1. Domu bani Mateus 24:9, mase lang heran hita sanggah bahat halak na marsogam ni uhur banta?

ITOMPA Jahowa do hita ase boi mangkaholongi halak janah sihol do homa uhurta ihaholongi. Jadi, sanggah dong na marsogam ni uhur banta, tontu borit ma pangahapta janah ra do gabe mabiar hita. Umpamani, si Regina na tading i Eropa mangkatahon, “Sanggah marumur 14 tahun, ihasogamkon inang do ahu halani mangidangi Jahowa. Gabe lang maharga huahap diringku. Janah ragu do ahu ai tongon do dear na huhorjahon on.” * Sanina Danylo mangkatahon, “Sanggah ibogbogi tentara ahu, iejek, janah iancam halani Saksi Jahowa ahu, gabe mabiar ma ahu janah maila.” Tongon, sanggah sonai situasinta tontu borit tumang uhurta. Tapi lang heran hita halani ongga do ihatahon Jesus bahat do halak na marsogam ni uhur hubanta.​—Basa Mateus 24:9.

2-3. Mase bahat halak marsogam ni uhur hubani susian ni Jesus?

² Bahat do halak na marsogam ni uhur hubani susian ni Jesus. Mase? Halani songon Jesus, lang “hun dunia on” hita. (Joh. 15:17-19) Halani ai, age pe hormat hita hubani pamarentah, tapi pitah Jahowa dassa na isombah hita. Jadi, lang ra hita salut hubani lambang-lambang negara. Porsaya do hita pitah Jahowa dassa na marhak mamarentah ganup jolma. Tapi anggo Sibolis pakon ganup na mangirikkonsi lang sonai. (1 Mus. 3:1-5, 15) Ipatugah hita do pitah Harajaon ni Naibata dassa na boi pasaloseihon ganup parsoalan i dunia on. Anjaha lang piga dokah nari ropukan ni Naibata do sagala pamarentahan na manlawan  Harajaon-Ni. (Dan. 2:44; Pangk. 19:19-21) Barita na madear do on bani ganup halak na lamlam maruhur. Tapi, barita na sambor do on bani parjahat.​—Ps. 37:10, 11.

³ Masogam do homa halak mangidah hita halani hita marparlahou domu bani harosuh ni Naibata. Anggo dunia on sambor tumang do parlahouni. Umpamani, bahat do halak sonari lang maila patuduhkon parlahou na butak. Hape halani parlahou na sisonai do hinan iripaskon Naibata kota Sodom pakon Gomora! (Jud. 7) Jadi, halani lang ra hita mangihutkon parlahou ni sidea ai, gabe iejek ma hita janah ihatahon ma ganjil parlahounta.​—1 Ptr. 4:3, 4.

4. Aha do na boi mangurupi hita ase totap toguh sanggah dong na marsogam ni uhur hubanta?

⁴ Sanggah dong na marsogam ni uhur banta, sonaha hita boi martahan? Sai pos ma uhurta urupan ni Jahowa do hita. Songon gantar, haporsayaonta boi ‘mangintopi haganup panah apuy ni parjahat’. (Ep. 6:16) Tapi lang sungkup haporsayaon tumang. Porlu do homa ipatuduh hita holong. Mase? Anggo dong holong banta, “seng urah marah” hita. Gabe boi ma hita manaron hasunsahan aha pe. (1 Kor. 13:4-7, 13) Sonari ulas hita ma sonaha holong hubani Jahowa, sanina botou, pakon munsuh, boi mangurupi hita totap martahan hassi pe dong na marsogam ni uhur banta.

5. Sonaha holong hubani Jahowa mangurupi Jesus totap martahan?

⁵ Bani borngin paima matei Jesus ihatahon ia do bani susianni, “Holong do uhurhu bani Bapa in, [halani ai] sonaha ihatahon Bapa in, sonai do huhorjahon.” (Joh. 14:31) Halani mangkaholongi Jahowa, gabe iurupi ma ia manaron bahat parlajouan. Anggo holong uhurta bani Jahowa, gabe boi ma homa hita mambahen na sisonai.

