1. Aha do janji ni Jahowa bani pardousa na mambahen hamubahon?

 JAHOWA do Sitompa, Sibere Titah, ampa Hakim. Tapi sobali ai, Bapa na parholong do homa Ia. (Ps. 100:3; Jes. 33:22) Sanggah mardousa hita, marpangulaki do uhur-Ni janah sirsir do Ia manasap dousanta anggo ra hita mambahen hamubahon. (Ps. 86:5) Marhitei Nabi Jesaya marjanji do Jahowa, “Age pe gerger dousanima songon [daroh], lopak do bahenon-Ku ai songon salju.”​—Jes. 1:18.

2. Ase totap dear parhasomananta pakon na legan, aha do na maningon ibahen hita?

² Halani lang gokan dear sipata ra do ibahen hita borit uhur ni halak. (Jak. 3:2) Boi do totap dear parhasomananta anggo ra hita marsisasapan dousa. (Pod. 17:9; 19:11; Mat. 18:21, 22) Sihol do Jahowa ase isalpuhon hita hasalahanni ai. (Kol. 3:13) Mase maningon ibahen hita sonai? Halani Jahowa pe marpangulaki do uhur-Ni hubanta janah sirsir do Ia manasap dousanta.​—Jes. 55:7.

3. Aha ma na laho iulas hita bani artikel on?

³ Bani artikel on holi iulas hita ma sonaha hita boi maniru Jahowa na sirsir manasap dousa. Dob ai, iulas hita homa dousa na sonaha do na maningon ipatugah hita hubani sintua, mase Jahowa sihol ase hita marsisasapan dousa, ampa aha do na boi itiru hita humbani sanina botou na sirsir manalpuhon hasalahan ni halak, hassi pe domma marsitaronon sidea ibahen.

4. (a) Anggo adong na mangkorjahon dousa serius, aha do na maningon ibahen ia? (b) Sanggah mambahen panitia pangadilan, aha ma tanggung jawab ni sintua?

⁴ Anggo adong sasahalak na mangkorjahon dousa serius, maningon ipatugah do ai hubani sintua. Dousa serius artini manlanggar uhum ni Naibata. Contoh-contoh dousa sisonai adong bani 1 Korint 6:9, 10. Jadi, anggo sasahalak mangkorjahon dousa serius, maningon martonggo do ia hubani Jahowa mangindo hasasapan ni dousa. Dob ai, maningon ipatugah ia do dousani ai hubani sintua i kuria. (Ps. 32:5; Jak. 5:14) Tapi, pitah Jahowa dassa na marhak manasap dousa ni halak ai. Janah isasap Jahowa do dousanta marhitei tobusan ni Jesus. * Anggo sonai, aha ma tugas ni sintua? Ibere Jahowa do tanggung jawab bani sidea laho mambotoh prinsip ni Bibel na ija do na boi igunahon laho manontuhon boi do na mardousa ai totap i kuria atap lang. (1 Kor. 5:12) Ase boi idalankon sintua tanggung jawab ai, maningon tangkas do ibotoh sidea balos ni sungkun-sungkun on: Sangaja do ia mangkorjahon dousa ai? Marusaha do ia mamonopkon dousani ai? Ai domma irencanahon ia hinan hajahatonni ai? Marulak-ulak do ihorjahon ia ai sadokah on? Na sipontingan, ai adong do bukti na patuduhkon anggo ia manolsoli dousani janah tongon-tongon mambahen hamubahon? Anjaha ai adong do bukti na patuduhkon anggo Jahowa domma manasap dousani?​—Lah. 3:19.

5. Aha do guna ni haputusan na ibahen sintua i kuria?

⁵ Sanggah sintua manangani dousa serius, tujuan ni sidea ai ma mambahen haputusan songon haputusan na dob ibahen Jahowa i surga. Ase boi sonai, martonggo do lobei sidea mangindo pangurupion ni Jahowa, ase dapot sidea prinsip ni Bibel na domu bani parkara ai, janah boi sidea mangihutkon paraturan na dob ibahen organisasi-Ni. (Mat. 18:18) Aha ma guna ni haputusan ai? Ai boi manjaga kuria totap borsih. Anggo ipaturut sahalak pardousa na lang ra mambahen hamubahon totap adong i kuria, on boi mambere pangaruh na lang dear hubani sanina botou. (1 Kor. 5:6, 7, 11-13; Tit. 3:10, 11) Haputusan ai boi mangurupi pardousa ai ase mambahen hamubahon janah mandapot hasasapan ni dousa humbani Jahowa. (Luk. 5:32) Holi, itonggohon sintua ma ia ase iurupi Jahowa ia mardear use pakon-Si.​—Jak. 5:15.

