1. Paruhuran ni Jesus na ija do na mambahen malas uhurta, anjaha aha ma contohni?

MALAS do uhurta mambotoh anggo Jesus mangarusi sitaronon na iahapkon jolma na lang sempurna. Sanggah i tanoh on, dihut do Jesus ‘marmalas ni uhur pakon na marmalas ni uhur’ janah ‘tangis pakon na tangis’. (Rom 12:15) Umpamani sanggah 70 susianni mulak marbarita ibagas malas ni uhur, “marolob-olob” do Jesus. (Luk. 10:17-21) Tapi sanggah ididah ia bahat na marpusok ni uhur halani hamatean ni si Lasarus, pusok do homa uhurni.​—Joh. 11:33.

2. Mase Jesus boi patuduhkon uhur na sapangahapan?

² Hassi pe sempurna, maridop ni uhur do Jesus bani jolma na lang sempurna. Mase? Halani holong do ase sonai ia. Songon na dob iulas hita bani artikel na salpu, rosuhan do uhurni hubani manisia. (Pod. 8:31) Halani holong, iarusi ia do pingkiran ampa pangahap ni jolma. Apostel Johannes mangkatahon, “Ibotoh do na ibagas uhur ni jolma in.” (Joh. 2:25) Boi do iahapkon halak idop ni uhur ampa holong ni Jesus in. Halani ai ma ra sidea manangihon barita Harajaon na ipadas ia. Jadi anggo maridop ni uhur hita songon Jesus, gabe marhasil ma hita sanggah mangidangi.​—2 Tim. 4:5.

3-4. (a) Anggo ipatuduh hita uhur na sapangahapan, gabe sonaha ma pangahapta sanggah mangidangi? (b) Aha do na laho iulas hita bani artikel on?

³ Ibotoh apostel Paulus maningon marbarita do ia, anjaha sonai do homa hita. (1 Kor. 9:16) Tapi sedo pitah halani maningon ase ra hita marbarita. Anggo dong uhur na sapangahapan banta, parduli do hita bani halak janah  sihol do mangurupi sidea. On ma na mangojur hita ase ra marbarita. Domma ibotoh hita “martuahan do na mambere ase na manjalo”. (Lah. 20:35) Anggo tongtong idingat hita ai, lambin marmalas ni uhur ma hita sanggah mangidangi.

⁴ Bani artikel on, iulas hita ma sonaha hita boi patuduhkon uhur na sapangahapan sanggah mangidangi. Tapi ulas hita ma lobei sonaha pangahap ni Jesus mangidah halak na legan. Dob ai, iulas hita ma use ompat cara sonaha hita boi mangusihi Jesus.​—1 Ptr. 2:21.

5-6. (a) Bani ise do Jesus patuduhkon uhur na sapangahapan? (b) Songon na ipatugah bani Jesaya 61:1, 2, mase maidop uhur ni Jesus mangidah halak na mabuei?

⁵ Pardiateihon hita ma sada contoh sonaha Jesus patuduhkon uhur na sapangahapan. Bani sada ari, loja ma Jesus pakon susianni dobkonsi sibuk marbarita. ‘Gari mangan pe seng sompat’ sidea. Halani ai iarahkon Jesus ma sidea hu “ianan na lungun, laho papuligkon diri” janah “marsaran otik”. Hape ibotoh halak na mabuei do ai janah laho ma sidea mardalan nahei hujai. Daskonsi Jesus ijai, ididah ma halak na mabuei ai. Sonaha pangahap ni Jesus? “Maidop ma uhurni * mangidah sidea, ai songon biribiri na so marparmahan do sidea, gabe buei ma ipodahkon bani sidea.”​—Mrk. 6:30-34.

⁶ Pardiateihon ma mase sonai pangahap ni Jesus bani sidea. Bibel mangkatahon “songon biribiri na so marparmahan” do sidea ididah Jesus. Ipardiateihon Jesus dong do sidea na miskin tumang janah maningon gogoh marhorja laho mansarihon kaluargani. Dong na marpusok ni uhur halani matei na hinaholonganni. Tontu iarusi Jesus do pangahap  ni sidea. Songon na dob iulas hita bani artikel na salpu, ongga do homa iahapkon Jesus sitaronon sisonai. Halani parduli bani sidea, gabe tarojur ma Jesus marbarita ase tarapoh sidea.​—Basa Jesaya 61:1, 2. 

7. Sonaha hita boi mangusihi Jesus?

⁷ Aha do na boi iparlajari hita humbani Jesus? Sonari on pe bahat do halak na “songon biribiri na so marparmahan”. Bahat do homa sitaronon ni sidea. Jadi hita sihol mangurupi sidea marhitei padaskon barita Harajaon. (Pangk. 14:6) Songon Jesus, halani ‘maidop uhurta’ bani halak na miskin gabe ra ma hita marbarita bani sidea. (Ps. 72:13) Anjaha sihol do hita mangurupi sidea.

