1. Aha do na boi ibahen garama i kuria?

SASINTONGNI, bahat do na boi ibahen garama i kuria. Gogoh ope hanima. (Pod. 20:29) Jadi, bahat do na boi ibahen hanima laho mangurupi sanina botou i kuria. Ra do sihol uhurnima mangidangi gabe siparugas. Tapi ra do adong sanina botou na mangahap maposotu ope hanima, janah lape marpangalaman. Jadi iahap sidea ma lape sosok hanima mandapot tanggung jawab i kuria. Hassi pe sonai, dong do na boi ibahen hanima ase porsaya sidea anggo hanima boi mandalankon tanggung jawab i kuria.

2. Aha do na laho iulas hita bani artikel on?

² Bani artikel on, iulas hita ma holi pangalaman ni Raja Daud ampa dua raja Juda, ai ma si Asa pakon si Josafat. Holi iulas hita ma tantangan aha do na iahapkon sidea janah sonaha sidea mangatasi ai. Dobkonsi ai, iulas hita use aha do na boi iparlajari ganup garama humbani sidea.

3. Sonaha na maposo boi mangurupi na matua i kuria?

³ Humbani poso ope si Daud, orot do parhasomananni pakon Jahowa. Anjaha marbakat do homa ia marmusik. Halani ai, igunahon ia ma hapandeianni ai laho mangurupi Raja Saul. (1 Sam. 16:16, 23) Sonai homa do na maposo i kuria, tontu  dong bei do hapandeiannima. Halani ai, boi do igunahon hanima hapandeianmu laho mangurupi halak na legan. Umpamani, ra do itonggor hanima dong na matua i kuria na porlu iurupi laho manggunahon henpon atap tabletni laho marlajar Bibel ampa martumpu. Anggo ra hanima mangurupi sidea, gabe malas ma uhur ni sidea.

4. Sifat aha ma na boi itiru na maposo humbani si Daud? (Tonggor ma gambar sampul.)

⁴ Halak na ringgas do si Daud janah dear mandalankon tugasni. Humbani na ihatahon ia bani Raja Saul taridah ma sasintongni marbahaya do tugasni ai. Nini si Daud do, “Somal do jabolonmu on marmahan biri-biri ni bapani; anggo roh singa barang gipul mambuat biri-biri hun bani hulanan ai, huayak ma ia anjaha hubogbog, anjaha hupaluah ma biri-biri ai hun babahni.” (1 Sam. 17:34, 35) Tangkas ma barani do si Daud janah dear ia mandalankon tugasni laho manjaga biri-biri ni bapani. Hanima na maposo, boi do homa itiru hanima si Daud. Dear ma horjahon tugas aha pe na ibere bannima.

5. Domu bani Podah 3:32, aha do na maningon ibahen garama?

⁵ Orot do homa parhasomanan ni si Daud pakon Jahowa. Hassi pe halak na barani ia janah pandei marmusik, tapi parhasomananni pakon Jahowa do na sipontingan ibagas goluhni. Lang pitah Naibatani Jahowa ai, tapi huan-kuanni do homa. (Basa Podah 3:32.) Sonai homa hanima garama, patoguh ma parhasomananmu pakon Jahowa. Anggo ibahen hanima sonai, ra do gabe ibere bannima lambin bahat tugas i kuria.

6. Aha do na ihatahon halak pasal si Daud?

⁶ Ijia, bahat do na mangahap maposotu ope si Daud janah lang martanggung jawab. Hassi pe sonai, lang gabe maretek ni uhur ia halani ai. Umpamani, ituduh abangni do si Daud lang dear mandalankon tugasni. (1 Sam. 17:26-30) Leganni ai, sanggah ipindo si Daud hubani si Saul ase ia na marporang manlawan si Goliat, Nini si Saul do bani, “Parana ope ho.” (1 Sam. 17:31-33) Tapi lang sonai pangahap ni Jahowa hu bani. Hassi pe poso ope si Daud, tapi halani marpangunsandeian ia hubani Jahowa, boi ma italuhon ia si Goliat.​—1 Sam. 17:45, 48-51.

