1. Sitaronon aha do ra na masa bani juakjuak ni Jahowa?

RA DO adong sitaronon ni nasiam. Umpamani, ra do adong halak i kuria na mambahen borit uhurmu. (Jak. 3:2) Atap ra do adong hasoman i sikolah atap i parhorjaan na manrisai nasiam halani mangidangi Jahowa. (1 Ptr. 4:3, 4) Ra do homa adong kaluarga na manlanglangi nasiam laho martumpu ampa marbarita. (Mat. 10:35, 36) Anggo borat tumang sitaronon ai, ra do pangahapmu laho menyerah. Tapi lang soal sitaronon aha pe na masa hubanta, pos ma uhurta ibere Jahowa do hapentaran ampa hagogohon banta ase boi manaron ganupan ai.

2. Domu bani Rom 15:4, aha do gunani anggo hita marlajar Bibel?

² Bani Bibel, dong ibahen Jahowa sitiruon na patuduhkon anggo jolma na lang sempurna boi totap martahan age pe dong sitaronon. Halani ai, boi do hita marlajar humbani sidea. Pasal ai do homa na isuratkon apostel Paulus. (Basa Rom 15:4.) Anggo ibasa hita ai, gabe ipatoguh ma hita janah dong ma pangarapanta. Tapi ase dong guna na idapot hita humbani Bibel, lang sungkup pitah mambasa tumang. Maningon ipamasuk hita do ai hubagas uhur ampa pingkiranta. Aha ma na ibahen hita ase ibotoh hita podah na sosok bani situasinta? Dong ompat cara na boi iihutkon hita: (1) Martonggo, (2) Mambayangkon, (3) Manrimangi atap mamingkiri, anjaha (4) Mandalankon. Ulas hita ma sonaha hita boi mangkorjahon ompat cara ai. * Janah iulas hita use sonaha hita manggunahon cara ai sanggah marlajar pasal Raja Daud ampa si Paulus.

3. Paima hita mambasa Bibel aha ma na porlu ibahen hita, janah mase?

 ³ (1) Martonggo. Paima mambasa Bibel, martonggo ma bani Jahowa ase iurupi hita mambotoh aha do parlajaran na boi idapot hita. Umpamani, ra do nasiam sihol manonggor podah na sosok hubani situasimu. Halani ai, pindo ma bani Jahowa ase iurupi nasiam mambotoh prinsip ni Bibel na boi mangurupi nasiam.​—Pil. 4:6, 7; Jak. 1:5.

4. Sonaha carani ase lambin menarik na ibasa hita ibagas Bibel?

⁴ (2) Mambayangkon. Ibere Jahowa do hubanta kesanggupan ase boi mambayangkon aha na ipingkirhon hita. Halani ai, ase lambin menarik na ibasa hita ai, bayangkon ma aha na masa ibagas sarita ai janah ham do tokoh ibagas sarita ai. Pingkirhon ma aha na itonggor ia ampa sonaha pangahapni.

5. Aha do na porlu irimangi hita sanggah mambasa Bibel, janah sonaha hita boi mangkorjahon ai?

⁵ (3) Manrimangi atap mamingkiri. Sanggah hita mambasa Bibel, maningon irimangi hita do aha na ibasa hita janah sonaha hita boi mandalankon ai. On boi mangurupi hita mambotoh aha do kaitanni na ibasa hita sonari on pakon na ongga iparlajari hita hinan. Hasilni, lambin bagas ma pangarusionta. Anggo hita pitah mambasa tumang, usih ma hita ai songon na patumpu-tumpuhon bumbu tumang laho marmasak. Sasintongni, maningon igiling do ganup bumbu ai janah imasak ase boi ibotoh daini sipanganon ai. Sonai ma homa hita sanggah manrimangi isi ni Bibel. Ase boi hita manrimangi isi ni Bibel, boi do ibalosi hita sungkun-sungkun on: ‘Aha do na ibahen tokoh ibagas sarita ai sanggah dong sitarononni? Sonaha Jahowa mangurupisi? Aha do na boi huparlajari humbani sarita ai sanggah dong sitarononku?’