8. Sanggah marbarita, sonaha hita boi patuduhkon uhur na sapangahapan? Bere ma contoh.

⁸ Sonaha hita boi patuduhkon uhur na sapangahapan sanggah marbarita? Marusaha ma mangarusi pingkiran ampa pangahap ni halak. Bayangkon ma anggo hita songon sidea, tontu hita sihol ase ibahen na madear hubanta. Halani ai bahen ma na madear bani sidea sanggah hita marbarita. * (Mat. 7:12) Sonari ulas hita ma ompat cara sonaha hita mangkorjahon ai. Na parlobei, pingkirhon ma haporluan ni tiap halak. Sanggah marbarita, dos songon dokter do hita. Sahalak dokter na dear, ipingkirhon ia do haporluan ni tiap pasienni. Isungkun do lobei sonaha pangahap ni sidea janah sabar do ia manangar. Paima mambere tambar, ipareksa ia do lobei pasienni ai ase boi ia mambere tambar na sosok bani sidea. Sonai homa ma hita. Sanggah marbarita, ulang ipados hita ganup halak. Tapi pasosok hita ma baritanta domu bani situasi ni sidea.

9. Sanggah marbarita, aha do na lang boi ibahen janah aha do na porlu ibahen hita?

⁹ Sanggah marbarita, anggo jumpah ham pakon sasada halak, ulang ma iagan ham domma ibotoh ham aha na ihaporsayai ia atap mase porsaya ia pasal ai. (Pod. 18:13) Maruhur ma mambahen sungkun-sungkun ase ibotoh ham na ipingkirhon ia. (Pod. 20:5) Umpamani dob martutur, sungkun ma asalni, pasal kaluargani, atap pe horjani. Anggo sonai ibahen ham gabe ibotoh ham ma sonaha padaskon ambilan na madear domu bani haporluan ni sidea. Sonai do na ibahen Jesus.​—Bandingkon 1 Korint 9:19-23.

10-11. Domu bani 2 Korint 4:7, 8, aha do cara na paduahon laho patuduhkon uhur na sapangahapan? Bere ma contoh.

¹⁰ Na paduahon, bayangkon ma sonaha  hagoluhan ni sidea. Halani lang sempurna, sai adong do sitarononta. Halani ai gabe iarusi hita ma sonaha pangahap ni halak na marsitaronon. (1 Kor. 10:13) Ibotoh hita sunsah tumang do hagoluhan sonari on. Hassi pe sonai boi do hita martahan halani iurupi Jahowa. (Basa 2 Korint 4:7, 8.) Tapi pingkirhon ma sidea na lape mananda Jahowa. Tontu sunsahan do pangahap ni sidea. Halani ai, songon Jesus gabe maidop ma uhurta bani sidea. On ma na mangojur hita mambaritahon “ambilan na madear” bani sidea.​—Jes. 52:7.

¹¹ On ma na masa bani si Sergey. Sahalak na parmaila janah parsip-sip do ia. Sunsah do ia patugahkon sonaha pangahapni. Bani sada ari, marlajar Bibel ma ia. Nini ma, “Humbani Bibel gabe hubotoh ma maningon husaritahon do ganup na huparlajari bani halak na legan. Tapi huahap lang boi ahu sonai.” Hassi pe sonai, totap do ipingkirhon ia sonaha hagoluhan ni halak na lang marlajar Bibel. Ibayangkon ia ma sonaha hagoluhan ni sidea anggo lang mananda Jahowa. Nini use, “Halani marlajar Bibel, ai do na mambahen malas uhurhu janah damei ibagas pingkiranku. Ninuhurhu ma halak na legan pe porlu do marlajar Bibel.” Halani ai, gabe barani ma si Sergey marbarita bani halak na legan. Nini use, “Hape, dob husaritahon aha na huparlajari, lambin porsaya diri ma ahu janah lambin toguh do haporsayaonku.” *

12-13. Mase maningon sabar hita sanggah mangajari halak marlajar hasintongan? Bere ma sada limbaga.

¹² Na patoluhon, sabar ma hita mangajari sidea. Ra, dong ajaran ni Bibel na domma dokah ibotoh hita. Tapi bani halak na legan baru ope ai. Dob ai dong homa halak na porsaya tumang bani aha na iajarhon ugama ni sidea. Pangahap ni sidea ponting tumang do  ugamani ai halani boi mambahen sidea dohor bani kaluarga, hasoman, janah sosok homa bani adat ni sidea. Sonaha hita boi mangurupi sidea?

¹³ Pingkirhon ma limbaga on: Dong sada jembatan na domma dokah janah mulai maseda. Jadi porlu ma ibahen jembatan na baru. Somalni sanggah ibahen jembatan na baru ai, ipakei ope jembatan na dokah ai. Dob salosei, baru ma irumbakkon jembatan na dokah ai. Sonai homa ma hita sanggah mangurupi halak. Porlu do panorang ase ra sidea manadingkon ajaran na dob “dokah” ihaporsayai sidea. Jadi, paima ai urupi ma sidea ase mangkarosuhkon hasintongan na “baru” ope iparlajari.​—Rom 12:2.

