1. (a) Pangarapan aha do na ibere Jahowa hubanta? (b) Aha do artini “parhanalom ma Jahowa”? (Tonggor ma “Hatorangan Istilah”.)

 IBERE Jahowa do pangarapan na jenges tumang bani ganup halak na mangkaholongi-Si. Lang piga dokah nari sasapon-Ni do panahit, sitaronon, ampa hamatean. (Pangk. 21:3, 4) Holi urupan-Ni do ganup halak “na lamlam maruhur”, na marpangarapan hu Bani laho mambahen tanoh on gabe paradeiso. (Ps. 37:9-11) Anjaha urupan-Ni do ganup halak ase lambin orot hu Bani. Tongon, pangarapan na luar biasa tumang do on! Tapi, mase porsaya hita pasaudon ni Naibata do holi janji-Ni ai? Halani tongtong do ipasaud Jahowa janji-Ni. Dong do alasan mase boi hita ‘marnalom ni uhur bani Jahowa’. * (Ps. 27:14) Ipatuduh hita ma ai marhitei sabar janah marmalas ni uhur paimahon Jahowa pasaudkon janji-Ni.​—Jes. 55:10, 11.

2. Janji na ija do na domma ipasaud Jahowa?

² Bahat do bukti na patuduhkon anggo Jahowa tongtong pasaudkon janji-Ni. Umpamani, bani buku Pangungkabon marjanji do Jahowa bani panorangta bahenon-Ni do ganup halak humbani marbagei bangsa, suku, ampa bahasa marsada laho manombah-Si. Saud do ai sonari on! Itanda do kalompok ai “humpulan na banggal”. (Pangk. 7:9, 10) Age pe ibagas kalompok ai adong dalahi, naboru, ampa dakdanak na roh humbani marbagei bahasa janah legan homa hasomalanni, tapi songon sada kaluarga do sidea. (Ps. 133:1; Joh. 10:16) Ringgas do sidea marbarita anjaha sirsir do sidea patugahkon pangarapan na dob ibere Jahowa  hubani ise pe na ra manangar. (Mat. 28:19, 20; Pangk. 14:6, 7; 22:17) Anggo dihut ham ibagas humpulan na banggal ai, tontu maharga tumang do pangarapan pasal ari simagira bamu.

3. Aha do harosuh ni Sibolis?

³ Tapi sihol do Sibolis ase lang porsaya hita bani janji ni Naibata. Marusaha do ia mambahen ase hita marpingkir lang parduli Jahowa hubanta janah lang ra Ia pasaudkon janji-Ni. Anggo marhasil Sibolis mambahen hita lang be marpangarapan bani Jahowa, gabe mabiar ma hita janah lang ra be hita mangidangi Ia. Ai ma na ibahen Sibolis hubani si Job. Marusaha do ia mambahen ase si Job lang be martenger ni uhur bani Jahowa janah lang be manombah-Si.

4. Aha ma na laho iulas hita bani artikel on? (Job 1:9-12)

⁴ Bani artikel on, holi iulas hita ma sonaha Sibolis marusaha mambahen si Job lang setia bani Jahowa. (Basa Job 1:9-12.) Iulas hita homa aha ma na boi iparlajari hita humbani siusihan na ibahen si Job janah mase maningon porsaya hita holong do uhur ni Jahowa hubanta anjaha pasaudon-Ni do holi ganup janji-Ni.

5-6. Aha do na masa bani si Job?

⁵ Sonang do goluh ni si Job. Orot parhasomananni pakon Jahowa, martuah kaluargani, janah bayak homa ia. (Job 1:1-5) Tapi pitah ibagas sada ari, magou do ganupan ai. Mungkahni, bois do ganup artani. (Job 1:13-17) Dob ai, matei ganup niombahni. Pingkirhon ma on: pitah sada pe matei niombah, domma pusok tumang uhur ni namatorasni. Tarlobih ma si Job pakon istrini. Tontu tarsonggot anjaha marosak tumang ma uhur ni sidea dob mambotoh domma matei niombahni na sapuluh ai. Patut ma irigat si Job hiouni halani madotei atei-ateini!​—Job 1:18-20.

