ISARITAHON si Lisa do aha na mambahen ia marosuh marlajar Bibel. * Nini do, “Lang tarlupahon ahu habujuran ni sanina botou.” Sonai do homa na iahapkon si Anna. Ihatahon ia, “Mungkahni na mambahen ahu tartarik marlajar Bibel halani huidah bujur do Saksi Jahowa ai, sedo halani sihol ahu mambotoh isi ni Bibel.” Jadi banggal tumang do pengaruhni habujuran ai. Sonari haduasi botou ai marosuh tumang marlajar Bibel ampa manrimangi isini.

Sonaha hita boi patuduhkon habujuron bani halak na legan? Dong dua cara na laho iulas hita, ai ma marhitei parsahap ampa pambahenanta. Anjaha iulas hita homa hubani ise do hita maningon bujur.

Bani Podah bindu 31, ihatahon do anggo istri na maruhur, dong ‘podah halamlamon bani dilahni’. (Pod. 31:26) On artini ipingkirhon ia do lobei aha na laho hatahononni ampa sonaha ia mangkatahon ai. Namatoras pe porlu do homa bujur marsahap bani niombahni. Halani, anggo kasar sidea gabe borit ma uhur ni niombahni janah lang ra sidea manangihon namatorasni. Tapi anggo lamlam namatoras mamodahi, gabe ra ma niombah manangihon podah ni namatorasni.

Aha do na boi ibahen hita ase bujur parsahapta? Pardiateihon ma Podah 31:26, “Ibuha do pamanganni ibagas hapentaran.” On artini ipingkirhon hita do lobei aha na laho ihatahon hita janah sonaha ase totap lamlam hita marsahap. Rimangi ma, ‘Anggo huhatahon on, ai gabe dear do holi situasini atap gabe manggila do holi ia?’ (Pod. 15:1) Jadi, paima marsahap dear do anggo ipingkirhon hita sungkun-sungkun ai.

Dong homa podah na mangkatahon, “Sahap ni halak sihampung parsahap songon paniham ni podang do.” (Pod. 12:18) Halani dong do pengaruhni parsahapta bani na legan, tontu marusaha do hita manjaga parsahapta. Lang ra hita mambahen borit uhur ni halak atap pe isorgangi hita sidea. (Ep. 4:31, 32) Lang ra homa hita mambere komentar na lang dear. Tapi marusaha ma hita patoguhkon na legan. Itiru hita do Jahowa na tongtong patoguhkon na legan. Sanggah holsohan si Elias, isuruh Jahowa do malekatni laho mangapoh si Elias. “Lamlam janah nanget” do malekat ai marsahap hu bani. (1 Raj. 19:12,Terjemahan Dunia Baru) Hassi pe sonai, habujuron ai lang pitah ipatuduh hita humbani parsahap, tapi maningon taridah ma homa humbani pambahenanta. Sonaha carani?

Sihol do homa hita maniru habujuron ni Jahowa ibagas pambahenanta. (Ep. 4:32; 5:1, 2) Songon pangalaman ni si Lisa nongkan, gabe sihol ia mambotoh hasintongan halani mangidah bujur do Saksi  Jahowa. Ia mangkatahon, “Sanggah maningon pindah rumah kaluarganami, mintor dong dua pasang suami istri hun kuria na mambuat cuti ase boi mangurupi hanami. Hape lape marlajar Bibel ahu sanggah ai.” Halani mangidah habujuron ni sidea ai ma gabe tarojur si Lisa marlajar Bibel.

Si Anna pe marosuh do marlajar Bibel halani mangidah habujuron ni Saksi Jahowa. Nini do, “Halani mangidah situasi ni dunia on, lang urah ahu porsaya bani halak. Sanggah dong na marbarita hubangku, lang porsaya ahu bani sidea. Nini uhurhu ma, ‘Mase bujur sidea hubangku?’ Tapi totap do sabar janah bujur guru studikku. Halani ai, gabe torus ma ahu marlajar Bibel.”

