1. Aha ma na ibotoh hita humbani Parambilan 3:1, 7?

DONG do hita na rosuh marsarita, tapi dong do homa na parsip. Songon na ihatahon bani ayat tema ni artikel on, dong panorang sip-sip anjaha dong panorang marsahapi. (Basa Parambilan 3:1, 7.) Hassi pe sonai, sipata sanggah ididah hita dong sanina botou na rosuh marbuali, ra do nini uhurta sip ma namin ia. Hape sanggah ididah hita halak parsip, ra do nini uhurta mase lalab sip-sip on.

2. Ise ma na mangurupi hita laho mambotoh sonaha manggunahon pamanganta?

² Sanggah hita itompa, ibere Jahowa do pamangan hubanta ase boi marsahapi. (2 Mus. 4:10, 11; Pangk. 4:11) Marhitei Bibel, iurupi Jahowa do hita laho mambotoh sonaha ma namin manggunahon sibere-bere ai. Bani artikel on, iulas hita ma contoh-contoh na mangurupi hita ase mambotoh attigan porlu marsahap, attigan porlu sip. Janah iulas hita homa aha do pangaruhni bani Jahowa sanggah hita marsahap bani na legan.

3. Domu bani Rom 10:14, attigan do hita porlu mansaritahon pasal Jahowa ampa Harajaon-Ni?

³ Songon Jesus, sadihari pe maningon sirsir do hita mansaritahon pasal Jahowa ampa Harajaon-Ni. (Mat. 24:14; basa Rom 10:14.) Sanggah ia roh hu tanoh on, mansaritahon hasintongan pasal Bapani do na sipontingan hu bani. (Joh. 18:37) Tapi sanggah hita marbarita, maningon ipingkirhon hita do homa sonaha parsahapta. Jadi sanggah hita mangkorjahon ai, maningon “lamlam ampa hormat ma” hita. Porlu do homa ipingkirhon hita pangahap ni halak ampa aha na ihaporsayai sidea. (1 Ptr. 3:15) Anggo ibahen hita sonai, gabe hona ma bani uhur ni sidea aha na iajarhon hita.

4. Domu bani Podah 9:9, aha do na boi ibahen hita laho mangurupi na legan?

 ⁴ Anggo dong sanina atap botou na porlu ipodahi, maningon ra ma sintua marsahap pakon sidea. Tontu maningon ipilih sintua ma panorang na sosok ase ulang maila sanina atap botou ai. Dear do sidea marsahapi sanggah sahalaksi ia. Maningon marusaha ma sintua patuduhkon ihargai sidea do halak ai. Tapi ulang malang sidea patugahkon prinsip ni Bibel na boi mangurupisi mangkorjahon na dear. (Basa Podah 9:9.) Mase maningon barani hita mangkorjahon na sisonai? Pardiateihon hita ma dua contoh: Sada bapa na maningon pasingatkon anak-anakni, ampa sada naboru na porlu pasingatkon sada halak na laho gabe raja.

5. Sanggah nattigan do si Eli lang marsahap hape maningon marsahap do ia?

⁵ Dong dua anak ni Sintua ni Malim Eli janah holong tumang uhurni bani sidea. Haduasi sidea mangidangi gabe malim i Tabernakel. Hassi pe sonai, lang parduli anakni ai bani Jahowa. Isalahgunahon do jabatanni. Iapasi sidea do galangan na laho ibere bani Jahowa janah ihorjahon sidea do homa parriah-riahon. (1 Sam. 2:12-17, 22) Sasintongni maningon iparonti do sidea gabe malim. Janah mangihutkon Titah ni si Musa, maningon matei do haduasi sidea. Tapi pitah ipodahi si Eli dassa sidea janah ipaturut do sidea totap mangidangi i Tabernakel. (5 Mus. 21:18-21) Sonaha ma pangahap ni Jahowa mangidah ai? Nini ma bani malim Eli, ‘Mase sangapan anakmu hun Bangku ibahen ho?’ Ujungni iuhum matei ma anakni ai.​—1 Sam. 2:29, 34.

