1-2. Songon na ipatugah bani Lahoan 8:27-31, 35-38, mase halak Etiopia ai sihol ididi?

AI RA do ham ididi? Bahat do halak na ra ididi halani sihol patuduhkon holong ampa tarima kasih bani Jahowa. Pardiateihon ma contoh humbani sahalak pegawai na mangidangi ratu Etiopia.

² Dobkonsi iarusi halak Etiopia ai maningon ididi do ia, mintor idalankon ia ma ai. (Basa Lahoan 8:27-31, 35-38.) Mase sonai? Sanggah i gareta, ibasa ia do piga-piga ayat humbani gulungan ni nabi Jesaya, janah marosuh tumang ia bani isini. Dobkonsi ipatorang si Pilippus ayat ai hu bani, gabe tarojur ma ia patuduhkon tarima kasih bani aha na dob ibahen Jesus hu bani. Tapi mase halak Etiopia ai laho hu Jerusalem? Laho manombah Jahowa do ia hujai. Hunjon taridah ma holong do uhurni bani Jahowa. Ra do domma itadingkon ia ugamani na hinan. Dob ai iihutkon ia ma ugama ni halak Jahudi na manombah Naibata na sintong. Halani mangkaholongi Jahowa do homa ase ra ia ididi.​—Mat. 28:19.

3. Aha do na mambahen sasada halak lang ra ididi? (Tonggor ma kotak “ Usih Songon Tanoh na Ija do Uhurmu?”)

³ Nasiam pe tontu sihol ididi halani holong uhurmu bani Jahowa. Tapi boi do homa halani holong gabe lang ra ham ididi. Mase sonai? Pardiateihon ma piga-piga contoh. Ra do holong tumang uhurmu bani kaluarga. Halani ai, mabiar ma ham anggo ididi holi gabe sogam ma sidea mangidah ham. (Mat. 10:37)  Atap ibagas uhurmu marosuh ope ham bani hasomalan na ihagigihon Naibata. Janah payah ope pangahapmu manadingkon ai. (Ps. 97:10) Atap ra do humbani na etek domma somal ham dihut bani ari-ari raya. Ra do malas uhurmu halani mardingat sonaha ham manrayahon ai hinan. Ujungni gabe sunsah ma iahap ham manadingkon ari raya ai. (1 Kor. 10:20, 21) Anggo sonai, rimangi ma sungkun-sungkun on, “Aha do na sipontingan ibagas uhurhu?”

4. Aha do alasan na sipontingan na mangojur ham ase ra ididi?

⁴ Tontu bahat do na iharosuhkon ham. Umpamani, paima marlajar Bibel pakon Saksi Jahowa, domma marosuh ham mambasa Bibel. Janah domma holong uhurmu bani Jesus. Sonari domma itanda ham Saksi Jahowa janah marosuh tumang ham marsaor pakon sidea. Hassi pe maharga ganupan ai bamu, sedo pitah ai na mambahen ham sihol mangondoskon diri bani Jahowa anjaha ididi. Alasan na sipontingan mase ra ham ididi ai ma halani mangkaholongi Jahowa. Anggo holongan uhurmu bani Jahowa, tontu lang ipaturut ham aha pe atap ise pe manlanglangi ham laho mangidangi-Si. Halani mangkaholongi-Si, gabe ra ma ham ididi. Halani holong, dob ididi pe marusaha do ham ase totap setia bani Jahowa.

5. Aha ma na laho iulas hita bani artikel on?

⁵ Jesus mangkatahon maningon ihaholongi hita do Jahowa humbani gok ni uhur, gok ni hosah, gok ni pingkiran, ampa gok ni gogohta. (Mrk. 12:30) Sonaha ase boi sonai holongta bani Jahowa? Anggo irimangi hita sonaha Jahowa mangkaholongi hita, gabe holong ma uhurta hu Bani. (1 Joh. 4:19) Bani artikel on, ulas hita ma piga-piga cara na mangurupi hita ase boi mangkaholongi Jahowa. Ulas hita ma homa sonaha pangahapmu anjaha aha na sihol bahenonmu dobkonsi holong uhurmu bani Naibata. *

6. Domu bani Rom 1:20, sonaha hita boi mananda Jahowa?

⁶ Paruhurhon ma tompaon ase lambin mananda Jahowa. (Basa Rom 1:20; Pangk. 4:11) Paruhurhon ma sonaha Jahowa manompa suan-suanon ampa binatang-binatang. Hunjai taridah do hapentaran-Ni. Longang do homa uhurta mangidah cara kerja ni angkulanta. (Ps. 139:14) Rimangi ma homa sonaha banggal ni kuasa ni Jahowa na taridah humbani mata ni ari. Hape dong marmiliar juta nari bintang na songon mata ni ari hebatni. * (Jes. 40:26) Sanggah irimangi ham ganup tompaon, lambin hormat ma ham hubani Jahowa. Jadi, ponting tumang do ibotoh hita anggo Jahowa ai Naibata na pentar janah gok kuasa-Ni. Tapi ase lambin holong uhurta hu Bani janah boi hita gabe hasoman-Ni, dong ope na maningon ibotoh hita.

