GANUP hita sihol do ididah halak anggo hita on pardear layak. Tapi lang sai urah patuduhkon halayakon atap pe tongtong mambahen na madear. Sonari bahat do halak na “magigi bani na madear”. (2 Tim. 3:3) Anjaha lang ra sidea mangihutkon aturan ni Jahowa. Gabe iahap sidea ma ‘na bajan ai do na dear, anjaha na dear ai do na bajan’. (Jes. 5:20) Ra do homa lang urah mambahen na madear halani hita manisia na lang sempurna, janah ongga do ra halak mambahen na lang madear hubanta. Halani ai, ra do pangahapta dos songon hasomanta naboru na dob dokah mangidangi Jahowa. Ia mangkatahon, “Sunsah tumang do huahap gabe halak na madear ai.”

Tapi sasintongni ganup hita boi do gabe halak na madear. Marhitei tonduy na pansing iurupi Naibata do hita ase ulang mangihutkon pambahenan ni halak i dunia on. Anjaha iurupi do homa hita ase boi manaluhon hisap-hisap ni dagingta. Sonari ulas hita ma lobei aha do artini halayakon ai, janah sonaha hita boi tongtong patuduhkon ai.

Sasada halak ihatahon layak atap dear anggo marusaha ia patuduhkon habujuron. Ipingkirhon ia do sonaha ia boi mangurupi halak na legan janah mambahen na madear bani sidea. Anjaha humbani borsih ni uhurni do ia mangkorjahon ai.

Ase boi gabe halak na madear i lobei ni Jahowa, lang sungkup pitah mambahen na madear bani kaluarga ampa hasoman. Tontu lang adong hita na boi mambahen na madear bani ganup panorang. Bibel mangkatahon, “Seng dong halak parpintor i tanoh on, sihorjahon na madear tumang, anjaha na so ongga mardousa.” (Par. 7:20) Apostel Paulus pe iakui do hahuranganni. Nini do, “Hubotoh do, seng dong na madear marianan ibagas ahu.” (Rom 7:18) Jadi ase boi gabe halak na madear maningon humbani Jahowa do hita marlajar, halani Ia do harohan ni hadearon.

Jahowa do na manontuhon pasal aha na madear. Bani Bibel ihatahon, “Dear do Ham anjaha sibahen na madear, ajarhon Ham ma hu bangku uhum-Mu.” (Ps. 119:68) Ulas hita ma dua alasan mase bani ayat ai ihatahon dear do Jahowa.

Dear do Jahowa. On patuduhkon dear do ganup paruhuran ni Jahowa. Pardiateihon ma aha na ihatahon Jahowa bani si Musa, “Pabontaskonon-Ku ma ganup hatunggungon-Ku [“hadearon-Ku”, Terjemahan Dunia Baru] hun lobei ni bohimu.” Sanggah ipatuduh Jahowa hamuliaon ampa hadearon-Ni, itangar si Musa ma sada sora na mangkatahon, “Jahowa, Jahowa do Naibata pardear layak anjaha paridop ni uhur, nanget marringis, anjaha gok holong ni uhur-Ni pakon habonaran-Ni, na pahotkon holong ni uhur-Ni hubani halak marribu-ribu, anjaha na manasap hajahaton, panlanggaron pakon dousa; tapi sabonar lang ra paluahkon sonin tumang parsalah.” (2 Mus. 33:19; 34:6, 7) Hunjon tangkas ma ibotoh hita dear do ganup dalan ni Jahowa. Hassi pe Jesus ihatahon halak na madear, tapi ia sandiri mangkatahon, “Seng dong sidear uhur sobali Naibata.”​—Luk. 18:19.

Sibahen na madear do Jahowa. Dear do ganupan na ibahen Ia. “Pardear layak do Jahowa  bani haganup anjaha holong do atei-Ni bani ganup jadi-jadian-Ni.” (Ps. 145:9) Halani Ia pardear layak janah lang manonggor jumbak, ipasirsir do ganup na ihaporluhon manisia ase boi totap manggoluh. Taridah do homa hadearon-Ni halani ra Ia manasap dousanta. Isurat do bani buku Psalmen, “Pardear layak do Ham, [Jahowa], anjaha marpangulaki do uhur-Mu.” (Ps. 86:5) Pos ma uhurta tongtong do ibahen Jahowa “na madear bani halak na bujur marparlahou”.​—Ps. 84:12.

Halani Naibata manompa hita songon rupa-Ni, tontu hita boi maniru paruhuran-Ni na madear ai. (1 Mus. 1:27) Tapi lang urah mandalankon ai. Bibel mangkatahon maningon do iparlajari hita ‘mambahen na madear’. (Jes. 1:17) Tapi sonaha carani? Ulas hita ma tolu cara na boi mangurupi hita mandalankon aha na madear.

Na parlobei, pindo ma bani Jahowa ase ibere tonduy na pansing. Marhitei ai iurupi ma hita patuduhkon halayakon atap pe mambahen na madear. (Gal. 5:22) Anjaha iurupi do homa hita mangkarosuhkon aha na dear janah mangkagigihon na sambor. (Rom 12:9) Bibel mangkatahon Jahowa boi ‘patotaphon uhurta bani sagala horja ampa hata na madear’.​—2 Tes. 2:16, 17.

Na paduahon, maningon ibasa hita do Bibel. Sanggah ibasa hita Bibel, ibotoh hita ma “sagala dalan na dear” na iajarhon Naibata. Gabe boi ma hita mangkorjahon “sagala horja na madear”. (Pod. 2:9; 2 Tim. 3:17) Boi ihatahon songon panimpanan arta do uhurta. Jadi anggo ibasa hita Bibel janah iparimbagaskon hita isini, gabe gok ma arta ibagas uhurta. Anjaha boi ma ipadarat hita ai sadihari pe iporluhon.​—Luk. 6:45; Ep. 5:9.