6. Aha do na iparlajari hita humbani si Eli?

⁶ Hunjon dapot hita ma parlajaran na ponting. Anggo dong hasoman atap kaluarganta na lepak pambahenanni, maningon barani do hita pasingatkon ia. Dob ai, patugah ma anggo ia maningon mangindo pangurupion bani sintua. (Jak. 5:14) Ulang ma hita songon si Eli na mambahen sangapan kaluargani atap hasomanni humbani Jahowa. Tongon, maningon barani do hita pasingatkon hasoman na lepak pambahenanni. Hassi pe sonai, dear do holi hasilni. Pardiateihon ma sada contoh humbani sada naboru Israel na margoran si Abigail. Legan do na ibahen ia humbani na ibahen si Eli.

7. Mase si Abigail maningon marsahap hubani si Daud?

⁷ Halak na bayak tumang do suami ni si Abigail. Si Nabal do goranni. Sanggah si Daud  pakon hasomanni lintun humbani Raja Saul, iurupi sidea do parmahan ni si Nabal manjaga biribirini ase ulang irampok. Ai ihargai si Nabal do pangurupion ni sidea ai? Lang. Sanggah si Daud mangindo ase ibere si Nabal otik sipanganon ampa bah hu bani pakon hasomanni, isorgang janah iapasi si Nabal do sidea. (1 Sam. 25:5-8, 10-12, 14) Ujungni, laho ma si Daud pakon hasomanni laho mamunuh ganup dalahi i rumah ni si Nabal. (1 Sam. 25:13, 22) Sonaha ase ulang saud ai? Mintor laho ma si Abigail manjumpahi si Daud ampa 400 hasomanni ai. Barani do ia manjumpahi sidea na loheian ampa na ringisan ai halani mambotoh maningon marsahap do ia bani si Daud.

8. Aha do na boi iparlajari hita humbani si Abigail?

⁸ Sanggah jumpah si Abigail pakon si Daud, barani anjaha hormat do ia marsahap pakonsi. Janah mangelek do ia ase ra si Daud manangar hatani. Mangaku salah do ia bani si Daud hassi pe lang salahni ai. Ipuji ia do si Daud janah pos do uhurni urupan ni Jahowa do ia. (1 Sam. 25:24, 26, 28, 33, 34) Songon si Abigail, maningon barani ma hita pasingatkon hasoman ase ulang sompat ia mambahen dousa na banggal. (Pod. 25:12) Tapi hormat ma hita sanggah pasingatkon ia. Anggo ra hita mambere podah na madear bani hasoman, on patuduhkon tongon do hita hasomanni.​—Pod. 27:17.

9-10. Aha do na porlu idingat sintua sanggah sidea mamodahi sanina atap botou?

⁹ Sintua pe maningon barani do sidea marsahap laho pasingatkon sanina atap botou i kuria na mambahen panlanggaron. (Gal. 6:1) Tongon, jolma na lang gokan dear do sintua ai janah ra do porlu homa ipodahi. Tapi ulang ma halani ai gabe lang ra sidea pasingatkon sanina atap botou na porlu ipatorsa-torsa. (2 Tim. 4:2; Tit. 1:9) Sanggah sintua  mamodahi, maningon sabar anjaha marusaha ma sidea ase podahni ai hona bani uhurni. Halani holong, tontu marusaha do sintua mangurupi sanina botou i kuria. (Pod. 13:24) Tapi na sipontingan ibahen sidea ai ma laho pasangapkon goran ni Jahowa, mangihutkon aturan-Ni, janah manjaga kuria ase totap borsih.​—Lah. 20:28.

¹⁰ Jadi domma iulas hita attigan do hita porlu marsahap. Tapi sipata porlu do homa hita sip. Aha ma na mambahen lang urah mangkorjahon ai?