6. Mase maningon ihorjahon hita aha na iparlajari hita?

⁶ (4) Mangkorjahon. Jesus mangkatahon anggo lang ihorjahon hita aha na iparlajari hita, usih ma ai songon sasada halak na pajongjong rumah i atas horsik. Domma loja ia marhorja tapi soya-soya do haganup. Mase? Halani sanggah roh logou na doras ampa banjir, mintor mareong ma rumah ai. (Mat. 7:24-27) Sonai ma homa, domma martonggo hita paima marlajar, ibayangkon hita saritani, janah irimangi hita. Tapi anggo lang idalankon hita na iparlajari ai, soya-soya ma haganup. Anggo roh sitaronon atap iparburu halak hita, mintor galek ma haporsayaonta. Tapi anggo ihorjahon hita aha na iparlajari hita, gabe boi ma hita mambahen haputusan na dear, damei pangahapta, anjaha gabe lambin toguh ma haporsayaonta. (Jes. 48:17, 18) Sonari ulas hita ma sonaha hita boi manggunahon ompat cara ai laho mangulas aha na boi iparlajari hita humbani si Daud.

7. Ise do tokoh ibagas Bibel na laho iparlajari hita sonari?

⁷ Ongga do hasoman atap kaluargamu mambahen borit uhurmu? Anggo sonai dear ma iulas hita sarita pasal si Daud. Ongga do borit uhurni ibahen si Absalom anakni ai. Ibahen ia do rencana na jahat laho manggantihon bapani gabe raja.​—2 Sam. 15:5-14, 31; 18:6-14.

8. Aha do na porlu bahenonmu ase iurupi Jahowa?

⁸ (1) Martonggo. Dob ai, martonggo ma bani Jahowa janah patugah ma sonaha pangahapmu sanggah dong na mambahen na lang dear bamu. (Ps. 6:7-10) Patugah ma ganup na dong ibagas uhurmu. Dob ai, pindo ma bani Jahowa ase iurupi nasiam mambotoh prinsip na ija do na boi mangurupi nasiam sanggah ibagas sitaronon.

9. Aha do na masa bani si Daud pakon si Absalom?

⁹ (2) Bayangkon ma. Bayangkon na masa bani sarita ai janah aha do pengaruhni bani  si Daud. Sadokah martahun-tahun, marusaha do si Absalom mambuat uhur ni rakyat ase marpihak hu bani. (2 Sam. 15:7) Dobkonsi jumpah panorang na dob itontuhon ia, isuruh ia ma mata-mata hu Israel laho mangarahkon rakyat ase setuju sidea ia na ilantik gabe raja. Dob ai, iarahkon si Absalom do homa hasoman ampa penasihat ni si Daud, ai ma si Ahitopel ase dihut pakonsi laho manlawan bapani. Dobkonsi si Absalom itingtingkon gabe raja, marusaha ma ia manangkap si Daud laho mamunuhsi, hape ra do boritan si Daud sanggah ai. (Ps. 41:2-10) Tapi ibotoh si Daud ma rencana ai. Janah lintun ma ia hun Jerusalem. Ujungni marporang ma tentara ni si Absalom pakon tentara ni si Daud. Talu ma tentara ni si Absalom janah tarbunuh ma ia.

10. Aha do na lang ibahen si Daud?

¹⁰ Dob ai, bayangkon hita ma sonaha pangahap ni si Daud sanggah masa ganupan ai. Sasintongni holong do uhur ni si Daud hubani si Absalom pakon si Ahitopel. Tapi jahat do pambahenan ni sidea hu bani. Marusaha do homa sidea mamunuhsi. Sasintongni boi do namin lang porsaya be si Daud bani hasomanni na legan. Janah nini uhurni domma marpihak ganup hasomanni hubani si Absalom. Atap boi do homa ia pitah mamingkirhon dirini sandiri, janah pangahapni rahanan ma ia lintun sahalaksi hun nagori ai. Atap boi do homa gabe mandolei si Daud halani ai. Tapi lang adong age sada humbani na tolu ai na ihorjahon si Daud. Totap do ia martahan age pe borat sitarononni. Aha ma na mangurupisi?

11. Aha do na ibahen si Daud sanggah dong sitarononni?

¹¹ (3) Manrimangi. Prinsip aha ma na boi iparlajari nasiam humbani sarita ai? Balosi ma sungkun-sungkun on, “Aha do na ibahen si Daud sanggah marsitaronon ia?” Totap do ia tenang janah lang tarolos ia mambahen haputusan. Lang homa torus mabiar ia. Tapi martonggo do ia bani Jahowa mangindo pangurupion. Ipindo ia do homa hasomanni laho mangurupisi. Janah mintor podas do ia mandalankon rencanani. Hassi pe borit tumang uhur ni si Daud, lang gabe mardomdom ia hubani na legan. Tapi totap do ia porsaya hubani Jahowa ampa hubani hasomanni.

