1-2. Ise do na boi mangurupi parlajar Bibel mambahen hamajuon ronsi ia ididi?

SI AMY na tading i Fiji mangkatahon, “Marosuh tumang do ahu marlajar Bibel. Pos do uhurhu on do hasintongan ai. Tapi dobkonsi marsaor ahu pakon sanina botou i kuria, ijai ma lambin bahat ahu mambahen hamubahon janah ididi.” Humbani pangalaman ni si Amy dapot hita ma parlajaran na ponting tumang: Bahat do parlajar Bibel ra mambahen hamajuon janah ididi halani ganup sanina botou i kuria mangurupi sidea.

² Ganup do hita i kuria boi mangurupi sasahalak mambahen hamajuon ronsi ia ididi. (Ep. 4:16) Si Leilani, perintis na tading i Vanuatu mangkatahon, “Somal do ijon ihatahon ase dakdanak dear marparlahou ronsi magodang, maningon dihut do halak sahutani mangurupi ia.” Artini lang sungkup pitah kaluargani na mangajari dakdanak ai. Maningon dear do homa guru ampa hasomanni mangajarisi ase boi dakdanak ai bujur ronsi magodang. Nini si Leilani use, “Sonai ma homa sanggah hita mangurupi halak gabe susian ni Jesus. Ganup do hita i kuria dihut mangurupi ia.” Jadi ganup do sanina botou i kuria boi mamodahi ampa mangojur ia, janah mambahen siusihan na madear. Ai do na mangurupi sidea mambahen hamajuon janah ididi.​—Pod. 15:22.

3. Aha do na boi iparlajari hita humbani na ihatahon si Ana, si Dorin, pakon si Leilani?

³ Mase ma ra hita iurupi hasoman na legan sanggah hita mangajari parlajar Bibelta? Si Ana, perintis istimewa i Moldova mangkatahon, “Sasintongni bahat do na porlu ibahen laho mangurupi sahalak parlajar Bibel mambahen hamajuon. Halani ai, lang sungkup pitah guruni na mangurupisi.” Si Dorin, perintis  istimewa na tading i nagori ai mangkatahon, “Lang husangka gati do hatorangan tambahan na ibere hasoman boi patoguhkon uhur ni parlajar Bibelta.” Si Leilani mangkatahon, “Sanggah ididah parlajar Bibel holong tumang ganup parbarita hu bani, janah parduli homa, gabe porsaya ma ia tongon-tongon do hita susian ni Jesus.”​—Joh. 13:35.

4. Aha do na laho iulas hita bani artikel on?

⁴ Ra do sungkun-sungkun ham, ‘Sonaha ma ahu boi mangurupi parlajar Bibel mambahen hamajuon anggo sedo ahu guruni?’ Ulas hita ma aha do na porlu ibahen hita sanggah iarahkon hasoman hita mangajari parlajar Bibelni, aha na porlu ibahen hita sanggah roh sidea martumpu, ampa sonaha sintua mangurupi sahalak parlajar Bibel mambahen hamajuon ronsi ididi.

5. Aha do na boi ibahen hita sanggah iarahkon hasoman hu parlajar Bibelni?

⁵ Anggo adong hasomanta na dong parlajar Bibelni, sasintongni tanggung jawabni do mangurupi parlajar Bibelni ai mangarusi isi ni Bibel. Tapi anggo iarahkon hita hu parlajar Bibelni, urupi ma ia. (Par. 4:9, 10) Sonaha hita boi mangurupi hasomanta ai?

6. Sanggah iarahkon hasoman hita hu parlajar Bibelni, sonaha hita boi mandalankon prinsip na dong bani Podah 20:18?

⁶ Bahen ma persiapan. Na parlobei, boi ma isungkun hita ia pasal parlajar Bibelni ai. (Basa Podah 20:18.) Boi do isungkun ham, “Aha do ugamani, janah sonaha kaluargani? Topik na ija do na laho iulas nasiam? Humbani topik ai, aha do na sihol iajarhon ham? Aha do na lang boi hubahen atap huhatahon sanggah marlajar hita? Sonaha ahu boi mangurupi parlajar Bibelmu ai mambahen hamajuon?” Ra do lang ipatugah ia ganup pasal parlajar Bibelni ai. Hassi pe sonai, aha pe na isaritahon ia boi do ai mangurupi ham laho mambotoh sonaha carani mangurupi parlajar Bibelni. Sonai ma na ibahen si Joy, hasomanta naboru na mangidangi gabe misionaris. Jadi paima sidea marlajar, ipatugah ia do pasal parlajar Bibelni hubani hasomanni. Jadi nini ma, “Halani hubahen sonai gabe ibotoh hasomanku ma pasal parlajar Bibelku. Janah ibotoh ia ma aha do na laho ihatahon laho mangurupi parlajar Bibelku.”

