SAPARI halak Israel na tading i Tanoh Parpadanan, mamungkah tahun na baru sanggah sidea laho mambajak pakon manuan. Sonari hira-hira bulan September/Oktober ma ai.

Tahun na ietong marhitei parputaran ni bulan (hira-hira 29 atap 30 ari tiap bulan) lobih pondok marimbangkon tahun na ietong marhitei parputaran ni mata ni ari. Marmasam do carani halak ase haduasi kalender ai sarupa ganjangni. Umpamani, itambahkon ma piga-piga ari tiap tahun. Atap, bani tahun-tahun na tertentu adong sada bulan na itambahkon, misalni dobkonsi bulan na parpudi. Halani ai, tiap tahun bani bulan na sarupa ma musim manuan atap pariama.

Bani panorang ni si Musa, Naibata mangkatahon bani juakjuak-Ni ase imulai sidea tahun na baru tiap bulan Abib atap Nisan. Anggo sonari bulan Maret atap April ma ai. (2 Mus. 12:2; 13:4) Bani bulan ai ma ibahen sidea perayaan, janah bulan ai homa adong panen barli.​—2 Mus. 23:15, 16.

Bani buku The History of the Jewish People in the Age of Jesus Christ, (175 B.C.–A.D. 135) sahalak pakar na margoran Emil Schürer mangkatahon, “Lang sunsah pamasukkon sada bulan bani sada tahun kalender. Perayaan Paskah irayahon sanggah bulan purnama bani bulan Nisan (14 Nisan). Perayaan ai ibahen topat sanggah ekuinoks * ai ma arian pakon borngin sarupa ganjangni . . . Bani ujungni tahun ipardiateihon sidea ma Paskah ai irayahon paima ekuinoks, jadi itambah ma sada bulan bani kalender satahun itotapkon ma ai paima bulan Nisan.”

Cara on ma na igunahon Saksi Jahowa, laho manontuhon attigan do tanggal na pas mambahen acara Pardingatan Hamateian ni Jesus. On sosok pakon tanggal 14 Nisan bani kalender ni halak Jahudi. Dobkonsi ibotoh sidea tanggal na pas, mintor ipatugah sidea ma ai bani ganup kuria i sab tanoh on.

Tapi sonaha do halak Israel laho mambotoh domma salosei sada bulan janah laho ipungkah ma bulan na baru? Anggo sonari mintor boi do ididah hita hunbani kalender atap perangkat elektronikta. Tapi sapari lang urah laho mambotoh ai.

Paima Bah na Sumbang, sada bulan dokahni 30 ari. (1 Mus. 7:11, 24; 8:3, 4) Tapi dobkonsi ai bani kalender ni halak Jahudi lang totap be 30 ari ibagas na sabulan. Bani kalender ni halak Jahudi, bulan baru imulai dobkonsi muncul bulan sabit na baru. Hira-hira 29 atap 30 ari dobkonsi taridah bulan sabit na parlobei.

Bani sada panorang, ongga do si Daud pakon si Jonatan mangkatahon pasal bulan na baru. Sidea mangkatahon ‘patar ma bulan na baru’. (1 Sam. 20:5, 18) Hunjai gabe ibotoh hita ma anggo bani abad 11 SM, domma ibotoh halak pasal mangetong bulan. Sonaha ma halak Israel mambotoh attigan bulan baru ai imulai? Ipatugah do ai bani Misnah, ai ma buku na marisi pasal hukum ampa tradisi ni halak Jahudi. Ijai ihatahon martanggung jawab do Sanhendrin laho patugahkon ai. Jadi tiap bulan na papituhon martumpu ma sidea bani tanggal 30. Sanggah ai ma itontuhon attigan do bulan baru ai imulai. Sonaha do carani sidea manontuhon ai?

Sanggah borngin, itugaskon ma piga-piga dalahi i sakaliling Jerusalem laho mangidah parrohni bulan sabit na baru. Dob ai ipatugah sidea ma ai bani Sanhendrin. Dobkonsi sungkup bukti-buktini, iputuskon Sanhendrin ma domma ipungkah bulan na baru. Tapi sonaha anggo lang boi ididah dalahi-dalahi ai bulan halani tartutup hombun?  Gabe iputuskon sidea ma anggo bulan ai 30 ari, anjaha patar ni ma ipungkah bulan na baru.

Laho patugahkon haputusan ni Sanhendrin, ibahen ma apuy i dolog Jetun na dohor hun Jerusalem. Tanda ai boi ididah ganup halak Israel. Dob ai isuruh ma piga-piga halak laho patugahkon barita ai. Gabe ibotoh ganup halak ma domma imulai bulan na baru. Halani ai boi ma ganup halak rup mambahen perayaan.

Laho mangurupi ham mangarusi ganup bulan, perayaan, ampa musim ni halak Jahudi na sapari idah ma tabel on.