7. Ase lambin banggal holongmu bani Jahowa, aha do na porlu idingat ham pasal Ia?

⁷ Maningon pos do uhurmu holong tumang Jahowa bamu. Ai sunsah do pangahapmu mambayangkon anggo Jahowa ai parduli bamu? Anggo sonai pangahapmu, dingat ma “seng daoh Ia humbani ganup hita”. (Lah. 17:26-28) “Ipareksa Jahowa do sagala uhur na ibagas.” Bibel mangkatahon, “Anggo ipindahi ho Ia, sai na jumpah ho do Ia.” (1 Kron. 28:9) Sasintongni, nasiam boi marlajar Bibel ronsi sonari halani ‘itogu-togu’ Naibata do. (Jer. 31:3) Jadi anggo irimangi ham ganup na ibahen  Jahowa bamu, lambin banggal ma holongmu hu Bani.

8. Sonaha ham patuduhkon anggo ham mangkargai holong ni Jahowa?

⁸ Marhitei tonggo, hita boi patuduhkon anggo hita mangkargai holong ni Jahowa. Sanggah martarima kasih ham hu Bani, anjaha ipatugah ham sonaha pangahapmu, lambin banggal ma holongmu bani Jahowa. Lambin orot ma homa parhasomananmu pakon-Si sanggah ibotoh ham sonaha Ia mambalosi tonggomu. (Ps. 116:1) Lambin pos ma uhurmu anggo Ia mangarusi pangahapmu. Tapi ase boi ham lambin dohor bani Jahowa, maningon iarusi ham do homa sonaha pingkiran ampa dalan-Ni. Anjaha porlu do homa ibotoh ham aha do na iharosuhkon Ia hun bamu. Jadi ase boi dapotmu ganupan ai, tongtong ma parlajari Bibel.

9. Sonaha ham patuduhkon anggo ham mangkargai isi ni Bibel?

⁹ Hargai ma aha na iparlajari ham humbani Bibel. Pitah ibagas Bibel do adong hasintongan pasal Jahowa ampa sura-sura-Ni bamu. Sonaha ham patuduhkon anggo ham mangkargai isi ni Bibel? Basa ma Bibel bai ganup ari, bahen ma persiapan paima marlajar Bibel pakon halak na mangajari ham, ampa dalankon ma na dob iparlajari ham. (Ps. 119:97, 99; Joh. 17:17) Ai dong do ipasirsir ham panorang ase boi mambasa Bibel bai ganup ari?

10. Aha do na mambahen Bibel lang sarupa pakon buku na legan?

¹⁰ Legan do Bibel marimbangkon buku na legan halani marisi hatorangan pasal Jesus. Anjaha halak na mangidah Jesus sanggah i tanoh on do na manuratkon hatorangan ai. Pitah Bibel dassa na patorangkon aha na dob ibahen Jesus bani jolma. Anggo iparlajari ham aha na dob ihorjahon ampa na iajarhon Jesus, gabe marosuh ma ham marhasoman pakonsi.

11. Sonaha ham boi mangkaholongi Jahowa?

¹¹ Marusaha ma mangkaholongi Jesus ase lambin banggal holongmu bani Jahowa. Mase sonai? Halani Jesus mangusihi paruhuran ni Jahowa. (Joh. 14:9) Jadi, lambin bahat na iparlajari ham pasal Jesus, lambin iarusi  ham ma paruhuran ni Jahowa. Anjaha lambin holong ma uhurmu hu Bani. Pingkirhon ma sonaha Jesus patuduhkon idop ni uhur bani halak na iapasi halani miskin sidea, boritan, janah galek. Rimangi ma podah na madear na ibere Jesus bamu, na mambahen lambin dear goluhmu.​—Mat. 5:1-11; 7:24-27.

12. Aha ma na sihol bahenonmu dob itanda ham Jesus?

¹² Lambin banggal ma homa holongmu bani Jesus anggo irimangi ham aha na dob ibahen ia laho manobus dousanta. (Mat. 20:28) Dobkonsi iarusi ham ganupan ai, gabe tarojur ma ham mambahen hamubahon janah mangindo hasasapan ni dousa bani Jahowa. (Lah. 3:19, 20; 1 Joh. 1:9) Anjaha anggo domma holong uhurmu bani Jahowa pakon Jesus, gabe sihol ma ham marhasoman pakon halak na mangkaholongi sidea.