14-15. Sonaha hita mangurupi halak ase mangarusi pangarapan pasal paradeiso? Bere ma contoh.

¹⁴ Anggo sabar hita mangidangi, tontu lang ipaksa hita halak ase mangarusi atap pe porsaya bani ajaran ni Bibel na baru ope itangar sidea. Anggo iarusi hita pangahap ni sidea, tontu marusaha ma hita mangurupi sidea ase anget-anget boi manjalo hasintongan ni Bibel. Umpamani pingkirhon ma sonaha hita mangurupi halak ase porsaya boi do hita manggoluh sadokah ni dokahni i Paradeiso. Bahat do halak na lang mambotoh pasal ai. Iahap sidea halak na matei lang boi manggoluh use. Atap dong do halak na porsaya ganup halak na bujur hu surga do holi. Sonaha hita mangurupi sidea?

¹⁵ Dong sada hasomanta dalahi na patugahkon cara na gati igunahon ia. Parlobei ibasahon ia ma 1 Musa 1:28. Dob ai isungkun ia ma simada rumah, “Harosuh ni Naibata, ija do manisia tading, janah sonaha do hagoluhan ni sidea?” Gati do halak mambalosi, “I tanoh on janah marmalas ni uhur.” Dob ai ibasahon ia ma Jesaya 55:11 janah isungkun ma ai mubah do sura-sura ni Naibata bani manisia. Bahat do sidea na mambalosi lang. Ujungni, ibasahon ia ma Psalmen 37:10, 11 janah isungkun ma sonaha do hagoluhan ni manisia bani ari simagira. Marhitei ayat-ayat ai, domma iurupi ia piga-piga halak mangarusi anggo Naibata sihol ase manisia manggoluh sadokah ni dokahni i Paradeiso i tanoh on.

16-17. Domu bani Podah 3:27, sonaha hita patuduhkon anggo hita parduli bani halak? Bere ma contoh.

¹⁶ Na paompathon, pingkirhon ma aha na boi ibahen laho patuduhkon anggo nasiam parduli bani sidea. Umpamani sonaha porini hita roh bani panorang na lang sosok. Minta maaf ma janah hatahon sonaha anggo roh hita bani panorang na legan. Sonaha porini simada rumah porlu iurupi? Atap sonaha porini ia domma matua atap boritan, anjaha  lang boi ia kaluar mangurus urusanni? Bani situasi sisonai boi do iurupi hita sidea.​—Basa Podah 3:27.

¹⁷ Bahat do gunani habujuron na ipatuduh hita age otik. On ma na iahapkon sada hasomanta naboru. Dong sada kaluarga na baru matei poso-posoni. Halani parduli ia bani kaluarga ai, itulis ia ma surat bani sidea. Ibagas surat ai ipatugah ia ma piga-piga ayat na mangapoh sidea. Sonaha pangahap ni kaluarga ai? Ibalas inang na marpusok ni uhur ai ma suratni ai, “Pusok tumang uhurnami nantuari. Tapi halani suratmu ai, gabe toguh do uhurnami. Lang hubotoh sonaha mangkatahon tarima kasih. Marulak-ulak do hubasa, lobih 20 hali. Tarapoh tumang do uhurnami. Tarima kasih banggal da.” Dapot hita do homa hasil na sisonai anggo marusaha hita patuduhkon uhur na sapangahapan janah ra mangurupi sidea.

18. Domu bani 1 Korint 3:6, 7, aha do na porlu idingat hita sanggah mangidangi, janah mase?

¹⁸ Sanggah mangidangi, iurupi hita do halak ase mananda Jahowa. Tapi dingat ma sedo hita na mambahen sidea gabe panombah-Ni. (Basa 1 Korint 3:6, 7.) Jahowa do na manogu-nogu sidea ase gabe panombah-Ni. (Joh. 6:44) Hassi pe sonai sidea sandiri do na manontuhon ra manjalo barita ai atap lang. (Mat. 13:4-8) Jadi ulang ma maretek ni uhur anggo dong halak na lang ra manjalo baritanta, hassi pe domma marusaha hita mangurupi sidea. Dingat ma bahat do homa halak na lang ra manjalo barita ni Jesus, hassi pe ia do Guru na sidearan.

19. Aha do gunani anggo ra hita patuduhkon uhur na sapangahapan sanggah mangidangi?

¹⁹ Bahat do gunani anggo ra hita patuduhkon uhur na sapangahapan sanggah mangidangi. Lambin marmalas ni uhur ma hita janah iahapkon hita ma hatuahon halani ra mangurupi halak. Anjaha urah ma halak “na dob tinontuhon hinan hu hagoluhan sisadokah ni dokahni” manjalo barita na madear. (Lah. 13:48) Jadi, “halani sompat ope, horjahon hita ma na madear bani haganup halak”. (Gal. 6:10) Dob ai gabe marmalas ni uhur ma hita halani domma pasangapkon Bapanta na i surga.​—Mat. 5:16.