1. Aha do na ihatahon Raja Salomo bani Parambilan 7:20?

 RAJA SALOMO mangkatahon, “Seng dong halak parpintor i tanoh on, sihorjahon na madear tumang, anjaha na so ongga mardousa.” (Par. 7:20) Sintong do ai! Ganup do hita mardousa. (1 Joh. 1:8) Halani ai ganup do hita porlu mandapot hasasapan ni dousa humbani Naibata ampa humbani halak na legan.

2. Sonaha ma pangahapmu anggo ra hasoman manalpuhon hasalahanmu?

² Ra, ongga do ham mambahen borit uhur ni hasomanmu. Halani sihol mardear use, tontu mangindo maaf ma ham hu bani. Sonaha ma pangahapmu anggo ra ia mamaafkon hasalahanmu ai? Tontu malas do uhurmu!

3. Aha do na laho iulas hita bani artikel on?

³ Sihol do uhurta marhasoman orot pakon Jahowa. Tapi sipata, ra do parsahap ampa pambahenanta mambahen borit uhur-Ni. Bani artikel on, holi iulas hita ma mase pos uhurta marpangulaki do uhur ni Jahowa janah sirsir do Ia manasap dousanta. Dob ai, iulas hita homa sanggah Jahowa manasap dousa ni sasahalak, legan do ai pakon sanggah hita manalpuhon hasalahan ni halak. Anjaha iulas hita homa sonaha ase boi isasap Naibata hasalahan ni sasahalak.

4. Mase pos uhurta sirsir do Jahowa manasap dousa?

⁴ Ipatugah do bani Bibel anggo Jahowa sirsir manasap dousa. Sanggah marsahapi Ia pakon si Musa marhitei sada malekat, ihatahon Ia do, “Jahowa, Jahowa do Naibata pardear layak anjaha paridop ni uhur, nanget marringis,  anjaha gok holong ni uhur-Ni pakon habonaran-Ni, na pahotkon holong ni uhur-Ni hubani halak marribu-ribu, anjaha na manasap hajahaton, panlanggaron, pakon dousa.” (2 Mus. 34:6, 7) Naibata na bujur anjaha paridop ni uhur do Jahowa ai, janah sirsir do Ia manasap dousa ni halak na tongon-tongon mambahen hamubahon.​—Neh. 9:17; Ps. 86:15.

5. Aha ma na ibahen Jahowa halani mananda ganup jolma? (Psalmen 103:13, 14)

⁵ Halani Jahowa na manompa hita, tangkas do itanda Ia hita. Humbani tubuh, domma ibotoh Ia ganup hagalekonta. (Ps. 139:15-17) Ibotoh Ia do homa aha na masa ibagas goluhta. Halani ai, iarusi Ia do sifat-sifatta. Janah na mambahen longang tumang uhurta, itanda Ia do ganup halak na i tanoh on anjaha ibotoh Ia do ganup pasal sidea. Halani ai, gabe maidop ma uhur-Ni hubanta.​—Ps. 78:39; basa Psalmen 103:13, 14.

6. Sonaha Jahowa patuduhkon anggo Ia sirsir manasap dousanta?

⁶ Ipatuduh Jahowa do anggo Ia sirsir manasap dousanta. Ia mangarusi halani pambahenan ni si Adam, gabe mardousa ma ganup jolma janah matei. (Rom 5:12) Lang adong jolma na boi manobus dirini pakon hasomanni humbani dousa ampa hamatean. (Ps. 49:8-10) Tapi halani maidop uhur-Ni, ibahen Jahowa ma sonaha ase ipaluah hita. Aha ma na ibahen Ia? Songon na ipatugah bani Johannes 3:16, ibere Ia do Anak-Ni na sasada in matei laho mangkopkop hita. (Mat. 20:28; Rom 5:19) Janah ra do Jesus matei manggantihon hita ase ganup halak na porsaya bani boi mandapot haluahon. (Heb. 2:9) Pusok tumang uhur ni Jahowa mangidah parmatei ni Anak-Ni ai. Tontu lang ipaturut Ia matei Anak-Ni ai anggo lang sihol uhur-Ni manasap dousanta.