6. Sonaha pangahapni juakjuak ni Jahowa sanggah dong na marsogam ni uhur bani sidea?

⁶ Halani mangkaholongi Naibata, gabe iurupi ma juakjuak-Ni totap martahan sanggah iparburu. Umpamani, bani abad na parlobei, ilarang pambobai ugama ni Jahudi do apostel-apostel marbarita. Tapi, halani mangkaholongi Naibata, gabe ‘balosan do sidea bani Naibata marimbangkon jolma’. (Lah. 5:29; 1 Joh. 5:3) Holong sisonai do homa na mangurupi sanina botou sonari on. Bahat do hita na iparburu pamarentah. Age pe sonai lang maretek ni uhur hita. Hasangapon do iahap hita sanggah dong na marsogam ni uhur hubanta.​—Lah. 5:41; Rom 5:3-5.

7. Sanggah dong tantangan humbani kaluarga, sonaha ma namin pambahenanta?

⁷ Sanggah ibotoh kaluarga hita marlajar pasal Jahowa, ra do gabe iahap sidea hita domma ipakahou, atap pe domma podouan. (Bandingkon Markus 3:21.) Halani ai gabe manggila tumang ma sidea hubanta. Tantangan na borat do on halani roh humbani kaluarga. Tapi lang tarsonggot hita halani ongga do ihatahon Jesus, “Hasomanni sarumah do gabe munsuh bani Jolma in.” (Mat. 10:36) Age pe sonai, lang ihira hita sidea munsuhta. Mase? Halani anggo lambin banggal holongta hubani Jahowa, tontu lambin banggal ma holongta hubani jolma. (Mat. 22:37-39) Hassi pe sonai lang ra hita papeolhon titah ni Naibata atap pe prinsip ni Bibel halani sihol pamalaskon uhur ni jolma.

8-9. Aha do na mangurupi si Regina sanggah dong tantanganni?

⁸ Pardiateihon hita ma pangalaman ni si Regina, na ipatugah nongkan ai. Totap do toguh ia age pe bahat tantangan roh humbani inangni. Ia mangkatahon, “Mungkahni, rap marlajar Bibel do hanami nadua pakon Saksi Jahowa. Dob onom bulan sihol ma ahu roh hu partumpuan. Tapi mintor manggila tumang  ma inang. Hubotoh ma domma pajumpah ia pakon halak na murtad, janah porsaya do ia bani na ihatahon sidea. Ai do homa na ipadas inang hubangku. Ijambak ma ahu, isongkik, janah itimpalhon ma buku-bukungku. Dob marumur 15 tahun, ididi ma ahu. Tapi totap do marusaha inang ase hutadingkon Jahowa. Jadi ipamasuk ma ahu hu rehabilitasi. Ijai bahat do remaja na marmasalah, songon parminum-minum, ampa parnarkoba. Borat tumang do huahap tantangan on halani roh humbani halak na seharusni mangkaholongi janah manjaga ahu.”

⁹ Aha do na mangurupi si Regina totap martahan? Nini do, “Sanggah na manggila ai inang, baru pe salosei hubasa ganup isi ni Bibel. Halani ai, gabe pos ma uhurhu on do hasintongan ai. Gabe lambin dohor ma huahap bani Jahowa. Jadi gati ma ahu martonggo, anjaha itangihon Ia do tonggongku. Sanggah kaluar ahu hun rehabilitasi ai, dong ma sada hasomanta naboru mangontang ahu hu rumahni. Ijai rap marlajar Bibel ma hanami. Jadi bani panorang ai, ipatoguh sanina botou i kuria do uhurhu. Ibahen sidea do ahu songon kaluargani. Hunjon tangkas ma huidah daoh do gogohan Jahowa humbani ganup munsuhta.”

10. Aha do na tongtong laho bahenon ni Jahowa hubanta?

¹⁰ Apostel Paulus manuratkon lang adong na boi mambahen “sirang hita humbani holong ni uhur ni Naibata, na ibagas Kristus Jesus Tuhanta in”. (Rom 8:38, 39) Age pe maningon manaron hasunsahan hita, sai ihasomani Jahowa do hita janah ipargogohi. Pangalaman ni si Regina patuduhkon iurupi Jahowa do homa hita marhitei hasoman sahaporsayaonta.