11. Limbaga aha ma na igunahon si Jakobus laho patuduhkon porlu manrajai pamangan, janah mase sosok ai?

¹¹ Ra do lang urah manrajai pamanganta. Si Jakobus sahalak panurat ni Bibel mangkatahon, “Anggo adong na so marsalah bani sahap, ai ma halak na gokan dear, na boi manrantei haganup angkulani.” Ibahen ia ma limbaga na domu hujai. (Jak. 3:2, 3) Somalni ibahen tali kokang bani babah ni huda ase boi siajak huda mangatur langkah ni huda ai atap marsuruh huda ai maronti. Anggo lang ijolom ia kokang ai, boi ma gabe lintun huda ai janah bahaya do on hu bani pakon hudani. Sonai ma homa anggo lang irajai hita pamanganta, parohkon bahaya do ai. Ulas hita ma piga-piga situasi na patuduhkon ponting tumang do hita manrajai pamanganta.

12. Sanggah attigan do porlu irajai hita pamanganta?

¹² Aha ma na ibahen ham anggo dong hasoman na lang boi patugahkon hatorangan na ibotoh sidea? Umpamani anggo jumpah ham pakon hasoman na tading i nagori na manlarang horja parambilanonta, ai isungkuni ham do ia pasal sonaha horja parambilanonta ijai ibobahon? Sedo na sihol manunsahi sidea ase isungkun ham sonai hu bani. Holong do uhurta bani sanina botou ijai. Janah sihol do hita  mambotoh situasi ni sidea. Leganni ai sihol do homa hita manonggohon sidea. Hassi pe sonai, maningon irajai hita do pamanganta. Anggo ipaksa hita hasomanta ai patugahkon aha na lang boi isaritahon ia, on patuduhkon anggo hita lang mangkaholongisi, sonai homa sanina botou na tading ijai. Hape domma pos uhur ni sidea anggo hasomanta ai lang ra patugah-tugahkon pasal parambilanon ijai. Jadi ulang ma ibahen hita lambin sunsah sanina botounta na tading i nagori sisonai. Hasomanta na mangidangi i nagori sisonai pe tontu lang ra patugahkon hatorangan pasal sonaha Saksi ijai marbarita ampa martumpu.

13. Songon na ipatugah bani Podah 11:13, aha do na maningon ibahen sintua, janah mase?

¹³ Ponting tumang do homa ase sintua mandalankon sipasingat na isurat bani Podah 11:13. (Basa.) Ulang ma ipatugah sintua hatorangan bani halak na lang dong hakni mambotoh ai. Tapi bani sintua na dob marhajabuan, ra do lang urah mangkorjahon on. Tongon, maningon gati do sidea marsarita pakon pasanganni, patugahkon pangahapni bei ampa holsoh ni uhurni ase lambin toguh parhajabuanni. Tapi ibotoh sintua do homa anggo sidea lang boi patugahkon “rusia” ni kuria hubani istrini. Anggo ilanggar sidea on, lang porsaya be holi halak hu bani janah gabe maseda ma goranni. Ia halak na marugas i kuria, lang boi “sipardua hata”. (1 Tim. 3:8) Artini lang marosuh ia margosip. Anggo holong do uhurni bani istrini, tontu lang ra ia patugahkon aha pe na lang porlu ibotoh istrini.

14. Sonaha do istri ni sintua boi mangurupi suamini ase totap dear goranni?

¹⁴ Istri ni sintua pe boi mangurupi suamini ase totap dear goranni. Halani ai, ulang ma ipaksa ia suamini patugahkon aha pe na lang boi isaritahon. Anggo idalankon ia ai, on patuduhkon lang pitah iurupi ia suamini. Tapi taridah do anggo ia mangkargai halak na marsarita hubani suamini ai. Na sipontingan, tontu malas do uhur ni Jahowa mangidahsi halani dihut do ia manjaga hadameion ampa hasadaon i kuria.​—Rom 14:19.