7. Ise ma contoh ibagas Bibel na ongga isalpuhon Jahowa dousani?

⁷ Bani Bibel bahat do contoh-contoh pasal halak na isalpuhon Jahowa hasalahanni. (Ep. 4:32) Ise ma na idingat nasiam? Idingat nasiam do ra Raja Manasse. Buei tumang do hajahaton na ibahen ia. Isombah ia do gana-gana, janah iarahkon ia do homa halak na legan  mangkorjahon na sisonai. Itutung ia do homa anakni bahen galangan hubani gana-gana. Ipajongjong ia do use gana-gana batu ni naibata na legan i rumah panumbahan. Bibel mangkatahon, “Buei tumang do ihorjahon sogam ni uhur ni Jahowa laho mamuhoi ringis-Ni.” (2 Kron. 33:2-7) Tapi, sanggah tongon-tongon si Manasse mambahen hamubahon, isalpuhon Jahowa do dousani ai. Janah ibahen do use ia gabe raja. (2 Kron. 33:12, 13) Ra do homa idingat nasiam Raja Daud. Marbangkis do ia janah ibunuh ia do halak na lang marsalah. Tapi sanggah iakui si Daud dousani ai janah tongon-tongon ia mambahen hamubahon, isalpuhon Jahowa do homa dousani. (2 Sam. 12:9, 10, 13, 14) Tangkas ma marpangulaki do uhur ni Jahowa janah sirsir do Ia manasap dousanta. Anjaha songon na laho iulas hita, sanggah Jahowa manalpuhon hasalahan ni sasahalak, legan do ai pakon hita na manalpuhon hasalahan ni halak na legan.

8. Aha do na mambahen Jahowa gabe Hakim na sidearan?

⁸ Jahowa do “Panguhum [atap, Hakim] siuhumi ganup dunia on”. (1 Mus. 18:25) Sahalak hakim porlu mambotoh hukum. Tangkas do ibotoh Jahowa hukum halani sobali Hakim, Sibere Titah do homa Ia. (Jes. 33:22) Pitah Jahowa do na boi manontuhon na ija na sintong ampa na lepak. Aha ope na porlu ibotoh sahalak hakim? Maningon ibotoh ia do hasintongan ni ganup parkara paima mambahen haputusan. Jadi, Jahowa do Hakim na sidearan halani ibotoh Ia do haganup.

9. Aha do na domma ibotoh Jahowa paima Ia manalpuhon hasalahan ni sasahalak?

⁹ Lang songon hakim i dunia on, ibotoh Jahowa do hasintongan ni ganup parkara. (1 Mus. 18:20, 21; Ps. 90:8) Lang pitah na ididah pakon na itangar boi ibotoh Ia. Ibotoh Ia do sonaha pangahap ni sasahalak, sifat-sifat na itiru humbani namatorasni, latar belakang pendidikan, lingkungan, ampa kesehatan mentalni. Ibotoh Jahowa do homa na ibagas uhur ni jolma. Jadi, tangkas do ibotoh Ia alasan pambahenan ni sasahalak. Lang adong na ponop i lobei-Ni. (Heb. 4:13) Halani ai, sanggah isalpuhon Jahowa hasalahan ni sasahalak, tontu halani domma ibotoh Ia ganup hasintonganni.

10. Mase boi ihatahon Jahowa ai Hakim na adil? (5 Musa 32:4)

¹⁰ Hakim na adil do Jahowa ai. Lang sididah bohi Ia. Sanggah isalpuhon Ia hasalahan ni sasahalak, sedo halani mangidah rupani, habayakonni, jabatanni, atap hapandeianni. (1 Sam. 16:7; Jak. 2:1-4) Lang ra Ia manjalo suap. (2 Kron. 19:7) Janah lang mangihutkon pangahap-Ni Ia sanggah mambahen haputusan. (2 Mus. 34:7) Tangkas ma Jahowa do Hakim na sidearan halani ibotoh Ia do ganup pasal hita ampa situasinta.​—Basa 5 Musa 32:4.