12. Sonaha Jahowa mangurupi si Daud?

¹² Sonaha Jahowa mangurupi si Daud? Anggo iriset hita otik pasal ai, ibotoh hita ma ipargogohi Jahowa do si Daud ase totap martahan ibagas sitarononni. (Ps. 3:1-9) Ipasu-pasu Jahowa do haputusan na ibahen si Daud. Anjaha iurupi Jahowa do homa hasoman ni si Daud ase boi sidea manlinggomi si Daud.

13. Sonaha hita boi maniru si Daud anggo dong na mambahen borit uhurta? (Mateus 18:15-17)

¹³ (4) Mandalankon. Rimangi ma sungkun-sungkun on, ‘Sonaha ahu boi maniru si Daud?’ Anggo dong parsoalanta, mintor podas ma isaloseihon hita ai. Anjaha boi do homa iihutkon hita prinsip na ipatugah Jesus bani Mateus pasal 18. (Basa Mateus 18:15-17.) Tapi ulang ma hita tarolos mambahen haputusan sanggah marsogam ni uhur ope hita. Martonggo ma bani Jahowa ase totap hita tenang janah ibere hapentaran hubanta ase mambotoh aha na laho sibahenonta. Totap ma porsaya hubani hasoman na legan. Anjaha ra ma hita manjalo pangurupion ni sidea. (Pod. 17:17) Na sipontingan, ihutkon hita ma podah ni Jahowa na dong ibagas Bibel.​—Pod. 3:5, 6.

14. Sanggah sonaha do situasinta ase porlu iulas hita 2 Timoteus 1:12-16; 4:6-11, 17-22?

¹⁴ Ra do adong kaluargamu na marsogam ni uhur halani nasiam mangidangi Jahowa. Ra do ham tading i nagori na mambatasi atap manlarang horja parambilanonta. Anggo sonai, dear do anggo hita mangulas aha na ihatahon  bani 2 Timoteus 1:12-16 pakon 4:6-11, 17-22. * Si Paulus do manuratkon ai sanggah ibagas penjara ope ia.

15. Aha do na boi ipindo hita bani Jahowa?

¹⁵ (1) Martonggo. Paima ibasa nasiam ayat ai, martonggo ma lobei bani Jahowa. Patugah ma aha do parsoalanmu janah sonaha pangahapmu. Pindo ma bani Jahowa ase iurupi nasiam mambotoh aha do na boi iparlajari humbani si Paulus sanggah ia marsitaronon. Pindo ma homa ase iurupi nasiam mambotoh aha do na porlu bahenonmu sanggah marsitaronon.

16. Hasunsahan aha do na roh hubani si Paulus?

¹⁶ (2) Mambayangkon. Bayangkon ma anggo ham si Paulus. Irantei do ia sanggah i penjara i Rom. Domma ongga ia ipenjarahon. Tapi pangahapni, laho iuhum matei ma ia. Dong homa piga-piga hasomanni na manadingkonsi janah lang be margogoh ia.​—2 Tim. 1:15.

17. Aha do na lang ipingkirhon si Paulus?

¹⁷ Sasintongni boi do namin si Paulus marpingkir anggo lang ipilih ia hinan gabe susian ni Jesus, tontu lang ipenjarahon ia sonari. Atap ra do gabe borit tumang uhurni halani itadingkon hasomanni i Asia. Ra do homa lang be porsaya ia bani hasomanni na legan. Tapi lang sonai pingkiran ni si Paulus. Aha do na mangurupi ia ase totap martenger ni uhur janah marpangarapan?

18. Aha do na ibahen si Paulus sanggah marsitaronon ia?

¹⁸ (3) Manrimangi. Balosi ma sungkun-sungkun on. “Aha do na ibahen si Paulus ase totap ia martahan?” Age pe ibotoh ia na laho ibunuh mando ia, tapi totap do idingat ia aha do na sipontingan, ai ma pasangapkon goran ni Jahowa. Tongtong do ipingkirhon ia sonaha ia boi patoguhkon halak na legan. Anjaha totap do ia martonggo bani Jahowa. (2 Tim. 1:3) Lang sai ipingkiri ia hasomanni na manadingkonsi. Tapi bagas tumang do holongni hubani hasomanni na tongtong mangurupisi. Anjaha ringgas tumang do si Paulus marlajar Hata ni Naibata. (2 Tim. 3:16, 17; 4:13) Na sipontingan, porsaya tumang do ia holong do uhur ni Jahowa pakon Jesus hu bani. Lang ongga ia itadingkon, janah ibere do pasu-pasu hu bani halani totap ia setia mangidangi Jahowa.