Humbani pangalaman ni si Lisa pakon si Anna nongkan, ibotoh hita ma anggo bujur hita bani na legan, on boi mambahen sidea sihol mambotoh hasintongan. Anjaha anggo bujur sanina botou bani sidea, on boi mambahen sidea lambin porsaya bani Jahowa ampa organisasi-Ni.

Dong do halak na urah tarsirom janah basar parsahapni halani sonai do hasomalan i kaluargani atap pe i hutani. Jenges do hasomalan sisonai. Tapi lang sungkup anggo hita bujur pitah halani hasomalan dassa. Maningon itiru hita do habujuron ni Jahowa.​—Bandingkon Lahoan 28:2.

Sasintongni habujuron ai tarmasuk do buah ni tonduy. (Gal. 5:22, 23) Jadi ase boi hita patuduhkon habujuron, Maningon iurupi tonduy na pansing do hita. Anggo ibahen hita sonai, on artini itiru hita habujuron ni Jahowa pakon Jesus. Anjaha itiru hita ma Jesus na tongtong parduli bani na legan. Holongta bani Jahowa pakon bani hasoman ma namin na mangojur hita mambahen na bujur bani na legan. Janah ai do na iharosuhkon Jahowa.

Somalni bujur do hita bani halak na itanda hita atap pe bani halak na bujur hubanta. (2 Sam. 2:6) Ra do hita martarima kasih bani sidea. (Kol. 3:15) Tapi sonaha anggo dong halak na lang bujur hubanta, ai porlu do hita bujur hu bani?

Jahowa do contoh na sidearan na patuduhkon habujuron. Janah humbani Bibel ibotoh hita do sonaha Jahowa patuduhkon ai. Bahat do isuratkon ibagas Kitab-Kitab Yunani Kristen ‘banggal do idop ni uhur ni Jahowa’. Mase ihatahon sonai?

Bujur tumang do Jahowa bani ganup manisia. Ibere Ia do aha na ihaporluhon sidea ase boi manggoluh. (Mat. 5:45) Bujur do Jahowa bani ganup jolma hassi pe lape itanda sidea Jahowa. (Ep. 2:4, 5, 8) Umpamani, ibere Ia do Anak-Ni na sasada in gabe tobusan. Ihatahon Apostel Paulus do anggo tobusan ai ibere “domu hubani habayakon ni idop uhur-Ni”. (Ep. 1:7) Hassi pe mardousa hita janah gati mambahen na salah, sai tongtong do iajari Jahowa hita. Songon “udan paris-paris” do pangajarion-Ni. (5 Mus. 32:2) Jadi sasintongni lang boi tarbalas hita pambahenan ni Naibata. Anjaha halani habujuron ni Jahowa do ase dong pangarapanta bani ari simagira.​—Bandingkon 1 Petrus 1:13.

Tontu malas do uhurta halani bujur Jahowa hubanta. Halani ai, sihol do hita maniru habujuron-Ni. Ulang ma hita bujur pitah bani piga-piga halak tapi bani ganup halak ma. (1 Tes. 5:15) Anggo ibahen hita sonai usih ma hita songon api unggun sanggah borgoh ari. Gabe boi ma iapoh hita kaluarganta, hasoman i kuria, hasoman sahorja, hasoman i sikolah, ampa halak na legan.

Rimangi hita ma, ‘Ai dong do kaluarga atap hasoman i kuria na porlu ipatoguh ampa iurupi hita?’ Ra do adong hasoman i kuria na porlu iurupi laho paborsihkon rumahni, alamanni, atap laho marbalanja. Leganni ai, patuduh hita ma homa habujuron bani halak na legan sanggah hita marbarita.

Jadi tiru hita ma habujuron ni Jahowa ibagas ganup parsahap ampa pambahenanta.