1. Aha do na iparentahkon Jesus bani susianni? (Tonggor ma gambar sampul.)

BANI borngin paima matei Jesus, ibere ia ma parentah bani susianni. Ia mangkatahon, “Songon holong ni uhurhu bannima, sonai ma marsihaholongan hanima.” Nini use, “Hunjon ma botohon ni ganup halak susianku hanima, anggo marsihaholongan hanima.”​—Joh. 13:34, 35.

2. Mase hita maningon marsihaholongan?

² Jesus mangkatahon tangkas do ibotoh halak ise susianni anggo sidea patuduhkon holong songon na dob ibahen ia. Marlaku do parentah ai ronsi sonari. Halani ai maningon marsihaholongan ma homa hita hassi pe sipata lang urah mangkorjahon ai.

3. Aha do na laho iulas hita bani artikel on?

³ Halani lang gokan dear, ra do sipata lang urah patuduhkon holong humbani gok ni uhurta. Tapi maningon marusaha ma hita maniru Kristus. Bani artikel on iparlajari hita ma holi anggo hita patuduhkon holong, gabe iurupi ma hita mardamei pakon na legan, lang manonggor jumbak, janah rosuh manjalo tamu. Jadi sanggah iparlajari nasiam artikel on, sungkun ma dirimu, ‘Sonaha ahu boi mangusihi sanina botou na totap patuduhkon holong hassi pe dong tantangan?’

4. Domu bani Mateus 5:23, 24, mase maningon marusaha hita mardamei pakon hasoman na masogam hubanta?

⁴ Ipatugah Jesus do mase maningon mardamei hita pakon hasoman na masogam hubanta. (Basa Mateus 5:23, 24.) Ia mangkatahon anggo hita sihol pamalaskon uhur ni Jahowa, maningon marusaha ma hita totap mardear pakon sanina botounta. Malas tumang uhur-Ni anggo ibahen hita sonai. Tapi lang marosuh Ia hubanta anggo totap borit uhurta janah lang marusaha mardamei pakon sidea.​—1 Joh. 4:20.

5. Mase pangahapni sada sanina lang urah laho mardamei pakon na legan?

⁵ Ra, nini uhurta lang urah mardamei pakon na legan. Mase? Pardiateihon ma na masa bani si Markus. * Dong sanina na pasambor-samborhon ia i kuria. Gabe borit ma uhur ni si Markus. Aha ma na ibahen ia? Nini ma, “Mintor hugilai ma ia.” Tapi dobkonsi ai, gabe manosal ma si Markus. Mangaku salah ma ia bani sanina ai janah marusaha ase mardear pakonsi. Hassi pe sonai lang ra sanina ai. Nini uhur ni si Markus ma, ‘Mase pala marusaha ahu mardamei, anggo ia pe lang ra?’ Tapi iojur sintua kaliling ma ase ulang marnaloja ia laho mardamei pakon sanina ai. Aha ma na ibahen si Markus?

6. (a) Sonaha si Markus laho mardamei pakon hasomanni? (b) Sonaha ia mandalankon podah bani Kolosse 3:13, 14?

⁶ Sanggah irimangi si Markus sonaha parlahouni sadokah on, ibotoh ia ma sipata pangahapni pintoran dirini marimbangkon na legan. Sobali ai, dong homa gijang uhurni. Halani ai marusaha ma ia mubah. (Kol. 3:8, 9, 12) Martoruh ni uhur ma ia manjumpahi sanina ai janah mangaku salah ma ia. Itulis ia ma surat laho patuduhkon manosal tumang do ia janah sihol ase sidea boi mardear use. Ibere do homa hadiah bani sanina ai. Tapi,  totap do sanina ai lang ra mardamei. Hassi pe sonai, idalankon si Markus do parentah ni Jesus. Marusaha do ia mangkaholongisi janah manasap hasalahanni. (Basa Kolosse 3:13, 14.) Hassi pe dong halak na lang ra mardamei pakon hita, totap ma ihaholongi hita ia songon na dob ibahen Jesus. Isasap hita ma hasalahan ni sidea janah itonggohon hita ma ase boi mardamei use pakon sidea.​—Mat. 18:21, 22; Gal. 6:9.

7. (a) Podah aha do na ibere Jesus hubanta? (b) Tantangan aha do na iahapkon sada botou?

⁷ Jesus mangojur bahen hita ma bani halak domu bani na pinindo ni uhurta ase ibahen halak banta. Janah ulang ma pitah hasoman na marholong ni uhur hubanta na ihaholongi hita. (Luk. 6:31-33) Sonaha porini dong hasoman na lang ra manisei hita? On ma na masa bani si Lara, hasomanta naboru. Ia mangkatahon, “Dong sada hasoman na lang ra manisei ahu hape lang hubotoh salahku. Gabe pusok ma uhurhu janah marayoh do ahu hu partumpuan.” Nini uhur ni si Lara ma, ‘Lang adong na lepak hubahen. Janah ibotoh sanina botou i kuria memang sonai do parlahouni.’