19. Sonaha Jahowa mangurupi si Paulus?

¹⁹ Domma ipatugah Jahowa hinan hubani si Paulus na laho iparburu ma ia halani gabe halak Kristen. (Lah. 21:11-13) Sonaha ma Jahowa mangurupi si Paulus? Ibalosi Jahowa do tonggoni janah ipargogohi. (2 Tim. 4:17) Porsaya do si Paulus jaloonni do pasu-pasu anggo totap ia setia. Anjaha ibere Jahowa do homa hasoman-hasoman na setia na boi patoguhkonsi.

20. Domu bani Rom 8:38, 39, sonaha hita boi maniru si Paulus?

²⁰ (4) Mandalankon. Rimangi ma sungkun-sungkun on, ‘Sonaha ahu boi maniru si Paulus?’ Songon si Paulus ibotoh hita do homa na laho iparburu do hita halani haporsayaonta. (Mrk. 10:29, 30) Tapi ase boi hita totap toguh age pe dong sitaronon, maningon tongtong do hita martonggo bani Jahowa, janah ringgas marlajar Bibel. Tongtong ma idingat hita aha na sipontingan, ai ma laho pasangapkon goran ni Jahowa. Porsaya ma hita lang ongga itadingkon Jahowa hita. Janah lang adong age aha na boi mambahen hita sirang humbani holong ni Naibata.​—Basa Rom 8:38, 39; Heb. 13:5, 6.

21. Aha do na mangurupi si Aya pakon si Hector laho mangatasi tantangan ni sidea?

²¹ Sonaha pe situasinta boi do hita totap margogoh anggo marlajar hita humbani contoh-contoh na dong ibagas Bibel. Umpamani si Aya sahalak perintis na tading i Jepang, gabe barani do ia manjaga gerai dobkonsi iparlajari  ia pasal si Jona. Dong homa si Hector anak remaja hun Indonesia na marlajar pasal si Rut. Dob iparlajari ia pasal ai, gabe tarojur ma uhurni ase totap mangidangi Jahowa age pe namatorasni lang Saksi Jahowa.

22. Sonaha carani ase dapot hita parlajaran na bagas humbani drama Bibel atap seri artikel “Tirulah Iman Mereka”?

²² Sonaha ma carani ase boi ibotoh nasiam contoh ibagas Bibel na sosok pakon situasimu? Sarita ai boi itonggor nasiam bani drama Bibel, drama audio, pakon seri artikel “Tirulah Iman Mereka”. * Dear tumang ipersiapkon bahan-bahan ai janah on boi mangurupi hita ase lambin urah mambayangkon saritani. Jadi, paima itonton atap ibasa nasiam ai, pindo ma bani Jahowa ase iurupi nasiam mandapot parlajaran humbani sarita ai. Bayangkon ma anggo nasiam na gabe tokoh utama ibagas sarita ai. Rimangi ma aha na ibahen tokoh ai, janah sonaha Jahowa mangurupi sidea sanggah ibagas sitaronon. Dobkonsi ai, dalankon ma aha na iparlajari nasiam. Martarima kasih ma bani Jahowa na sirsir mangurupi hita. Anggo ihargai nasiam ganupan ai, gunahon ma ai laho mangurupi ampa patoguhkon halak na legan.

23. Domu bani Jesaya 41:10, 13, aha do janji ni Jahowa hubanta?

²³ Halani hita manggoluh bani panorang parpudi, sai lambin sunsah do hagoluhanta. Janah sipata lang ibotoh hita aha na laho sibahenonta. (2 Tim. 3:1) Hassi pe sonai, ulang ma hita lalab holsohan atap pe mabiar. Ibotoh Jahowa do sitaronon aha na masa hubanta. Marjanji do Ia tongtong do ijolom Ia hita marhitei tangan siamun-Ni. (Basa Jesaya 41:10, 13.) Pos ma uhurta sai urupan ni Jahowa do hita. Jadi anggo dear iparlajari hita Bibel, lang soal sitaronon aha pe na masa hubanta totap do hita boi margogoh.