6. Anggo adong sasahalak na ipecat hun kuria, ai boi do isasap Jahowa dousani? Patorang ma.

⁶ Tapi sonaha anggo adong sasahalak na lang ra mambahen hamubahon age pe domma marusaha sintua mangurupi ia? Maningon ipecat do halak ai hun kuria. Age pe sonai anggo i pudian ni ari isolsoli ia hasalahan ni ai janah ra ia mambahen hamubahon, ra do Jahowa manasap dousani hassi pe banggal dousa ni ai. (Luk. 15:17-24; 2 Kron. 33:9, 12, 13; 1 Tim. 1:15) Leganni ai, lang soal sasahalak mambahen hamubahon atap lang, lang boi sintua manlinggomi ia humbani hukum ni pamarentah. Mase? Halani ibere Jahowa do kuasa bani pamarentah laho mangadili ampa manguhum atap ise pe na manlanggar hukum ni sidea.​—Rom 13:4.

7. Aha do artini isalpuhon hita hasalahan ni halak na mardousa hubanta?

 ⁷ Malas uhurta halani lang ibere tanggung jawab hubanta laho mamutuskon boi do isasap Jahowa dousa ni sasahalak atap lang. Age pe sonai adong do na boi iputuskon hita. Aha ma ai? Umpamani, ra do adong sasahalak na mardousa hubanta. Lang soal ia mangindo maaf atap lang, boi do ipilih hita manalpuhon hasalahanni janah lang be manggila hu bani. Tongon, lang urah on tarlobih anggo borit tumang uhurta ibahen. Tapi bani Menara Pengawal 15 September 1994 ihatahon, “Anggo isalpuhon hita hasalahan ni sasahalak, sedo artini setuju hita bani hasalahanni ai. Tapi sanggah isalpuhon hita hasalahanni, on artini domma iondoskon hita parsoalan ai hubani Jahowa. Ia do Hakim na sidearan, janah bereon-Ni do keadilan hubanta bani panorangni.” Mase ma iparentahkon Jahowa hita manalpuhon hasalahan ni halak janah mangondoskon parsoalan ai hu Bani?

8. Sonaha hita patuduhkon anggo hita martarima kasih bani idop ni uhur ni Jahowa hubanta?

⁸ Anggo isasap hita hasalahan ni halak na legan, on patuduhkon martarima kasih do hita bani idop ni uhur na dob ipatuduh Jahowa hubanta. Ipausih Jesus do Jahowa ai songon sada raja na manasap utang ni sahalak jabolonni. Tapi lang ra jabolon ai patuduhkon idop ni uhur bani hasomanni na marutang hu bani. Hape daoh do otikan utang ni hasomanni ai marimbangkon utangni. (Mat. 18:23-35) Aha ma na sihol iajarhon Jesus banta? Anggo tongon-tongon hita martarima kasih bani idop ni uhur ni Jahowa hubanta, tontu gabe tarojur ma hita laho manasap hasalahan ni halak. (Ps. 103:9) Piga-piga tahun na dob salpu, ongga do ipatugah bani majallah Menara Pengawal: “Atap sadiha gati pe hita manalpuhon hasalahan ni halak na legan, daoh do gatinan Jahowa manalpuhon hasalahanta marhitei tobusan ni Jesus Kristus.”

9. Bani ise ma Jahowa maridop ni uhur? (Mateus 6:14, 15)

⁹ Anggo isasap hita hasalahan ni halak, isasap Jahowa ma homa dousanta. Maridop ni uhur do Jahowa bani halak na maridop ni uhur. (Mat. 5:7; Jak. 2:13) Tangkas do taridah on humbani tonggo na iajarhon Jesus bani susianni. (Basa Mateus 6:14, 15.) Anjaha tangkas do homa on humbani na ihatahon Jahowa bani si Job juakjuak-Ni ai. Sanggah ai borit tumang uhur ni si Job hubani si Elipas, si Bildad, pakon si Sopar halani kasar sidea marsahap. Tapi isuruh Jahowa do ase itonggohon si Job sidea. Dob ihorjahon si Job ai, ipasu-pasu Jahowa ma ia.​—Job 42:8-10.