⁶ Dob ai, ibahen Sibolis ma ia hona panahit na parah. (Job 2:6-8; 7:5) Sanggah lape boritan, ipasangap halak na i hutani do si Job. Janah bahat do halak na mangindo podah hun bani. (Job 29:7, 8, 21) Tapi dob boritan ia, mandaoh ma ganup halak hun bani. Kaluargani, hasoman-hasomanni, gari jabolonni pe mandaoh do hun bani!​—Job 19:13, 14, 16.

7. (a) Nini uhur ni si Job mase ma ia marsitaronon, tapi aha ma na lang ibahen ia? (b) Sonaha sitaronon ni halak Kristen sonari on sarupa pakon na ipatuduh bani gambar?

⁷ Marusaha do Sibolis mambahen si Job marpingkir halani manggila do Jahowa hu bani ase marsitaronon ia. Umpamani, ibahen Sibolis ma marumbak rumah ni anakni marhitei halisungsung sanggah rap mangan ganup anak ni si Job ijai. Gabe matei ma sidea ganupan. (Job 1:18, 19) Ibahen ia do homa apuy roh hun langit mamboiskon biri-biri ampa jabolon ni si Job. (Job 1:16) Halani halisungsung pakon apuy ai roh hun langit, tontu iagan si Job ma ai roh humbani Jahowa. Halani ai, iagan ia ma domma borit uhur ni Jahowa ibahenni. Hassi pe sonai, lang ra ia mamurai Jahowa. Idingat ia do anggo sadokah on domma bahat pasu-pasu ni Jahowa na ijalo ia. Jadi nini uhurni ma anggo sadokah on malas uhurni manjalo na matobu, maningon malas do homa uhurni manjalo na mapaet. Halani ai, ihatahon ia ma, “Pinuji ma goran ni Jahowa.” (Job 1:20, 21; 2:10) Jadi, age pe domma bois artani, matei ganup niombahni, janah boritan homa ia, totap do si  Job setia bani Jahowa. Hassi pe sonai lang menyerah Sibolis.

8. Aha ma use na ibahen Sibolis hubani si Job?

⁸ Marhitei tolu hasomanni, ibahen Sibolis ma ase si Job marpingkir lang maharga dirini. Ihatahon sidea ma halani hajahatonni do ase marsitaronon si Job. (Job 22:5-9) Marusaha do sidea mambahen ase si Job marpingkir age pe domma bahat na dear na ibahenni, lang adong gunani ai i lobei ni Naibata. (Job 4:18; 22:2, 3; 25:4) Marusaha do homa sidea mambahen ase si Job marpingkir lang holong uhur ni Naibata mangidahsi, lang parduli Ia hu bani, anjaha soya-soya do ia manombah Naibata. Anggo porsaya si Job bani hata ni sidea ai, boi do ai mambahen ia gabe mandolei.

9. Mase boi si Job totap barani janah toguh haporsayaonni?

⁹ Bayangkon ma situasini. Hundul ma si Job i abuan janah pusok ope uhurni. (Job 2:8) Songon batu na banggal do borat ni sitarononni anjaha pusok tumang uhurni halani matei ganup niombahni. Halani ai, sip dassa ia. (Job 2:13–3:1) Jadi, ihatahon hasomanni ai ma anggo si Job sedo halak na bujur janah lang adong na madear na ibahen ia. Sanggah na sip si Job ai, iagan sidea ma domma itadingkon ia Naibatani. Hape lepak tumang sidea. Ujungni marsahap ma si Job. Ra do sanggah ai ipadirgak ia uluni, inonoi sidea, lanjar ihatahon ma, “Ronsi matei ahu, totap do ahu setia bani Naibata!” (Job 27:5, Kitab Suci Terjemahan Dunia Baru) Mase boi si Job totap barani janah toguh haporsayaonni age pe domma borat sitarononni? Age pe maretek ni uhur ia, totap do porsaya si Job holong tumang do uhur ni Jahowa hu bani, janah marujung do holi ibahen Naibata sitarononni ai. Pos do uhurni gari matei pe ia ipapuho Jahowa do holi ia.—Job 14:13-15.