7. Sanggah iarahkon hasoman hita hu parlajar Bibelni, mase hita porlu mambahen persiapan?

⁷ Sanggah iarahkon hasoman hita hu parlajar Bibelni, dear do anggo ibahen hita persiapan. (Esr. 7:10) Sanina Dorin na ipatugah nongkan ai mangkatahon, “Malas tumang uhurhu anggo ibahen hasomanku lobei persiapan paima hanami hu parlajar Bibelku.” Anggo itonggor parlajar Bibel ai guruni pakon hasomanni dear mambahen persiapan, gabe tarojur ma homa ia mambahen na sisonai. Tapi, porini lang sompat ibasa ham ganup parlajaran ai, dear do anggo ipingkirhon ham aha do intini parlajaran ai.

8. Aha do na porlu ibahen hita ase dear hita mambobahon tonggo sanggah marlajar Bibel?

 ⁸ Bani parlajaran Bibel ipungkah do ai pakon itutup marhitei tonggo. Halani ai, dear ma anggo ipingkirhon ham lobei aha na laho ihatahon ham ibagas tonggo sanggah isuruh ham mambobahon tonggo. (Ps. 141:2) Si Hanae na tading i Jepang mangkatahon torus do dingat ia aha na ihatahon hasoman ni guruni sanggah martonggo. Nini do, “Humbani tonggoni ai gabe hubotoh ma dohor tumang do ia hubani Jahowa. Sihol do ahu ase sonai homa tonggongku. Huahapkon ma holong tumang do ia bangku halani isobut goranku ibagas tonggoni.”

9. Domu bani Jakobus 1:19, aha do na porlu ibahen hita sanggah iarahkon hasoman hu parlajar Bibelni?

⁹ Urupi ma hasomanta sanggah mambobahon parlajaran Bibel. Sahalak perintis istimewa na margoran si Omamuyovbi, na tading i Nigeria mangkatahon, “Sanggah iarahkon hasoman hita hu parlajar Bibelni, dear ma tangihon aha na iulas ia pakon parlajar Bibelni. Tapi, sanggah mambere komentar, ulang gabe hita na bahatan marsahap marimbangkon ia. Halani sasintongni guruni ai do na mambobahon parlajaran Bibel.” Sonaha ma carani ase ibotoh hita attigan do hita porlu mambere komentar tambahan? (Pod. 25:11) Dear ma tangihon aha na iulas sidea. (Basa Jakobus 1:19.) Holi gabe ibotoh ham ma aha na porlu ihatahon janah attigan do panorang na topat laho mambere hatorangan tambahan. Tapi, dong do na porlu idingat ham. Umpamani, ulang ma bahattu marsahap atap pe ulang isampangi ham guruni sanggah ia patorangkon. Ulang homa iulas ham topik na legan. Tapi boi ma ibahen ham limbaga atap sungkun-sungkun na boi mangurupi parlajar Bibel ai lambin mangarusi intini parlajaran ai. Sipata ra do itonggor ham domma iarusi ia parlajaran ai. Jadi iahap ham lang porlu ibere ham hatorangan tambahan. Hassi pe sonai, anggo ipuji ham parlajar Bibel ai, janah totap ham basar hu bani, on boi mangurupi ia mambahen hamajuon.

10. Aha do gunani sanggah isaritahon hita pangalamanta hubani sidea na marlajar Bibel?

¹⁰ Saritahon ma pangalamanmu. Boi do homa isaritahon ham pangalamanmu sonaha do mulani ham mambotoh hasintongan. Tantangan aha do na ongga iahapkon ham janah sonaha Jahowa mangurupi ham. (Ps. 78:4, 7) Anggo isaritahon ham pangalaman sisonai, ra do ai boi mangurupi parlajar Bibel ai ase lambin toguh haporsayaonni janah gabe barani ma ia mambahen parubahan, dobkonsi ai ididi. Anjaha gabe ibotoh ia ma homa aha na porlu ibahen sanggah dong tantangan. (1 Ptr. 5:9) Si Gabriel na tading i Brasil janah sonari gabe perintis mangkatahon bahat do gunani na idapot ia halani marlajar Bibel. Nini ma, “Dobkonsi hutangar pangalaman ni sanina botou,  gabe hubotoh ma sasintongni itonggor Jahowa do sanggah hita marsitaronon. Janah, iurupi Jahowa do sanina botou ai. Ahu pe gabe porsaya iurupi Jahowa do homa ahu sanggah marsitaronon.”

11-12. Sanggah roh parlajar Bibel hu partumpuan, mase maningon ialo-alo hita sidea?