11. Hunja ibotoh hita legan do cara ni Jahowa manalpuhon hasalahan pakon cara ni jolma?

¹¹ Piga-piga panurat ni Kitab-Kitab Ibrani manggunahon sada kata Ibrani laho manggambarhon sonaha Jahowa manalpuhon hasalahan ni sasahalak. Janah legan do on pakon jolma na manalpuhon hasalahan ni hasomanni. Sada referensi patorangkon anggo “kata ai igunahon pitah laho patorangkon cara ni Naibata manalpuhon hasalahan ni pardousa. Lang ongga igunahon kata ai hubani  jolma na manalpuhon hasalahan ni hasomanni”. Jadi, pitah Jahowa do na tongon-tongon manasap dousa ni halak na ra mambahen hamubahon. Sonaha ma pangahapta dob mambotoh ai?

12-13. (a) Sonaha pangahap ni sasahalak na isasap Jahowa dousani? (b) Sonaha Jahowa patuduhkon idop ni uhur sanggah manalpuhon hasalahan ni sasahalak?

¹² Sanggah isasap Jahowa dousanta, gabe ‘malas ma uhurta’, damei pingkiran, janah borsih panggora ni uhurta. Pitah ‘humbani Jahowa’ do adong hasasapan ni dousa sisonai. (Lah. 3:19, 20) Sanggah isasap Jahowa dousanta, gabe dear ma use parhasomananta pakon-Si janah songon na lang ongga ihorjahon hita dousa ai.

¹³ Dobkonsi isasap Jahowa dousanta, lang be ipadingat-dingat Ia ai, atap uhumon-Ni hita halani hasalahan ai. (Jes. 43:25; Jer. 31:34) Ipadaoh Jahowa do dousanta ai “songon daoh ni hapoltakan humbani hasundutan”. * (Ps. 103:12) Anggo irimangi hita banggal idop ni uhur ni Naibata sanggah manalpuhon hasalahanta, tontu martarima kasih tumang do hita hu Bani. (Ps. 130:4) Tapi sonaha ase boi isasap Naibata hasalahan ni sasahalak?

14. Aha do na domma iparlajari hita pasal hasasapan ni dousa humbani Jahowa?

¹⁴ Songon na dob iulas hita, sanggah Jahowa manalpuhon hasalahan ni sasahalak, sedo halani banggal atap etek dousani ai. Leganni ai, domma ibotoh hita Jahowa do Sitompa, Sibere Titah, ampa Hakim, anjaha ibotoh Ia do ganupan. Marguna tumang do ai hu Bani sanggah laho manalpuhon hasalahan ni sasahalak. Tapi aha deba na ipardiateihon Jahowa paima mamutuskon manalpuhon hasalahan ni sasahalak atap lang?

15. Domu bani Lukas 12:47, 48, aha do na ipertimbangkon Jahowa paima manalpuhon hasalahan ni sasahalak?

¹⁵ Paima manasap dousa ni sasahalak, ipertimbangkon Jahowa ma ibotoh halak ai do domma lepak pambahenanni atap lang. Ai ma na ipatuduh Jesus humbani na ihatahon ia bani Lukas 12:47, 48. (Basa.) Jadi anggo adong na sangaja  mangkorjahon na jahat hassi pe domma ibotoh ia lang marosuh Jahowa, dousa serius do ai. Ra do lang isasap Jahowa hasalahanni ai. (Mrk. 3:29; Joh. 9:41) Tapi sipata, ra do ihorjahon hita na lepak hassi pe domma ibotoh hita lang marosuh Jahowa mangidah ai. Anggo sonai situasini, boi do isasap dousanta ai? Boi, halani adong ope na legan na ipardiateihon Jahowa.