Na patoluhon, marusaha ma hita ‘maniru na madear’. (3 Joh. 11) Bahat do siusihan na dear na isurat ibagas Bibel. Tontu Jahowa pakon Jesus do siusihan na sidearan. Tapi dong homa contoh na legan na mambahen na dear. Umpamani si Tabita pakon si Barnabas. (Lah. 9:36; 11:22-24) Sanggah marlajar Bibel, bahat do gunani anggo ipardiateihon nasiam sonaha sidea mangurupi na legan. Pardiateihon homa aha do gunani na iahapkon sidea halani mangkorjahon na madear. Dob ai, pingkirhon ma sonaha nasiam boi mangusihi sidea sanggah mangurupi kaluarga, hasoman, ampa na leganni. Anggo iparlajari nasiam siusihan sisonai ibagas Bibel, bahat do gunani ai bani nasiam.

Leganni ai boi homa ipardiateihon hita siusihan na ibahen sanina botounta sonari on. Umpamani pingkirhon ma pasal sintua i kuria na ringgas  mangidangi janah marosuh bani na “madear”. Pardiateihon homa siusihan na ibahen bahat botounta marhitei parsahap ampa pambahenan ni sidea. Buei do sidea na marosuh membere ‘podah na madear’. (Tit. 1:8; 2:3) Sada hasomanta naboru na margoran si Roslyn mangkatahon, “Adong sada hasomanku na marosuh tumang mangurupi janah patoguhkon hasomanta i kuria. Ipingkirhon ia do ise na porlu iurupi. Marusaha do ia mangurupi sanina botou domu bani na tarbahensi. Tongon-tongon do ia halak na bujur.”

Jahowa mangojur hita ase ‘mangindahi na madear’. (Ams. 5:14) Anggo ihorjahon hita ai, gabe iharosuhkon hita ma aturan ni Jahowa anjaha gabe tarojur ma hita mangkorjahon aha na madear.

Tapi ulang ma iagan hita mambahen na madear ai maningon bahat na ihorjahon atap pe mambere hadiah na mahal bani na legan. Pingkirhon ma contoh on: Ase boi tubuh suan-suanan, lang mintor bahat ibahen hita bahni laho maniram janah pitah sahali tumang. Tapi maningon otik-otik do isiram janah maningon gati. Sonai homa hita, anggo sihol patuduhkon habujuran, maningon gati ma hita mangurupi na legan, hassi pe otik na tarbahen hita.

Bani Bibel iojur do hita ase “sirsir” mangurupi halak na legan tarlobih sanina botou. (2 Tim. 2:21; Tit. 3:1) Anggo ipardiateihon hita aha na ihaporluhon sidea, gabe urah ma hita ‘mambahen na madear laho pauli-ulihon sidea’. (Rom 15:2) Idah hita ma atap na porlu do hita marsibere-bere bani halak na hurangan. (Pod. 3:27) Boi do homa iontang hita sidea mangan hu rumahta laho patoguhkon sidea. Anggo dong na boritan, boi do homa hita manonggor atap manalepon ia laho mambotoh baritani. Sasintongni bahat do cara na boi ibahen hita laho mangkatahon ‘na madear na boi pauli-ulihon na hurang, ase dapotan ulih na mambogeisi’.​—Ep. 4:29.

Marusaha ma hita maniru Jahowa marhitei mambahen na madear bani ganup halak. Janah ulang manonggor jumbak sanggah mangkorjahon ai. Cara na sidearan ai ma mambaritahon Harajaon ni Naibata bani sidea. Songon na ihatahon Jesus, porlu do homa hita mambahen na madear bani halak na lang marosuh mangidah hita. (Luk. 6:27) Sai dong do hasilni anggo bujur hita janah tongtong mambahen na madear halani “seng marlawan titah dompak na sonai ai”. (Gal. 5:22, 23) Ra do ujungni gabe tarojur sidea mananda hasintongan janah pasangapkon Naibata.​—1 Ptr. 3:16, 17.

Bibel mangkatahon ‘[iupahi] do sidear uhur marhitei pambahenanni na madear’. (Pod. 14:14) Aha deba upahni? Gabe dear ma homa pambahenan ni halak hubanta. (Pod. 14:22) Tapi porini dong halak na mambahen na lang madear hubanta, maningon tongtong do hita mambahen na dear hu bani. Ra ujungni gabe mubah ma ia janah bujur hubanta.​—Rom 12:20.

Anggo ihorjahon hita na madear janah lang be mangkorjahon na sambor, bahat do gunani ai. Ai ma na iahapkon bahat sanina botou. Pardiateihon ma pangalaman ni si Nancy. Ia mangkatahon, ‘Hinan sambor do parlahoungku. Tapi dob marlajar Bibel ahu janah hudalankon podah ni Jahowa, gabe malas ma uhurhu. Sonari na madear do na huhorjahon.’

Alasan na sipontingan mase hita mangkorjahon na madear, halani ai boi mambahen malas uhur ni Jahowa. Hassi pe bahat na lang mangidah, tapi anggo Jahowa ibotoh do ai. Sanggah ipingkirhon ampa ihorjahon hita na madear, ididah Jahowa do ai. (Ep. 6:7, 8) Aha do hasilni? ‘Gabe iharosuhkon Jahowa ma halak sidear uhur.’ (Pod. 12:2) Anjaha bereon-Ni do ‘hasangapon, hamuliaon ampa damei bani sagala na mangkorjahon na madear’.​—Rom 2:10.