11. Sonaha holong na ipatugah Jesus bani Johannes 15: 12, 13 boi mangurupi susianni? Bahen ma contoh.

¹¹ Bani borngin paima matei Jesus, iparentahkon ia do ase marsihaholongan susianni. (Basa Johannes 15:12, 13.) Anggo marsihaholongan sidea, gabe boi ma sidea totap marsada janah martahan age pe bahat halak na marsogam ni uhur bani sidea. Pardiateihon ma siusihan na ibahen kuria i Tessalonika. Mulai jongjong pe kuria ai, domma bahat tantanganni. Hassi pe sonai, gabe siusihan do sanina botou ijai halani totap setia anjaha marsihaholongan. (1 Tes. 1:3, 6, 7) Tapi iojur si Paulus do ase lambin banggal ipatuduh sidea holongni ai. (1 Tes. 4:9, 10) Halani holong,  gabe tarojur ma sidea mangapoh na maretek ni uhur janah patoguhkon na galek. (1 Tes. 5:14) Humbani surat ni si Paulus na paduahon hu kuria ai, taridah do idalankon sidea podahni ai. Itulis si Paulus do, “Martambah do holong ni uhur ni ganup nasiam samah nasiam.” (2 Tes. 1:3-5) Halani marsihaholongan, gabe boi ma sidea totap martahan manaron hasunsahan ampa sanggah iparburu.

12. Sanggah masa porang, sonaha sanina botounta i sada nagori patuduhkon holong?

¹² Pardiateihon ma pangalaman ni si Danylo pakon istrini. Sanggah masa porang i hutani, totap do sidea martumpu ampa marbarita. Marbagi sipanganon do homa sidea pakon sanina botou na legan. Tapi bani sada ari, sompong ma roh tentara hu rumah ni si Danylo. Nini ma, “Ipaksa sidea ma ahu ase ulang be gabe Saksi Jahowa. Halani lang ra ahu, mintor ibogbogi sidea ma ahu, janah ibahen do pistol hu ulukku. Paima laho, iancam sidea ma ahu janah ihatahon roh do use sidea laho memperkosa istringku. Tapi, mintor podas do roh sanina botou mangalop hanami anjaha itaruhkon ma hanami hu stasiun kereta api ase pindah hu kota na legan. Sai hudingat do holong na ipatuduh sidea bannami. Daskonsi hanami i kota ai, mintor roh ma sanina botou ijai mamboan sipanganon janah iurupi do hanami mandapot horja ampa rumah. Hasilni, gabe boi ma homa hanami mangurupi hasomanta na legan na mengungsi halani porang.” Pangalaman ai patuduhkon anggo marsihaholongan hita, gabe boi ma hita martahan sanggah dong na marsogam ni uhur hubanta.

13. Sonaha tonduy na pansing mangurupi hita totap mangidangi Jahowa age pe dong na masogam banta?

¹³ Iparentahkon Jesus do ase susianni mangkaholongi munsuhni. (Mat. 5:44, 45) Ai urah do mangkorjahon ai? Tontu lang. Tapi boi do idalankon hita ai anggo ipatuduh hita buah ni tonduy songon holong, hasabaron, habujuron, halamlamon, ampa panrajaion diri. (Gal. 5:22, 23) Anggo ipatuduh hita sifat-sifat na dear ai, iurupi tonduy na pansing ma hita ase boi martahan sanggah dong na marsogam ni uhur hubanta. Bahat do halak lang be marsogam ni uhur dobkonsi mangidah suami, istri, niombah, atap pe hasomanni patuduhkon sifat-sifat na dear ai. Anjaha bahat do homa sidea na gabe Saksi Jahowa i pudian ni ari. Anggo iahap ham lang urah mangkaholongi halak na marsogam ni uhur bamu halani Saksi Jahowa ai  ham, martonggo ma mangindo tonduy na pansing. (Luk. 11:13) Anjaha porsaya ma pitah mangkorjahon titah ni Jahowa dassa dalan na sidearan.​—Pod. 3:5-7.

14-15. Sanggah dong tantangan humbani suamini, sonaha Rom 12:17-21 mangurupi si Jasmin totap patuduhkon holong?

¹⁴ Pardiateihon ma pangalaman ni si Jasmin, na tading i Timur Tengah. Sanggah gabe Saksi Jahowa ia, iagan suamini ma domma ipakahou ia. Halani ai marusaha ma suamini ase ia lang be mangidangi Naibata. Ihina suamini do ia janah iarahkon do homa kaluarga, pambobai ni ugama, ampa dukun laho mangancam si Jasmin. Ihatahon ma anggo si Jasmin domma mansedai kaluarga. Ra do homa suamini ai marsuraki mangapasi sanina botou sanggah martumpu sidea. Gati ma tangis si Jasmin halani pambahenan ni suamini ai.