7. Aha do na boi iparlajari garama humbani si Daud?

⁷ Aha do na boi iparlajari hanima humbani si Daud? Maningon sabar do hanima. Ra do iagan sanina botou dakdanak ope  hanima halani domma itanda sidea hanima humbani etek-etek nari. Hape sasintongni domma banggal hanima. Tapi dingat ma lang sonai pangidah ni Jahowa bamu. Dear tumang do itanda Ia hanima. Anjaha ibotoh Ia do aha na boi ihorjahon hanima. (1 Sam. 16:7) Halani ai, patoguh ma parhasomananmu pakon Naibata. Ai do homa na ibahen si Daud. Gati do ia mangidah tompaon ni Jahowa. Hunjai gabe lambin itanda ia ma paruhuran ni Jahowa. (Ps. 8:4, 5; 139:14; Rom 1:20) Leganni ai, pindo ma hagogohon bani Jahowa. Umpamani, ai dong do hasomanmu i sikolah na mangejek halani Saksi Jahowa ai hanima? Anggo adong, martonggo ma bani Jahowa ase iurupi Ia hanima mangatasi ai. Anjaha dalankon ma haganup na iparlajari hanima humbani Bibel pakon publikasi na ipasirsir organisasi. Anggo iahapkon hanima sonaha Jahowa mangurupi hanima sanggah dong tantangan, lambin porsaya ma hanima hu Bani. Anjaha anggo itonggor sanina botou tongtong hanima marondos hubani Naibata, lambin porsaya ma sidea halak na martanggung jawab do hanima.

8-9. Aha do na mangurupi si Daud ase sabar paimahon boi mamarentah gabe raja, anjaha aha do na boi iparlajari garama humbani si Daud?

⁸ Pardiateihon hita ma tantangan na legan na iahapkon si Daud. Dobkonsi iminaki gabe raja, ronsi martahun-tahun do ia paimahon ase boi mamarentah i Juda. (1 Sam. 16:13; 2 Sam. 2:3, 4) Aha do na mangurupi ia ase sabar paimahon? Sai tongtong do ipingkiri ia aha na boi ihorjahonsi. Jadi lang ra ia maretek ni uhur. Umpamani, sanggah si Daud tading i nagori ni halak Palistim halani iparburu si Saul ia, marporang do ia manlawan munsuh ni halak Israel. Halani sonai ibahen ia, gabe ilinggomi ma batas daerah ni halak Juda.​—1 Sam. 27:1-12.

⁹ Aha ope na boi iparlajari garama humbani si Daud? Horjahon hanima ma aha pe na boi ibahen hanima laho mangurupi sanina botou. Pardiateihon ma pangalaman ni hasomanta na margoran si Rikardo. * Sanggah remaja, marcita-cita do ia gabe perintis biasa. Tapi nini sintua lape boi. Hassi pe sonai lang maretek ni uhur ia. Marusaha do ia ase lambin pandei ibagas pangidangion. Nini do, “Anggo hurimang-rimangi, bahat do parubahan na porlu hubahen. Umpamani, marusaha do ahu manrohi ganup kunjunganku janah paima ai, hubahen do lobei persiapan. Ujungni, adong ma na ra marlajar Bibel bangku. Halani lambin ringgas mangidangi, gabe barani ma ahu sanggah marbarita.” Sonari domma gabe perintis biasa si Rikardo, janah gabe siparugas homa i kuria.

10. Aha do lobei na ibahen si Daud paima mambahen sada haputusan?

¹⁰ Pardiateihon hita ma use pangalaman ni si Daud. Sanggah ia pakon hasomanni tading i Palistim halani marponop humbani si Saul, laho ma sidea marporang janah itadingkon ma kaluargani i rumah. Sanggah na laho ai sidea, roh ma panamun janah iboan ma istri pakon niombah ni sidea. Halani domma marpangalaman si Daud marporang, boi do namin ibahen ia rencanani laho paluahkon kaluargani sidea. Tapi lang sonai ibahen ia. Ipindahi do lobei panogu-noguan humbani Jahowa. Marhitei Malim Abyatar isungkun si Daud ma Jahowa, nini ma, “Dear do pardakdakonku panamun ai?” Ihatahon Jahowa ma maningon iayak si Daud do panamun ai, janah boi do ipaluah ia kaluargani. (1 Sam. 30:7-10) Aha ma na boi iparlajari hanima humbani sarita ai?