15. Sonaha pangahap ni Jahowa mangidah tolu hasoman ni si Job, janah mase?

¹⁵ Humbani buku Job, bahat do na boi iparlajari hita pasal sonaha janah attigan do hita porlu marsahap. Dob si Job manaron piga-piga parlajouan, roh ma hasomanni laho mangapoh anjaha mamodahisi. Tolu humbani sidea na ompat ai goranni si Elipas, si Bildad, pakon si Sopar. Dokah do sidea sip bei. Hape dob marsahap taridah ma sanggah na sip ai sidea, sedo mamingkirhon sonaha carani mangurupi si Job. Tapi na ipingkirhon sidea sonaha mambuktihon anggo si Job domma lepak pambahenanni. Tongon, adong do hata ni sidea ai na sintong. Tapi bahatan do na lang sintong na ihatahon sidea pasal si Job pakon Jahowa. Kasar do parsahap ni sidea anjaha ituduh do si Job ai halak na jahat. (Job 32:1-3) Sonaha ma pangahap ni Jahowa mangidah ai? Manggila tumang ma Jahowa bani sidea na tolu ai. Ihatahon do sidea ai halak na oto. Anjaha isuruh do sidea ase mangindo bani si Job laho manonggohon sidea.​—Job 42:7-9.

16. Parlajaran aha ma na dapot hita humbani si Elipas, si Bildad, pakon si Sopar?

¹⁶ Dong piga-piga parlajaran na boi idapot hita humbani si Elipas, si Bildad, pakon si Sopar. Na parlobei, ulang ma iuhumi hita sanina botounta. (Mat. 7:1-5) Tapi paima marsahap, dear ma lobei hita manangihon. Dob ai pe ibotoh hita sonaha do situasi ni sidea na sasintongni. (1 Ptr. 3:8) Na paduahon, dear ma  parsahapta, anjaha maningon na sintong ma na ihatahon hita. (Ep. 4:25) Na patoluhon, ipardiateihon Jahowa do aha pe na ihatahon hita hubani halak na legan.

17. Aha do na boi iparlajari hita humbani si Elihu?

¹⁷ Si Elihu ma dalahi na paompatkon na mangidah si Job. Hade-hade ni si Abraham do ia. Sanggah si Job pakon tolu dalahi ai marsahap, dear tumang do si Elihu manangihon. Halani ai, gabe boi ma ia mamodahi si Job humbani bujur ni uhurni. Hasilni, gabe ibotoh si Job ma lepak do pingkiranni. (Job 33:1, 6, 17) Na sipontingan bani si Elihu ai ma laho pasangapkon Jahowa, sedo dirini, atap pe halak na legan. (Job 32:21, 22; 37:23, 24) Humbani si Elihu, ibotoh hita ma dong do panorangni sip janah dear manangihon. (Jak. 1:19) Gabe ibotoh hita use, sanggah mamodahi, pasangapkon Jahowa do na sipontingan banta, sedo pasangapkon dirinta.

18. Sonaha hita patuduhkon anggo hita mangkargai sibere-bere humbani Naibata?

¹⁸ Sibere-bere na maharga do pamanganta. Sada cara na sidearan laho patuduhkon anggo hita mangkargai sibere-bere ni Naibata anggo idalankon hita podah ni Bibel pasal attigan janah sonaha dearni hita marsahap. Raja Salomo mangkatahon, “Doskon jambu omas na i atas ni pinggan pirak do, hata na niluarhon topat bani panorangni.” (Pod. 25:11) Anggo dear hita manangihon sanggah marsahap halak, janah ipingkirhon hita lobei hata na laho sisahapkonon, gabe songon jambu omas ai ma jengesni hatanta. Jadi lang soal bahat atap otik pe na ihatahon hita, andohar ma ai boi patoguhkon halak na legan anjaha mambahen megah uhur ni Jahowa.​—Pod. 23:15; Ep. 4:29.