13. Aha ma na dob ibere Jahowa bamu?

¹³ Haholongi ma sidea na mangkaholongi Jahowa. Ra do kaluarga atap hasomanmu lang mangarusi mase ham ra mangondoskon diri bani Jahowa. Ra do gabe sogam uhurni mangidah ham. Tapi, ibere Jahowa do bamu sanina botou i kuria. Sidea boi gabe kaluargamu. Anggo totap dohor ham bani sidea, ihaholongi anjaha iurupi sidea ma ham. (Mrk. 10:29, 30; Heb. 10:24, 25) Janah i pudian ni ari, ra do adong kaluargamu na lang Saksi ujungni gabe ra manombah Jahowa janah mandalankon aturan-Ni.​—1 Ptr. 2:12.

14. Domu bani 1 Johannes 5:3, sonaha pangahapmu bani prinsip ni Bibel?

¹⁴ Haholongi ma aturan ni Jahowa janah dalankon ma ai. Paima itanda ham Jahowa, ra do rosuhmu sandiri na iihutkon ham. Tapi sonari domma ibotoh ham aturan ni Jahowa do na sidearan. (Ps. 1:1-3; basa 1 Johannes 5:3.) Umpamani dong podah ni Bibel bani suami, istri, namatoras, ampa dakdanak. (Ep. 5:22–6:4) Dob idalankon ham ai, lambin martuah do kaluargamu? Sanggah iihutkon ham podah ni Bibel pasal mamilih hasoman, dong do parubahan ibagas parlahoumu? Lambin martuah do ham? (Pod. 13:20; 1 Kor. 15:33) Ra do eak balosmu bani ganup sungkun-sungkun ai.

15. Aha ma na maningon bahenonmu ase boi mandalankon prinsip ni Bibel?

¹⁵ Sipata, ra do lang ibotoh ham sonaha mandalankon prinsip ni Bibel. Halani ai marhitei organisasi-Ni, ibere Jahowa ma publikasi na patorangkon prinsip ni Bibel ase iurupi ham mangarusi ija do na madear ampa na masambor. (Heb. 5:13, 14) Anggo iparlajari ham ai, gabe ibotoh ham ma sonaha mandalankon prinsip ni Bibel. Janah gabe sihol ma ham dihut gabe bagian organisasi ni Jahowa.

16. Sonaha Jahowa mangatur juakjuak-Ni?

¹⁶ Haholongi ma organisasi ni Jahowa janah ihutkon ma tugah-tugah hunjai. Ipatumpu Jahowa do sonari juakjuak-Ni ibagas kuria-kuria. Anjaha Jesus do na ipilih gabe kopala ni kuria. (Ep. 1:22; 5:23) Domma ipilih Jesus piga-piga dalahi na iminaki laho mangatur horja na itotapkon ia i tanoh on. Isobut do sidea ai “juakjuak na bujur anjaha na maruhur”. (Mat. 24:45-47) Martanggung jawab do sidea mangurupi hita ase dohor bani Jahowa janah totap marhasoman pakon-Si. Sonaha sidea mangurupi hita? Ipilih sidea ma piga-piga dalahi na gabe sintua i kuria ase iparmahani sidea hita. (Jes. 32:1, 2; Heb. 13:17; 1 Ptr. 5:2, 3) Humbani tuk ni gogohni marusaha do sidea patoguhkon uhurta janah mangurupi hita ase lambin dohor bani Jahowa. Tapi na sipontingan marusaha do sidea mangurupi hita ase boi mangajari halak na legan mananda Jahowa.​—Ep. 4:11-13.

17. Domu bani Rom 10:10, 13, 14, mase ra hita patugahkon pasal Jahowa bani na legan?

 ¹⁷ Urupi ma halak ase mananda Jahowa. Iparentahkon Jesus do ganup susianni ase marbarita. (Mat. 28:19, 20) Tontu ihorjahon hita ai sedo pitah halani iparentahkon Jesus. Anggo lambin banggal holongta bani Jahowa, gabe sarupa ma pangahapta songon apostel Petrus pakon Johannes na mangkatahon, “Seng tarbahen hanami lang mangkatahon na dob ididah ampa ibogei hanami.” (Lah. 4:20) Malas tumang ma uhurta anggo ra hita mangurupi halak mangkaholongi Jahowa. Tontu sonai ma pangahap ni si Pilippus halani halak Etiopia ai ra ididi dobkonsi mambotoh hasintongan. Anggo itiru ham si Pilippus anjaha idalankon ham parentah ni Jesus ase marbarita, on patuduhkon sihol do ham gabe Saksi Jahowa. (Basa Rom 10:10, 13, 14.) Dob ai, dos songon halak Etiopia ai ma na ibagas uhurmu, “Adong ope na manlanglangi ase tardidi ahu?”​—Lah. 8:36.

18. Aha ma na laho iulas hita bani artikel na mangihut?

¹⁸ Sanggah ham mamutuskon laho ididi, sada haputusan na ponting do ai. Halani ai, porlu ma irimangi ham pasal on: Aha do na porlu ibotoh ham pasal ididi? Anjaha aha do na maningon ibahen paima ididi ampa dobkonsi ididi ham. Ulas hita ma balosni ai bani artikel na mangihut.