11. Aha do na porlu ibahen hanima paima mambahen haputusan?

¹¹ Ulang ma podas-podas mambahen haputusan.  Sungkun ma lobei pandapot ni namatorasmu. Atap boi do homa ipindo hanima podah humbani sintua. “Sibere-bere” humbani Jahowa do sintua i kuria. (Ep. 4:8) Pos do uhur-Ni hubani sidea. Halani ai, hanima pe boi do homa porsaya hubani sintua. Anggo itiru hanima haporsayaon ni sidea janah idalankon hanima podahni, gabe marhasil ma goluhnima. Sonari ulas hita ma siusihan humbani Raja Asa.

12. Sonaha do sifat ni Raja Asa sanggah ia mamarentah?

¹² Poso ope si Asa sanggah mamarentah gabe raja manggantihon bapani, ai ma si Abia. Hassi pe sonai, halak na toruh maruhur do ia anjaha barani. Umpamani, barani do ia manripaskon ganup gana-gana i nagorini. Janah ‘iparentahkon do halak Juda mangindahi Jahowa, Naibata ni ompung ni sidea, anjaha mangkorjahon titah pakon tonah-Ni’. (2 Kron. 14:1-7) Leganni ai, sanggah roh si Sisera ampa 1.000.000 tentarani laho mandorab halak Juda, mintor martonggo do si Asa bani Jahowa laho mangindo pangurupion. Nini do, “Ham Jahowa, seng dong sobali Ham, na boi mangurupi halak na so margogoh marimbang halak na gogoh. Sai urupi Ham ma hanami, Ham Jahowa, Naibatanami; ai marpangunsandeian Bamu do hanami.” Hunjai taridah ma porsaya tumang do si Asa boi do ilinggomi Jahowa sidea. Halani ai, “italuhon Jahowa ma halak Etiopia ai”.​—2 Kron. 14:8-12.

13. Aha do ujungni na masa hubani si Asa, janah mase?

¹³ Tontu mabiar do si Asa sanggah roh 1.000.000 tentara laho mandorab bangsani. Tapi halani marpangunsandeian bani Jahowa, monang ma si Asa. Hassi pe sonai, sanggah roh use tantangan na legan, lang marondos be ia bani Jahowa. Umpamani, sanggah roh Raja Baesa hun Israel mamorangi sidea, bani Raja Aram do si Asa mangindo pangurupion. Gabe sambor ma ujungni! Marhitei nabi Hanani ihatahon Jahowa ma bani si Asa, “Halani marpangunsandeian ham hubani raja Aram, seng marpangunsandeian ham hubani Jahowa, Naibatamu, maluah ma bala ni raja Aram hun tanganmu.” Humbani ari ai, sai lalab do marporang si Asa sadokah goluhni. (2 Kron. 16:7, 9; 1 Raj. 15:32) Aha ma parlajaranni?

14. Sonaha hanima patuduhkon anggo hanima marpangunsandeian bani Jahowa, janah anggo ibahen hanima sonai aha ma hasilni, domu bani 1 Timoteus 4:12?

 ¹⁴ Totap ma martoruh ni uhur janah marpangunsandeian hubani Jahowa. Sanggah ididi, taridah ma porsaya do hanima hubani Jahowa. Anjaha malas ma uhur-Ni halani ipilih hanima gabe Saksi-Ni. Tapi, maningon tongtong ma hanima marpangunsandeian hu Bani. Ra, mintor marpangunsandeian bani Jahowa do hanima sanggah laho mambahen haputusan na banggal. Tapi maningon totap do hanima marpangunsandeian bani Jahowa sanggah mamilih hiburan, parhorjaan, atap pe mambahen cita-cita. Ulang ma mangihutkon pingkiranmu sandiri. Tapi, pindahi ma prinsip ni Bibel na sosok pakon situasimu janah dalankon ma ai. (Pod. 3:5, 6) Anggo ibahen hanima sonai, gabe malas ma uhur ni Jahowa anjaha gabe porsaya ma sanina botou i kuria halak na martanggung jawab do hanima.​—Basa 1 Timoteus 4:12.

