Halak Levi na lang mangidangi gabe malim ibere do piga-piga tugas bani sidea. Umpamani gabe siparugas i rumah panumbahan. Sahalak panurat ni Jahudi na margoran si Filo patorangkon aha do horja ni sidea. Nini do, “Dong na gabe sijaga pintu masuk. Dong homa na marjaga i lobei [ibagas rumah panumbahan] laho manlanglangi halak na lang talup mangihutkon Titah ni si Musa masuk hubagas. Sobali ai, dong homa na marrunda i rumah panumbahan. Margantih do sidea na manjaga ai. Dong na arian, dong homa bani borngin ni ari.”

Boi do homa ipindo Sanhedrin pangurupion humbani siparugas ai. Humbani halak Jahudi, pitah kalompok siparugas ai do na ibere pamarentah Rom mamboan sinjata.

Sahalak pakar na margoran si Joachim Jeremias mangkatahon, “Sanggah itangkap Jesus, ihatahon ia ma anggo ari-ari do ia mangajar i rumah panumbahan, tapi seng itangkap. (Mat. 26.55) Humbani na ihatahon Jesus ai tangkas ma siparugas rumah panumbahan do na manangkap Jesus sanggah ai.” Leganni ai, porsaya do homa si Jeremia piga-piga dokah paima masa ai, sidea do homa na sihol manangkap Jesus. (Joh. 7:32, 45, 46) Dob ai, iparentahkon Sanhedrin ma kopala ni rumah panumbahan ampa piga-piga siparugas laho manangkap susian ni Jesus. Ra, sanggah si Paulus isarad hu darat ni rumah panumbahan, siparugas ai do homa na mangkorjahon ai.​—Lah. 4:1-3; 5:17-27; 21:27-30.