10. Aha ma na boi iparlajari hita humbani sarita pasal si Job?

¹⁰ Humbani sarita pasal si Job ibotoh hita ma lang boi ibahen Sibolis hita manadingkon Jahowa anjaha ibotoh Jahowa do aha pe na masa hubanta. Humbani pangalaman ni si Job ibotoh hita do homa mase hita marsitaronon. Sonari ulas hita ma sonaha hita boi maniru si Job.

11. Aha ma hasilni anggo martenger ni uhur hita hubani Jahowa? (Jakobus 4:7)

¹¹ Humbani pangalaman ni si Job ibotoh hita ma anggo martenger ni uhur hita bani Jahowa, gabe boi ma hita martahan ibagas sitarononta janah boi ma ilawan hita Sibolis. Aha ma hasilni? Bibel mangkatahon gabe lintun ma Sibolis hun banta.​—Basa Jakobus 4:7.

12. Sonaha pangarapan pasal parpuhoon boi patoguhkon uhur ni si Job?

¹² Maningon porsaya do hita bani janji ni Naibata pasal parpuhoon. Songon na ipatugah bani artikel na salpu, marusaha do Sibolis mambahen hita manadingkon Jahowa halani biar bani hamatean. Hinan ihatahon Sibolis do anggo si Job ra mangkorjahon aha pe, tarmasuk manadingkon Jahowa, asal ma totap manggoluh ia. Tapi, salah do Sibolis ai. Age pe nini uhur ni si Job laho matei mando ia, totap do ia setia bani Jahowa. Porsaya do ia bujur tumang do Jahowa ai janah iurupi do ia ase boi totap martahan. Age pe lang iurupi Jahowa ia sadokah goluhni, tapi porsaya do si Job anggo matei ipapuho do holi ia. Toguh tumang do haporsayaon ni si Job bani janji ni Jahowa pasal parpuhoon. Hita pe, anggo porsaya hita pasal ai, lang adong na boi mambahen hita manadingkon Jahowa tarmasuk biar bani hamatean.

13. Aha do na boi iparlajari hita humbani na ibahen Sibolis bani si Job hinan?

¹³ Sarupa do akal-akal na ibahen Sibolis hubanta sonari on pakon na ibahenni bani si Job hinan. Pardiateihon ma na ihatahon Sibolis, “Sagala na dong bani jolma in [lang pitah si Job] ra do ia mambere gantih ni hosahni.” (Job 2:4, 5) Hunjon taridah ma Sibolis mangkatahon anggo hita lang tongon-tongon mangkaholongi Jahowa. Anggo tarancam goluhta, mintor itadingkon hita do Ia. Ihatahon Sibolis do homa anggo Naibata lang mangkaholongi hita. Anjaha aha pe na ibahen hita laho pamalaskon uhur-Ni, lang idingat Naibata ai. Halani domma ibotoh hita akal-akal ni Sibolis, tontu lang porsaya hita bani hatani ai.

14. Sanggah marsitaronon hita, sonaha ai boi mangurupi hita laho mamareksa diri? Bahen ma limbaga.

¹⁴ Sanggah ibagas parlajouan, anggap hita ma ai kesempatan laho mamareksa diri? Sanggah marsitaronon si Job, gabe iurupi ma ia laho mambotoh hagalekonni. Umpamani, gabe ibotoh ia ma porlu do hape ia lambin martoruh ni uhur. (Job 42:3) Sonai homa hita, sanggah ibagas parlajouan, bahat do na boi iparlajari hita. Ai ma na iahapkon hasomanta na margoran si Nikolas, * na ipenjarahon age pe borit-boritan ia. Ia mangkatahon, “Sanggah ibagas penjara ahu, usih songon na i-rontgen do huahap. Gabe hubotoh ma sifat-sifat na porlu hupadear.” Anggo domma ibotoh hita hahuranganta, maningon marusaha ma hita laho padearhon ai.