10. Mase berbahaya anggo totap hita manggila hubani sasahalak? (Epesus 4:31, 32)

¹⁰ Anggo torus hita manggila parohkon mara do ai hubani dirinta sandiri. Usih songon siboanon na borat do ringis ai na mambahen loja pangahap. Tapi sihol do Jahowa ase hampung pangahapta. Halani ai, maningon iambukkon hita ma ringis humbagas uhurta. (Basa Epesus 4:31, 32.) Ipodahi Jahowa do ase ‘ipadaoh hita ringis janah ulang marsogam ni uhur’. (Ps. 37:8) Anggo idalankon hita podah-Ni ai, marguna do ai hubanta. (Pod. 14:30) Anggo lalab hita manggila bani sasahalak boi do ai mambahen hita gabe boritan. Dos songon manginum racun do ai na parohkon mara hubanta. Tapi  anggo isasap hita hasalahan ni halak hita do na maruntung. (Pod. 11:17) Gabe damei ma uhur ampa pingkiranta, janah boi ma hita torus mangidangi Jahowa.

11. Aha ma na ihatahon Bibel pasal balas dendam? (Rom 12:19-21)

¹¹ Hak ni Jahowa do mambalaskon. Sanggah adong na marsalah hubanta, lang ibere Jahowa hak banta laho manguhumi halak ai. (Basa Rom 12:19-21.) Halani lang gokan dear, tontu lang boi dear caranta pasaloseihon parsoalan ai songon na ibahen Naibata. (Heb. 4:13) Anjaha sipata, ra do pitah mangihutkon pangahap hita sanggah laho mambahen haputusan. Bibel mangkatahon, “Seng ihorhon marah ni jolma hapintoron i lobei ni Naibata.” (Jak. 1:20) Halani ai, pos ma uhurta bahenon ni Jahowa do holi na dear anjaha na pintor bani panorang na topat.

12. Sonaha hita patuduhkon pos uhurta bani hapintoron ni Jahowa?

¹² Anggo isasap hita hasalahan ni halak, on patuduhkon pos uhurta pintor do Jahowa ai. Sanggah iondoskon hita parsoalan ai hubani Jahowa, taridah ma pos uhurta sasapon ni Jahowa do holi ganup hasedaon halani dousa. Marjanji do Jahowa i dunia na baru holi, “seng be ingaton [borit ni uhur], barang puho ibagas uhur”. (Jes. 65:17) Tapi sonaha anggo borit tumang uhurta ibahen? Sonaha carani ase lang lalab hita manggila? Pardiateihon ma piga-piga sitiruon humbani hasomanta.

13-14. Parlajaran aha ma na dapot ham humbani pangalaman ni si Tony pakon si José pasal manasap hasalahan?

¹³ Bahat do sanina botounta na domma manalpuhon hasalahan ni halak na legan hassi pe borit tumang uhur ni sidea ibahen. Pasu-pasu aha ma na dapot ni sidea halani ra mangkorjahon ai?

¹⁴ Pardiateihon hita ma pangalaman ni si Tony na tading i Filipina. * Martahun-tahun sanggah lape gabe Saksi Jahowa si Tony, ibunuh si José ma abangni. Sanggah ai halak na kasar do si Tony janah sihol do ia balas dendam. Ujungni itangkap janah ipenjarahon ma si José halani hajahatonni ai. Tapi marjanji do si Tony  bunuhonni do holi pamunuh abangni ai. Halani ai iboli ia ma sinjata. I pudian ni ari marlajar Bibel ma si Tony pakon Saksi Jahowa. Ihatahon ia ma, “Dob marlajar Bibel ahu, hubotoh ma maningon huubah do cara marpingkirhu ampa parlahouku. Janah, lang boi be ahu mardomdom. Ujungni ididi ma si Tony janah gabe sintua ma ia. Bayangkon ma sonaha malas ni uhur ni si Tony dob mambotoh hape si José pe domma gabe Saksi Jahowa. Sanggah pajumpah, marsidahopan ma sidea. Ipatugah si Tony ma hubani si José anggo ia domma manalpuhon hasalahanni. Ihatahon si Tony ma malas tumang uhurni halani ra ia manasap hasalahan. Tongon, ipasu-pasu Jahowa do si Tony halani ra ia manalpuhon hasalahan ni halak humbani borsih ni uhurni.