16. Aha do artini mambahen hamubahon, janah mase maningon ibahen hita hamubahon?

¹⁶ Na legan na ipardiateihon Jahowa ai ma: tongon-tongon do na mardousa ai mambahen hamubahon atap lang. Aha do artini mambahen hamubahon? On artini “paubahkon pingkiran, parlahou, atap tujuan ni sasahalak”. Tarmasuk ma ai manolsoli pambahenanni na lepak janah pusok uhurni halani domma mangkorjahon ai. Atap pusok uhurni halani lang ihorjahon ia na sintong. Pusok do homa uhurni halani domma ipaturut ia maseda parhasomananni pakon Jahowa, gabe ibahen ia na salah. Dingat ma, hinan ihorjahon Raja Manasse pakon Raja Daud do dousa na serius. Tapi ra do Jahowa manasap dousa ni sidea halani tongon-tongon sidea mambahen hamubahon. (1 Raj. 14:8) Jadi ra do homa Jahowa manasap dousanta anggo ididah Ia hita mambahen hamubahon. Anjaha lang sungkup pitah marpusok ni uhur hita halani pambahenanta na salah ai. Maningon adong ope na porlu ibahen hita janah ai do homa na ipardiateihon Jahowa. *

17. Aha do artini marubah, janah mase ponting ai? (Jesaya 55:7)

¹⁷ Leganni ai, na ipardiateihon Jahowa ai ma: parubahan na ibahen sasahalak. Marubah artini “marbalik”. Jadi, maningon itadingkon sasahalak do parlahouni na sambor janah marusaha marparlahou domu bani harosuh ni Jahowa. (Basa Jesaya 55:7.) Maningon iubah ia do cara marpingkirni ase boi ia mangihutkon cara marpingkir ni Jahowa.  (Rom 12:2; Ep. 4:23) Maningon tongtong ma ia marusaha manadingkon parlahou ampa pingkiran na sambor. (Kol. 3:7-10) Tapi na sipontingan maningon porsaya do ia bani tobusan ni Jesus, halani ai do dasar bani Jahowa laho manalpuhon hasalahanta janah paborsihkon hita humbani dousa. Anggo ididah Ia marusaha hita mambahen parubahan ibagas parlahou, gabe isasap Ia ma dousanta.​—1 Joh. 1:7.

18. Aha do na domma iulas hita?

¹⁸ Sonari dingat hita ma use aha na domma iulas hita. Banggal tumang do idop ni uhur ni Jahowa ai, janah pitah Ia do na boi tongon-tongon manalpuhon hasalahan. Mase ihatahon hita sonai? Na parlobei, sirsir do Ia manasap dousa. Na paduahon, tangkas do itanda Ia hita. Halani ai, boi do ibotoh Ia na tongon-tongon do hita mambahen hamubahon atap lang. Anjaha na patoluhon, sanggah isasap Jahowa dousanta lang be idingat-dingat Ia ai, songon na lang ongga ihorjahon hita hasalahan ai. Halani ai gabe borsih ma panggora ni uhurta janah boi ma use hita marhasoman orot pakon-Si.

19. Mase hita boi marmalas ni uhur hassi pe lape gokan dear janah tongtong mambahen hasalahan?

¹⁹ Tontu sai adong do hasalahan na ibahen hita halani lape gokan dear hita. Hassi pe sonai, gabe ipatoguh janah tarapoh do uhurta halani mambotoh paridop ni uhur do Jahowa ai. Iarusi Ia do homa hagalekon ni juakjuak-Ni. Halani ai, lang porlu lalab marpusok ni uhur hita halani hagalekonta. (Ps. 103:8-14; 130:3) Anggo marusaha hita mangkorjahon harosuh ni Jahowa, gabe marmalas ni uhur ma hita.​—Pil. 4:4-6; 1Joh. 3:19-22; tonggor ma Pemahaman Alkitab, Jilid 2, alaman 1055.

20. Aha ma na laho iulas hita bani artikel na mangihut?

²⁰ Martarima kasih tumang do hita halani sirsir do Jahowa manasap dousanta anggo tongon-tongon hita mambahen hamubahon. Tapi sonaha hita boi maniru Jahowa? Sanggah isalpuhon hita hasalahan ni hasoman, sonaha ai dos pakon cara ni Jahowa, tapi aha ma parlegananni? Mase maningon iarusi hita pasal ai? Ulas hita ma balosni ai bani artikel na mangihut.