¹¹ Ase parlajar Bibel ai boi mambahen hamajuon, maningon taratur do ia roh hu partumpuan. (Heb. 10:24, 25) Ra, domma iontang guruni ia roh hu partumpuan. Jadi, sanggah roh ia hu Balei Harajaon, ganup do hita boi mangalo-alo ia. Sonaha carani?

¹² Alo-alo ma sidea. (Rom 15:7) Anggo ialo-alo hita parlajar Bibel na roh hu partumpuan, ra do gabe tarojur use ia ase roh martumpu. Halani ai, basar ma hita sanggah mangalo-alo sidea janah patandahon hita ma homa sidea hubani sanina botou na legan. Parsahapkon ma sidea halani ra do lape roh guruni, atap ra do adong tugas ni guruni i Balei Harajaon. Dobkonsi ai, dear ma tangihon sanggah marbuali nasiam pakon parlajar Bibel ai. Aha ma hasilni anggo ibahen hita sonai? Pardiateihon ma pangalaman ni si Dmitrii, na domma ididi piga-piga tahun na salpu janah sonari gabe siparugas i kuria. Ihatahon ma sonaha pangahapni sanggah parlobei sahali ia roh hu partumpuan. Nini ma, “Dong sada sanina na manonggor ahu i darat ni Balei Harajaon. Itonggor ia ma songon na lang pag ahu masuk. Mintor ijumpahi ia ma ahu janah iarahkon ma ahu masuk. Bahat tumang do na manisei ahu. Malas tumang uhurhu. Dob ai, gabe sihol ma ahu ase roh use hu partumpuan. Lang ongga huahapkon na sisonai i ianan na legan.”

13. Aha do hasilni anggo ibahen hita siusihan na dear?

¹³ Bahen ma siusihan na dear. Anggo itonggor sahalak parlajar Bibel parlahounta na madear, ra do lambin porsaya ma ia tongon-tongon do hita susian ni Jesus. (Mat. 5:16) Si Vitalii, sahalak perintis na tading i Moldova mangkatahon, “Hutonggor do bujur-bujur halak i kuria. Ai ma na mambahen ahu porsaya Saksi Jahowa on do ugama na sintong.”

14. Anggo ibahen hita siusihan na dear, sonaha do ai boi mangurupi sasada halak mambahen hamajuon?

¹⁴ Ase sasada halak boi ididi, maningon idalankon ia do aha na iparlajari ia. Ra do lang urah pangahapni mandalankon ai. Tapi anggo itonggor parlajar Bibel ai bahat do gunani banta halani mandalankon prinsip ni Bibel, ra do gabe tarojur ia mangkorjahon na sarupa. (1 Kor. 11:1) Pardiateihon hita ma aha na ihatahon si Hanae. Nini do, “Idalankon sanina botou do na iparlajari sidea humbani Bibel. Humbani sidea ma gabe hubotoh sonaha do ahu boi mangojur na legan, manasap salah ni hasoman, ampa patuduhkon holong. Sai na madear  do na ididah sidea humbani halak na legan. Gabe tarojur do ahu mangusihi sidea.”

15. Sonaha prinsip na dong bani Podah 27:17 boi mangurupi hita laho marhasoman pakon parlajar Bibel na dob somal martumpu?

¹⁵ Marusaha ma hita gabe hasomanni. Anggo domma somal parlajar Bibel ai martumpu, totap ma patuduh anggo hita parduli hu bani. (Pil. 2:4) Marusaha ma hita ase boi gabe hasomanni. Umpamani anggo itonggor ham dong parubahan na ibahen ia, puji ma ia. Sanggah marbuali nasiam, boi ma isungkun ham ia pasal parlajaranni, kaluargani, atap pe horjani. Tapi jaga ma ase ulang isungkuni hita pasal aha na so porlu botohonta. Anggo gati ham marbuali pakonsi, lambin orot ma nasiam. Ai ma na mangurupi ia boi mambahen hamajuon janah ididi. (Basa Podah 27:17.) Si Hanae sonari domma mangidangi gabe perintis biasa. Idingat ia ma sonaha pangahapni sanggah parlobei sahali ia roh hu partumpuan. Nini ma, “Halani bahat hasomanku i kuria, gabe marosuh ma ahu martumpu. Age pe loja ahu, totap do ahu martumpu. Jadi lambin urah ma huahap ase lang marsaor be pakon hasomanku na lang sisombah Jahowa. Sihol tumang do ahu ase dohor bani Jahowa pakon sanina botou na legan. Ai ma na mangojur ahu ase ididi.”