¹⁵ Tapi, sanggah i Balei Harajaon iapoh anjaha ipatoguh sanina botou do si Jasmin. Sintua pe mangojur ia ase mandalankon podah na isurat bani Rom 12:17-21. (Basa.) “Borat tumang do on,” nini si Jasmin. “Tapi martonggo do ahu ase iurupi Jahowa. Marusaha do ahu mambahen na sidearan laho mandalankon prinsip ni Bibel. Jadi, sanggah isampakkon suamiku tanoh hu dapurnami, hupaborsih do ai. Sanggah ihina ia ahu, lamlam do ahu mambalosi. Anjaha sanggah boritan ia, dear do huurus.”

16-17. Aha do na boi iparlajari hita humbani pangalaman ni si Jasmin?

¹⁶ Bahat do pasu-pasu na ijalo si Jasmin halani totap ia mangkaholongi suamini. Ia mangkatahon, “Gabe porsaya ma suamiku hubangku halani sai na sintong do na huhatahon. Ra do ia manangihon sanggah husaritahon pasal haporsayaonku. Anjaha marjanji do ia lang be mambahen na geor i rumah. Sonari isuruh ia do ahu ase tongtong martumpu. Lambin dear ma kaluarganami anjaha gabe damei ma i rumah. Mangarap do ahu ase i pudian ni ari ra suamiku marlajar Bibel janah boi hanami rap mangidangi Jahowa.”

¹⁷ Humbani pangalaman ni si Jasmin taridah ma boi do hita ‘martahan, mangarap, anjaha sabar manaron haganup’. (1 Kor. 13:4, 7) Jadi anggo totap ipatuduh hita holong hubani na legan, ra do lang be marsogam ni uhur sidea hubanta. Anjaha anggo totap ipatuduh hita holong, gabe malas ma uhur ni Jahowa. Tapi, age pe lalab sogam uhur ni sidea hubanta, boi do tong hita marmalas ni uhur. Sonaha carani?

18. Mase ma boi martuah hita sanggah dong na marsogam ni uhur hubanta?

¹⁸ Jesus mangkatahon, “Martuah ma hanima anggo ihasogamkon halak.” (Luk. 6:22) Tontu lang marosuh hita ihasogamkon atap pe iparburu halani haporsayaonta. Tapi, mase ma martuah hita sanggah dong na mambahen sonai? Dong tolu alasanni. Na parlobei, anggo martahan hita, gabe malas ma uhur ni Naibata. (1 Ptr. 4:13, 14) Na paduahon, gabe ipatoguh ma haporsayaonta. (1 Ptr. 1:7) Anjaha na patoluhon, dapot hita ma hagoluhan na sadokah ni dokahni bani ari simagira.​—Rom 2:6, 7.

19. Mase apostel marmalas ni uhur hape domma ilonsingi sidea?

¹⁹ Lang piga dokah dobkonsi Jesus ipapuho, iahapkon ganup apostel ma sintong do na ihatahon Jesus ai. Dob ilonsing anjaha ilarang sidea marbarita, gabe marmalas ni uhur do sidea. Mase? “Halani boi sidea manaron [hinaan] mangkopkop goran ni Jesus.” (Lah. 5:40-42) Halani holong tumang uhur ni sidea bani Guruni, lang mabiar sidea bani munsuh. Taridah do ai halani seng “marnamaronti” sidea mambaritahon ambilan na madear. Bahat do homa sanina botounta sonari on na totap setia age pe marsitaronon. Sidea mambotoh sai idingat Jahowa do holong ampa horja na ipatuduh sidea bani goran-Ni.​—Heb. 6:10.

20. Aha ma na laho iulas hita bani artikel na mangihut?

²⁰ Ronsi roh ajal ni dunia on, sai adong do na marsogam ni uhur banta. (Joh. 15:19) Tapi, ulang pala mabiar. Songon na laho iulas hita bani artikel na mangihut, ‘ipargogohi Jahowa do hita anjaha ondingan-Ni’ anggo totap hita setia. (2 Tes. 3:3) Jadi, totap ma patuduh holong hubani Jahowa, sanina botou, ampa hubani munsuhta. Anggo idalankon hita ai, gabe marsada ma hita janah lambin toguh ma haporsayaonta. Leganni ai, gabe ipasangap ma goran ni Jahowa, anjaha taridah ma daoh do gogohan Jahowa marimbangkon ganup munsuhta.