15. Domu bani 2 Kronika 18:1-3; 19:2, hasalahan aha ma na ibahen Raja Josafat?

¹⁵ Halani lang sempurna, ganup do hita ongga mambahen hasalahan. Hassi pe sonai, ulang ma halani ai gabe lang ra hanima mambahen na sidearan ibagas pangidangion. Pardiateihon ma pangalaman ni Raja Josafat. Sasintongni, bahat do sifatni na dear. Sanggah poso ope, “ipindahi uhurni do Naibata ni bapani anjaha marparlahou do ia domu hubani tonah-Ni”. Dob ai, isuruh ia do pejabatni hu huta-huta Juda laho mangajarhon pasal Jahowa bani rayatni. (2 Kron. 17:4, 7) Hassi pe sonai, ongga do piga-piga hali ibahen ia hasalahan. Halani ai, isuruh Jahowa ma nabi-Ni laho pasingatkonsi. (Basa 2 Kronika 18:1-3; 19:2.) Aha ma na boi iparlajari hanima humbani sarita ai?

16. Aha do na boi iparlajari hanima humbani pangalaman ni si Rajab?

¹⁶ Jalo anjaha dalankon ma podah na ibere bannima. Ra do iahap hanima lang urah mambahen pangidangion na sipontingan ibagas goluhnima. Bahat do homa na maposo na sonai pangahapni. Tapi, ulang ma maretek ni uhur. Pardiateihon hita ma pangalaman ni si Rajab. Mardingat sanggah remaja hinan, ihatahon ia ma, “Sanggah ai, lang hubotoh aha do na sipontingan ibagas goluhku. Rosuhan do ahu marolahraga pakon marsonang-sonang marimbangkon martumpu atap pe marbarita.” Tapi aha ma na mangurupi si Rajab? Dong sada  sintua na parduli hu bani, janah ipodahi ma ia. Nini si Rajab ma, “Iulas sintua ai ma bangku prinsip na dong bani 1 Timoteus 4:8.” Toruh maruhur do si Rajab mandalankon podah ai, janah ipingkirhon ia ma use aha do na sipontingan ibagas goluhni. Nini ma, “Jadi hubahen ma pangidangion na sipontingan ibagas goluhku.” Sonaha hasilni? Nini use, “Dob piga-piga tahun, ilantik ma ahu gabe siparugas i kuria.”

17. Sonaha do pangahap ni sanina botou mangidah ganup garama na mangidangi Jahowa?

¹⁷ Tontu malas ma uhur ni ganup sanina botou i kuria anggo “sauhur” ganup garama mangidangi rap pakon sidea! (Sep. 3:9) Malas do uhur ni sidea mangidah haringgasonnima mangkorjahon tugas aha pe na ibere bannima. Tontu marosuh do sidea mangidah hanima.​—1 Joh. 2:14.

18. Domu bani Podah 27:11, sonaha do pangahap ni Jahowa bani ganup garama na mangidangi-Si?

¹⁸ Dingat ma, holong tumang do uhur ni Jahowa bannima janah pos do uhur-Ni bamu. Ihatahon Ia do anggo bani panorang parpudi bahat do juakjuak-Ni na maposo songon tentara na ra mangidangi-Si. (Ps. 110:1-3) Porsaya do Jahowa holong tumang do uhurmu hu Bani, janah sihol do hanima mambahen na sidearan ibagas pangidangion. Halani ai, totap ma sabar sanggah mangurupi na legan, janah sabar ma homa porini lape ibere tugas i kuria. Anggo ipinsang hanima halani mambahen hasalahan, jalo ma ai. Dingat ma, humbani Jahowa do pinsang-pinsang ai. (Heb. 12:6) Totap ma ringgas mangkorjahon tugas aha pe na ibere bannima. Anjaha na sipontingan, aha pe na ihorjahon hanima bahen ma ase megah uhur ni Jahowa.​—Basa Podah 27:11.