8. Aha ma na ibahen si Lara laho mardamei pakon hasomanni, janah aha ma parlajaranni hubanta?

⁸ Hassi pe sonai marusaha do si Lara laho mardamei. Martonggo ma ia janah ijumpahi ma hasomanni ai. Isahapkon sidea ma masalahni. Dob ai, mardear ma sidea anjaha marsidahopan. Nini si Lara ma, “Tapi dob ai, iulakkon ia do mambahen sisonai hubangku. Borit tumang uhurhu.” Mungkahni iagan si Lara ma gabe sonang uhurni anggo hasomanni ai mangubah parlahouni. Tapi iarusi ia ma maningon bujur do ia tongtong hu bani janah ‘manasap dousa’ ni hasomanni ai. Ai ma na sidearan na boi ibahen ia. (Ep. 4:32–5:2) Idingat si Lara ma na ihatahon Bibel anggo holong ai “seng ipadingat-dingat na jahat. Bani haganup do ia tahan, haganup do ihaporsayai, haganup do iarapkon, sabar do ia manaron haganup”. (1 Kor. 13:5, 7) Lang be pusok uhurni si Lara. Ujungni, gabe basar ma hasomanni ai hu bani. Anggo marusaha nasiam mardamei pakon sanina botou janah tongtong  bujur bani sidea, pos ma uhurmu “ihasomani Naibata parholong anjaha pardamei in ma nasiam”.​—2 Kor. 13:11.

9. Domu bani Lahoan 10:34, 35, mase lang boi hita manonggor jumbak?

⁹ Naibata na so manonggor jumbak do Jahowa ai. (Basa Lahoan 10:34, 35.) Anggo hita lang manonggor jumbak, talar ma anak-Ni do hita. Ihaholongi hita do hasoman songon dirinta, janah marusaha do hita ase totap mardamei pakon sanina botounta.​—Rom 12:9, 10; Jak. 2:8, 9.

10-11. Aha do na mambahen sada botou gabe mubah pingkiranni?

¹⁰ Tapi ra do adong halak na lang urah mangkorjahon ai. Pardiateihon hita ma na masa bani si Rut. Sanggah dakdanak ia, dong sada naboru hun nagori na legan na sambor tumang parlahouni hubani kaluargani. Halani ai, nini si Rut ma, “Sogam tumang uhurhu bani nagori ai. Huahap, sonai do parlahouni ganup halak ijai tarmasuk ma sanina botou.” Aha ma na ibahen si Rut ase ulang lalab sonai pangahapni?

¹¹ Ibotoh si Rut do lang boi ia sonai. Jadi ibasa ia ma laporan pasal nagori ai hun Buku Tahunan. Ia mangkatahon, “Marusaha ma ahu mambotoh aha na dear pasal sidea. Hurimangi ma haringgason ni sidea mangidangi Jahowa. Gabe tangkas ma bangku sanina botounta do sidea ganup.” Dob ai, ibotoh si Rut ma porlu do ia patuduhkon holong. Ia mangkatahon, “Sanggah jumpah ahu pakon sanina botou hun nagori ai, basar ma ahu bani sidea ase boi ahu lambin mananda sidea.” Aha ma hasilni? Nini si Rut ma, “Ujungni lang be masogam uhurhu mangidah sidea.”

12. Parlahou na sonaha do na maningon iubah si Sara?

¹² Ra do adong na lang mambotoh halak sitonggor jumbak do ia. Umpamani iagan si Sara ma anggo ia lang manonggor jumbak halani lang ongga ia manguhumi halak halani warna kulitni, habayakonni, atap pe tanggung jawabni i kuria. Tapi ihatahon ia ma, “Gabe hubotoh ma sitonggor jumbak do hape ahu.” Mase sonai hatani? Gijang do sikolah ni si Sara ampa ganup kaluargani. Jadi rosuhan ma ia marsaor pakon halak na gijang homa sikolahni. Ongga do ihatahon ia sonon bani hasomanni, “Pitah bani sanina botou na gijang sikolahni do ahu ra marsaor. Lang huhasomani na lang gijang sikolahni.” Tangkas ma maningon iubah si Sarah do parlahouni ai. Sonaha carani?

13. Aha ma na iparlajari hita humbani pangalaman ni si Sarah?

¹³ Dong ma sintua kaliling na mangurupisi. Nini si Sarah ma, “Ipuji ia do ahu halani ringgas mangidangi, dear mambere komentar, ampa mangarusi ayat-ayat ni Bibel. Dob ai ihatahon ia homa leganni marlajar, porlu do homa ipatuduh hita parlahou na madear, songon toruh ni uhur ampa habujuran.” Jadi idalankon si Sarah ma podah ni sintua kaliling ai. Nini si Sarah use, “Tongon, ponting tumang do hita patuduhkon habujuran ampa holong ni uhur.” Ujungni, mubah ma parlahouni bani sanina botou. Nini use, “Marusaha ma ahu mambotoh mase sidea ihaholongi Jahowa.” Hita pe, ulang ma halani sikolahta gabe iahap hita gijangan dirinta marimbangkon na legan. Anggo “marholong ni uhur [hita] bani hasoman”, tontu marusaha do hita ase ulang manonggor jumbak.​—1 Ptr. 2:17.

