai (ayat 9, 10). Sipata, borat tumang do sitarononni (ayat 13). Anjaha karas do homa ia ipinsang Jahowa (ayat 18). Age pe sonai ihatahon ia do, “Seng mabiar ahu.” Mase boi sonai pangahapni? Halani ibotoh ia Bapa na parholong do Jahowa ai. Jadi sanggah ipinsang ia, halani holong ni uhur ni Jahowa do ai hu bani. Janah porsaya do ia, atap sonaha pe situasini sai iurupi Jahowa do ia.​—Ps. 118:29.

4. Anggo porsaya hita bani holong ni uhur ni Naibata, biar na sonaha ma na boi irajai hita?

⁴ Maningon porsaya ma hita holong tumang do uhur ni Jahowa hubanta. Ai ma na boi mangurupi hita laho manrajai biar bani tolu situasi on: (1) biar lang boi mansarihon haporluan siganup ari; (2) biar bani jolma, anjaha (3) biar bani hamatean. Sanina botounta na ipatugah nongkan ai boi manrajai biar ni uhur halani porsaya bani holong ni uhur ni Naibata.

5. Situasi na sonaha do na boi mambahen kopala kaluarga mabiar? (Tonggor ma gambar sampul.)

⁵ Tanggung jawab ni kopala kaluarga do manggoki haporluan ni ganup anggota kaluargani. (1 Tim. 5:8) Anggo sahalak kopala kaluarga ham, ra do mabiar ham lang adong horjamu halani pandemi na masa baru-baru on. Ra do mabiar ham lang boi pasirsirhon sipanganon bani kaluargamu atap pe manggalar sewa rumah. Ra do homa mabiar ham anggo ipecat hun parhorjaan, lang boi be dapotmu horja na legan. Atap songon si Nestor pakon si María na ipatugah nongkan ai, ra do mabiar ham anggo hurang pansarianmu, sonaha ma boi manggoki haporluan ni kaluarga. Dingat ma, marhasil do Sibolis mambahen bahat halak lang be mangidangi Jahowa halani biar na sisonai.

6. Pingkiran na sonaha do na iharosuhkon Sibolis ipingkirhon hita?

⁶ Marusaha do Sibolis mambahen hita ase lang porsaya parduli do Jahowa hubanta janah lang ra Ia mangurupi hita mansarihon kaluarganta. Ujungni, ra ma hita mambahen aha pe hassi pe ai lang domu bani prinsip ni Bibel, asal ma boi hita totap marhorja.

7. Aha do na ihatahon Jesus na paposkon uhurta?

⁷ Tangkas do itanda Jesus Jahowa ai. Ia mangkatahon, ‘Ibotoh Bapanta do na porlu banta, sanggah lape ipindo hita ai hun Bani.’ (Mat. 6:8) Anjaha Jesus pe mambotoh sirsir do Jahowa manggoki haporluanta. Jahowa do Kopala kaluarga, janah ganup juakjuak-Ni anggota kaluarga-Ni. Halani ai, pos ma uhurta tontu idalankon Jahowa do aha na dob ihatahon-Ni bani 1 Timoteus 5:8.

8. (a) Aha ma na mangurupi hita sanggah mabiar lang boi manggoki haporluan siganup ari? (Mateus 6:31-33) (b) Songon na ipatuduh bani gambar, sonaha hita maniru suami istri na ra marbagi sipanganon?

⁸ Anggo porsaya hita holong tumang do uhur ni Jahowa hubanta pakon kaluarganta, tontu pos uhurta isarihon Jahowa do na porlu banta. (Basa Mateus 6:31-33.) Sihol do Ia mangkorjahon ai, janah layak do Ia mambere! Buktini, sanggah itompa Ia tanoh on, lang pitah haporluanta na ipasirsir. Tapi bahat tumang do na ibahen Ia ase boi hita marmalas ni uhur. (1 Mus. 2:9) Jadi anggo sipata pitah sipanganon dassa na tarsari hita, dingat ma adong pe ai halani Jahowa do na pasirsirhon ai. (Mat. 6:11) Dingat ma homa pengorbanan aha pe na ibahen hita  sonari, banggalan do holi na laho bereon ni Jahowa banta bani ari simagira. Ai ma na iahapkon si Nestor pakon si María.​—Jes. 65:21, 22.