15-16. Parlajaran aha ma na dapot ham humbani pangalaman ni si Peter pakon si Sue pasal manalpuhon hasalahan?

¹⁵ Bani tahun 1985, sanggah martumpu si Peter pakon si Sue i Balei Harajaon, sompong ma meledak bom. Hape dong sada dalahi na domma mananom bom ijai. * Gabe maseda ma panonggor ampa pambogei ni si Sue, janah lang boi be ia manganggoh. Dob martahun-tahun, itangkap ma parjahat ai janah ipenjarahon ma ia seumur hidup. Sanggah isungkun ai boi do isalpuhon sidea hasalahan ni dalahi ai? Ihatahon sidea ma, “Iajari Jahowa do hita anggo torus hita manggila janah mardomdom, hita do na gabe boritan. Janah, gabe lang damei pangahapta halani ai. Jadi ipindo hanami do bani Jahowa ase iurupi hanami manasap hasalahanni ai janah lang be mardomdom.”

¹⁶ Ai urah do iahap sidea manalpuhon hasalahan ni parjahat ai? Sipata lang. Ihatahon sidea use, “Sanggah susah si Sue halani naboritni ai, gabe tubuh ma use ringisnami. Tapi lang lalab ai na ipingkiri hanami. Sasintongni porini gabe Saksi Jahowa parjahat ai, malas do uhurnami mangalo-alo ia. Humbani pangalaman on  ibotoh hanami do anggo idalankon hita prinsip ni Bibel, gabe damei ma pangahapta. Janah tarapoh do homa uhurta halani mambotoh lang piga dokah nari, isalpuhon Jahowa do ganup hasusahanta on.”

17. Parlajaran aha ma na dapot ham humbani pangalaman ni si Mira pasal manalpuhon hasalahan?

¹⁷ Sonari idah hita ma use pangalaman na legan. Sanggah si Mira marlajar Bibel, domma marhajabuan ia janah domma adong dua anakni etek-etek ope. Tapi lang ra suamini marlajar Bibel. Dob ai, selingkuh ma suamini janah itadingkon ma si Mira ampa niombahni. Ihatahon si Mira ma, “Pojam tumang pangahapku sanggah itadingkon ia hanami. Lang porsaya ahu masa on. Pusok tumang uhurhu, manosali diri, mansalahkon diri sandiri, janah manggila.” Totap do sonai pangahap ni si Mira age pe domma marsirang sidea. Nini si Mira use, “Sonai ma pangahapku sadokah marbulan-bulan. Janah husadari ma, adong do pangaruhni ai hubani parhasomananku pakon Jahowa ampa sanina botou.” Sonari lang be marah si Mira janah lang sihol uhurni adong masa na lang dear hubani mantan suamini ai. Mangarap do si Mira bani sada ari ra mantan suamini ai mananda Jahowa. Hasilni gabe bahat ma panorang ni si Mira manrimangi janji ni Jahowa pasal ari si magira. Marusaha do ia pabanggalhon dua niombahni ase gabe sisombah Jahowa. Sonari malas tumang uhur ni si Mira boi mangidangi Jahowa rap pakon anakni ampa kaluarga ni sidea.

18. Halani Jahowa Hakim na Sitimbulan, aha do na pasti bahenon-Ni?

¹⁸ Gabe damei do uhurta dob mambotoh lang ibere Jahowa hubanta tanggung jawab laho mamutuskon sonaha sasahalak iadili. (Rom 14:10-12) Halani Jahowa do Hakim na Sitimbulan, Ia do na marhak manontuhon ai. Jadi, pos ma uhurta tongtong do adil panguhuman ni Jahowa halani Ia do na mambotoh ija na sintong ija na salah. (1 Mus. 18:25; 1 Raj. 8:32) Lang mungkin bahenon-Ni na lang adil!

19. Aha ma na laho ipaima-ima hita?

¹⁹ Sai tarpaima-ima do hita sanggah Jahowa manasap ganup sitaronon halani dousa. Bani panorang ai malum ma ganup naboritta. Lang be iahapkon hita pusok ni uhur. (Ps. 72:12-14; Pangk. 21:3, 4) Janah seng be dingaton ganupan ai. Tapi sambil paimahon ai, malas tumang uhurta halani boi maniru Jahowa laho manalpuhon hasalahan ni halak.