14. Domu bani Heber 13:16, sonaha do pangahap ni Jahowa anggo ra hita manjalo tamu?

¹⁴ Malas do uhur ni Jahowa anggo ra hita manjalo tamu. (Basa Heber 13:16.) Anggo  ra hita mangurupi hasoman na mamorluhon, marosuh ma Jahowa mangidah hita. (Jak. 1:27; 2:14-17) Bani Bibel iojur do hita ase ‘mangkaporluhon partamueion’. (Rom 12:13) Anggo rosuh hita manjalo tamu, taridah ma halak na parduli janah parholong do hita. Jahowa sihol ase hita mambere sipanganonta, siinumon, atap pe panorangta hubani sidea. (1 Ptr. 4:8-10) Tapi ra do lang urah mangkorjahon ai.

15-16. (a) Mase dong halak malang uhurni manjalo tamu? (b) Aha do na ibahen si Edit ase marosuh ia manjalo tamu?

¹⁵ Ra do malang uhurta manjalo tamu halani situasinta. Pardiateihon ma pangalaman ni si Edit, sada hasomanta na dob mabalu. Sanggah lape gabe Saksi, lang sai marosuh ia marsaor pakon halak. Pangahapni sosokan ma na legan manjalo tamu marimbangkon ia.

¹⁶ Dob gabe Saksi si Edit, mubah ma parlahouni ai. Marusaha ma ia ase rosuh manjalo tamu. Ia mangkatahon, “Sanggah ipajongjong Balei Harajaonnami, ipatugah sada sintua ma bangku dong suami istri na sihol mangurupi horja ai. Isungkun ia ma ahu atap na boi do sidea tading i rumahku sadokah dua minggu. Hudingat ma ipasu-pasu Jahowa do sada naboru na dob mabalu hun Sarpat.” (1 Raj. 17:12-16) Mintor ra ma si Edit manjalo sidea. Ai dapotsi do pasu-pasu halani ai? Nini si Edit ma, “Malas tumang uhurhu halani lang pitah dua minggu sidea tading i rumah, tapi dua bulan do. Sadokah panorang ai, lambin orot ma parhasomanannami.” Gabe tambah ma hasoman ni si Edit ai i kuria. Sonari domma gabe parintis biasa ia. Dob salosei mangidangi, malas do uhurni mangontang hasomanni mardinas roh hu rumahni. Ia mangkatahon, “Gabe malas do uhurhu halani rosuh marsibere bere, janah bahat do pasu-pasu na hudapot halani ai.”​—Heb. 13:1, 2.

17. Aha do na isadari si Lukas pakon istrini?

¹⁷ Ra do sadokah on, domma rosuh hita manjalo tamu. Tapi, ai ra do hita manjalo ganupan, sedo pitah na orot pakon hita?  Umpamani, halak na rosuh manjalo tamu do saninanta si Lukas pakon istrini. Somal do iontang sidea namatorasni, hade-hadeni, huan-huanni, ampa sintua kaliling pakon istrini. Tapi nini si Lukas ma, “Hape sadokah on, pitah na orot pakon hanami dassa na iontang hanami.” Jadi, aha ma na ibahen si Lukas dob mambotoh ai?

18. Aha do na ibahen si Lukas pakon istrini laho maniru Jahowa sanggah manjalo tamu?

¹⁸ Idingat sidea ma na ihatahon Jesus on, “Anggo holong uhurnima pitah bani na marholong ni uhur bennima, aha ma upahnima?” (Mat. 5:45-47) Gabe ibotoh sidea ma aha do artini rosuh manjalo tamu ai. Maningon itiru sidea do Jahowa na bujur bani haganup. Jadi, iontang sidea ma sanina botou na lape ongga iontang hu rumahni. Nini si Lukas ma, “Malas tumang do uhurnami ganupan. Gabe marsiojuran ma hanami janah lambin orot pakon Jahowa.”

19. Sonaha hita patuduhkon anggo hita susian ni Jesus, janah aha do na sihol bahenonmu?

¹⁹ Domma iulas hita anggo ipatuduh hita holong ni uhur humbani gok ni uhurta, gabe iurupi ma hita mardamei pakon na legan, lang manonggor jumbak, janah rosuh manjalo tamu. Jadi ulang ma sai idingat-dingat hita hahurangan ni sanina botou. Tapi marusaha ma hita mangkaholongi sidea humbani gok ni uhurta. Anggo sonai ibahen hita, gabe malas ma uhurta janah taridah ma tongon do hita susian ni Jesus.​—Joh. 13:17, 35.