9. Aha ma na boi iparlajari ham humbani pangalaman ni si Nestor pakon si María?

⁹ Tading i Kolombia do si Nestor pakon si María. Jenges do rumahni sidea janah dear do homa horja ni sidea. Ihatahon sidea ma, “Sihol uhurnami mambahen penyesuaian ase boi lambin bahat mangidangi Jahowa. Tapi mabiar do hanami, sonaha ma holi goluhnami anggo hurang duitnami?” Aha ma na boi mangurupi sidea mangatasi ai? Irimangi sidea ma sonaha Jahowa patuduhkon holong-Ni bani sidea sadokah on. Halani ai, pos ma uhur ni sidea tongtong do isarihon Jahowa sidea. Jadi, kaluar ma sidea hun parhorjaanni, ijual rumahni, janah pindah ma sidea hu nagori na mamorluhon bahat parbarita. Sonaha pangahap ni sidea dob mambahen haputusan ai? Si Nestor mangkatahon, “Iahapkon hanami ma sintong do na ihatahon bani Mateus 6:33 ai. Lang ongga hahurangan hanami, janah martuah do goluhnami sonari.”

10. Mase ma adong halak na mabiar bani jolma?

¹⁰ Dobkonsi si Adam pakon si Hawa manlawan dompak Jahowa, mulai ma jolma manunsahi jolma. (Par. 8:9) Umpamani, adong ma halak na mansalahgunahon jabatanni laho mambahen hajahaton. Adong do homa na i-bully hasomanni ia i sikolah. Anjaha dong homa na mambahen na kejam hubani anggota kaluargani. Jadi, patut ma adong halak na mabiar bani jolma! Sonaha Sibolis manggunahon ai laho manaluhon hita?

11-12. Aha ma deba na ibahen Sibolis laho manaluhon hita?

¹¹ Marusaha do Sibolis mambahen hita mabiar tumang bani jolma ase lang be marbarita hita janah lang mangkorjahon harosuh ni Jahowa. Igunahon ia ma pamarentah laho manlarang horja parambilanonta janah iparburu hita. (Luk. 21:12; Pangk. 2:10) Igunahon Sibolis do homa dunia on laho pararatkon barita na lang sintong pasal Saksi Jahowa. Bahat do halak na porsaya bani barita ai. Halani ai, iejek ma hita, janah adong do homa na marusaha mambogbogi hita. (Mat. 10:36) Ai tarsonggot do hita manangar ai? Lang.  Humbani abad na parlobei pe domma ibahenni sonai.—Lah. 5:27, 28, 40.

¹² Tapi, lang pitah ai na igunahon Sibolis laho pabiar-biarhon hita. Adong do homa na mabiar halani mamingkirhon aha ma holi na ibahen kaluargani anggo ibotoh gabe Saksi Jahowa ia. Sipata, biaran do sidea bani kaluargani marimbangkon iparburu. Holong tumang do uhur ni sidea bani kaluargani. Sihol do sidea ase kaluargani mananda janah mangkaholongi Jahowa. Jadi, sanggah adong kaluarga na lang mangkargai haporsayaonni atap pabajan-bajankon hasoman sahaporsayaonni, gabe pusok tumang ma uhur ni sidea. Tongon, adong do piga-piga kaluarga na manlarang hinan, ujungni gabe Saksi Jahowa. Tapi sonaha porini totap do lang parduli kaluarganta hubanta halani haporsayaonta? Aha ma na laho bahenonta?