15. Ise do na maningon itangihon hita, janah mase?

 ¹⁵ Jahowa do na maningon itangihon hita, sedo munsuh-munsuhta. Sanggah marsahap Jahowa hubani si Job, dear do ipardiateihon ia ai. Ibalosi Naibata ma si Job. Hira-hira sonon ma na ihatahon, ‘Ai ididah ho do tompaan-Ku na mambahen longang uhur? Hubotoh do ganup na masa bam. Ai iagan ho do lang parduli ahu bam?’ Ihargai si Job do ganup habujuran ni Jahowa anjaha humbani toruh ni uhur ibalosi ia ma, “Domma namin hubogei barita pasal Ham, tapi anggo sonari matangku sandiri ma mangidah Ham.” (Job 42:5) Sanggah mangkatahon ai hundul ope si Job i abuan, parah naboritni, janah marpusok ni uhur ia halani matei ganup niombahni. Age pe sonai, ipapos Jahowa do uhurni anggo ia mangkaholongi si Job janah marosuh uhur-Ni bani.​—Job 42:7, 8.

16. Domu bani Jesaya 49:15, 16, aha ma na maningon idingat hita sanggah ibagas parlajouan?

¹⁶ Sonari, bahat do homa halak na mangejek hita janah marusaha mambahen ase hita maretek ni uhur. Marusaha do sidea pabajan-bajankon hita atap organisasinta. (Mat. 5:11) Humbani pangalaman ni si Job, gabe ibotoh hita ma porsaya do Jahowa anggo hita boi totap setia sanggah ibagas parlajouan. Holong do uhur-Ni hubanta janah lang ongga itadingkon Ia halak na martenger ni uhur hu Bani. (Basa Jesaya 49:15, 16.) Halani ai, ulang ma tangihon hita na ihatahon  munsuh-munsuh ni Naibata! Ai ma na ibahen si James, hasomanta hun Turki. Bahat tumang do sitaronon ni kaluargani. Ia mangkatahon, “Ibotoh hanami do anggo porsaya hanami bani ladung na ihatahon halak pasal juakjuak ni Naibata, gabe maretek ni uhur ma hanami. Halani ai, sai idingat hanami do pasu-pasu na laho ibere Naibata marhitei Harajaon-Ni janah totap ringgas mangidangi-Si. Ai ma na mambahen hanami totap marmalas ni uhur.” Songon si Job, tangihon hita ma Jahowa. Anggo sonai ibahen hita, lambin toguh ma pangarapanta.

17. Aha ma na boi iparlajari ham humbani dalahi pakon naboru na setia na ipatugah bani Heber bindu 11?

¹⁷ Lang pitah si Job juakjuak ni Jahowa na totap barani janah setia sanggah ibagas parlajouan. Bahat nari ope na sisonai na ipatugah Apostel Paulus bani buku Heber. Isobut do sidea ganupan “songon hombun buei ni saksi”. (Heb. 12:1) Hassi pe bahat sitarononni, tapi totap do sidea setia bani Jahowa. (Heb. 11:36-40) Ai soya-soya do hatengeran ni uhur ni sidea ai? Lang! Age pe sadokah goluhni lape iahapkon sidea parsaudni janji ni Naibata, tapi sai mangarap do sidea hubani Jahowa. Anjaha halani domma ibahen sidea malas uhur ni Jahowa, pos do uhur ni sidea bani ari simagira boi do ididah sidea sonaha Jahowa pasaudkon janji-Ni ai. (Heb. 11:4, 5) Siusihan na ibahen sidea boi mangurupi hita ase tongtong mangarap bani Jahowa.

18. Aha ma na laho ibahen hita? (Heber 11:6)

¹⁸ Lambin jahat do dunia on sonari. (2 Tim. 3:13) Tongtong do marusaha Sibolis manlajou juakjuak ni Naibata. Lang soal sonaha pe tantangan na laho roh, maningon pongkut ma hita marhorja bani Jahowa, halani sai ‘mangarap do hita bani Naibata na manggoluh in’. (1 Tim. 4:10) Dingat ma, pasu-pasu na ibere Naibata bani si Job mambuktihon “parontou ni uhur banggal do [Jahowa] in anjaha paridop ni uhur”. (Jak. 5:11) Tongtong ma hita setia bani Jahowa. Pos ma uhurta bereon-Ni do upah “bani na mangindahi-Si”.​—Basa Heber 11:6.