16. Aha ope na porlu ibahen hita ase boi iahapkon parlajar Bibel maharga do ia i kuria?

¹⁶ Anggo parlajar Bibel ai domma mambahen hamajuon, urupi ma ia ase boi mangahapkon maharga do ia i kuria. Carani, tongtong ma patuduh habujuron. (Heb. 13:2) Si Denis na tading i Moldova mardingat aha do na ongga ibahen sanina botou sanggah marlajar Bibel ope ia. Nini ma, “Sanggah sanina botou i kuria mambahen acara ramah tamah, iontang do ahu pakon istringku hu acara ai. Ijai ma hutangar saritani sanina botou sonaha Jahowa mangurupi sidea sanggah dong parsoalanni. Gabe ipatoguh ma uhurhu, janah sihol ma ahu mangidangi Jahowa. Pos do uhurhu anggo hubahen sonai bahat do pasu-pasu na hujalo bani ari simagira.” Leganni ai, anggo parlajar Bibel ai domma gabe parbarita na lape ididi, boi do homa iarahkon hita ia marbarita. Si Diego na tading i Brasil mangkatahon, “Bahat do sanina botou na mangarahkon ahu marbarita. Halani ai lambin hutanda ma sidea janah bahat do homa na boi huparlajari. Lambin dohor ma huahap bani Jahowa pakon Jesus.”

17. Sonaha sintua boi mangurupi parlajar Bibel?

¹⁷ Pasirsir ma panorang laho mangurupi parlajar Bibel. Holong na ipatuduh sintua hubani sahalak parlajar Bibel, boi mangurupisi mambahen hamajuon janah ididi. Jadi, sanggah roh parlajar Bibel hu partumpuan, dear do anggo marbuali sintua pakon sidea. Anggo idingat nasiam goran ni sidea, tarlobih ma sanggah parlobei sahali sidea mambere komentar, gabe iahapkon sidea ma parduli do nasiam hu bani.  Leganni ai, boi do homa iatur nasiam panorang laho mangkasomani hasomanta mangajari parlajar Bibelni. Dear tumang do hasilni anggo ibahen nasiam sonai. Si Jackie sahalak perintis na tading i Nigeria mangkatahon, “Bahat do parlajar Bibelku na tarsonggot dob ibotoh sidea sintua do hape hasoman na huboan hu rumahni. Dong sada parlajar Bibelku na mangkatahon, ‘Lang ongga ibahen pastornami sonai. Pitah hu rumah ni halak na bayak dassa sidea roh atap hu rumah ni halak na ra mambere amplop na tobal!’” Sonari parlajar Bibelni ai domma roh hu partumpuan.

18. Sonaha sintua boi mandalankon podah na dong bani 1 Petrus 5:2?

¹⁸ Latih anjaha patoguh ma parbarita na dong parlajar Bibelni. Ponting tumang do ase sintua mangurupi ganup parbarita ase lambin dear marbarita ampa mangajari halak marlajar Bibel. (Basa 1 Petrus 5:2.) Dear do anggo nasiam na mambobahon parlajaran ai porini adong parbarita na maila mambobahon parlajaran Bibel sanggah sintua hasomanni. Si Jackie na ipatugah nongkan ai mangkatahon, “Gati do isungkun sintua pasal parlajar Bibelku. Anggo husaritahon tantanganku sanggah mambobahon parlajaran Bibel, ibere sidea ma podah laho mangurupi ahu.” Jadi, bahat do na boi ibahen sintua laho patoguhkon ampa mangojur sanina botou na dong parlajar Bibelni. (1 Tes. 5:11) Nini si Jackie use, “Marosuh tumang ahu sanggah dong sintua na mamuji ahu. Songon bah borgoh ibagas milas ni ari do ai huahap. Halani ipuji sidea ahu, gabe pos ma uhurhu domma hubahen na sidearan sanggah mambobahon parlajaran Bibel. Gabe lambin tambah ma malas ni uhurhu.”​—Pod. 25:25.

19. Aha do na boi mambahen ganup hita marmalas ni uhur?

¹⁹ Hassi pe lape adong parlajar Bibelta, tapi ganup do hita boi mangurupi sasada halak mambahen hamajuon ronsi ididi. Jadi, anggo iarahkon hasoman hita hu parlajar Bibelni, dear do anggo ibahen hita lobei persiapan. Janah sanggah mambere komentar tambahan, ulang ma bahattu hita marsahap. Boi do homa marusaha hita gabe hasomanni parlajar Bibel ai sanggah roh sidea hu partumpuan. Anjaha bahen ma siusihan na dear. Leganni ai, dear do homa anggo sintua mambere panorang laho marbuali ampa mangojur parlajar Bibel. Latih janah puji ma sanina botou na dong parlajar Bibelni. Tontu malas tumang uhurta anggo dihut hita ganupan mangurupi sasada halak ase mangkaholongi janah mangidangi Jahowa.