13. Aha ma na porlu ibahen hita sanggah lang parduli kaluarganta hubanta? (Psalmen 27:10)

¹³ Gabe tarapoh do uhurta anggo idingat hita na ihatahon bani Psalmen 27:10. (Basa.) Anggo idingat hita sonaha Jahowa mangkaholongi hita, gabe lang mabiar hita hassi pe lang parduli be kaluarganta hubanta. Gabe pos ma uhurta bereon ni Jahowa do ganup haporluanta. Anjaha urupan-Ni do hita ase totap marmalas ni uhur janah orot hu Bani. Ai ma na iahapkon si Biniam na ipatugah nongkan ai.

14. Parlajaran aha ma na idapot ham humbani pangalaman ni si Biniam?

¹⁴ Age pe ibotoh si Biniam iparburu janah isiksa pamarentah do Saksi Jahowa i nagorini, tapi totap do ra ia gabe Saksi Jahowa. Paruhurhon hita ma sonaha holongni uhur ni Jahowa mangurupi ia mangatasi biar bani jolma. Ia mangkatahon, “Tongon, mabiar do ahu iparburu pamarentah. Tapi biaran do ahu ihasogamkon kaluargaku. Mabiar do ahu pusok uhur ni bapa halani gabe Saksi Jahowa ahu janah lang be ihargai kaluargaku ahu.” Hassi pe sonai, pos do uhur ni si Biniam tongtong do isarihon Jahowa halak na mangkaholongi-Si. Nini si Biniam use, “Hudingat ma sonaha Jahowa mangurupi hasoman-hasomanta na sunsah ibagas parduitan, na manaron ketidakadilan, ampa na iparburu. Hubotoh do anggo totap  setia ahu bani Jahowa, pasu-pasuon-Ni do ahu. Sanggah piga-piga hali itangkap ahu, janah ongga do homa isiksa ahu, huahapkon tongtong do Jahowa mangurupi hita anggo totap hita setia hu Bani.” Dos songon Bapa do Jahowa ai bani si Biniam, anjaha songon kaluargani do hasoman sahaporsayaonta.

15. Mase mabiar hita bani hamatean?

¹⁵ Bibel mangkatahon munsuh do hamatean ai. (1 Kor. 15:25, 26) Ra do mabiar hita sanggah mamingkirhon pasal hamatean, tarlobih sanggah adong kaluarganta na parah naboritni. Mase mabiar hita bani hamatean? Halani sanggah itompa Jahowa jolma, ibere do homa harosuh laho manggoluh sadokah ni dokahni. (Par. 3:11) Halani ai, anggo mabiar hita bani hamatean gabe ihargai hita ma hagoluhan. Umpamani, ipangan hita ma sipanganon na sehat, rajin olahraga, janah laho do hita martambar sanggah boritan. Leganni ai, ipadaoh hita do dirinta humbani bahaya.

16. Sonaha Sibolis manggunahon biar bani hamatean laho manaluhon hita?

¹⁶ Ibotoh Sibolis do anggo hita mangkargai hagoluhan. Tapi halani ia do “na [“parohkon”, Kitab Suci Terjemahan Dunia Baru] hamatean”, marusaha do ia mambahen ase hita manadingkon Jahowa halani biar bani hamatean. (Heb. 2:14, 15) Umpamani marhitei pangihutni, iancam do hita laho ibunuh anggo totap mangidangi Jahowa. Atap, sanggah parah naboritta, ra do igunahon ia ai ase hita manlanggar titah ni Naibata. Marhitei dokter atap kaluarganta na lang Saksi, ra do ipaksa hita manjalo transfusi darah. Atap, ra do homa halak na legan mangojur hita ase mangindahi partambaran na lang domu bani prinsip ni Bibel. Ihatahon Sibolis do aha pe ibahen hita asal ma boi totap manggoluh, hassi pe halani ai gabe maseda parhasomananta pakon Jahowa. (Job 2:4, 5) Tapi, lepak do na ihatahon Sibolis ai!

17. Domu bani Rom 8:37-39, mase lang porlu mabiar hita bani hamatean?

¹⁷ Tongon, lang ra hita matei. Tapi ibotoh hita do porini pe matei hita, totap do ihaholongi Jahowa hita. (Basa Rom 8:37-39.) Sanggah matei hasoman-Ni totap do idingat Jahowa sidea. Pangahap-Ni usih songon manggoluh ope sidea. (Luk. 20:37, 38) Sihol do uhur-Ni laho papuhohon sidea. (Job 14:15) Janah domma ibere Jahowa tobusan na maharga tumang ase boi hita mandapot “hagoluhan na sadokah ni dokahni”. (Joh. 3:16) Tangkas ma holong tumang do uhur ni Jahowa hubanta janah isarihon Ia do hita. Halani ai, anggo boritan hita atap pe iancam laho ibunuh, ulang ma tadingkon hita Jahowa. Tapi marondos ma hita hu Bani ase ibere Ia hubanta apoh-apoh, hauhuron, ampa hagogohon laho martahan. On ma na iahapkon si Valérie pakon suamini.​—Ps. 41:4.

18. Aha ma na boi iparlajari ham humbani pangalaman ni si Valérie?

¹⁸ Marumur 35 tahun ma si Valérie sanggah ihatahon dokter hona kanker ganas ia. Paruhurhon ma sonaha holong ni Jahowa boi mangurupi si Valérie mangatasi biar bani hamatean. Ia mansaritahon, “Sanggah hubotoh ahu hona kanker, tarsonggot tumang do ahu pakon suamiku. Maningon ioperasi do ahu ase boi malum. Jadi isungkun hanami ma bahat dokter. Tapi lang ra sidea mangoperasi anggo  lang transfusi darah. Mabiar tumang do ahu. Tapi halani sihol mandalankon titah ni Naibata, lang ra ahu manjalo transfusi darah. Sadokah goluhku domma huahapkon holong tumang do Jahowa hubangku. Jadi sonari ma panorangni laho patuduhkon holongku hu Bani. Sanggah ipatugah dokter barita na lang dear pasal naboritku, lambin hupatoguh ma uhurhu laho pasonangkon Jahowa. Janah lang hupaturut monang Sibolis. Ujungni, marhasil do ahu ioperasi. Age pe lalab borit-boritan ahu, tapi huahapkon tongtong do ibere Jahowa haporluannami. Umpamani, sanggah lape hubotoh hona kanker ahu, pas homa i partumpuan iulas artikel ‘Menghadapi Kesukaran dengan Tabah’. * Gabe ipatoguh do uhurnami. Halani ai, marulak-ulak ma ibasa hanami artikel ai. Leganni ai, torus do hanami marbarita janah roh hu partumpuan. On ma na mangurupi hanami ase totap damei anjaha boi mambahen haputusan na dear.”

19. Aha ma na laho masa lang piga dokah nari?

¹⁹ Marhitei pangurupion ni Jahowa, ganup do juakjuak-Ni boi mangatasi tantangan ampa manaluhon Sibolis. (1 Ptr. 5:8, 9) Nasiam pe boi do sonai. Lang piga dokah nari iparentahkon Jahowa ma ase Jesus pakon na 144.000 “laho mansedahon horja ni Sibolis”. (1 Joh. 3:8) Dobkonsi ai, ‘seng dong be na mambahen mabiar; sonai homa na mambahen tarsonggot’ i tanoh on. Gabe boi ma juakjuak ni Naibata marmalas ni uhur mangidangi-Si. (Jes. 54:14; Mi. 4:4) Tapi paima ai, maningon marusaha ma hita mangatasi biar ni uhur.

20. Sonaha hita boi mangatasi biar ni uhur?

²⁰ Maningon tongtong ma hita porsaya holong tumang do uhur ni Jahowa hubanta anjaha sai jagaon-Ni do juakjuak-Ni. Halani ai, rimangi ma sonaha Jahowa domma manjaga juakjuak-Ni. Anjaha saritahon ma ai hubani halak na legan. Dingat ma homa sonaha Jahowa domma mangurupi nasiam ibagas situasi na sunsah. Marhitei pangurupion-Ni, boi do hita mangatasi biar ni uhur!​—Ps. 34:5.